প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা এন.এক্স.তি. সম্মিৎতা ৱা ঙাংখ্রে
ঐখোয়গী পান্দম অমত্তনি, লমথুংফম অমত্তনি, মদুদি ‘বিক্সিত ভারত’নি: প্রধান মন্ত্রী
মালেমগী ওইবা লাংফম কয়া লৈজরবসু, মালেমগী লুচিংবশিং অমসুং অখঙ অহৈশিংনা ভারতপু চাউনা থাজবা অমগা লোইননা য়েংলি: প্রধান মন্ত্রী
নহাক্না তুংলমচৎকী শরুক অমা ওইনিংলবদি, নহাক ভারত্তা লৈবা তাই: প্রধান মন্ত্রী
ভারতনা মাঙদা চঙশিনবখক্তা নত্তে; ভারতনা মথংগী থাক তম্না চঙশিল্লি: প্রধান মন্ত্রী
ভারতনা মাগী লৌমীশিং অমসুং মীয়ামবু মালেমগী ওইবা শিংনবশিংগী পোৎলুমদগী ঙাকথোক্নবা হোৎনবা য়াবা খুদিংমক হোৎনগনি: প্রধান মন্ত্রী
থাগৎখিবা:
12 MAR 2026 10:02PM by PIB Imphal
প্রধান মন্ত্রীনা ঙসি আই.তি.ভি. নেতৱর্ক্কী এন.এক্স.তি. সম্মিৎতা ৱা ঙাংদুনা, দন্দি খোঙচৎকী পুৱারী ওইরবা কুমওন পাঙথোক্লদুনা ভারতকী নীংতম লান থেংনখিবা অমসুং হৌজিক চাউখৎলবা লৈবাক অমা ওইনবা তাল্লিবা খোঙচৎ অনিগী মরক্তা মান্নবা শক্তম অমা উৎখি। ১৯৩০ গী খোঙচৎ অদুনা লৈবাক অসিবু নীংতম্বা ফংনবগীদমক অমত্তা ওইনা পুনশিনখিবা অদুগুম্না, হৌজিক চাউখৎপা ভারত নত্রগা ‘বিক্সিত ভারত’কী মিসন অসিসু ভারতকী মীওই করোর ১৪০ গী অপুনবা পান্দমনি হায়না শ্রী মোদীনা ফোঙদোকখি। “পুৱারী ওইরবা খোঙচৎ অদু থোকখিবদগী চাউরাক্না চহি ১০০ রোমগী মতুংদা, ঙসি ঐখোয় ভারত মচাশিংনা অমুক হন্না ‘বিক্সিত ভারত’ (চাউখৎপা ভারত) অমগীদমক অনৌবা খোঙচৎ অমা হৌরে,” হায়না প্রধান মন্ত্রীনা ফোঙদোকখি।
২১শুবা চহীচাগী তোঙান-তোঙানবা শিংনবশিংগী মতাংদা নৌহৌননা নিংশিংলদুনা, প্রধান মন্ত্রীনা হায়খি মদুদি মালেমগী ওইবা লান অমসুং সপ্লাই চেনশিং শোকচিল্লবসু ভারত অসি থাজবা অমসুং তুংদু লৈতাবগী মঙাল অমা ওইরক্লি। মালেমগী মকোক থোংবা লুচিংবশিং অমসুং অখঙ অহৈশিংনা হৌজিক ভারতপু অনৌবা মালেমগী মওং-মতৌ শেম্বদা মরুওইবা লমজিংবনি হায়না লৌনরিবা অসি প্রধান মন্ত্রীনা ময়েক শেংনা ফোঙদোকখি। মহাক্না মখা তানা হায়খি মদুদি হন্দক ফিনলেন্দগী রাস্ত্রপতি অলেকজেন্দর স্তবনা ভারত্তা লাকপদা হায়খি মদুদি মালেমগী চৎন-পথাপ অসি হৌজিক্তি গ্লোবেল সাউথনা লেপকনি। প্রধান মন্ত্রী মোদীনা মখা তানা হায়খি মদুদি কানাদাগী মার্ক কার্নীনা ভারতপু তুংগী চহি ৩০ অসিদা মালেমগী শেল-থুমগী ইথিল লাকফম ওইরগনি হায়না শকখঙখ্রে, অমদি ফ্রান্সকী রাস্ত্রপতি মেক্রোননসু ভারতপু মালেমগী শিংনবশিং লোইশিনবদা অঙম্বা মতেং পাংবা খোঙলোয় অমা ওইনা উরি। শ্রী মোদীনা মখা তানা হায়খি, "নহাক্না তুংলমচৎকী শরুক অমা ওইনিংলবদি, নহাক ভারতকা মরী লৈনবা তাই অমসুং ভারত্তা লৈবা তাই।" ভারত মচাশিংগী মরক্তা লৈরিবা হান্না পানরুদবা মশাবু থাজবা অমসুং অপাম্বগী মতাংদা প্রধান মন্ত্রীনা ৱা ঙাংলদুনা মহাক্না মীয়াম্না লৈবাক্কী চাউখৎ-থৌরাংদা পাম্নরিবা অসি ভারত মচাশিংনা ক্রিকেট পাম্নবগা চাংদম্নখি। লৈবাক অসিনা মমাঙদা ওইথোক্লোয় হায়না লৌনরম্বা দিজিতেল পেমেন্ত অমসুং অচৌবা রিফোর্মগী থবকশিং অসি হৌজিক্তি "মথংগী থাক" ‘অসিদা চঙশিনবা ঙমখ্রে হায়না মহাক্না ফোঙদোকখি। শ্রী মোদীনা হায়খি, "ভারতনা মাঙদা চঙশিনবখক্তা নত্তে; ভারতনা মথংগী থাক অসিদা চঙশিল্লি।"
ভারত মচাশিংনা ক্রিকেটপু পাম্নবা অমসুং লৈবাক অসিগী চাউখৎ-থৌরাংগী ৱারোলদা মীয়াম্না মিৎয়েং থম্লিবা অসিগী মরক্তা প্রধান মন্ত্রীনা ময়েক শেংনা চাংদম্নরদুনা ভারত মচাশিংনা তি-২০ ৱর্ল্দ কাপকী স্কোর খোঙ্গুল লিবগুম, হৌজিক লৈবাক অসিগী শেল-থুমগী ফিভমগী মতাংদসু "রানিং কমেন্তরী" ফংনবা হোৎনরি। মসিগুম্বা হান্না খন্নরুদবা চাঙদা খঙনিংবগী ইথিল পোক্লিবা অসিনা ভারত মচাশিংগী মরক্তা চাউখৎনিংবগী অপাম্বা অমসুং মশানা মশাবু থাজজবগী শক্তম অমা উৎলি, অমসুং মসিদগী মালেম পুম্বনা ভারতপু থাজবা হৌনরিবনি হায়না প্রধান মন্ত্রী মোদীনা ফোঙদোকখি। মালেম পুম্বগী মীৎয়েংনা ভারতকী চাউখৎপদা লৈরিবা অসিগা লোয়ননা, খোঙচৎ অসি লেপ্তনা চঙশিনবগী অপুনবা থৌদাং অসি মীয়াম খুদিংমক্কী ওইনা হেনগৎলক্লে হায়না শ্রী মোদীনা ফোঙদোকখি। "মসিগুম্বা চাউরবা থাজবা কয়া অমা ঐখোয়গা মরী লৈনরকপা অমসুং মালেম পুম্বনা ঐখোয়গী লৈবাক অসিদা মীৎয়েং চঙলকপা মতমদা, ঐখোয়গী থৌদাং অসি মশক থোক্না হেনগৎলে," হায়না প্রধান মন্ত্রীনা ফোঙদোকখি।
প্রধান মন্ত্রীনা মিৎয়েং থমখি মদুদি অনৌবা ভারত অসি চাউখৎপখক নত্তনা মালেমগী থাক্তা ফিজিকল অমসুং দিজিতেলগী লন-থুমশিং শেমগৎলদুনা মশাবু "মথংগী থাক" অসিদা এক্তিব ওইনা চঙশিল্লি। প্রধান মন্ত্রীনা হায়খি মদুদি য়ুনিফায়দ পেমেন্তস ইন্তরফেস (UPI) গী অথুবা অওনবা অসিনা লৈবাক অসিগী শেল-থুমগী লম অসি অনৌবা তাঙ্কক অমদা পুরক্লে, মসিদগী ভারত অসি মালেমদা রিয়েল-তাইম দিজিতেল পেমেন্ত তৌবদা খ্বায়দগী মাংজিল থারিবা লৈবাক অমা ওইরে। ইনফ্রাস্ত্রকচরগী অওনবা অসিনা হেন্না মরী লৈনবা অমসুং হেন্না কান্নবা শেল-থুমগী ফিভম অমা শেম্বদা মতেং পাংলি। "ঙসিদি, ভারত অসি মালেমদা খ্বায়দগী অথুবা রিয়েল-তাইম দিজিতেল পেমেন্ত তৌবা লৈবাক ওইরে," হায়না শ্রী মোদীনা ফোঙদোকখি।
প্রধান মন্ত্রীনা হয়খি মদুদি ভারত অসি হৌজিক "মথংগী-মীরোলগী রিফোর্মশিং" গী খোঙজেল য়াঙবা লম্বী অমদা চৎলি, অমসুং মমাংদা ওইথোকপা য়াদবনি হায়না লৌনরম্বা ফিরেপশিং মপুং ফানা পাঙথোকপা ঙম্লে। প্রধান মন্ত্রীনা মরুওইবা মায় পাকপশিং হায়বদি আর্তীকল ৩৭০ লৌথোকপা, জন ধন একাউন্তগী খুৎথাংদা মীয়াম করোর ৫০ হেন্না বেঙ্কিং সিস্তেমগী মনুংদা চঙহনবা, অমসুং বিধান সভা অমসুং সংসদতা নুপীশিংগীদমক ৩৩% রিজার্বেসন পীবগী আইন চৎনহনবগী মতাংদা ময়েক শেংনা ফোঙদোকখি। শ্রী মোদীনা মখা তানা হায়খি মদুদি ভারতনা স্পেস, সেমিকন্দক্তর অমসুং ক্বান্তম কম্প্যুতিংগী অখন্নবা মিসনশিংগী খুত্থাঙদা তেক্নোলোজীগী অনৌবা থাকশিংদা চঙশিন্দুনা মমাংদা লৈরম্বা পল পুম্নমক থুগাইরে। "ঙসিদি মুন মিসন, সেমিকন্দক্তর মিসন, অমসুং ক্বান্তম মিসননা ভারতপু তেক্নোলোজীগী মথংগী অনৌবা পনখৈদা পুরক্লি," হায়না প্রধান মন্ত্রীনা ফোঙদোকখি।
প্রধান মন্ত্রীনা ফোঙদোকখি মদুদি লৈবাক অসিনা অপাম্বা ফোঙদোকপখক নত্তনা থবক্তা ওন্থোকপা অমসুং পান্দমশিং ফংনবগী তাঙ্কক অসিদা চঙশিল্লি। প্রধান মন্ত্রীনা হায়খি মদুদি মালেমগী কাঙলুপশিংনসু খোঙজেলগী অওনবা অসি শকখঙলে, অমসুং ভারতকী চাউখৎপসি তপ্না তপ্না লাকপা নত্তনা মপুং ফানা অওনবা পুরকপা মওং অমনি হায়না লৌনরে। অনৌবা অসিগুম্বা লৈবাকসিগী ফীভম অসিনা উৎলি মদুদি কুইনা মঙলক্লিবা মঙলানশিং অদু হৌজিক্তি সেক্তর খুদিংমক্তা থবক্তা ওন্থোকপা ঙম্লে। "ভারতনা চাউখৎপখক নত্তে; ভারতনা মথংগী থাক অসিদা চঙশিল্লি," হায়না শ্রী মোদীনা ফোঙদোকখি।
প্রধান মন্ত্রীনা হায়খি মদুদি লৈবাক অমগী চাউখৎপগী মশক অসি মালেমদা খঙহৌদনা থোক্লকপা অওনবশিংগী মায়কৈদা লৈবা অচেৎপা মথৌনা অসিনা লেপ্পনি, অমসুং মহাক্না মসিগীদমক চাউরবা লাইচৎ অমসুং মখা তানা মপাান্দা চত্থরিবা লানশিংগী শিংনবশিং অসি পনখি। প্রধান মন্ত্রীনা হায়খি মদুদি হৌজিক নক্নবা মফমদা চত্থরিবা লান অসিনা মালেম পুম্বদা ইনর্জীগী অৱাবা অমা থোকহল্লে, মসি লৈবাক অমগী লৈরিবা মতিক ময়াইশিং চাংয়েং তৌনবগী অখন্নবা তানফম অমনি মসিদা ইং-তপ্পা, খাঙবা কনবা অমসুং মীয়ামগী মরক্তা খঙ-হৈবগী ইথিল হেনগৎহনবা মথৌ তাই। রাজনিতি দলশিং, মেদিয়া অমসুং ইন্দস্ত্রীশিংগী অপুনবা থৌদাংগী মতাংদা মীৎয়েং থম্লদুনা, প্রধান মন্ত্রীনা নিংশিংখি মদুদি লাইচৎকী মতমদা অমত্তা ওইনা থবক তৌমিন্নখিবা অসিনা ভারতকী শক্তি অসি শরুক কয়া হেনগৎহনখি অমসুং হৌজিক লৈরিবা শিংনবশিং অসি মায়োক্ননদুনা অসিগুম্বা অমত্তা ওইবগী থৌনা অদু অমুক হন্না ময়েক শেংহন্নবা পাউজেল পীখি। "ঐখোয়না লৈবাক্কী খ্বায়দগী মরুওইবা ইন্তরেস্ত অদু খন্দুনা অপুনবা ওইনা হোৎনবা অমসুং ঐখোয়গী থৌদাংশিং পাঙথোকপা তাই," হায়না শ্রী মোদীনা ফোঙদোকখি।
প্রধান মন্ত্রীনা এল.পি.জি.গী মতাংদা খন্ন-নৈনরিবশিংগী মতাংদা মহাক্কী ৱারোল ফোঙদোকখি। প্রধান মন্ত্রীনা মালেমগী ওইরিবা ফীভম অসিদা অরানবা পাউশিংগী মহুত্তা অচুম্বা ৱাফমশিংদা হেন্না মীৎয়েং থমদুনা থৌদাং লৌবা ৱারি-ৱাতায় শাননবা তকশিনখি।
প্রধান মন্ত্রীনা হায়খি মদুদি হৌজিক মালেমদা চত্থরিবা লান অসিগী অৱাবা চৈথেঙশিংনা লৈবাক খুদিংমক্তা শোকহল্লে, মসিগীদমক ভারত লৈঙাক্না তোঙান-তোঙানবা থাকশিংদা মাংজিল থাবা থৌরাং অমসুং পাউখুম পীবগী মথৌ তাই। প্রধান মন্ত্রী মোদীনা ফোঙদোকখি মদুদি মালেমগী অৱাবা অসিগী লোইশিনফম অমসুং অচেৎপা পাম্বৈশিং থীনবা মহাক্না মালেমগী মকোক থোংবা লুচিংবশিংগা লেপ্তনা ৱারী শানরি। মখা তানা, প্রধান মন্ত্রীনা মিৎয়েং থমখি মদুদি মালেমগী সপ্লাই চেন মনুংদা থোরক্লিবা তোঙান-তোঙানবা অপনবশিং অদু কোকহন্নবা লৈঙাক্না লেপ্তনা থবক তৌরি। "সপ্লাই চেনদা থোক্লিবা অপনবশিং অসি ঐখোয়না করম্না মায়োক্নবা ঙমগনি হায়বদু লেপ্পা লৈতনা হোৎনরি," হায়না শ্রী মোদীনা ফোঙদোকখি।
প্রধান মন্ত্রীনা ভারতকী ইনর্জী সেক্যুরিতীগীদমক খোঙথাং অনিমক পুন্না চঙশিনবগী থৌরাং অমা ময়েক শেংনা ফোঙদোকখি, মসিদা লৈবাক অসিগী ইনফ্রাস্ত্রকচর চাউখৎহনবা অমসুং লৈবাক অসি অথুবা খোঙজেলদা চাউখৎহন্নবগীদমক মপান লৈবাকশিংদা তাংবা হন্থহনবদা মিৎয়েং থমখি। প্রধান মন্ত্রী মোদীনা গ্যাস সেক্তরগী চাউখৎপগী চাংদম্নবা অমা পীরদুনা হায়খি মদুদি ২০১৪ দা এল.পি.জি. কনেক্সন করোর ১৪ লৈরম্বদগী হৌজিক্তি চাউরাক্না করোর ৩৩ রোম হেনগৎলে, মসিনা ভারতকী ইমুং অয়াম্বা কোনশিনবা ঙমলে। শ্রী মোদীনা হায়খি মদুদি মসিগুম্বা চাউরবা হেনগৎলকপা অসি বোতলিং কেপাসিতী চাউনা হেনগৎহনবা, এল.এন.জি. তর্মিনলশিং শরুক অনি হেনগৎহনবা অমসুং গ্যাস পাইপলাইন নেতৱর্ক অসি কিলোমিতর ৩,৫০০ দগী কিলোমিতর ১০,০০০ রোমদা শাংদোকখিবনা মতেং ওইখিবনি। প্রধান মন্ত্রীনা মখা তানা হায়খি মদুদি সপ্লাই চেন অসি হেন্না চেৎশিনহন্নবা, মপান লৈবাকশিংদগী পুশিল্লক্লিবা এল.পি.জি.গী চাদা ৬০ পানবা ঙম্নবগীদমক লৈঙাক্না মরুওইবা হিথাংফমশিংদা ইমপোর্ত তর্মিনল কেপাসিতীশিং চাউনা হেনগৎহনখ্রে। “ভারতকী অথুবা চাউখৎ-থৌরাংগীদমক, তোঙান-তোঙানবা ইনর্জী সোর্সশিং হেনগৎহনবা অমসুং ইনর্জী সেক্তরদা মরোমদোম লেপচবা ঙম্নবা লেপ্তনা মীৎয়েং থম্বা অসি মথৌ তাবা অমনি,” হায়না শ্রী মোদীনা ফোঙদোকখি।
প্রধান মন্ত্রীনা শহরগী ইনর্জীগী অওনবা অসিগী চাউরবা থাক অদু মিৎয়েং থম্লদুনা পাউদমখি মদুদি পাইপ নেচরেল গ্যাস (PNG) অসি ২০১৪ গী মমাংদা শুপ্নগী ইমুং লাখ ২৫–২৬ খক্তমক ওইরম্বদগী হৌজিক্তি করোর ১.২৫ হেন্না য়ৌহনবা ঙমলে। প্রধান মন্ত্রী মোদীনা মখা তানা গ্রীন মোবিলিতীদা লাক্লিবা চাউরবা অওনবা অসি পাউদম্লদুনা হায়খি মদুদি সি.এন.জি.না চৎপা গারীশিংগী মশিং অসি লাখ ১০ দগী হৌজিক্তি লাখ ৭০ হেন্না হেনগৎলে। মদুদি মসিগুম্বা চাউখৎপসি হৌখিবা চহি তরা অসিদা লৈবাক অসিগী দিস্ত্রিক ৬০০ হেনবদা সিতী গ্যাস দিস্ত্রিব্যুসন নেতৱর্কশিং লিংখৎপগী মহৈনি। “মসি ওইথোকপা ঙম্লিবসি হৌখিবা চহি তরা অসিদা লৈবাক অসিগী দিস্ত্রিক ৬০০ হেনবদা সিতী গ্যাস দিস্ত্রিব্যুসন নেতৱার্কশিং লিংখৎলকপনিনি,” হায়না শ্রী মোদীনা ফোঙদোকখি।
প্রধান মন্ত্রীনা হায়খি মদুদি হৌজিক মালেমদা লৈরিবা তংদু-লৈতাদবা ফীভম অসিনা মরুওইবা সেক্তরশিংদা লৈবাক অসি মপুং ফানা মরোমদোম লেপচবা ঙম্নবগী মরুওইবা অদু অমুক হন্না নিংশিংহল্লে। ভারতকী ইনর্জী সেক্যুরিতী অসি হেন্না চেৎশিনহন্নবা অমসুং মপান লৈবাকশিংগী ইথিলদগী ঙাকথোক্নবা লৈঙাক্না হৌখিবা চহি কয়া অসিদা পুম্নমক পুনশিনবা পাম্বৈ অমা পায়খৎলে। মসিগুম্বা পুম্নমক কোনশিনবা থৌরাং অসিগী পান্দমদি মালেমগী খঙহৌদনা লাকপা অওনবশিংনা লৈবাক অসিগী চাউখৎ-থৌরাংদা অকায়বা পীহন্দনবনি। “মালেমগী ওইবা অৱাবা অসিনা লৈবাক অমগী ওইনা মরোমদোম লেপচবা ঙম্বা অসি করিগরীদমক মথৌ তারিবনো হায়বদু অমুক হন্না উৎলে,” হায়না শ্রী মোদীনা ফোঙদোকখি।
প্রধান মন্ত্রীনা পেত্রোলিয়মগী মপাল তাংবা হন্থহন্নবগীদমক ইথানোল অমসুং বাইওফুয়েলদা লৈঙাক্না থম্লিবা অখন্নবা মীৎয়েং অদু ময়েক শেংনা ফোঙদোকখি। মহাক্না হায়খি মদুদি পেত্রোলদা ইথানোল য়ানশিনবগী চাং অসি ২০১৪ গী মমাংদা চাউরাক্না চাদা ১–১.৫ খক্তমক ওইরম্বদগী হৌজিক্তি চাদা ২০ লোম য়ৌহনবা ঙমলে। থৌরাং অসিনা মরম ওইদুনা হৌখিবা চহি ১১ অসিদা থাউ বেরেল করোর ১৮ হেন্না লৈবগী মথৌ তাদ্রে, মসিদগী লৈবাক অসিগী রিজর্ভ অসি হেন্না চেৎশিনহনবদা মতেং ওইরে। হৌজিক লৈরিবা অওনবা অসিনা মরম ওইদুনা ভারতনা চহি খুদিংগী থাউ ইমপোর্ত তৌবদা বেরেল করোর ৪.৫ রোম হন্থহনবা ঙম্লে, মসিদগী লৈবাক অসিগী শেল-থুমগী ফিভমদা চাউরবা কান্নবা অমা পুরক্লে। “ইথানোল ব্লেন্দিং খক্তদগী লৈবাক অসিনা চাউরাক্না লুপা লাখ করোর অমগা তঙ্খাই (১.৫ লাখ করোর) রোম কনবা ঙমলে,” হায়না শ্রী মোদীনা ফোঙদোকখি।
প্রধান মন্ত্রীনা রেলৱে ইলেক্ত্রিফিকেসন অমসুং রিনিউএবল ইনর্জীনা লৈবাক অসিগী থাউ তুংশিনবদা পুরক্লিবা অওনবা অদুগী মতাংদা মিৎয়েং থমখি। মহাক্না হায়খি মদুদি ২০১৪ ফাওবদা রেল নেতৱর্ক্কী চাদা ২০ খক্তমক ইলেক্ত্রিফিকেসন তৌরম্লবসু, ঙসিদি ব্রোদ-গেজ নেতৱর্ক্কী চাউরাক্না চাদা ১০০ ইলেক্ত্রিফিকেসন তৌরে। মসিগী মায় পাকপা অসিনা ২০২৪-২৫ অসিদা ইন্দিয়ন রেলৱেজকী দিজল লিতর করোর ১৮০ রোম তুংশিনবা ঙমহনখি, মসিদগী মপান লৈবাক্তগী ক্রুদ ওইল পুশিল্লকপা চাউনা হন্থহনখি। গ্রীন ইনর্জীগী অওনবগী মতাংদা মখা তানা পাউদম্লদুনা, প্রধান মন্ত্রীনা হায়খি মদুদি ভারতকী রিনিউএবল কেপাসিতী অসি পুৱারী ওইবা মওংদা ২৫০ GW য়ৌরে, মসিদা সোলার পাৱার কেপাসিতী অসি ২০১৪ দা ২ GW খক্তমক ওইরম্বদগী হৌজিক ১৩০ GW দা হেনগৎলে। মহাক্না পি.এম. সুর্য ঘর মুফ্ত বিজলী য়োজনাগী মায় পাকপগী মতাংদসু পনখি, মসিগী খুৎথাংদা ইমুং লাখ ৩০ না মখোয়গী য়ুমথক্তা সোলার পেনেল থমদুনা ময়ুমগী মথৌ তাবা ইনর্জী অদু মৈদা ওন্থোকপা ঙমলে। “ঙসি ঐখোয়গী অপুনবা রিনিউএবল কেপাসিতীনা পুৱারী ওইবা মশিং ২৫০ গিগাৱাৎ হেনখ্রে অমসুং ঐখোয়গী অপুনবা মৈ পুথোকপগী কেপাসিতী অসিগী তঙ্খায় অসি রিনিউএবল সোর্সশিংদগী লাক্লি,” হায়না শ্রী মোদীনা ফোঙদোকখি।
প্রধান মন্ত্রীনা কেপাসিতী বিল্দিং অমসুং ৱেস্ত-তু-ইনর্জী থৌরাংশিংদা লৈঙাক্না কন্না হোৎনরিবা অসিগী মতাংদা ময়েক শেংনা পাউদমখি। মহাক্না হায়খি মদুদি গোবর্ধন স্কিমগী মখাদা হৌজিক কম্প্রেসদ বাইও-গ্যাস প্লান্ত ১০০ হেন্না থবক তৌবা হৌরে অমসুং অতোপ্পা ৬০০ মখা তানা শেমগৎলক্লি। লৈবাক অসিগী সেক্যুরিতীদা চাউরবা অওনবা অমা পুরক্লদুনা লাখ তন ৫০ হেনবগী স্ত্রেতেজিক পেত্রোলিয়ম রিজর্ভ অমা শেমগৎলে, মসি ২০১৪গী মমাংদা লৈরমবা চাউরাক্না অমত্তা লৈতবা স্তোরেজ কেপাসিতী অদুগা চাংদম্নবদা চাউরবা খুমাং চাউশিনবনি। মখা তানা, প্রধান মন্ত্রীনা পনখি মদুদি হৌখিবা চহি তরা অসিদা চহি খুদিংগী রিফাইনিং কেপাসিতী তন মিলিয়ন ৪০ হেন্না হেনগৎহনখিবা অসিনা ভারতপু মালেমগী রিফাইনিং হব অমা ওইহনবা ঙমহনখিবনি। প্রধান মন্ত্রী মোদীনা থাজবা ফোঙদোকখি মদুদি মসিগুম্বা ইনর্জীগী চেৎপা ইনফ্রাস্ত্রকচর অসিনা লৈবাক অসিবু মালেমগী ওইবা ইনর্জীগী শিংনবশিং মায়োকনবা ঙমহনগনি। “লান অসিনা পুরক্লিবা অৱাবা অসি ঐখোয়না শোয়দনা মায়োক্নবা ঙমগনি অমসুং ভারতপু চাউনা মরোমদোম লেপচবা ঙমহন্নবা ঐখোয়গী থবকশিং অসি মখা তানা চত্থগনি,” হায়না শ্রী মোদীনা ফোঙদোকখি।
প্রধান মন্ত্রীনা হৌজিক মালেমদা লৈরিবা তংদু-লৈতাদবা ফীভম অসি মায়োক্নবদা ভারতকী মীয়াম করোর ১৪০ গী অপুনবা শক্তিদা মহাক্কী চাউরবা থাজবা লৈ হায়না ফোঙদোকখি। লাইচৎকী মতমদা লৈবাক অসিনা অমত্তা ওইনা পাউখুম পীখিবা অদু নিংশিংলদুনা, প্রধান মন্ত্রী মোদীনা হায়খি মদুদি মসিগুম্বা শেম-শাবা অমসুং অচেৎপা থৌনা অসিনা লৈবাক অসিনা মালেমগী ওইবা অৱাবা অসিদগী শোয়দনা নান্থোকপা ঙমহনগনি। লৈবাক অসিগী চাউখৎ-থৌরাং ঙাকথোক্নবা মহাক্কী লৈঙাক্না লেপ্তনা মীয়ামগী থৌগল তৌনবা অমসুং মাংজিল থাবা থৌরাংশিং লৌখৎনবা ফিরেপ অদু প্রধান মন্ত্রীনা অমুক হন্না ফোঙদোকখি। “ঐখোয়গী ফিরেপ খুদিংমক্তা, মীয়ামগী কান্নবা অসি খ্বায়দগী মাঙজিল থাবা ওইগনি,” হায়না শ্রী মোদীনা ফোঙদোকখি।
প্রধান মন্ত্রীনা হায়খি মদুদি মালেমগী কৈথেল অমসুং মীয়াম্না মালেমগী ওইবা লানশিংগী চৈথেঙ ফাওরিবা অসিগুম্না, ভারত লৈঙাক্নদি মহাক্কী মীয়ামবু মপান লৈবাকশিংদগী লাকপা শাফুশিং অসিদগী ঙাকথোক্নবা লেপ্তনা থবক হোৎনদুনা লাক্লি। প্রধান মন্ত্রী মোদীনা রসিয়া-য়ুক্রেনগী অৱাবা অদু খুদম ওইনা পীরদুনা হায়খি মদুদি মদু মতম অদুদা লৈঙাক্না মথৌ তাবা পোৎলমশিংদা চাউনা সবসিদী পীদুনা লৈবাক অসিগী মনুংদা পোৎলমশিংগী মমল হেনগৎহনখিদে। মালেমগী কৈথেলদা য়ুরিয়া বেগ অমদা লুপা ৩০০০ য়ৌখিবা মতমদসু, লৈঙাক্না লৌউ-শিংউবগী লমদা তংদু-লৈতাবা লৈহন্নবগীদমক লৌমীশিংদা লুপা ৩০০ গী মমলদা ফংহনখি। “হৌজিক্কী তাঞ্জা অসিদসু, লান অসিনা লৈবাক অসিগী লৌমীশিং অমসুং মীয়ামগী পুন্সিদা খ্বায়দগী হন্থবা চৈথেঙ ফাওহন্নবা ঐখোয়না অঙম্বা থাক্তা হোৎনগনি,” হায়না শ্রী মোদীনা ফোঙদোকখি।
প্রধান মন্ত্রীনা হৌজিক মালেমগী ওইরিবা ফীভম অসিদা স্তেত লৈঙাকশিংনা হেন্না চেকশিন্না লৈনবা অমসুং পুন্না থবক তৌমিন্ননবা তকশিনখি। প্রধান মন্ত্রী মোদীনা হায়খি মদুদি অরানবা পাউশিং শন্দোকপা থিংবা অমসুং কাঙলোন কায়বা ললোন-ইতিক্কী চৎন-পথাপশিং থিংবা অসি খুন্নাই অমসুং শেল-থুমগী ফীভম তুংদু লৈতাবদা য়াম্না মরুওই। প্রধান মন্ত্রীনা লোকেল ওথোরিতীশিংদা কৈথেলগী ফীভম নীংথিনা অমসুং অচেৎপা মওংদা য়েংশিন্দুনা মীয়াম্বু করিগুম্বা মরম লৈতনা পোৎ-চৈ ফংহন্দবা নত্রগা মমল খঙহৌদনা হেনগৎহনবদগী ঙাকথোক্নবা হায়খি। “ফীভম অসিদা অচেৎপা মওংদা মীৎয়েং থম্বা অমসুং কনাগুম্বা ব্লেক মার্কেতিং তৌবা লৈনরবদি মখোয়গী মায়োক্তা অচেৎপা খোঙথাং লৌখৎপা অসি য়াম্না মথৌ তাই,” হায়না শ্রী মোদীনা ফোঙদোকখি।
প্রধান মন্ত্রীনা মীৎয়েং থমখি মদুদি হৌখিবা চহি তরা অসি মমাংগী লৈঙাকশিংনা খঙবীদনা থম্লমবা লমদমশিং অমসুং কাঙলুপশিংদা অহানবা ওইনা মিৎয়েং থমদুনা হেন্না মীনুংশিং লৈবা লৈঙাক অমা পুরকপগী মতম ওইরে। প্রধান মন্ত্রী মোদীনা হায়খি মদুদি এস্পিরেসনেল দিস্ত্রিক্ত প্রোগ্রাম অমসুং পি.এম. জনমন গুম্বা অখন্নবা থৌরাংশিংগী খুৎথাংদা লৈবাক অসিগী খ্বায়দগী মনুং হঞ্জিনবা মফমশিংদা ময়ুম-মকৈ, হকশেল অমসুং মহৈ-মশিংগী মথৌ তাবা ইনফ্রাস্ত্রকচরশিং লৈাকক্না মায় পাক্না ফংহনবা ঙমলে। মখা তানা, প্রধান মন্ত্রীনা লৈবাক অসিগী মনুংগী ঙাকশেলগী ফিভমদা থোরক্লিবা চাউরবা অওনবা অদু পাউদম্লদুনা হায়খি মদুদি ২০১৩ দা মাওইস্ত তেররনা শোকহনখিবা দিস্ত্রিক ১৮০ হেনবগী মশিং অদু হৌজিক্তি সিঙ্গল দিজিৎ নত্রগা তরা মখাদা হন্থরক্লে। অওনবা অসিনা উৎলে মদুদি লৈবাক অসিনা অকি-অখংগী মহুৎ চাউখৎ-থৌরাং অমসুং পুম্নমক কোনশিনবা চাউখৎপনা ওন্থোক্নবা লেপ্লি। “ঙসিদি মাওইস্ত তেররনা শোকহনবা দিস্ত্রিকশিংগী মশিং অসি সিঙ্গল দিজিৎতা লৈরে,” হায়না শ্রী মোদীনা ফোঙদোকখি।
প্রধান মন্ত্রীনা হৌখিবা চহি অসিদা লৈবাক অসিগী মনুংগী ঙাকশেলগী লমদা ফংবা ঙমখিবা চাউরবা মায় পাকপশিং অদু ময়েক শেংনা ফোঙদোকখি। মহাক্না হায়খি মদুদি নক্সল ২১০০ হেন্না খুৎলায় থাদোক্লক্লে অমসুং অকনবা মিলিতেন্ত ৩০০ হেন্না মুত্থৎখ্রে, মসিদগী হান্না লানগী চৈথেঙ নংলম্বা মফমশিংদা চাউখৎ-থৌরাংগী অনৌবা ইথিল অমা লাক্লে। প্রধান মন্ত্রী মোদীনা হায়খি মদুদি ভারতকী চাউখৎপগী খোঙজেল অসি হৌজিক্তি থিংবা ঙম্লরোই, মসি করোর ১৪০ ওইবা মীয়ামগী "মথংগী থাক্কী" অপাম্বশিংনা শৌগৎলিবনি। মহাক্না মসি মীয়ামগী থাজবগী চাউরবা লন-থুম ওইনা উরি, পোৎলুম অমা ওইনা নত্তে। মহাক্কী ৱারোল লোইশিনবদা, মীয়ামগী থৌজালনা ইথিল ওইরদুনা মরোমদোম লেপচবা ঙম্বা অমসুং চাউখৎপা লৈবাক অমা ওইহন্নবা লৈবাক অসিগী মঙলান মপুং ফাহনবগী ফিরেপ অদু মহাক্না অমুক হন্না ফোঙদোকখি। “সেক্তর খুদিংমক্তা ভারত অসি মরোমদোম লেপচবা ঙম্বা ওইরগনি অমসুং ফিভম খুদিংমক্তা ভারত অসি চাউখৎপা লৈবাক অমা ওইরগনি,” হায়না শ্রী মোদীনা ফোঙদোকখি।
***
(রিলিজ আই.দি.: 2239799)
ভিজিতর কাউন্তর : 8