ಗೌರವಾನ್ವಿತ ಸದಸ್ಯರೇ,

ಸ್ವತಂತ್ರ ಭಾರತದ ಸಂಸದೀಯ ಇತಿಹಾಸದಲ್ಲಿ, ಕಳೆದ ಎರಡು ದಿನಗಳಿಂದ ಈ ಸದನವು ಲೋಕಸಭೆಯ ಅಧ್ಯಕ್ಷರ ವಿರುದ್ಧದ ಮೂರನೇ ಅವಿಶ್ವಾಸ ನಿರ್ಣಯದ ಕುರಿತು ಹನ್ನೆರಡು ಗಂಟೆಗಳಿಗೂ ಹೆಚ್ಚು ಕಾಲ ಚರ್ಚೆಯನ್ನು ನಡೆಸಿದೆ.

ವಿವಿಧ ಪಕ್ಷಗಳ ಗೌರವಾನ್ವಿತ ಸದಸ್ಯರು ತಮ್ಮ ಅಭಿಪ್ರಾಯಗಳು, ವಾದಗಳು ಮತ್ತು ಕಳವಳಗಳನ್ನು ಈ ಸದನದ ಮುಂದೆ ಮಂಡಿಸಿದ್ದಾರೆ. ವಿರೋಧ ಪಕ್ಷದ ಸದಸ್ಯರು ವಿರೋಧ ಪಕ್ಷದ ಧ್ವನಿಯನ್ನು ಹತ್ತಿಕ್ಕಲಾಗುತ್ತಿದೆ ಮತ್ತು ನಿಷ್ಪಕ್ಷಪಾತದ ಕೊರತೆಯಿದೆ ಎಂಬ ವಿಷಯಗಳನ್ನು ಪ್ರಸ್ತಾಪಿಸಿದ್ದಾರೆ. ಗೌರವಾನ್ವಿತ ಸದಸ್ಯರು ಪೀಠದ ನಿಷ್ಪಕ್ಷಪಾತತೆ, ಸದನದ ದಕ್ಷತೆ ಮತ್ತು ಭಾರತದ ಸಂಸತ್ತಿನ ಜಾಗತಿಕ ಸಾಧನೆಗಳ ಬಗ್ಗೆಯೂ ಮಾತನಾಡಿದ್ದಾರೆ. ಅದೇ ಸಮಯದಲ್ಲಿ, ಸದಸ್ಯರು ನಮ್ಮ ಸಂಸದೀಯ ಪ್ರಜಾಪ್ರಭುತ್ವದ ಸ್ವರೂಪವನ್ನು ವಿವರಿಸಿದ್ದಾರೆ ಮತ್ತು ಈ ಸದನದ ಘನವೆತ್ತ ಸಂಪ್ರದಾಯಗಳು, ನಿಯಮಗಳು ಮತ್ತು ಕಾರ್ಯವಿಧಾನಗಳ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ.

ಗೌರವಾನ್ವಿತ ಸದಸ್ಯರೇ,

ಈ ಸದನವು ಭಾರತದ 1.4 ಶತಕೋಟಿ ನಾಗರಿಕರ ಸಾರ್ವಭೌಮ ಇಚ್ಛೆಯನ್ನು ಪ್ರತಿನಿಧಿಸುತ್ತದೆ. ಇಲ್ಲಿ ಉಪಸ್ಥಿತರಿರುವ ಪ್ರತಿಯೊಬ್ಬ ಸದಸ್ಯರು ಲಕ್ಷಾಂತರ ನಾಗರಿಕರ ಆದೇಶವನ್ನು ತಮ್ಮೊಂದಿಗೆ ಹೊತ್ತು ತಂದಿದ್ದಾರೆ. ಪ್ರತಿ ಗೌರವಾನ್ವಿತ ಸದಸ್ಯರು ಜನರ ಸಮಸ್ಯೆಗಳು, ಕಷ್ಟಗಳು ಮತ್ತು ಸಂಕಷ್ಟಗಳಿಗೆ ಪರಿಹಾರ ಸಿಗುತ್ತದೆ ಎಂಬ ಭರವಸೆಯೊಂದಿಗೆ ಹಾಗೂ ಅವರ ಆಕಾಂಕ್ಷೆಗಳು, ನಿರೀಕ್ಷೆಗಳು ಮತ್ತು ಕನಸುಗಳು ನನಸಾಗುತ್ತವೆ ಎಂಬ ಆಶಯದೊಂದಿಗೆ ಇಲ್ಲಿಗೆ ಬಂದಿದ್ದಾರೆ.

ಪ್ರತಿಯೊಬ್ಬ ಗೌರವಾನ್ವಿತ ಸದಸ್ಯರು ಈ ಸದನದ ನಿಯಮಗಳು ಮತ್ತು ಕಾರ್ಯವಿಧಾನಗಳ ಚೌಕಟ್ಟಿನೊಳಗೆ ತಮ್ಮ ವಿಷಯಗಳು ಮತ್ತು ಸಮಸ್ಯೆಗಳ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಲು ಶಕ್ತರಾಗಬೇಕು ಮತ್ತು ಎಲ್ಲಾ ಸದಸ್ಯರಿಗೆ ಸಾಕಷ್ಟು ಅವಕಾಶಗಳು ಸಿಗಬೇಕು ಎಂಬುದನ್ನು ಖಚಿತಪಡಿಸಿಕೊಳ್ಳಲು ನಾನು ಯಾವಾಗಲೂ ಪ್ರಯತ್ನಿಸಿದ್ದೇನೆ. ಈ ಸದನವು ಸಮಾಜದ ಕೊನೆಯ ಸಾಲಿನಲ್ಲಿ ನಿಂತಿರುವವರ — ಇಂದು ನಮಗೆ ಯಾರ ಅಗತ್ಯ ಹೆಚ್ಚಿದೆಯೋ ಅಂತಹವರ ಧ್ವನಿಯಾಗಿ ಕಾರ್ಯನಿರ್ವಹಿಸಬೇಕು.

ಹೊಸಬರಾಗಿರುವ ಅಥವಾ ಮಾತನಾಡಲು ಹಿಂಜರಿಯುವ ಗೌರವಾನ್ವಿತ ಸದಸ್ಯರನ್ನು ಸದನದ ಕಲಾಪಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುವಂತೆ ಪ್ರೋತ್ಸಾಹಿಸಲು ನಾನು ಸತತವಾಗಿ ಪ್ರಯತ್ನಿಸಿದ್ದೇನೆ. ನನ್ನ ಎರಡೂ ಅವಧಿಗಳಲ್ಲಿ, ಸದನದಲ್ಲಿ ಎಂದಿಗೂ ಮಾತನಾಡದ ಎಲ್ಲಾ ಸದಸ್ಯರನ್ನು ತಮ್ಮ ಅಭಿಪ್ರಾಯಗಳನ್ನು ಮಂಡಿಸುವಂತೆ ನಾನು ವಿನಂತಿಸಿದ್ದೇನೆ. ಸದಸ್ಯರು ಈ ಸದನದಲ್ಲಿ ಮಾತನಾಡಿದಾಗ, ಪ್ರಜಾಪ್ರಭುತ್ವದ ಸಂಕಲ್ಪವು ಬಲಗೊಳ್ಳುತ್ತದೆ ಮತ್ತು ಸರ್ಕಾರದ ಹೊಣೆಗಾರಿಕೆಯು ಖಚಿತವಾಗುತ್ತದೆ.

ಈ ಸದನವು ಯಾವಾಗಲೂ ಆಲೋಚನೆಗಳು ಮತ್ತು ಚರ್ಚೆಗಳಿಗೆ ಒಂದು ರೋಮಾಂಚಕ ವೇದಿಕೆಯಾಗಿದೆ. ನಮ್ಮ ಸಂಸದೀಯ ಪ್ರಜಾಪ್ರಭುತ್ವದಲ್ಲಿ, ಒಮ್ಮತ ಮತ್ತು ಭಿನ್ನಾಭಿಪ್ರಾಯದ ಉದಾತ್ತ ಸಂಪ್ರದಾಯವು ಯಾವಾಗಲೂ ಅಸ್ತಿತ್ವದಲ್ಲಿದೆ.

ಗೌರವಾನ್ವಿತ ಸದಸ್ಯರೇ,

ನಮ್ಮ ಸಂವಿಧಾನ ಶಿಲ್ಪಿಗಳು ಸ್ವತಂತ್ರ ಭಾರತಕ್ಕಾಗಿ ಸಂವಿಧಾನವನ್ನು ರೂಪಿಸಿದಾಗ, ಆಳವಾದ ವಿವೇಚನೆ ಮತ್ತು ತಮ್ಮ ಅನುಭವವನ್ನು ಬಳಸಿಕೊಂಡು ಸಂಸದೀಯ ಪ್ರಜಾಪ್ರಭುತ್ವದ ವ್ಯವಸ್ಥೆಯನ್ನು ಅಳವಡಿಸಿಕೊಂಡರು. ಇಂದು, ಸಂಸದೀಯ ಪ್ರಜಾಪ್ರಭುತ್ವವನ್ನು ವಿಶ್ವದ ಅತ್ಯುತ್ತಮ ಆಡಳಿತ ವ್ಯವಸ್ಥೆಗಳಲ್ಲಿ ಒಂದೆಂದು ಪರಿಗಣಿಸಲಾಗಿದೆ.

ಈ ವ್ಯವಸ್ಥೆಯಡಿಯಲ್ಲಿ, ಸಂಸತ್ತು ಕೇವಲ ಶಾಸನ ರಚನೆಯ ವೇದಿಕೆಯಲ್ಲದೆ ರಾಷ್ಟ್ರದ ಪ್ರಜಾಪ್ರಭುತ್ವ ಪ್ರಜ್ಞೆಯ ಕೇಂದ್ರವೂ ಆಗಿದೆ.

ಭಾರತದ ಸಂವಿಧಾನದ 93ನೇ ವಿಧಿಯು ಅಧ್ಯಕ್ಷರ (ಸ್ಪೀಕರ್) ಆಯ್ಕೆಗೆ ಅವಕಾಶ ಕಲ್ಪಿಸುತ್ತದೆ. ಈ ಘನವೆತ್ತ ಸದನವು ಎರಡನೇ ಬಾರಿಗೆ ಅಧ್ಯಕ್ಷರ ಕಚೇರಿಯ ಜವಾಬ್ದಾರಿಗಳನ್ನು ನಿರ್ವಹಿಸಲು ನನಗೆ ಅವಕಾಶ ನೀಡಿದೆ.

ಸದನದ ಕಲಾಪಗಳನ್ನು ನಿಷ್ಪಕ್ಷಪಾತವಾಗಿ, ಶಿಸ್ತಿನಿಂದ, ಸಮತೋಲನದಿಂದ ಮತ್ತು ನಿಯಮಗಳನುಸಾರ ನಡೆಸಲು ನಾನು ಯಾವಾಗಲೂ ಪ್ರಯತ್ನಿಸಿದ್ದೇನೆ. ಎಲ್ಲರನ್ನೂ ಒಟ್ಟಿಗೆ ಕರೆದೊಯ್ಯುವ ಮೂಲಕ ಸದನದಲ್ಲಿ ಸಾಮರಸ್ಯ, ಸುವ್ಯವಸ್ಥೆ ಮತ್ತು ದಕ್ಷತೆಯನ್ನು ಕಾಪಾಡುವುದು ಸಭಾಧ್ಯಕ್ಷರ ಪ್ರಾಥಮಿಕ ಜವಾಬ್ದಾರಿಯಾಗಿದೆ.

ಸದನದ ಘನತೆ, ಸಭ್ಯತೆ ಮತ್ತು ಪ್ರತಿಷ್ಠೆ ಬೆಳೆಯುತ್ತಲೇ ಇರುವುದನ್ನು ಖಚಿತಪಡಿಸಿಕೊಳ್ಳುವುದು ನನ್ನ ನಿರಂತರ ಪ್ರಯತ್ನವಾಗಿದೆ.

ಮಂಗಳವಾರ, 10 ಫೆಬ್ರವರಿ 2026 ರಂದು, ವಿರೋಧ ಪಕ್ಷದ ಕೆಲವು ಗೌರವಾನ್ವಿತ ಸದಸ್ಯರು ಅವಿಶ್ವಾಸ ನಿರ್ಣಯದ ನೋಟಿಸ್ ಸಲ್ಲಿಸಿದರು. ನಮ್ಮ ಶ್ರೇಷ್ಠ ಸಂವಿಧಾನವು ಸ್ಥಾಪಿಸಿದ ಸಂಸದೀಯ ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ನನಗೆ ಅಚಲವಾದ ನಂಬಿಕೆಯಿದೆ. ನನ್ನ ನೈತಿಕ ಜವಾಬ್ದಾರಿಯನ್ನು ಪೂರೈಸುತ್ತಾ, ಅವಿಶ್ವಾಸ ನಿರ್ಣಯವನ್ನು ಮಂಡಿಸಿದ ತಕ್ಷಣವೇ ನಾನು ಸದನದ ಕಲಾಪಗಳಿಂದ ದೂರ ಸರಿದೆ.

ಕಳೆದ ಎರಡು ದಿನಗಳಲ್ಲಿ, ಈ ಸದನವು ಪ್ರಜಾಪ್ರಭುತ್ವದ ಪ್ರಮುಖ ಸಂಸದೀಯ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿದೆ. ಚರ್ಚೆಯ ಸಮಯದಲ್ಲಿ, ಹಲವಾರು ಅಭಿಪ್ರಾಯಗಳು, ದೃಷ್ಟಿಕೋನಗಳು ಮತ್ತು ಭಾವನೆಗಳನ್ನು ಈ ಸದನದ ಮುಂದೆ ವ್ಯಕ್ತಪಡಿಸಲಾಗಿದೆ. ನಾನು ಪ್ರತಿಯೊಬ್ಬ ಗೌರವಾನ್ವಿತ ಸದಸ್ಯರ ಮಾತುಗಳನ್ನು ಎಚ್ಚರಿಕೆಯಿಂದ ಮತ್ತು ಗಮನವಿಟ್ಟು ಆಲಿಸಿದ್ದೇನೆ.

ಬೆಂಬಲವಾಗಿ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ ಅಥವಾ ಟೀಕೆಯ ರೂಪದಲ್ಲಿ ಸಲಹೆಗಳನ್ನು ನೀಡಿದ ಈ ಸದನದ ಎಲ್ಲಾ ಗೌರವಾನ್ವಿತ ಸದಸ್ಯರಿಗೆ ನಾನು ಪ್ರಾಮಾಣಿಕವಾಗಿ ಧನ್ಯವಾದ ಅರ್ಪಿಸುತ್ತೇನೆ. ಇದು ಪ್ರಜಾಪ್ರಭುತ್ವದ ಸಾರವಾಗಿದೆ: ಪ್ರತಿಯೊಂದು ಧ್ವನಿಯನ್ನು ಆಲಿಸಲಾಗುತ್ತದೆ ಮತ್ತು ಪ್ರತಿಯೊಂದು ದೃಷ್ಟಿಕೋನಕ್ಕೂ ಮೌಲ್ಯವಿರುತ್ತದೆ.

ಗೌರವಾನ್ವಿತ ಸದಸ್ಯರೇ,

ಈ ಪೀಠವು ಯಾವುದೇ ವ್ಯಕ್ತಿಗೆ ಸೇರಿದ್ದಲ್ಲ. ಇದು ಭಾರತದ ಪ್ರಜಾಸತ್ತಾತ್ಮಕ  ಸಂಪ್ರದಾಯಗಳ, ಸಂವಿಧಾನದ ಚೈತನ್ಯದ ಮತ್ತು ಈ ಮಹಾನ್ ಸಂಸ್ಥೆಯ ಪ್ರತಿಷ್ಠೆಯ ಸಂಕೇತವಾಗಿದೆ.

ನನ್ನ ಹಿಂದಿನ ಸಭಾಧ್ಯಕ್ಷರು ಈ ಸದನದ ಘನತೆ ಮತ್ತು ಸಂಪ್ರದಾಯಗಳನ್ನು ಬಲಪಡಿಸಿದರು ಮತ್ತು ಯಾವಾಗಲೂ ಅದರ ಪ್ರತಿಷ್ಠೆಯನ್ನು ಹೆಚ್ಚಿಸಿದರು. ಸಂಸ್ಥೆಗಳು, ಸಭ್ಯತೆ ಮತ್ತು ಸಂಪ್ರದಾಯಗಳು ಶಾಶ್ವತವಾದವು.

ಈ ಸದನವು ನನ್ನ ಮೇಲೆ ವ್ಯಕ್ತಪಡಿಸಿದ ವಿಶ್ವಾಸವನ್ನು ನಾನು ಆಳವಾಗಿ ಗೌರವಿಸುತ್ತೇನೆ ಮತ್ತು ಸಂಪೂರ್ಣ ಸಮರ್ಪಣೆ, ನಿಷ್ಪಕ್ಷಪಾತ ಮತ್ತು ಸಾಂವಿಧಾನಿಕ ಔಚಿತ್ಯದೊಂದಿಗೆ ಈ ಜವಾಬ್ದಾರಿಯನ್ನು ಮುಂದುವರಿಸುತ್ತೇನೆ ಎಂದು ನಾನು ನಿಮಗೆ ಭರವಸೆ ನೀಡುತ್ತೇನೆ.

ಚರ್ಚೆಯ ಸಮಯದಲ್ಲಿ, ಕೆಲವು ಗೌರವಾನ್ವಿತ ಸದಸ್ಯರು ವಿರೋಧ ಪಕ್ಷದ ನಾಯಕರನ್ನು ಮಾತನಾಡದಂತೆ ತಡೆಯಲಾಗಿದೆ ಮತ್ತು ಸಾಕಷ್ಟು ಅವಕಾಶಗಳನ್ನು ನೀಡುತ್ತಿಲ್ಲ ಎಂದು ಹೇಳಿದ್ದಾರೆ.

ಗೌರವಾನ್ವಿತ ಸದನದ ನಾಯಕರಿರಲಿ, ವಿರೋಧ ಪಕ್ಷದ ನಾಯಕರಿರಲಿ, ಸಚಿವರಾಗಿರಲಿ ಅಥವಾ ಇನ್ನಾವುದೇ ಸದಸ್ಯರಿರಲಿ — ಎಲ್ಲಾ ಗೌರವಾನ್ವಿತ ಸದಸ್ಯರು ಸದನದ ನಿಯಮಗಳಲ್ಲಿ ರೂಪಿಸಲಾದ ಕಾರ್ಯವಿಧಾನಗಳನ್ನು ಅನುಸರಿಸುವ ಮೂಲಕ ಮಾತ್ರ ಮಾತನಾಡಬಹುದು ಎಂದು ಈ ಪವಿತ್ರ ಪೀಠದಿಂದ ನಾನು ಸ್ಪಷ್ಟಪಡಿಸಲು ಬಯಸುತ್ತೇನೆ.

ವಿರೋಧ ಪಕ್ಷದ ನಾಯಕರು ಯಾವುದೇ ಸಮಯದಲ್ಲಿ ಎದ್ದು ನಿಂತು ತಮ್ಮ ಇಚ್ಛೆಯ ಯಾವುದೇ ವಿಷಯದ ಬಗ್ಗೆ ಮಾತನಾಡಬಹುದು ಎಂದು ಕೆಲವು ಗೌರವಾನ್ವಿತ ಸದಸ್ಯರು ನಂಬುತ್ತಾರೆ. ಅವರು ಇದನ್ನು ವಿಶೇಷ ಹಕ್ಕು ಎಂದು ಪರಿಗಣಿಸುತ್ತಾರೆ.

ಸದನವು ನಿಯಮಗಳ ಪ್ರಕಾರ ನಡೆಯುತ್ತದೆ ಎಂಬುದನ್ನು ನಾನು ಸ್ಪಷ್ಟಪಡಿಸಲು ಬಯಸುತ್ತೇನೆ. ಈ ಕಾರ್ಯವಿಧಾನದ ನಿಯಮಗಳನ್ನು ಸದನವೇ ರೂಪಿಸಿದೆ — ಸರ್ಕಾರವೂ ಅಲ್ಲ ಅಥವಾ ವಿರೋಧ ಪಕ್ಷವೂ ಅಲ್ಲ. ಈ ನಿಯಮಗಳನ್ನು ನನಗೆ ಪರಂಪರೆಯಾಗಿ ಒಪ್ಪಿಸಲಾಗಿದೆ ಮತ್ತು ಅವು ಪ್ರತಿಯೊಬ್ಬ ಸದಸ್ಯರಿಗೂ ಸಮಾನವಾಗಿ ಅನ್ವಯಿಸುತ್ತವೆ.

ಗೌರವಾನ್ವಿತ ಪ್ರಧಾನ ಮಂತ್ರಿಯವರು ಅಥವಾ ಯಾವುದೇ ಸಚಿವರು ಸಾರ್ವಜನಿಕ ಪ್ರಾಮುಖ್ಯತೆಯ ವಿಷಯದ ಬಗ್ಗೆ ಸದನದಲ್ಲಿ ಹೇಳಿಕೆ ನೀಡಲು ಬಯಸಿದಾಗ, ನಿಯಮ 372 ರ ಅಡಿಯಲ್ಲಿ ಅಧ್ಯಕ್ಷರ ಪೂರ್ವಾನುಮತಿ ಅಗತ್ಯವಿರುತ್ತದೆ ಮತ್ತು ಔಪಚಾರಿಕ ನೋಟಿಸ್ ಸಲ್ಲಿಸಬೇಕು.

ಈ ನಿಯಮಗಳ ಚೌಕಟ್ಟಿನ ಹೊರಗೆ ಮಾತನಾಡಲು ಈ ಸದನದ ಯಾವುದೇ ಗೌರವಾನ್ವಿತ ಸದಸ್ಯರಿಗೆ ಯಾವುದೇ ವಿಶೇಷ ಹಕ್ಕಿಲ್ಲ.

ಪ್ರಜಾಪ್ರಭುತ್ವ ಸಂಸ್ಥೆಗಳ ಘನತೆ, ಸಭ್ಯತೆ ಮತ್ತು ನಿಯಮಗಳನ್ನು ಗೌರವಿಸುವ ಶ್ರೀಮಂತ ಸಂಪ್ರದಾಯ ನಮ್ಮ ದೇಶಕ್ಕಿದೆ. ಈ ಸದನದ ಹಿಂದಿನ ಅಧ್ಯಕ್ಷರು ತೆಗೆದುಕೊಂಡ ನಿರ್ಧಾರಗಳ ಕೆಲವು ಉದಾಹರಣೆಗಳನ್ನು ನಾನು ಉಲ್ಲೇಖಿಸಲು ಬಯಸುತ್ತೇನೆ.

1957 ರಲ್ಲಿ, ರಾಷ್ಟ್ರಪತಿಯವರ ಭಾಷಣಕ್ಕೆ ವಂದನಾ ನಿರ್ಣಯದ ಮೇಲೆ ಮಾತನಾಡುತ್ತಾ, ಶ್ರೀ ಅಟಲ್ ಬಿಹಾರಿ ವಾಜಪೇಯಿ ಅವರು ತಮ್ಮ ಹೇಳಿಕೆಗೆ ಸಾಕ್ಷಿಯಾಗಿ ಜಮ್ಮು ಮತ್ತು ಕಾಶ್ಮೀರಕ್ಕೆ ಸಂಬಂಧಿಸಿದ ಕೆಲವು ಛಾಯಾಚಿತ್ರಗಳನ್ನು ಪ್ರಸ್ತುತಪಡಿಸಲು ಬಯಸಿದ್ದರು. ಹಾಗೆ ಮಾಡುವ ಮೊದಲು, ದಾಖಲೆಯನ್ನು ಮೊದಲು ಅಧ್ಯಕ್ಷರಿಗೆ ತೋರಿಸಬೇಕು ಮತ್ತು ಅದನ್ನು ಪ್ರಸ್ತುತಪಡಿಸಬಹುದೇ ಎಂದು ಅಧ್ಯಕ್ಷರು ನಿರ್ಧರಿಸುತ್ತಾರೆ ಎಂದು ಪೀಠವು ತೀರ್ಪು ನೀಡಿತು. ಶ್ರೀ ವಾಜಪೇಯಿ ಮತ್ತು ಇಡೀ ಸದನವು ಈ ತೀರ್ಪನ್ನು ಒಪ್ಪಿಕೊಂಡಿತು ಮತ್ತು ಗೌರವಿಸಿತು.

1 ಮಾರ್ಚ್ 1958 ರಂದು, ಶ್ರೀಮತಿ ರೇಣು ಚಕ್ರವರ್ತಿ ಅವರು ಸರ್ಕಾರೇತರ ದಾಖಲೆಯನ್ನು ಸದನದ ಮೇಜಿನ ಮೇಲೆ ಇರಿಸಲು ಪ್ರಯತ್ನಿಸಿದಾಗ, ಅಧ್ಯಕ್ಷರಿಗೆ ತೋರಿಸದೆ ಅದನ್ನು ಇರಿಸಲು ಸಾಧ್ಯವಿಲ್ಲ ಎಂದು ಹೇಳಿ ಪೀಠವು ಅದನ್ನು ತಿರಸ್ಕರಿಸಿತು.

26 ಮಾರ್ಚ್ 1958 ರಂದು, ಶ್ರೀ ಎಸ್.ಎಂ. ಬ್ಯಾನರ್ಜಿಯವರು ತಮ್ಮ ಹೇಳಿಕೆಯ ಬೆಂಬಲವಾಗಿ ಪತ್ರವೊಂದನ್ನು ಉಲ್ಲೇಖಿಸಲು ಬಯಸಿದಾಗ, ಅದನ್ನು ಮುಂಚಿತವಾಗಿ ಪೀಠಕ್ಕೆ ತೋರಿಸಿಲ್ಲ ಎಂಬ ಕಾರಣಕ್ಕಾಗಿ ಉಪಾಧ್ಯಕ್ಷರು ಅದನ್ನು ತಿರಸ್ಕರಿಸಿದರು.

ಈ ಎಲ್ಲಾ ಸಂದರ್ಭಗಳಲ್ಲಿ, ಸದನವು ಪೀಠದ ತೀರ್ಪುಗಳನ್ನು ಗೌರವಯುತವಾಗಿ ಸ್ವೀಕರಿಸಿದೆ.

ಅದೇ ರೀತಿ, ಲೋಕಸಭೆ ಮತ್ತು ರಾಜ್ಯಸಭೆ ಎರಡರಲ್ಲೂ ಹಲವಾರು ಸಂದರ್ಭಗಳಲ್ಲಿ, ಪೀಠದ ಪೂರ್ವಾನುಮತಿಯಿಲ್ಲದೆ ದಾಖಲೆಗಳನ್ನು ಉಲ್ಲೇಖಿಸಲು ಅಥವಾ ಮಂಡಿಸಲು ಅನುಮತಿ ನೀಡಿಲ್ಲ. ಈ ಸಂಪ್ರದಾಯವನ್ನು ಯಾವಾಗಲೂ ಗೌರವಿಸಲಾಗಿದೆ. ಸದಸ್ಯರು ವೈಯಕ್ತಿಕವಾಗಿ ಪೀಠದ ನಿರ್ಧಾರವನ್ನು ಒಪ್ಪಬಹುದು ಅಥವಾ ಒಪ್ಪದಿರಬಹುದು, ಆದರೆ ಸದನದ ನಿಯಮಗಳು, ಕಾರ್ಯವಿಧಾನಗಳು ಮತ್ತು ಸಂಪ್ರದಾಯಗಳನ್ನು ಜಾರಿಗೊಳಿಸುವುದು ನನ್ನ ಕರ್ತವ್ಯವಾಗಿದೆ.

ಕೆಲವು ಸದಸ್ಯರು ಸದನದ ಘನತೆಗೆ ವಿರುದ್ಧವಾಗಿ ವರ್ತಿಸಿದಾಗ, ಈ ಸಂಸ್ಥೆಯ ಘನತೆಯನ್ನು ಕಾಪಾಡುವ ಸಲುವಾಗಿ ನಾನು ಕಟ್ಟುನಿಟ್ಟಾದ ನಿರ್ಧಾರಗಳನ್ನು ತೆಗೆದುಕೊಳ್ಳುವುದು ಅನಿವಾರ್ಯವಾಗುತ್ತದೆ.

ಚರ್ಚೆಯ ಸಮಯದಲ್ಲಿ, ಗೌರವಾನ್ವಿತ ಸದಸ್ಯರೊಬ್ಬರು ಸಂಸತ್ತಿನಲ್ಲಿ ಸದಸ್ಯರ ವಾಕ್ ಸ್ವಾತಂತ್ರ್ಯದ ಬಗ್ಗೆ ಸಂವಿಧಾನದ 105ನೇ ವಿಧಿಯನ್ನು ಪ್ರಸ್ತಾಪಿಸಿದರು.

ಇದರ ಬಗ್ಗೆ ಸ್ಪಷ್ಟಪಡಿಸಲು ಸಂವಿಧಾನದ 105(1) ವಿಧಿಯನ್ನು ಓದಲು ನನಗೆ ಅನುಮತಿ ನೀಡಿ:

“ಈ ಸಂವಿಧಾನದ ನಿಬಂಧನೆಗಳಿಗೆ ಮತ್ತು ಸಂಸತ್ತಿನ ಕಾರ್ಯವಿಧಾನವನ್ನು ನಿಯಂತ್ರಿಸುವ ನಿಯಮಗಳು ಮತ್ತು ಸ್ಥಾಯಿ ಆದೇಶಗಳಿಗೆ ಒಳಪಟ್ಟು, ಸಂಸತ್ತಿನಲ್ಲಿ ವಾಕ್ ಸ್ವಾತಂತ್ರ್ಯವಿರುತ್ತದೆ.”

ಆದ್ದರಿಂದ, ಸದಸ್ಯರು ಸಂಸತ್ತಿನಲ್ಲಿ ವಾಕ್ ಸ್ವಾತಂತ್ರ್ಯವನ್ನು ಹೊಂದಿದ್ದರೂ, ಅದು ಸದನವು ಅನುಮೋದಿಸಿದ ನಿಯಮಗಳು ಮತ್ತು ಕಾರ್ಯವಿಧಾನಗಳಿಗೆ ಒಳಪಟ್ಟಿರುತ್ತದೆ.

ನಿಯಮ 352, ತನ್ನ ಹನ್ನೊಂದು ಉಪ-ನಿಯಮಗಳ ಮೂಲಕ, ಸದಸ್ಯರು ಸದನದಲ್ಲಿ ಹೇಗೆ ಮಾತನಾಡಬೇಕು ಮತ್ತು ಯಾವ ರೀತಿಯ ಹೇಳಿಕೆಗಳು ಅಥವಾ ಅಭಿವ್ಯಕ್ತಿಗಳನ್ನು ತಪ್ಪಿಸಬೇಕು ಎಂಬುದರ ಕುರಿತು ವಿವರವಾದ ಮಾರ್ಗಸೂಚಿಗಳನ್ನು ನೀಡುತ್ತದೆ.

ಕೆಲವು ಗೌರವಾನ್ವಿತ ಸದಸ್ಯರು ಪೀಠದಿಂದ ಕೆಲವು ವಿರೋಧ ಪಕ್ಷದ ಸದಸ್ಯರ ಮೈಕ್ರೊಫೋನ್ ಗಳನ್ನು ಸ್ವಿಚ್ ಆಫ್ ಮಾಡಲಾಗುತ್ತದೆ ಎಂದು ಹೇಳಿದ್ದಾರೆ.

ಮೈಕ್ರೊಫೋನ್ ಗಳನ್ನು ಆನ್ ಮಾಡಲು ಅಥವಾ ಆಫ್ ಮಾಡಲು ಪೀಠದ ಬಳಿ ಯಾವುದೇ ಬಟನ್ ಇಲ್ಲ ಎಂದು ನಾನು ಮೊದಲೇ ಸ್ಪಷ್ಟಪಡಿಸಿದ್ದೇನೆ. ವಿರೋಧ ಪಕ್ಷದ ಕೆಲವು ಸದಸ್ಯರೇ ಸ್ವತಃ ಪೀಠಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದಾರೆ ಮತ್ತು ಅವರಿಗೆ ಈ ವಿಷಯ ಚೆನ್ನಾಗಿ ತಿಳಿದಿದೆ.

ಸದನದ ವ್ಯವಸ್ಥೆಯು ಹೇಗಿದೆಯೆಂದರೆ, ಮಾತನಾಡಲು ಅನುಮತಿ ಪಡೆದ ಸದಸ್ಯರ ಮೈಕ್ರೊಫೋನ್ ಮಾತ್ರ ಸಕ್ರಿಯವಾಗಿರುತ್ತದೆ.

ಚರ್ಚೆಯ ಸಮಯದಲ್ಲಿ, ಮಹಿಳಾ ಸದಸ್ಯರ ಗೌರವದ ಬಗ್ಗೆಯೂ ಕಳವಳ ವ್ಯಕ್ತಪಡಿಸಲಾಯಿತು.

ನಾನು ಯಾವಾಗಲೂ ಎಲ್ಲಾ ಗೌರವಾನ್ವಿತ ಮಹಿಳಾ ಸದಸ್ಯರ ಬಗ್ಗೆ ಅತ್ಯಂತ ಗೌರವವನ್ನು ಹೊಂದಿದ್ದೇನೆ. ಪ್ರತಿಯೊಬ್ಬ ಮಹಿಳಾ ಸದಸ್ಯರಿಗೆ ಸದನದಲ್ಲಿ ಮಾತನಾಡಲು ಅವಕಾಶ ಸಿಗುವುದನ್ನು ಖಚಿತಪಡಿಸಿಕೊಳ್ಳಲು ನನ್ನ ಪ್ರಯತ್ನ ಯಾವಾಗಲೂ ಇರುತ್ತದೆ.

ನನ್ನ ಅವಧಿಯಲ್ಲಿ ಮೊದಲ ಬಾರಿಗೆ ಸದಸ್ಯರಾದವರು ಸೇರಿದಂತೆ ಪ್ರತಿಯೊಬ್ಬ ಮಹಿಳಾ ಸದಸ್ಯರು ಈ ಸದನದಲ್ಲಿ ತಮ್ಮ ಅಮೂಲ್ಯವಾದ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ ಎಂಬ ಬಗ್ಗೆ ನಾನು ಹೆಮ್ಮೆಪಡುತ್ತೇನೆ.

ಆದಾಗ್ಯೂ, ಕೆಲವು ಸದಸ್ಯರು ಸದನದ ಬಾವಿಯೊಳಗೆ ನುಗ್ಗಿ, ಘೋಷಣೆಗಳನ್ನು ಕೂಗುತ್ತಾ ಮತ್ತು ಬ್ಯಾನರ್‌ ಗಳನ್ನು ಪ್ರದರ್ಶಿಸುತ್ತಾ ಆಡಳಿತ ಪಕ್ಷದ ಆಸನಗಳತ್ತ ಸಾಗಿದಾಗ, ಅನಿರೀಕ್ಷಿತ ಪರಿಸ್ಥಿತಿ ಉಂಟಾಗುವ ಸಾಧ್ಯತೆಯಿತ್ತು. ಅಂತಹ ಯಾವುದೇ ಪರಿಸ್ಥಿತಿಯನ್ನು ತಡೆಗಟ್ಟಲು ಮತ್ತು ಸುವ್ಯವಸ್ಥೆಯನ್ನು ಕಾಪಾಡಲು, ನಾನು ಸದನದ ನಾಯಕರಿಗೆ ಆ ಕ್ಷಣದಲ್ಲಿ ಚೇಂಬರ್‌ ಗೆ ಪ್ರವೇಶಿಸದಂತೆ ವಿನಂತಿಸಿದೆ.

ಅಂತಹ ಕಷ್ಟಕರ ಸಂದರ್ಭಗಳಲ್ಲಿ, ಸದನದ ಘನತೆ ಮತ್ತು ಸುವ್ಯವಸ್ಥೆಯನ್ನು ಕಾಪಾಡಲು ನಾನು ಅಗತ್ಯವೆಂದು ಪರಿಗಣಿಸಿದ್ದನ್ನು ಮಾಡಿದ್ದೇನೆ.

ವಿರೋಧ ಪಕ್ಷದ ಸದಸ್ಯರಿಗೆ ಸಾಕಷ್ಟು ಅವಕಾಶಗಳನ್ನು ನೀಡುತ್ತಿಲ್ಲ ಎಂದು ಕೆಲವು ಸದಸ್ಯರು ಹೇಳಿದ್ದಾರೆ.

ಆದಾಗ್ಯೂ, 17 ಮತ್ತು 18ನೇ ಲೋಕಸಭೆಯ ಕಲಾಪಗಳ ಅಧಿಕೃತ ದತ್ತಾಂಶವು ವಾಸ್ತವವನ್ನು ಪ್ರಸ್ತುತಪಡಿಸುತ್ತದೆ. ಸಂಖ್ಯಾಬಲಕ್ಕೆ ಅನುಗುಣವಾಗಿ ನೋಡಿದರೆ, ರಾಷ್ಟ್ರಪತಿಯವರ ಭಾಷಣಕ್ಕೆ ವಂದನಾ ನಿರ್ಣಯ, ಬಜೆಟ್, ಪ್ರಮುಖ ಮಸೂದೆಗಳು, ವಿಶೇಷ ಚರ್ಚೆಗಳು, ಪ್ರಶ್ನೋತ್ತರ ಅವಧಿ ಮತ್ತು ಶೂನ್ಯ ವೇಳೆಯ ಚರ್ಚೆಗಳಲ್ಲಿ ವಿರೋಧ ಪಕ್ಷದ ಸದಸ್ಯರು ನಿಗದಿಪಡಿಸಿದ್ದಕ್ಕಿಂತ ಹೆಚ್ಚಿನ ಸಮಯವನ್ನು ಪಡೆದಿದ್ದಾರೆ.

ಕಳೆದ ಎರಡು ದಿನಗಳ ಚರ್ಚೆಯ ಸಂದರ್ಭದಲ್ಲಿ ಈ ಸತ್ಯಗಳನ್ನು ಹಲವು ಬಾರಿ ಮಂಡಿಸಲಾಗಿದೆ.

ಸದನದಲ್ಲಿ ಎಲ್ಲಾ ಸದಸ್ಯರಿಗೆ ಸಾಕಷ್ಟು ಅವಕಾಶ ಸಿಗುವುದನ್ನು ಖಚಿತಪಡಿಸಿಕೊಳ್ಳುವುದು ನನ್ನ ನಿರಂತರ ಪ್ರಯತ್ನವಾಗಿದೆ. ಸಣ್ಣ ಪಕ್ಷಗಳ ಸದಸ್ಯರು, ಏಕ ಸದಸ್ಯ ಪಕ್ಷಗಳು ಮತ್ತು ಪಕ್ಷೇತರ ಸದಸ್ಯರಿಗೆ ಸಾಕಷ್ಟು ಅವಕಾಶ ಸಿಗುವುದನ್ನು ನಾನು ಖಚಿತಪಡಿಸಿದ್ದೇನೆ. ಈ ಕಾರಣಕ್ಕಾಗಿಯೇ ನಾನು ಶೂನ್ಯ ವೇಳೆ ಮತ್ತು ಚರ್ಚೆಗಳಿಗೆ ನಿಗದಿಪಡಿಸಿದ ಸಮಯವನ್ನು ಆಗಾಗ್ಗೆ ವಿಸ್ತರಿಸುತ್ತೇನೆ.

ಕೆಲವು ಗೌರವಾನ್ವಿತ ಸದಸ್ಯರು ಅಮಾನತು ವಿಷಯವನ್ನೂ ಪ್ರಸ್ತಾಪಿಸಿದರು.

ನಾನು ಯಾವಾಗಲೂ ಪಕ್ಷ ಭೇದವಿಲ್ಲದೆ ಸದಸ್ಯರೊಂದಿಗೆ ಸೌಹಾರ್ದಯುತ ವೈಯಕ್ತಿಕ ಸಂಬಂಧವನ್ನು ಹೊಂದಿದ್ದೇನೆ. ಯಾವುದೇ ಸದಸ್ಯರ ವಿರುದ್ಧ ಯಾವುದೇ ಕ್ರಮ ತೆಗೆದುಕೊಳ್ಳಬೇಕೆಂದು ನಾನು ಎಂದಿಗೂ ಬಯಸುವುದಿಲ್ಲ. ಸದನದಲ್ಲಿ ಸುವ್ಯವಸ್ಥೆಯನ್ನು ಕಾಪಾಡಲು ಶಿಸ್ತು ಕ್ರಮ ಅಗತ್ಯವಾದಾಗಲೆಲ್ಲಾ ಅದು ನನಗೆ ತೀವ್ರ ದುಃಖವನ್ನು ಉಂಟುಮಾಡುತ್ತದೆ.

ಆದಾಗ್ಯೂ, ಅಂತಹ ಕಟ್ಟುನಿಟ್ಟಾದ ಕ್ರಮಗಳು ಅನಿವಾರ್ಯವಾಗುವ ಪರಿಸ್ಥಿತಿಗಳು ಏಕೆ ಉಂಟಾಗುತ್ತವೆ ಎಂಬುದನ್ನು ನಾವು ಆಲೋಚಿಸಬೇಕು.

ಈ ಸದನದಲ್ಲಿ ಅತ್ಯುನ್ನತ ಸಂಪ್ರದಾಯ ಮತ್ತು ಸಭ್ಯತೆಯನ್ನು ಕಾಪಾಡುವಂತೆ ನಾನು ಯಾವಾಗಲೂ ಮನವಿ ಮಾಡಿದ್ದೇನೆ. ಇಂದಿಗೂ ನಾನು ಒತ್ತು ನೀಡಿ ಹೇಳುವುದೇನೆಂದರೆ, ಘೋಷಣೆಗಳನ್ನು ಕೂಗುವುದು, ವ್ಯವಸ್ಥಿತ ಅಡೆತಡೆಗಳು ಮತ್ತು ಅಶಿಸ್ತು ಎಂದಿಗೂ ನಮ್ಮ ಸಂಸದೀಯ ಸಂಪ್ರದಾಯಗಳ ಭಾಗವಾಗಿಲ್ಲ.

1997 ರಲ್ಲಿ (ಸ್ವಾತಂತ್ರ್ಯದ ಐವತ್ತು ವರ್ಷಗಳ ಸಂಭ್ರಮದ ಅಂಗವಾಗಿ) ಮತ್ತು 2001 ರಲ್ಲಿ ನವದೆಹಲಿಯಲ್ಲಿ ಪೀಠಾಧ್ಯಕ್ಷರು, ಮುಖ್ಯಮಂತ್ರಿಗಳು ಮತ್ತು ಮುಖ್ಯ ಸಚೇತಕರು ನಡೆಸಿದ ಸಮ್ಮೇಳನಗಳಲ್ಲಿ ಅಳವಡಿಸಿಕೊಂಡ ನಿರ್ಣಯಗಳು ಘೋಷಣೆ ಕೂಗುವುದು, ಭಿತ್ತಿಪತ್ರಗಳನ್ನು ಪ್ರದರ್ಶಿಸುವುದು, ಕಾಗದಗಳನ್ನು ಹರಿಯುವುದು, ಅನುಚಿತ ಸನ್ನೆಗಳನ್ನು ಮಾಡುವುದು, ಅಧ್ಯಕ್ಷರ ಪೀಠದ ಹತ್ತಿರ ಹೋಗುವುದು, ಪ್ರತಿಭಟನೆ ನಡೆಸುವುದು, ಕಲಾಪಗಳಿಗೆ ಅಡ್ಡಿಪಡಿಸುವುದು, ಇತರ ಸದಸ್ಯರು ಮಾತನಾಡದಂತೆ ತಡೆಯುವುದು ಅಥವಾ ಪೀಠದ ತೀರ್ಪುಗಳನ್ನು ಪ್ರಶ್ನಿಸುವುದು ಮುಂತಾದ ಅನುಚಿತ ನಡವಳಿಕೆಗಳು ಸಂಸತ್ತು ಮತ್ತು ಶಾಸಕಾಂಗ ಸಂಸ್ಥೆಗಳ ಕಾರ್ಯನಿರ್ವಹಣೆಯ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತವೆ ಎಂದು ಸರ್ವಾನುಮತದಿಂದ ಒಪ್ಪಿಕೊಂಡಿವೆ.

2001 ರ ಸಮ್ಮೇಳನದಲ್ಲಿ ವಿರೋಧ ಪಕ್ಷದ ನಾಯಕರಾಗಿದ್ದ — ಕಾಂಗ್ರೆಸ್ ಪಕ್ಷದ ಹಿರಿಯ ನಾಯಕರೊಬ್ಬರು — ಸದನದ ಬಾವಿಗೆ ಪ್ರವೇಶಿಸುವುದನ್ನು ಸಂಪೂರ್ಣವಾಗಿ ನಿಷೇಧಿಸಬೇಕು ಮತ್ತು ನಿಯಮ ಉಲ್ಲಂಘಿಸಿದರೆ ಸ್ವಯಂಚಾಲಿತವಾಗಿ ಕಟ್ಟುನಿಟ್ಟಾದ ಶಿಸ್ತು ಕ್ರಮ ಜರುಗಿಸಬೇಕು ಎಂದು ಸೂಚಿಸಿದ್ದರು. ವಿಶಾಲ ರಾಷ್ಟ್ರೀಯ ಹಿತಾಸಕ್ತಿಯಿಂದ ಈ ನಿರ್ಣಯಗಳನ್ನು ಸರ್ವಾನುಮತದಿಂದ ಅಂಗೀಕರಿಸಲಾಯಿತು.

ಸಂಸದೀಯ ಚರ್ಚೆಯಲ್ಲಿ ಭಿನ್ನಾಭಿಪ್ರಾಯಗಳು ಮತ್ತು ಆಲೋಚನೆಗಳ ತೀವ್ರ ವಿನಿಮಯವು ಸಹಜ ಎಂಬುದನ್ನು ನಾವು ಯಾವಾಗಲೂ ನೆನಪಿಟ್ಟುಕೊಳ್ಳಬೇಕು. ಆದಾಗ್ಯೂ, ಪ್ರಜಾಪ್ರಭುತ್ವದ ಚರ್ಚೆ ಮತ್ತು ಅಸ್ತವ್ಯಸ್ತತೆಯ ನಡುವೆ ಒಂದು ಸ್ಪಷ್ಟವಾದ ಗೆರೆಯಿದೆ.

ಭಿತ್ತಿಪತ್ರಗಳನ್ನು ಪ್ರದರ್ಶಿಸುವುದು, ಘೋಷಣೆಗಳನ್ನು ಕೂಗುವುದು, ಕಾಗದಗಳನ್ನು ಹರಿಯುವುದು ಅಥವಾ ಮೇಜುಗಳ ಮೇಲೆ ಹತ್ತುವುದು ನಮ್ಮ ಶ್ರೇಷ್ಠ ಸಂಸದೀಯ ಸಂಪ್ರದಾಯಗಳಿಗೆ ವಿರುದ್ಧವಾಗಿದೆ. ಅಂತಹ ವರ್ತನೆಯು ಕಲಾಪಗಳಿಗೆ ಅಡ್ಡಿಪಡಿಸುವುದು ಮಾತ್ರವಲ್ಲದೆ ಸದನದ ಪ್ರತಿಷ್ಠೆಯನ್ನು ಕುಗ್ಗಿಸುತ್ತದೆ.

ಗೌರವಾನ್ವಿತ ಸದಸ್ಯರೇ,

ಈ ಸದನದ ಪ್ರತಿಯೊಬ್ಬ ಸದಸ್ಯರೂ ಗೌರವಾನ್ವಿತರು ಮತ್ತು ನಾನು ವೈಯಕ್ತಿಕವಾಗಿ ನಿಮ್ಮಲ್ಲಿ ಪ್ರತಿಯೊಬ್ಬರನ್ನೂ ಗೌರವಿಸುತ್ತೇನೆ. ಇಲ್ಲಿ ಕುಳಿತಿರುವ ಪ್ರತಿಯೊಬ್ಬ ಸದಸ್ಯರಲ್ಲಿ, ನೀವು ಪ್ರತಿನಿಧಿಸುವ ಭಾರತದ ಲಕ್ಷಾಂತರ ನಾಗರಿಕರನ್ನು ನಾನು ಕಾಣುತ್ತೇನೆ.

ಗೌರವಾನ್ವಿತ ಸದಸ್ಯರೇ,

ಕಳೆದ ಎರಡು ದಿನಗಳ ಚರ್ಚೆಯ ಸಂದರ್ಭದಲ್ಲಿ, ಸಂಸತ್ತಿನಲ್ಲಿ 22 ಭಾಷೆಗಳಲ್ಲಿ ಭಾಷಾಂತರ, ಡಿಜಿಟಲ್ ತಂತ್ರಜ್ಞಾನದ ಬಳಕೆ, ಸಂಶೋಧನಾ ಬೆಂಬಲ, ಸಾಮರ್ಥ್ಯ ವರ್ಧನೆ ಉಪಕ್ರಮಗಳು ಮತ್ತು ಪಿ-20 ಮತ್ತು CSPOC ಯಂತಹ ಕಾರ್ಯಕ್ರಮಗಳ ಯಶಸ್ವಿ ಆಯೋಜನೆ ಹಾಗೂ ಸ್ನೇಹ ಗುಂಪುಗಳಂತಹ ಸಾಧನೆಗಳನ್ನು ಹಲವಾರು ಸದಸ್ಯರು ಎತ್ತಿ ತೋರಿಸಿದ್ದಾರೆ.

ಈ ಸಾಧನೆಗಳು ವೈಯಕ್ತಿಕ ಸಾಧನೆಗಳಲ್ಲ; ಅವು ಈ ಸದನದ ಸಾಮೂಹಿಕ ಸಾಧನೆಗಳಾಗಿವೆ ಎಂದು ನಾನು ಒತ್ತಿ ಹೇಳಲು ಬಯಸುತ್ತೇನೆ.

ಭಾರತದ ಪ್ರಜಾಪ್ರಭುತ್ವವು ಪ್ರಪಂಚದಾದ್ಯಂತ ಅಪಾರ ಗೌರವವನ್ನು ಹೊಂದಿದೆ. ಅನೇಕ ದೇಶಗಳ ಸಂಸದರು ಮತ್ತು ಅಧಿಕಾರಿಗಳು ತರಬೇತಿಗಾಗಿ ನಮ್ಮ ಸಂಸತ್ತಿಗೆ ಬರುತ್ತಾರೆ. ನಾನು ಅಧ್ಯಕ್ಷನಾಗಿ ಅಂತರರಾಷ್ಟ್ರೀಯ ಸಮ್ಮೇಳನಗಳಲ್ಲಿ ಭಾಗವಹಿಸಿದಾಗಲೆಲ್ಲಾ, ನಮ್ಮ ಸಂವಿಧಾನ ಮತ್ತು ನಮ್ಮ ಸಂಸತ್ತಿನ ಬಗ್ಗೆ ನನಗೆ ಅಪಾರ ಹೆಮ್ಮೆ ಉಂಟಾಗುತ್ತದೆ.

ಗೌರವಾನ್ವಿತ ಸದಸ್ಯರೇ,

ತನ್ನ ಕಲಾಪಗಳ ನಿರ್ವಹಣೆಗಾಗಿ ಸದನವು ರೂಪಿಸಿದ ನಿಯಮಗಳನ್ನು ಪಾಲಿಸುವುದು ನಮ್ಮ ವೈಯಕ್ತಿಕ ಮತ್ತು ಸಾಮೂಹಿಕ ಜವಾಬ್ದಾರಿಯಾಗಿದೆ.

ಯಾವುದೇ ಸದಸ್ಯರು ಈ ನಿಯಮಗಳನ್ನು ನಿರ್ಲಕ್ಷಿಸಿ ಸದನದ ಕಾರ್ಯನಿರ್ವಹಣೆಗೆ ಅಡ್ಡಿಪಡಿಸಿದರೆ, ಈ ಪೀಠದಲ್ಲಿ ಕುಳಿತಿರುವ ಅಧ್ಯಕ್ಷರ ಕರ್ತವ್ಯವೆಂದರೆ ಅಂತಹ ಸದಸ್ಯರಿಗೆ ಮಾರ್ಗದರ್ಶನ ನೀಡುವುದು, ಎಚ್ಚರಿಸುವುದು ಮತ್ತು ಅಗತ್ಯವಿದ್ದರೆ ಅವರ ವಿರುದ್ಧ ಕ್ರಮ ತೆಗೆದುಕೊಳ್ಳುವುದು.

ನಿಯಮ 378 ಸ್ಪಷ್ಟವಾಗಿ ಹೇಳುವಂತೆ, ಅಧ್ಯಕ್ಷರು ಸದನದಲ್ಲಿ ಸುವ್ಯವಸ್ಥೆಯನ್ನು ಕಾಪಾಡಬೇಕು ಮತ್ತು ತಮ್ಮ ನಿರ್ಧಾರಗಳನ್ನು ಜಾರಿಗೊಳಿಸಲು ಅಗತ್ಯವಿರುವ ಎಲ್ಲಾ ಅಧಿಕಾರಗಳನ್ನು ಹೊಂದಿರಬೇಕು.

ಪ್ರಜಾಪ್ರಭುತ್ವ ಸಂಸ್ಥೆಗಳು ಶಾಶ್ವತವಾದವು. ಬಲವಾದ ಸಂಸ್ಥೆಗಳು ಬಲವಾದ ಪ್ರಜಾಪ್ರಭುತ್ವವನ್ನು ನಿರ್ಮಿಸುತ್ತವೆ. ನಾವೇ ಈ ಸಂಸ್ಥೆಗಳ ಪ್ರತಿಷ್ಠೆಯನ್ನು ಕುಗ್ಗಿಸಿದರೆ, ನಷ್ಟವು ಯಾವುದೇ ವ್ಯಕ್ತಿ ಅಥವಾ ಪಕ್ಷಕ್ಕಲ್ಲ, ಬದಲಿಗೆ ಇಡೀ ರಾಷ್ಟ್ರಕ್ಕೆ ಆಗುತ್ತದೆ.

ಸಾಂವಿಧಾನಿಕ ಸಂಸ್ಥೆಗಳ ಮೇಲಿನ ಗೌರವವು ಕೇವಲ ಔಪಚಾರಿಕತೆಯಲ್ಲ; ಇದು ಪ್ರಜಾಪ್ರಭುತ್ವದ ಸ್ಥಿರತೆಯ ಅಡಿಪಾಯವಾಗಿದೆ.

ಸದನದಲ್ಲಿ ಗಲಾಟೆ ಅಥವಾ ವ್ಯವಸ್ಥಿತ ಅಡ್ಡಿ ಉಂಟಾದಾಗಲೆಲ್ಲಾ, ಅದು ಜನರ ಮನಸ್ಸಿನಲ್ಲಿ ನಿರಾಶೆಯನ್ನು ಉಂಟುಮಾಡುತ್ತದೆ.

ಈ ಸದನದ ಮೇಲೆ ಭಾರತದ ಜನತೆ ಇಟ್ಟಿರುವ ನಂಬಿಕೆ ಮತ್ತು ವಿಶ್ವಾಸವನ್ನು ಉಳಿಸಿಕೊಳ್ಳಲು ಸಹಕರಿಸಬೇಕೆಂದು ನಾನು ನಿಮ್ಮಲ್ಲಿ ವಿನಮ್ರವಾಗಿ ಮನವಿ ಮಾಡುತ್ತೇನೆ.

ನಮ್ಮ ಶ್ರೇಷ್ಠ ಸಂವಿಧಾನ, ನಮ್ಮ ನಿಯಮಗಳು ಮತ್ತು ನಮ್ಮ ಸಂಪ್ರದಾಯಗಳು ನಮಗೆ ಬಂದಿರುವ ಪರಂಪರೆಯಾಗಿದೆ. ಈ ಪರಂಪರೆಯ ಬಗ್ಗೆ ನಾನು ಅಪಾರ ಹೆಮ್ಮೆ ಪಡುತ್ತಲೇ, ಅದನ್ನು ರಕ್ಷಿಸಲು ಮತ್ತು ಬಲಪಡಿಸಲು ಹಾಗೂ ಈ ಸದನದ ಘನತೆಗೆ ಎಂದಿಗೂ ಧಕ್ಕೆ ಬರದಂತೆ ನೋಡಿಕೊಳ್ಳಲು ನಾನು ಸಮಾನವಾಗಿ ಬದ್ಧನಾಗಿದ್ದೇನೆ.

ಆಡಳಿತ ಪಕ್ಷ ಮತ್ತು ವಿರೋಧ ಪಕ್ಷಗಳೆರಡನ್ನೂ ನಾನು ಈ ಸಂಸ್ಥೆಯ ಸಮಾನ ಪಾಲಕರೆಂದು ಪರಿಗಣಿಸುತ್ತೇನೆ.

ಪರಿಸ್ಥಿತಿ ಎಷ್ಟೇ ಪ್ರತಿಕೂಲವಾಗಿದ್ದರೂ, ಈ ಸದನದ ಘನತೆ ಮತ್ತು ಪ್ರತಿಷ್ಠೆಯನ್ನು ಎತ್ತಿ ಹಿಡಿಯುವುದು ನನ್ನ ದೃಢ ಸಂಕಲ್ಪವಾಗಿದೆ. ಈ ಸದನವು ಯಾವಾಗಲೂ ನಿಯಮಗಳು ಮತ್ತು ಕಾರ್ಯವಿಧಾನಗಳ ಪ್ರಕಾರ ಕಾರ್ಯನಿರ್ವಹಿಸಿದೆ ಮತ್ತು ಭವಿಷ್ಯದಲ್ಲೂ ಹಾಗೆಯೇ ಮುಂದುವರಿಯುತ್ತದೆ — ಯಾವುದೇ ನಿರ್ದಿಷ್ಟ ಸದಸ್ಯರು ಇದನ್ನು ಒಪ್ಪಲಿ ಅಥವಾ ಒಪ್ಪದಿರಲಿ.

ಗೌರವಾನ್ವಿತ ಸದಸ್ಯರೇ,

ಪ್ರಶಂಸೆಯಿರಲಿ ಅಥವಾ ಟೀಕೆಯಿರಲಿ, ನನ್ನ ಸಂಕಲ್ಪವು ಒಂದೇ ಆಗಿರುತ್ತದೆ: ಸದನದ ಘನತೆಯನ್ನು ರಕ್ಷಿಸುವುದು ಮತ್ತು ಅದರ ನಿಯಮಗಳನ್ನು ಎತ್ತಿ ಹಿಡಿಯುವುದು.

ನಾವು ಕೇವಲ ಸಂವಿಧಾನದ ಪದಗಳನ್ನು ಅನುಸರಿಸುವುದಲ್ಲದೆ, ಸಾಂವಿಧಾನಿಕ ನೈತಿಕತೆಯನ್ನು ಎತ್ತಿ ಹಿಡಿಯೋಣ.

ಇಂದಿನಿಂದ ಹೊಸ, ಸಕಾರಾತ್ಮಕ ಮತ್ತು ರಚನಾತ್ಮಕ ಅಧ್ಯಾಯವನ್ನು ಒಟ್ಟಾಗಿ ಆರಂಭಿಸೋಣ. ರಾಷ್ಟ್ರ ಸೇವೆ ಮತ್ತು ರಾಷ್ಟ್ರ ನಿರ್ಮಾಣದ ಹಾದಿಯಲ್ಲಿ ಒಗ್ಗಟ್ಟಿನಿಂದ ಮುನ್ನಡೆಯೋಣ.

ಧನ್ಯವಾದಗಳು. ಜೈ ಹಿಂದ್. ಜೈ ಭಾರತ್.

 

*****

(ಪ್ರಕಟಣೆ ಐ.ಡಿ.: 2239485) ವಿಸಿಟರ್ ಕೌಂಟರ್ : 3