مختلف پنشنرز ایسوسی ایشنز کے نمائندوں کے ساتھ آج ایک تعاملی ملاقات میں مرکزی وزیر مملکت (آزادانہ چارج) برائے عملہ، عوامی شکایات و پنشن ڈاکٹر جتیندر سنگھ نے ملک کی تعمیر میں سینیئر شہریوں کی مسلسل شمولیت کی تعریف کی۔

وزیر اس موقع پر نئی دہلی میں اسٹینڈنگ کمیٹی آف وولنٹری ایجنسیز (ایس سی او وی اے) کے 35ویں اجلاس کی صدارت کر رہے تھے۔

محکمہ پنشن و پنشنرز ویلفیئر مرکزی حکومت کے پنشنرز کی فلاح و بہبود کے لیے پُرعزم ہے۔ یہ محکمہ پنشن پالیسیوں کی تشکیل اور پنشنرز کی شکایات کے ازالے کے لیے حکومت ہند کی مختلف وزارتوں اور محکموں کے ساتھ فعال رابطہ رکھتا ہے تاکہ مرکزی حکومت کے پنشنرز کے لیے باوقار اور آسان زندگی کو یقینی بنایا جا سکے۔ یہ محکمہ ملک بھر میں لاکھوں پنشنرز کی نمائندگی کرنے والی پنشنرز ویلفیئر ایسوسی ایشنز کے ساتھ بھی قریبی رابطہ رکھتا ہے، تاکہ فلاحی اقدامات کی سفارشات میں شراکتی مشاورت کو یقینی بنایا جا سکے۔

اسٹینڈنگ کمیٹی آف وولنٹری ایجنسیز (ایس سی او وی اے) کو 1986 میں محکمہ پنشن و پنشنرز ویلفیئر نے حکومت اور پنشنرز ویلفیئر ایسوسی ایشنز کے درمیان ہم آہنگی کو ادارہ جاتی شکل دینے کے لیے قائم کیا تھا۔ یہ کمیٹی وزیر مملکت برائے عملہ، عوامی شکایات و پنشن کی سربراہی میں کام کرتی ہے، جبکہ سکریٹری، محکمہ پنشن و پنشنرز ویلفیئر اس کے سیکریٹری کے طور پر فرائض انجام دیتے ہیں۔

ایس سی او وی اے میں پنشنرز ویلفیئر ایسوسی ایشنز کی نمائندگی کرنے والے 15 غیر سرکاری ارکان شامل ہیں، جبکہ حکومتِ ہند کی مختلف وزارتوں اور محکموں کے سرکاری ارکان بھی اس کا حصہ ہوتے ہیں۔ یہ کمیٹی ایک ادارہ جاتی پلیٹ فارم فراہم کرتی ہے جہاں پنشنرز کی ایسوسی ایشنز تعمیری تبادلۂ خیال کے ذریعے پنشنرز کی فلاح و بہبود سے متعلق مسائل کو براہِ راست متعلقہ وزارتوں اور محکموں کے سامنے پیش کر سکتی ہیں۔

اس اجلاس میں دہلی، کرناٹک، تلنگانہ، مہاراشٹر، جموں و کشمیر، اوڈیشہ، آسام، جھارکھنڈ، اتراکھنڈ، تمل ناڈو، مغربی بنگال اور گجرات سے تعلق رکھنے والی پنشنرز ویلفیئر ایسوسی ایشنز کے نمائندوں نے شرکت کی۔

اس موقع پر وزارت صحت و خاندانی بہبود، کنٹرولر جنرل آف ڈیفنس اکاؤنٹس، محکمہ اخراجات، وزارت ریلوے، کنٹرولر جنرل آف کمیونیکیشن اکاؤنٹس، محکمہ مالیاتی خدمات، محکمہ سابق فوجیوں کی بہبود، محکمہ محصولات اور محکمہ ٹیلی کمیونیکیشن کے سینیئر افسران نے بھی شرکت کی اور پنشنرز کی فلاح و بہبود اور شکایات کے ازالے سے متعلق امور پر تبادلہ خیال کیا۔

سینیئر شہریوں کی فعال شرکت کو اجاگر کرتے ہوئے ڈاکٹر جتیندر سنگھ نے کہا کہ ان کا تجربہ اور تجاویز حکمرانی کو بہتر بنانے میں اہم کردار ادا کرتی ہیں۔

انہوں نے پنشنرز کی ایسوسی ایشن کو یہ بھی ترغیب دی کہ وہ صرف شکایات تک محدود نہ رہیں بلکہ تجاویز بھی پیش کریں تاکہ پالیسیوں اور خدمات کو مزید مضبوط بنایا جا سکے۔

توقع ہے کہ یہ اجلاس حکومت اور پنشنرز کی ایسوسی ایشنز کے درمیان ہم آہنگی کو مزید مضبوط کرے گا اور مرکزی حکومت کے پنشنرز کے لیے آسان زندگی کو بہتر بنانے میں معاون ثابت ہوگا۔

*********

ش ح۔ ف ش ع

                                                                                                                                       U: 3715

(ریلیز آئی ڈی: 2237867) وزیٹر کاؤنٹر : 9