مرکزی حکومت نے مالی سال 2025-26 کے دوران آسام کے پنچایتی راج اداروں اور دیہی مقامی اداروں کے لیے پندرھویں مالیاتی کمیشن کے تحت امداد جاری کر دی ہے۔ اس میں مالی سال 2025-26 کی بلا پابندی امداد کی دوسری قسط کے طور پر 256.60 کروڑ روپے شامل ہیں۔

یہ فنڈز ریاست آسام کی تمام اہل 27 ضلع پنچایتوں، 182 بلاک پنچایتوں اور 2192 گرام پنچایتوں کے ساتھ ساتھ تین خود مختار ضلعی کونسلوں یعنی بوڈولینڈ علاقائی کونسل، کاربی آنگلونگ خود مختار کونسل اور دیما ہساو خود مختار کونسل کے لیے جاری کیے گئے ہیں۔

اس کے علاوہ مالی سال 2025-26 کی پہلی قسط کی بلا پابندی گرانٹ کے روکے گئے حصے میں سے 42.70 کروڑ روپے بھی جاری کیے گئے ہیں، جو اضافی طور پر اہل تین خود مختار ضلعی کونسلوں (بوڈولینڈ علاقائی کونسل، کاربی آنگلونگ خود مختار کونسل اور دیما ہساو خود مختار کونسل) کو فراہم کیے جائیں گے۔

حکومت ہند کی جانب سے وزارت پنچایتی راج اور وزارت جل شکتی (محکمہ پینے کے پانی اور صفائی) ریاستوں کو پنچایتی راج اداروں اور دیہی مقامی اداروں کے لیے پندرھویں مالیاتی کمیشن کی گرانٹ جاری کرنے کی سفارش کرتی ہیں، جسے بعد میں وزارت خزانہ جاری کرتی ہے۔ یہ گرانٹ مالی سال کے دوران دو قسطوں میں فراہم کی جاتی ہے۔

بلا پابندی گرانٹ کو پنچایتی راج ادارے اور دیہی مقامی ادارے آئین کے گیارہویں شیڈول میں شامل 29 موضوعات کے تحت مقامی ضروریات کے مطابق استعمال کر سکتے ہیں، تاہم اسے تنخواہوں اور دیگر انتظامی اخراجات کے لیے استعمال نہیں کیا جا سکتا۔

جبکہ پابند گرانٹس کو بنیادی خدمات جیسے صفائی اور کھلے میں رفع حاجت سے پاک حیثیت کو برقرار رکھنے، گھریلو کچرے اور انسانی فضلے کے انتظام، نیز پینے کے پانی کی فراہمی، بارش کے پانی کے ذخیرے اور پانی کے دوبارہ استعمال کے منصوبوں پر خرچ کیا جا سکتا ہے۔

*****

ش ح ۔   م  د ۔  م  ص

(U :3520    )

(ریلیز آئی ڈی: 2236692) وزیٹر کاؤنٹر : 13