કેન્દ્રીય કૃષિ અને ખેડૂત કલ્યાણ તથા ગ્રામીણ વિકાસ મંત્રી શ્રી શિવરાજ સિંહ ચૌહાણે આજે ચેન્નાઈમાં નાળિયેર પકવતા ખેડૂતો, વૈજ્ઞાનિકો, કૃષિ નિષ્ણાતો અને નાળિયેર ક્ષેત્ર સાથે સંકળાયેલા મુખ્ય હિતધારકો સાથે બજેટ પછીની એક મહત્વપૂર્ણ ચર્ચામાં ભાગ લીધો હતો. આ પ્રસંગે તેમણે નાળિયેર ક્ષેત્રના વિકાસ, ઉત્પાદન વધારવા અને ખેડૂતોની આવક વધારવા સંબંધિત વિવિધ મુદ્દાઓ પર ચર્ચા કરી હતી.

તેમના સંબોધનમાં શ્રી ચૌહાણે કહ્યું કે જ્યારે પણ તેઓ તમિલનાડુની પવિત્ર ભૂમિની મુલાકાત લે છે ત્યારે તેમનું હૃદય આનંદ અને ઉત્સાહથી ભરાઈ જાય છે. તેમણે તમિલનાડુના મહાન લોકો, તેની સમૃદ્ધ સંસ્કૃતિ, પરંપરાઓ અને રાષ્ટ્રમાં નોંધપાત્ર યોગદાન આપનાર પ્રતિષ્ઠિત હસ્તીઓને શ્રદ્ધાંજલિ અર્પી હતી.

કેન્દ્રીય કૃષિ મંત્રીએ કહ્યું કે તમિલનાડુ દેશમાં નાળિયેર ઉત્પાદનના મુખ્ય કેન્દ્રોમાંનું એક છે. તેમણે નોંધ્યું કે સમગ્ર ભારતમાં આશરે 1.25 કરોડ ખેડૂતો નાળિયેરની ખેતી સાથે સંકળાયેલા છે, જ્યારે લગભગ 3 કરોડ લોકોની આજીવિકા નાળિયેર ક્ષેત્ર પર નિર્ભર છે. તેમણે ધ્યાન દોર્યું હતું કે નાળિયેર પકવતા ખેડૂતો હાલમાં અનેક પડકારોનો સામનો કરી રહ્યા છે જે આ ક્ષેત્રમાં ઉત્પાદકતા અને ટકાઉપણાં (sustainability) ને અસર કરી રહ્યા છે.

તેમણે સમજાવ્યું કે દેશમાં નાળિયેરના ઘણા બગીચાઓ લગભગ 60 વર્ષ જૂના થઈ ગયા છે, જેના કારણે ઉત્પાદકતામાં ઘટાડો થયો છે. આ ઉપરાંત, રુટ વિલ્ટ (મૂળનો સડો) અને વ્હાઇટ ફ્લાય (સફેદ માખી) જેવા રોગો પણ નાળિયેરના ઉત્પાદન પર પ્રતિકૂળ અસર કરી રહ્યા છે. તેમણે કહ્યું કે આ પડકારો માટે સંકલિત પ્રયાસો અને નવીન ઉકેલોની જરૂર છે જેથી ખેડૂતો ઉત્પાદકતા જાળવી શકે અને તેમની આવકનું સ્તર સુધારી શકે.

શ્રી ચૌહાણે કહ્યું કે આ પડકારોને પહોંચી વળવા માટે સરકાર નાળિયેરની નવી, અદ્યતન અને રોગ-પ્રતિકારક જાતોના વિકાસ પર વિશેષ ભાર મૂકશે. આનો ઉદ્દેશ્ય નાળિયેરના ઉત્પાદન અને ગુણવત્તા બંનેમાં વધારો કરવાનો છે જેથી ભારત વૈશ્વિક નાળિયેર નિકાસ બજારમાં પોતાની સ્થિતિ વધુ મજબૂત કરી શકે.

તેમણે સભાને જાણ કરી હતી કે ખેડૂતો, વૈજ્ઞાનિકો અને નિષ્ણાતો સાથે વ્યાપક ચર્ચા કરવામાં આવી રહી છે જેથી સામૂહિક રીતે વ્યવહારુ અને અસરકારક ઉકેલો વિકસાવી શકાય. તેમના મતે, નીતિગત પગલાં ખેડૂતોના વાસ્તવિક અનુભવો અને જરૂરિયાતો પર આધારિત રહે તે સુનિશ્ચિત કરવા માટે આ પરામર્શ જરૂરી છે.

કેન્દ્રીય મંત્રી શ્રી ચૌહાણે કહ્યું કે પ્રધાનમંત્રી શ્રી નરેન્દ્ર મોદી દ્વારા જાહેર કરાયેલ 'કોકોનટ પ્રમોશન સ્કીમ' (નાળિયેર પ્રોત્સાહન યોજના) દ્વારા સરકાર ઉત્પાદન, પ્રોસેસિંગ અને આંતર-પાકને પ્રોત્સાહન આપશે, જે નાળિયેર પકવતા ખેડૂતોની આવક વધારવામાં મદદ કરશે. તેમણે સમજાવ્યું કે નાળિયેરની ખેતીની સાથે આંતર-પાક લેવાને પ્રોત્સાહન આપવાથી નાળિયેરના ખેતરોની આર્થિક વ્યવહારુતામાં નોંધપાત્ર સુધારો થઈ શકે છે અને ખેડૂતોને આવકના વધારાના સ્ત્રોત મળી શકે છે.

શ્રી ચૌહાણે વધુમાં જણાવ્યું હતું કે સરકાર નાળિયેર પકવતા ખેડૂતોને વધુ સારી સુવિધાઓ અને મજબૂત સંસ્થાકીય સહાય મળે તે સુનિશ્ચિત કરવા પ્રતિબદ્ધ છે. આ પ્રયાસના ભાગરૂપે અનેક મહત્વપૂર્ણ પહેલો હાથ ધરવામાં આવશે. જેમાં જૂના અને બિનઉત્પાદક બગીચાઓના સ્થાને નવા બગીચાઓની સ્થાપના, ઉચ્ચ ગુણવત્તાની નર્સરીઓનો વિકાસ, આધુનિક પ્રોસેસિંગ સુવિધાઓની ઉપલબ્ધતા અને નાળિયેર આધારિત ઉત્પાદનોમાં મૂલ્યવર્ધન પર વધુ ભારનો સમાવેશ થાય છે.

તેમણે એમ પણ કહ્યું કે કોકોનટ પ્રમોશન સ્કીમની વિગતોને અંતિમ ઓપ આપવા માટે ખેડૂતો અને રાજ્ય સરકારો સાથે પરામર્શ ચાલુ છે. એકવાર આ ચર્ચાઓ પૂર્ણ થઈ જાય પછી, કોકોનટ પ્રમોશન બોર્ડ સંબંધિત વ્યાપક માળખું પણ તૈયાર કરવામાં આવશે. આ માળખાનો ઉદ્દેશ્ય એક મજબૂત સંસ્થાકીય માળખું બનાવવાનો રહેશે જે આગામી વર્ષોમાં નાળિયેર ક્ષેત્રના વિકાસને માર્ગદર્શન અને સમર્થન આપી શકે. શ્રી ચૌહાણે વિશ્વાસ વ્યક્ત કર્યો હતો કે આ પહેલથી દેશભરના નાળિયેર પકવતા ખેડૂતોને નોંધપાત્ર ફાયદો થશે. ખાસ કરીને, તેમણે નોંધ્યું હતું કે નાળિયેર વિકાસ સંબંધિત સૂચિત પગલાં અને પહેલોના અમલીકરણથી તમિલનાડુના લગભગ 28 ટકા ખેડૂતોને લાભ થવાની અપેક્ષા છે.

કાર્યક્રમ દરમિયાન શ્રી શિવરાજ સિંહ ચૌહાણે ભારતની ભાષાકીય વિવિધતાનો પણ ઉલ્લેખ કર્યો હતો. તેમણે કહ્યું કે ભારતની પ્રાદેશિક ભાષાઓ અત્યંત સમૃદ્ધ અને સુંદર છે, અને તે દેશના સાંસ્કૃતિક વારસા અને વિવિધતાને પ્રતિબિંબિત કરે છે. તેમણે સૂચવ્યું કે આવી ચર્ચાઓમાં સહભાગીઓ પોતપોતાની માતૃભાષામાં વાતચીત કરી શકે છે અને જો જરૂર પડે તો અનુવાદકોની મદદ લઈ શકાય છે. તેમના મતે, આવો અભિગમ માત્ર સહભાગીઓ માટે સંવાદને સરળ અને વધુ આરામદાયક બનાવશે એટલું જ નહીં પરંતુ દેશની સાંસ્કૃતિક વિવિધતા અને રાષ્ટ્રીય એકતાના અનોખા સંગમનું પ્રદર્શન પણ કરશે.

SM/DK/JD

(રીલીઝ આઈડી: 2236425) મુલાકાતી સંખ્યા : 20