گرین ہائیڈروجن کے معیارات اور حفاظتی ضوابط پر بھارت–برطانیہ کانفرنس 27 فروری 2026 کو نئی دہلی میں منعقد ہوئی۔ اس کانفرنس میں بھارت اور برطانیہ کے حکومتی اداروں، صنعت، تعلیمی حلقوں، معیارات کے اداروں، جانچ کرنے والے اداروں، تحقیقی تنظیموں اور ضابطہ کار ایجنسیوں کے نمائندے شریک ہوئے۔ اس کا مقصد بھارت کے نیشنل گرین ہائیڈروجن مشن کے تحت گرین ہائیڈروجن کے محفوظ نفاذ کے لیے باہمی تعاون کو مضبوط بنانا تھا۔

اس کانفرنس کا انعقاد نیشنل سینٹر فار ہائیڈروجن سیفٹی (این سی ایچ ایس) نے کیا، جو نئی اور قابلِ تجدید توانائی  کی وزارت (ایم این آر ای) کے تحت نیشنل گرین ہائیڈروجن مشن کی معاونت کے لیے قائم کیا گیا ہے۔ یہ کانفرنس بھارت میں برطانوی ہائی کمیشن اور ڈبلیو آر آئی انڈیا کے تعاون سے منعقد ہوئی۔ اس میں گرین ہائیڈروجن ویلیو چین کے مختلف مراحل، جن میں پیداوار، ذخیرہ، نقل و حمل اور آخری استعمال کی ایپلی کیشنز شامل ہیں، کے حوالے سے ضابطہ جاتی فریم ورک، بین الاقوامی معیارات اور حفاظتی پروٹوکولز پر اہم مباحثے ہوئے۔

افتتاحی اجلاس کا آغاز محمد ریحان، ڈائریکٹر جنرل، نیشنل انسٹی ٹیوٹ آف سولر انرجی کے تعارفی کلمات سے ہوا۔ اس کے بعد خصوصی خطابات پیش کیے گئے جن میں ابھے باکرے، مشن ڈائریکٹر، نیشنل گرین ہائیڈروجن مشن، وزارتِ نئی و قابلِ تجدید توانائی، جینوس شریتی، فرسٹ سیکریٹری (تجارت)، برطانوی ہائی کمیشن بھارت؛ انجَن کمار مشرا، سیکریٹری، پیٹرولیم اینڈ نیچرل گیس ریگولیٹری بورڈ، اور لورا ایلیٹ، فرسٹ سیکریٹری (آب و ہوا و توانائی)، برطانوی ہائی کمیشن بھارت شامل تھے۔

کلیدی خطاب پیش کرتے ہوئے پرویندر مینی، سائنسی سیکریٹری، دفترِ پرنسپل سائنٹفک ایڈوائزر حکومتِ ہند نے اس بات پر زور دیا کہ گرین ہائیڈروجن ٹیکنالوجیز کے بڑے پیمانے پر نفاذ کو ممکن بنانے کے لیے مضبوط حفاظتی فریم ورک، معیارات کی تیاری اور بین الاقوامی تعاون نہایت اہم ہیں۔

کانفرنس کی ایک نمایاں خصوصیت ہائیڈروجن کی حفاظت اور معیارات کے ذمہ دار قومی ضابطہ کار اداروں کی شرکت تھی۔ پیٹرولیم اینڈ ایکسپلوسِوز سیفٹی آرگنائزیشن (پی ای ایس او) نے ہائیڈروجن نظاموں کے لیے حفاظتی تقاضوں کی تعمیل، خطرات کے جائزے اور ممکنہ خطرات کے انتظام سے متعلق ضابطہ جاتی نقطۂ نظر پیش کیا۔ بیورو آف انڈین اسٹینڈرڈز (بی آئی ایس) نے معیارات کے ارتقا پذیر فریم ورک اور بھارتی ہائیڈروجن معیارات کو بین الاقوامی بہترین طریقوں کے مطابق ہم آہنگ کرنے کی جاری کوششوں کے بارے میں آگاہی فراہم کی۔

کانفرنس کے دوران ہونے والے تکنیکی سیشنز میں صنعت، تعلیمی حلقوں اور تحقیقی اداروں کے ممتاز ماہرین نے ہائیڈروجن ویلیو چین میں حفاظتی طریقۂ کار پر پریزنٹیشنز اور مباحثے پیش کیے۔ مقررین میں سوسائٹی آف انڈین آٹوموبائل مینوفیکچررز، این ٹی پی سی لمیٹڈ، آٹوموٹو ریسرچ ایسوسی ایشن آف انڈیا، کوچین شپ یارڈ لمیٹڈ، آروپ، پیٹرولیم اینڈ نیچرل گیس ریگولیٹری بورڈ، سی ایس آئی آر – نیشنل میٹالرجیکل لیبارٹری، کوچین یونیورسٹی آف سائنس اینڈ ٹیکنالوجی اور انڈین انسٹی ٹیوٹ آف ٹیکنالوجی مدراس کے نمائندے شامل تھے۔ ان سیشنز میں ہائیڈروجن کے آخری استعمال سے متعلق حفاظتی طریقوں، ہائیڈروجن کی پیداوار، ذخیرہ اور نقل و حمل کے نظاموں کے محفوظ ڈیزائن اور آپریشن، خطرات کے جائزے کے طریقۂ کار، حادثات کے مطالعاتی کیسز اور ابھرتی ہوئی اختراعات جیسے جدید سینسر ٹیکنالوجی اور مصنوعی ذہانت پر مبنی نگرانی کے نظام پر گفتگو کی گئی۔

کانفرنس کا اختتام اس مشترکہ عزم کے ساتھ ہوا کہ بھارت اور برطانیہ گرین ہائیڈروجن ٹیکنالوجیز کے محفوظ اور بڑے پیمانے پر نفاذ کی حمایت کے لیے معیارات کی تیاری، ضابطہ جاتی صلاحیت سازی اور حفاظتی فریم ورک کے شعبوں میں تعاون کو مزید مضبوط کریں گے۔ اس کانفرنس میں ہونے والی گفتگو سے توقع ہے کہ وہ نیشنل گرین ہائیڈروجن مشن کے تحت جاری کوششوں میں معاون ثابت ہوگی، تاکہ ایک جامع حفاظتی نظام قائم کیا جا سکے اور بھارت میں قابلِ اعتماد اور عالمی سطح پر مسابقتی گرین ہائیڈروجن شعبے کی ترقی کو فروغ دیا جا سکے۔

******

ش ح۔ ش ا ر۔ ول

Uno-3479

(ریلیز آئی ڈی: 2236283) وزیٹر کاؤنٹر : 26