યુવા બાબતો અને રમતગમત મંત્રાલયના યુવા બાબતોના વિભાગે ઇન્સ્ટિટ્યૂટ ફોર સ્ટેમ સેલ સાયન્સ એન્ડ રિજનરેટિવ મેડિસિન (inStem), બેંગલુરુ ખાતે બે દિવસીય MY Bharat–NSS ચિંતન શિબિરના પ્રથમ દિવસનું સફળતાપૂર્વક આયોજન કર્યું હતું. ચિંતન શિબિરનો ઉદ્દેશ્ય સહયોગ મજબૂત કરવાનો, શ્રેષ્ઠ પદ્ધતિઓ શેર કરવાનો અને ભારતની 'અમૃત પેઢી'ને રાષ્ટ્ર નિર્માણમાં સક્રિય ભાગીદાર તરીકે સશક્ત બનાવવા અને 'વિકસિત ભારત@2047'ના વિઝનને આગળ વધારવા માટે વ્યૂહાત્મક રોડમેપ તૈયાર કરવાનો છે.

આ ચિંતન શિબિરનું ઉદ્ઘાટન કેન્દ્રીય યુવા બાબતો અને રમતગમત મંત્રી ડો. મનસુખ માંડવિયા અને યુવા બાબતો અને રમતગમત રાજ્ય મંત્રી સુશ્રી રક્ષા નિખિલ ખડસે દ્વારા કરવામાં આવ્યું હતું. આ પ્રસંગે સચિવ ડો. પલ્લવી જૈન ગોવિલ; અધિક સચિવ શ્રી નિતેશ કુમાર મિશ્રા; અને સંયુક્ત સચિવ શ્રી શિવ રતન, યુવા બાબતોના વિભાગ; MY Bharat ના CEO ડો. પ્રિયંકા શુક્લા અને મંત્રાલય, MY Bharat અને નેશનલ સર્વિસ સ્કીમ (NSS) ના અન્ય વરિષ્ઠ અધિકારીઓ તેમજ વિવિધ રાજ્યો અને કેન્દ્રશાસિત પ્રદેશોના પ્રતિનિધિઓ ઉપસ્થિત રહ્યા હતા.

તેલંગાણા, આંધ્રપ્રદેશ, કર્ણાટક, તમિલનાડુ, કેરલમ, આંદામાન અને નિકોબાર ટાપુઓ, લક્ષદ્વીપ, ઓડિશા, છત્તીસગઢ અને મહારાષ્ટ્ર સહિત 10 રાજ્યો અને કેન્દ્રશાસિત પ્રદેશોનું પ્રતિનિધિત્વ કરતા અધિકારીઓએ ચર્ચામાં ભાગ લીધો હતો.

ચર્ચા માટેનો એજન્ડા નક્કી કરતા, યુવા બાબતોના વિભાગના સચિવ ડો. પલ્લવી જૈન ગોવિલે ચિંતન શિબિરના મુખ્ય ઉદ્દેશ્યો અને અપેક્ષિત પરિણામોની રૂપરેખા આપી હતી, જેમાં MY Bharat અને નેશનલ સર્વિસ સ્કીમ (NSS) પ્લેટફોર્મ્સ દ્વારા સંકલિત આયોજન, સંસ્થાકીય સંકલન અને મજબૂત યુવા જોડાણના મહત્વ પર ભાર મૂક્યો હતો.

મુખ્ય વ્યાખ્યાન આપતા કેન્દ્રીય યુવા બાબતો અને રમતગમત મંત્રી ડો. મનસુખ માંડવિયાએ ભારપૂર્વક જણાવ્યું હતું કે ભારતના યુવાનોએ માત્ર વિકાસમાં ભાગ લેવો જોઈએ એટલું જ નહીં પરંતુ રાષ્ટ્રના ભવિષ્યના શિલ્પકાર બનવું જોઈએ. તેમણે જણાવ્યું હતું કે દરેક યુવાન નાગરિકને વિકસિત ભારતનું પોતાનું વિઝન વિકસાવવા માટે સશક્ત બનાવવો જોઈએ, જેના માટે યુવા વિકાસ માટે કામ કરતી સંસ્થાઓ વચ્ચે મજબૂત તાલમેલ (synergy), સંકલન, નેટવર્કિંગ અને અનુભવોનું સતત આદાનપ્રદાન જરૂરી છે.

મંત્રીએ દેશભરમાં યુવા જોડાણને વધુ મજબૂત કરવા માટે અનેક પગલાં પણ સૂચવ્યા હતા. તેમણે MY Bharat પ્લેટફોર્મ દ્વારા સોશિયલ મીડિયા સંકલનને મજબૂત કરવાની સાથે યુવા ક્લબ, NSS સ્વયંસેવકો અને ડિજિટલ આઉટરીચ જૂથો સહિત જિલ્લા અને બ્લોક સ્તરે સંરચિત યુવા નેટવર્ક બનાવવાની જરૂરિયાત પર ભાર મૂક્યો હતો. તેમણે યુવા ભાગીદારીને ઓળખવા અને પ્રોત્સાહિત કરવા માટે રાજ્ય-સ્તરના યુવા પ્લેટફોર્મને MY Bharat ઇકોસિસ્ટમ સાથે સંકલિત કરવાના મહત્વ પર પ્રકાશ પાડ્યો હતો. ડો. માંડવિયાએ MY Bharat, NSS, યુનિવર્સિટીઓ, રાજ્ય સરકારો અને જિલ્લા વહીવટીતંત્રો વચ્ચે વધુ મજબૂત જોડાણ (convergence) માટે હાકલ કરી હતી, જેમાં નિયમિત સંકલન, રાજ્ય સ્તરે નવીન યુવા પ્રવૃત્તિઓ અને રમતગમત તથા સામુદાયિક જોડાણ સહિત માસિક યુવા ક્લબ કાર્યક્રમોને પ્રોત્સાહિત કર્યા હતા. તેમણે નોંધ્યું હતું કે આવી સહયોગી ઇકોસિસ્ટમ ભારતના યુવાનોને વિકસિત ભારત@2047 ના વિઝનમાં સક્રિયપણે યોગદાન આપવા સક્ષમ બનાવશે.

ચિંતન શિબિર માટે માર્ગદર્શક વિઝન રજૂ કરતા, યુવા બાબતો અને રમતગમત રાજ્ય મંત્રી સુશ્રી રક્ષા નિખિલ ખડસેએ રાષ્ટ્ર નિર્માણમાં યુવા ભાગીદારી અને સ્વયંસેવા (volunteerism) ની પરિવર્તનકારી ભૂમિકા પર પ્રકાશ પાડ્યો હતો અને યુવા ક્લબ, NSS એકમો અને MY Bharat પહેલો દ્વારા ગ્રામીણ સ્તરે (grassroots) જોડાણને વધુ મજબૂત કરવાની જરૂરિયાત પર ભાર મૂક્યો હતો, જે યુવાનોને સામુદાયિક વિકાસ અને રાષ્ટ્રીય પ્રગતિમાં અર્થપૂર્ણ યોગદાન આપવા સક્ષમ બનાવશે.

આ પરિપ્રેક્ષ્યોના આધારે, “સંવાદ સે સમાધાન” થીમ હેઠળની ચર્ચાઓ સહભાગી રાજ્યો અને કેન્દ્રશાસિત પ્રદેશો વચ્ચે ક્રોસ-લર્નિંગ, પોલિસી એલાઈનમેન્ટ અને અનુભવ વહેંચણી પર કેન્દ્રિત હતી. ડિજિટલ યુથ એન્ગેજમેન્ટ ફ્રેમવર્ક પરના પ્રેઝન્ટેશનમાં MY Bharat પોર્ટલ દ્વારા યુવાનોના ઓનબોર્ડિંગ અને જોડાણમાં શ્રેષ્ઠ પદ્ધતિઓ પર પ્રકાશ પાડવામાં આવ્યો હતો, જે દર્શાવે છે કે કેવી રીતે ટેકનોલોજી દેશભરમાં યુવા ભાગીદારીને મજબૂત કરી શકે છે.

ચર્ચાઓને વધુ આગળ વધારતા, બપોરના સત્રમાં વાર્ષિક એક્શન પ્લાન (AAP) 2026-27 અને MY Bharat તથા NSS પહેલોના સંકલન પર વ્યૂહાત્મક વિચાર-વિમર્શ પર ધ્યાન કેન્દ્રિત કરવામાં આવ્યું હતું. ચર્ચાઓમાં યુવા ક્લબની ટકાઉક્ષમતા, AAP 2025-26 ના અમલીકરણમાંથી શીખેલા પાઠ અને યુવા ગતિશીલતામાં નવીન પદ્ધતિઓ આવરી લેવામાં આવી હતી, જેમાં છત્તીસગઢ, કેરલમ, આંધ્રપ્રદેશ, ઓડિશા અને તેલંગાણાના પ્રતિનિધિઓએ તેમના અનુભવો અને સફળ મોડલ શેર કર્યા હતા.

દિવસભરની ચર્ચાઓનો સારાંશ આપતા, ચિંતન શિબિરના પ્રથમ દિવસનું સમાપન મુખ્ય આંતરદૃષ્ટિના સંશ્લેષણ અને બીજા દિવસ માટેના એજન્ડા નિર્ધારણ સાથે કરવામાં આવ્યું હતું, ત્યારબાદ MY Bharat સ્વયંસેવકો દ્વારા યુવા ભાગીદારીની ભાવના અને વિવિધતાની ઉજવણી કરતા સાંસ્કૃતિક કાર્યક્રમનું આયોજન કરવામાં આવ્યું હતું.

MY Bharat–NSS ચિંતન શિબિર દેશભરમાં યુવા વિકાસમાં રોકાયેલા હિતધારકો વચ્ચે સંવાદ, સહયોગ અને નીતિ સંકલન માટે એક મહત્વપૂર્ણ પ્લેટફોર્મ તરીકે કામ કરે છે. આ ચર્ચાઓના પરિણામો યુવા જોડાણ મિકેનિઝમ્સને વધુ મજબૂત બનાવશે અને વિકસિત ભારત@2047 ના વિઝનને સાકાર કરવામાં ભારતની 'અમૃત પેઢી'ની સક્રિય ભાગીદારીને ટેકો આપશે.

SM/JY/JD