انڈین فارماکوپیا کمیشن (آئی پی سی)، وزارتِ صحت و خاندانی بہبود، حکومتِ ہند نے آندھرا پردیش میڈ ٹیک زون (اے ایم ٹی زیڈ) کے اشتراک  سے 27 فروری  سے 28 فروری 2026 تک وِشاکھاپٹنم میں واقع آندھرا پردیش میڈ ٹیک زون (اے ایم ٹی زیڈ) میں ’’بھارت میں فارماکو ویجیلنس اور میٹیریو ویجیلنس کو مضبوط بنانے‘‘ کے موضوع پر دو روزہ قومی اجلاس منعقد کیا۔

پہلی بار منعقد ہونے والے اس قومی اجلاس میں فارماکو ویجیلنس پروگرام آف انڈیا (پی وی پی آئی) اور میٹیریو ویجیلنس پروگرام آف انڈیا (ایم وی پی آئی) میں شریک علاقائی مراکز کی پہلی سالانہ میٹنگ منعقد کی گئی، جس کا مقصد بھارت میں ادویات اور طبی آلات کی حفاظت کے نظام کو مضبوط بنانا اور ضابطہ جاتی اداروں، صحت کے اداروں، اے ڈی آر مانیٹرنگ مراکز (اے ایم سیز) اور میڈیکل ڈیوائس مانیٹرنگ مراکز (ایم ڈی ایم سیز) کے درمیان ہم آہنگی کو فروغ دینا تھا۔ اس اجلاس میں ریگولیٹری اتھارٹیز کے سینئر عہدیداران، ممتاز طبی اداروں کے نمائندگان اور عالمی ادارۂ صحت کے بھارت آفس کے نمائندے شریک ہوئے۔

 

افتتاحی اجلاس کی صدارت ڈاکٹر وی کَلَی سیلوان، سکریٹری و سائنٹفک ڈائریکٹر، آئی پی سی نے کی۔ انہوں نے اس بات پر زور دیا کہ فارماکو ویجیلنس کے نظام کو محض آگاہی پر مبنی رپورٹنگ سے آگے بڑھاتے ہوئے کارکردگی پر مبنی اور قابلِ پیمائش نتائج والے فریم ورک کی جانب منتقل کرنا وقت کی ضرورت ہے۔افتتاحی اجلاس میں ممتاز ایمس اداروں کی سینئر قیادت، بشمول پروفیسر وائی کے گپتا اور پروفیسر اشوک پورانک، کے ساتھ ڈاکٹر جتیندر شرما، منیجنگ ڈائریکٹر و بانی سی ای او، اے ایم ٹی زیڈ، اور ڈاکٹر کویتا کچرو، سی ای او، کلام انسٹی ٹیوٹ آف ہیلتھ ٹیکنالوجی نے شرکت کی۔ مقررین نے ملک بھر میں فارماکو ویجیلنس اور میٹیریو ویجیلنس نظام کو مضبوط بنانے کے لیے ادارہ جاتی تعاون کی اہمیت کو اجاگر کیا۔

افتتاحی اجلاس کے دوران اے ڈی آر پی وی پی آئی 2.0 موبائل ایپلی کیشن کا اجرا کیا گیا، جس کا مقصد رپورٹنگ کو آسان بنانا، حقیقی وقت میں ڈیٹا کے اندراج کو مضبوط کرنا اور ملک بھر میں مضر ادویاتی اثرات کی نگرانی کے عمل میں متعلقہ فریقین کی مؤثر شمولیت کو بہتر بنانا ہے۔

 تکنیکی اجلاس منعقد کیے گئے جن میں پی وی پی آئی اور ایم وی پی آئی کے تحت پیش رفت کا جائزہ لیا گیا اور اہم چیلنجوں پر غور کیا گیا، جن میں مضر ادویاتی اثرات کی کم رپورٹنگ، دستاویزی خلا، اور طبی آلات کی حفاظت کی نگرانی کو مزید مضبوط بنانے کی ضرورت شامل تھی۔ مباحثوں میں اے ایم سیز اور ایم ڈی ایم سیز کی کارکردگی کو بہتر بنانے اور صحت کے اداروں میں منظم رپورٹنگ کے کلچر کو فروغ دینے پر بھی زور دیا گیا۔

اجلاس کے دوسرے دن کو ’’بھارت کی فارماکو ویجیلنس اور میٹیریو ویجیلنس کو بااختیار بنانا: آگاہی سے عمل تک‘‘ کے موضوع کے تحت منظم عاملہ گروپ مباحثوں کے لیے وقف کیا گیا۔ تکنیکی اجلاسوں کے ساتھ ساتھ عاملہ گروپوں نے کم رپورٹنگ کے مسئلے سے نمٹنے، قابلِ روک تھام مضر واقعات کی دستاویز سازی اور تجزیے کے لیے معیاری فریم ورک تیار کرنے، اور ضلعی سطح کے صحت مراکز سے آگے فارماکو ویجیلنس اور میٹیریو ویجیلنس کی رسائی کو وسعت دینے کی حکمت عملیوں کا جائزہ لیا۔

مباحثوں سے سامنے آنے والی سفارشات میں صلاحیت سازی، رپورٹنگ کے طریقۂ کار کی معیاری تشکیل، اداروں کے درمیان بہتر ہم آہنگی، اور مریضوں کی حفاظت کو مضبوط بنانے کے لیے ٹیکنالوجی پر مبنی نگرانی کے نظام کو مربوط کرنے پر زور دیا گیا۔

 

اجلاس کا اختتام اس عزم کے اعادے کے ساتھ ہوا کہ آئی پی سی مربوط اور شواہد پر مبنی اقدامات کے ذریعے بھارت کے فارماکو ویجیلنس اور میٹیریو ویجیلنس نظام کو مزید مضبوط بنانے کے لیے اپنی کوششیں جاری رکھے گا۔

*****

ش ح ۔   م  د ۔  م  ص

(U :    3200 )

(ریلیز آئی ڈی: 2234019) وزیٹر کاؤنٹر : 5