ইণ্ডিয়া এ আই ইমপেক্ট ছামিট ২০২৬-ৰ বাবে ভাৰতৰ প্ৰস্তুতিয়ে মেঘালয়, গুজৰাট, ওড়িশা, মধ্যপ্ৰদেশ, উত্তৰ প্ৰদেশ, ৰাজস্থান আৰু কেৰেলাত অনুষ্ঠিত সাতখন আঞ্চলিক এ আই সন্মিলনৰ জৰিয়তে দেশজুৰি গতি লাভ কৰিছে।

ইণ্ডিয়াএআই মিছন-ৰ অধীনত ৰাজ্য চৰকাৰ, প্ৰধান শৈক্ষিক প্ৰতিষ্ঠান আৰু বিষয়ভিত্তিক কেন্দ্ৰীয় মন্ত্ৰালয়ৰ অংশীদাৰিত্বৰে আয়োজিত এই সন্মিলনসমূহে ২০২৬ চনৰ ১৬ৰ পৰা ২০ ফেব্ৰুৱাৰীত নতুন দিল্লীত অনুষ্ঠিত হ’বলগীয়া ইণ্ডিয়া এ আই ইমপেক্ট ছামিট ২০২৬ৰ পূৰ্বে উচ্চ পৰ্যায়ৰ, ফলপ্ৰসূ সংযোগ হিচাপে কাম কৰিছিল।

২০২৫ চনৰ অক্টোবৰৰ পৰা ২০২৬ চনৰ জানুৱাৰী মাহৰ ভিতৰত অনুষ্ঠিত হোৱা প্ৰতিখন সন্মিলনে সুশাসন, অৰ্থনৈতিক বিকাশ, সামাজিক সৱলীকৰণ আৰু উন্নত জনসেৱা প্ৰদানৰ বাবে এআই ব্যৱহাৰ কৰাৰ ৰাষ্ট্ৰীয় দৃষ্টিভংগীৰ সৈতে সংগতি ৰাখি অঞ্চল নিৰ্দিষ্ট প্ৰাথমিকতাসমূহৰ বিষয়ে আলোচনা কৰিছিল। আলোচনাসমূহে শাসন, স্বাস্থ্যসেৱা, কৃষি, শিক্ষা, ভাষা প্ৰযুক্তি, দক্ষতা, উদ্ভাৱন আৰু ডিজিটেল আন্তঃগাঁথনিৰ মাজেৰে ব্যৱহাৰিক এআই-ৰ প্ৰয়োগত গুৰুত্ব আৰোপ কৰিছিল। আঞ্চলিক সংযোগসমূহে নীতি নিৰ্ধাৰক, উদ্যোগৰ নেতা, ষ্টাৰ্টআপ, গৱেষক, শিক্ষাবিদ, নাগৰিক সমাজ আৰু স্থানীয় সম্প্ৰদায়সমূহক একত্ৰিত কৰিছিল, যাতে ভাৰতৰ এআই ৰোডমেপ আঞ্চলিক বাস্তৱতা আৰু নাগৰিকৰ প্ৰয়োজনীয়তাৰ ভিত্তিত গঢ়ি তোলাটো নিশ্চিত হয়। এই সন্মিলনসমূহৰ পৰা পোৱা অন্তৰ্দৃষ্টিয়ে ইণ্ডিয়া এ আই ইমপেক্ট ছামিট ২০২৬ৰ কাৰ্যসূচী আৰু ফলাফলৰ বিষয়ে পোনপটীয়াকৈ অৱগত কৰিব।

আঞ্চলিক এআই সন্মিলনসমূহৰ মূল কণ্ঠস্বৰসমূহ

“প্ৰধানমন্ত্ৰীৰ এটা স্পষ্ট মিছন আছে যে প্ৰযুক্তিবিদ্যাক গণতান্ত্ৰিক কৰি তোলা হৈছে যাতে এআই-ৰ দ্বাৰা চালিত বুদ্ধিমত্তাৰ তথ্য নিৰ্বাচিত কেইজনমানৰ মাজতে আবদ্ধ হৈ থকাতকৈ প্ৰতিগৰাকী ব্যক্তি, প্ৰতিটো ঘৰ, আৰু প্ৰতিটো উদ্যোগৰ কাষলৈ যায়। এই অভিযানৰ লগত সংগতি ৰাখি ভাৰতৰ যুৱক-যুৱতীসকলক এই নতুন প্ৰযুক্তিগত যুগৰ বাবে সম্পূৰ্ণৰূপে সাজু হোৱাটো নিশ্চিত কৰি দহ লাখ যুৱক-যুৱতীক এআই দক্ষতাৰ প্ৰশিক্ষণ দিয়াৰ এক কাৰ্যসূচী আৰম্ভ কৰা হৈছে।’- ভাৰত চৰকাৰৰ ইলেক্ট্ৰনিকছ আৰু তথ্য প্ৰযুক্তি দপ্তৰৰ মন্ত্ৰী শ্ৰী অশ্বিনী বৈষ্ণৱ

“নাগৰিকসকলৰ আয় বৃদ্ধি, জীৱন-যাপনৰ সহজতা উন্নত কৰা, আৰু এআই-ৰ দায়িত্বশীল আৰু সমগ্ৰিক ব্যৱহাৰৰ জৰিয়তে দেশৰ সামগ্ৰিক উৎপাদনশীলতা বৃদ্ধি কৰাৰ উদ্দেশ্যে ভাৰত এআই মিছন-ৰ অধীনত ১০,০০০ কোটি টকাৰ বিনিয়োগৰ প্ৰতিশ্ৰুতি দিছে।”- ভাৰত চৰকাৰৰ ইলেক্ট্ৰনিকছ আৰু আই টিৰ ৰাজ্যিক মন্ত্ৰী (এম অ’ এছ) শ্ৰী জিতিন প্ৰসাদ

"মেঘালয়ৰ প্ৰতিগৰাকী গৰ্ভৱতী মহিলাক ডিজিটেলভাৱে অনুসৰণ কৰা হয়, যাৰ ফলত উচ্চ বিপদাশংকাযুক্ত ৰোগীসকলৰ আগতীয়া চিনাক্তকৰণ আৰু সময়মতে চিকিত্সাৰ দিহা কৰাটো সম্ভৱ হয়। এই তথ্য-চালিত পদ্ধতিয়ে মাতৃসকলৰ মৃত্যুৰ হাৰ ৫০ শতাংশ হ্ৰাস কৰাত সহায় কৰিছে।"-মেঘালয়ৰ মুখ্যমন্ত্ৰী শ্ৰী কনৰাড কে চাংমা

“আঞ্চলিক এ আই সন্মিলনসমূহ হৈছে এআই-চালিত উন্নয়ন যাতে প্ৰতিখন জিলা আৰু প্ৰতিটো ভাষাত প্ৰৱেশ কৰে তাৰ বাবে গুৰুত্বপূৰ্ণ মঞ্চ। এই মঞ্চসমূহে ধাৰণাসমূহক কৰ্মলৈ ৰূপান্তৰিত কৰাত সহায় কৰে আৰু বাস্তৱক্ষেত্ৰত জীৱন উন্নত কৰাত সহায় কৰে।”- গুজৰাটৰ মুখ্যমন্ত্ৰী শ্ৰী ভূপেন্দ্ৰভাই ৰজনীকান্ত পেটেল

“কৃত্ৰিম বুদ্ধিমত্তাই আমাৰ দেশৰ যাত্ৰাৰ পৰৱৰ্তী বৃহৎ পৰ্যায়ক প্ৰতিনিধিত্ব কৰে। এআই আৰু মেচিন লাৰ্নিং-ৰ জৰিয়তে জনসেৱা প্ৰদানক দ্ৰুত, অধিক স্বচ্ছ আৰু অধিক নাগৰিককেন্দ্ৰিক কৰি তুলিব পাৰি।”- ৰাজস্থানৰ মুখ্যমন্ত্ৰী শ্ৰী ভজন লাল শৰ্মা

"মধ্যপ্ৰদেশ চৰকাৰে বিশ্বাস কৰে যে এআই-য়ে প্ৰশাসন, নাগৰিক আৰু উদ্যোগসমূহক একেদৰেই উপকৃত কৰিব পাৰে। আমি নীতিগত সমৰ্থনৰ বাবে প্ৰতিশ্ৰুতিবদ্ধ যিয়ে দক্ষতা সৰ্বাধিক কৰে আৰু বিভিন্ন খণ্ডত এআই-নেতৃত্বাধীন বিকাশ ত্বৰান্বিত কৰে।"-মধ্যপ্ৰদেশৰ মুখ্যমন্ত্ৰী ড° মোহন যাদৱ

“উত্তৰ প্ৰদেশৰ দৰে বৃহৎ আৰু স্পৰ্শকাতৰ ৰাজ্যত পৰিসৰত প্ৰত্যাহ্বানসমূহ মোকাবিলা কৰিবলৈ সময়োপযোগী, প্ৰযুক্তি-চালিত আৰু সঁহাৰি জনোৱা আৰ্হিৰ প্ৰয়োজন। এই পৰিৱৰ্তনত কৃত্ৰিম বুদ্ধিমত্তাই গুৰুত্বপূৰ্ণ ভূমিকা পালন কৰিব।”- উত্তৰ প্ৰদেশৰ মুখ্যমন্ত্ৰী শ্ৰী যোগী আদিত্যনাথ

"কৃত্ৰিম বুদ্ধিমত্তা এতিয়া আৰু ভৱিষ্যতৰ প্ৰযুক্তি নহয়। আচল প্ৰত্যাহ্বান আমি এআই গ্ৰহণ কৰো নে নাই সেইটো নহয়, কিন্তু আমি ইয়াক কেনেকৈ গ্ৰহণ কৰো সেইটোহে। প্ৰযুক্তিয়ে গণতন্ত্ৰক শক্তিশালী কৰিব লাগিব, মৰ্যাদা ৰক্ষা কৰিব লাগিব আৰু সাধাৰণ নাগৰিকসকলৰ সেৱা কৰিব লাগিব।"-কেৰালা বিধানসভাৰ অধ্যক্ষ শ্ৰী এ এন শ্বামছীৰ

পলকতে ঘোষণাসমূহ | আঞ্চলিক এআই সন্মিলন

১) ভৱিষ্যতৰ বাবে সাজু কৰ্মবাহিনী গঢ়ি তুলিবলৈ লাখ লাখ যুৱক-যুৱতীক ৰাষ্ট্ৰীয় এআই দক্ষতা কাৰ্যসূচী, যুৱা এআই ফৰ অল-ৰ অধীনত এআই দক্ষতাৰ প্ৰশিক্ষণ দিয়া হ’ব

২) হাতে কামে কৰা এআই শিক্ষা শক্তিশালী কৰিবলৈ আই টি আই, পলিটেকনিক আৰু কাৰিকৰী প্ৰতিষ্ঠানসমূহত নতুন লেবৰেটৰীকে ধৰি ৰাজ্যজুৰি ভাৰত এ আই ডাটা এণ্ড এ আই লেব-ৰ সম্প্ৰসাৰণ কৰা হ’ব

৩) শাসন, উদ্ভাৱন আৰু নিয়োগ বৃদ্ধিৰ বাবে এটা উচৰ্গিত ৰাজস্থান এআই পৰ্টেল-ৰ লগতে ৰাজস্থান এআই/এমএল নীতি ২০২৬ আৰম্ভ কৰা, আৰু ৰাজ্যখনত এনিমেশ্যন, ভিএফএক্স, গে’মিং, কমিক্স, আৰু এক্সটেণ্ডেড ৰিয়েলিটী পৰিতন্ত্ৰ শক্তিশালী কৰিবলৈ ৰাজস্থান এভিজিচি-এক্সআৰ পৰ্টেল যুগুতোৱা হ’ব

৪) ৰাষ্ট্ৰীয় প্ৰাথমিকতাসমূহৰ সৈতে মিল থকা বৃহৎ পৰিসৰৰ এ আই পৰিতন্ত্ৰ গঢ়ি তুলিবলৈ ৰাজ্যিক পুঁজিৰ সহায়ত উত্তৰ প্ৰদেশ এ আই মিছন-ৰ ঘোষণা

৫) ৰাজহুৱা সেৱা প্ৰদানৰ বাবে মহাকাশ আৰু ভূ-স্থানীয় প্ৰযুক্তিৰ সৈতে এআই-ক একত্ৰিত কৰি মধ্যপ্ৰদেশ স্পেচটেক নীতি ২০২৬ আৰম্ভ কৰা

৬) এ আই গৱেষণা, দক্ষতা আৰু উদ্ভাৱনক আগুৱাই নিয়াৰ বাবে ভাৰত এ আই মিছন, ৰাজ্য চৰকাৰ, শিক্ষাবিদ আৰু উদ্যোগৰ মাজত একাধিক বুজাবুজি চুক্তি স্বাক্ষৰ কৰা

7. ৰাজ্যিক পৰ্যায়ত পৰিমাপযোগ্য, সুৰক্ষিত আৰু নাগৰিক-কেন্দ্ৰিক এআই মোতায়েন সমৰ্থন কৰিবলৈ এআই ষ্টেকসমূহ আৰু ক্লাউড অভিগ্ৰহণ কাঠামোসমূহ মুকলি কৰা

৮) দক্ষতা আৰু নাগৰিক সেৱা প্ৰদানৰ উন্নতিৰ বাবে এআই সক্ষম ডিজিটেল পৰ্টেল আৰু শাসন মঞ্চ আৰম্ভ কৰা

৯) স্থানীয় প্ৰতিভাসমূহৰ প্ৰচাৰৰ বাবে হেকাথন আৰু প্ৰতিযোগিতাকে ধৰি ৰাজ্যসমূহৰ নেতৃত্বত এআই ব্যৱহাৰৰ ক্ষেত্ৰ, ষ্টাৰ্টআপ আৰু উদ্ভাৱন প্ৰত্যাহ্বানসমূহ প্ৰদৰ্শন কৰা

১০) ইণ্ডিয়া এ আই ইমপেক্ট ছামিট ২০২৬ৰ কাৰ্যসূচী আৰু ফলাফলত পোনপটীয়াকৈ সহযোগিতা আগবঢ়াবলৈ আঞ্চলিক পৰামৰ্শ

১১) এআই গৱেষণা, দক্ষতা, নৈতিক কাঠামো, আৰু উদ্ভাৱন পৰিতন্ত্ৰক আগুৱাই নিয়াৰ বাবে গুগল, আই আই টি দিল্লী, নেচশ্যনেল ল ইউনিভাৰ্চিটী, যোধপুৰ, আৰু ৰাজস্থানৰ স্কিল ডেভেলপমেণ্ট নেটৱৰ্ক (ৱাধৱানী ফাউণ্ডেশ্যন)ৰ সৈতে বুজাবুজিৰ চুক্তিপত্ৰ (এম অ’ ইউ) স্বাক্ষৰ।

****

MSZ/KB