اٹل اختراعی مشن (اے آئی ایم)، جو نیتی آیوگ کے تحت کام کرتا ہے، نے آج تریپورہ میں پہلا ریاستی اختراعی مشن (ایس آئی ایم) شروع کیا، جو ریاست کی طویل مدتی ترقیاتی حکمتِ عملی میں اختراع اور صنعت کاری کو شامل کرنے کی سمت ایک اہم قدم ہے۔

ریاستی اختراعی مشن، اے آئی ایم 2.0 پروگرام کا حصہ ہے جسے نیتی آیوگ کے ریاستی تعاون مشن (ایس ایس ایم) کے تحت منظوری دی گئی ہے۔ اسے ایک طویل مدتی ادارہ جاتی نظام کے طور پر تیار کیا گیا ہے تاکہ ریاستوں اور مرکز کے زیر انتظام علاقوں کو مضبوط، جامع اور مقامی تقاضوں سے ہم آہنگ اختراعی ماحولیاتی نظام کی تعمیر میں مدد فراہم کی جا سکے، جو قومی ترجیحات اور مقامی صلاحیتوں سے مطابقت رکھتے ہوں۔

افتتاحی تقریب اگرتلہ کے ہاپانیا بین الاقوامی نمائشی مرکز میں منعقد ہوئی، جس میں تریپورہ کے وزیر اعلیٰ پروفیسر (ڈاکٹر) مانک ساہا، نیتی آیوگ کے نائب چیئرمین جناب سمن بیری، مرکزی وزیر مملکت ڈاکٹر جتیندر سنگھ اور نیتی آیوگ کے رکن ڈاکٹر وی کے سارسوت موجود تھے۔

وزیر اعلیٰ پروفیسر (ڈاکٹر) مانک ساہا نے اپنے خطاب میں ریاستی اختراعی مشن کے تحت کئی مستقبل بین اقدامات کا اعلان کیا۔ تریپورہ کے لیے ایس آئی ایم فریم ورک پیش کیا گیا، جس میں ٹرپرا انسٹی ٹیوشن فار ٹرانسفارمیشن (ٹی آئی ایف ٹی) کے تحت ایس آئی ایم کو ادارہ جاتی شکل دینا، ٹی-نیسٹ (تریپورہ – نرچرنگ انٹرپرینیورشپ اینڈ اسٹارٹ اپس) کا افتتاح بطور خصوصی انکیوبیشن و انوویشن مرکز تاکہ اسٹارٹ اپس کی پرورش کی جا سکے اور ’’میک فرام تریپورہ‘‘ حل کو فروغ دیا جا سکے، نیز ریاست کے تمام آٹھ اضلاع میں ٹی-نیسٹ سے منسلک انوویشن سینٹرز کا قیام شامل ہے تاکہ خواتین اور قبائلی برادریوں میں اختراع کو فروغ ملے۔

پروفیسر (ڈاکٹر) مانک ساہا نے بھارت کے ابتدائی ڈسٹرکٹ انوویٹر فیلوشپ (ڈی آئی ایف) پروگراموں میں سے ایک کا بھی آغاز کیا، جس کا مقصد نچلی سطح کے موجدین کی شناخت اور منظم معاونت کے ذریعے ان کی رہنمائی ہے۔ انہوں نے اعلان کیا کہ تریپورہ ذمہ دار اور جامع مصنوعی ذہانت کے وزیر اعظم نریندر مودی کے وژن سے ہم آہنگ ایک ریاستی اے آئی پالیسی متعارف کرائے گا، اور اگرتلہ میں عالمی ٹیکنالوجی شراکت داروں کے تعاون سے منفرد نوعیت کا اے آئی سٹی قائم کیا جائے گا، جس سے ریاست اے آئی پر مبنی اختراع اور حکمرانی کا مستقبل تیار مرکز بن سکے گی۔

ریاستی اختراعی مشن کے ذریعے، اے آئی ایم حکومتِ تریپورہ کے ساتھ قریبی تعاون میں طویل مدتی اختراعی و صنعت کاری حکمتِ عملی کی تیاری اور نفاذ میں مدد کرے گا، جو ریاست کی معاشی ترجیحات، شعبہ جاتی صلاحیتوں اور ترقیاتی اہداف سے ہم آہنگ ہوگی۔ ایس آئی ایم کا مقصد اختراعی ماحولیاتی نظام کو صلاحیت سازی، پالیسی معاونت، شراکت داری، باہمی سیکھنے اور پروگراماتی مداخلتوں کے ذریعے مضبوط بنانا ہے۔

اس موقع پر خطاب کرتے ہوئے سائنس و ٹیکنالوجی کے مرکزی وزیر مملکت (آزادانہ چارج) ڈاکٹر جتیندر سنگھ نے اٹل اختراعی مشن کو وزیر اعظم نریندر مودی کا تصور کردہ دور اندیش اقدام قرار دیا۔ انہوں نے کہا کہ اے آئی ایم نے حکمرانی میں اختراع کی نئی ثقافت متعارف کرائی اور گزشتہ برسوں میں ٹھوس نتائج فراہم کیے ہیں۔ انہوں نے مشاہدہ کیا کہ پلاننگ کمیشن سے نیتی آیوگ کی منتقلی اور اے آئی ایم کے قیام نے روایتی منصوبہ بندی سے اختراع پر مبنی ترقی کی جانب تبدیلی کو ظاہر کیا، جس سے ریاستوں کو ترقی کے فعال محرک بننے کا موقع ملا۔ تریپورہ کے حوالے سے انہوں نے کہا کہ ایس آئی ایم کا آغاز اس بات کی عکاسی کرتا ہے کہ ریاستیں کس طرح اے آئی ایم فریم ورک سے فائدہ اٹھا کر مقامی صلاحیتوں کو اجاگر کر سکتی ہیں اور قومی ترقی کی ابھرتی قوت بن سکتی ہیں۔

اٹل اختراعی مشن کے مشن ڈائریکٹر دیپک بگلا نے ریاستی قیادت میں اختراعی نظام کو مضبوط بنانے کے اے آئی ایم کے نقطۂ نظر کو اجاگر کرتے ہوئے کہا کہ وزیر اعظم کا وژن اختراع پر مبنی آتم نربھرتا کی تعمیر ہے اور ریاستی اختراعی مشن اسی وژن کو عملی جامہ پہنانے کی کوشش ہے۔ انہوں نے کہا کہ جب ہر ضلع، ہر تعلیمی ادارہ اور ہر برادری کی صلاحیت کو قومی ترقی کا محرک بنایا جائے گا تو اختراع کی یہ قومی مہم حقیقی معنوں میں جامع بنے گی۔

ریاستی اختراعی مشن تریپورہ میں اسکولی سطح سے اختراعی تعلیم اور صنعت کاری کے رجحان کو فروغ دینے میں بھی مدد کرے گا، جبکہ اسٹارٹ اپس اور موجدین کو بنیادی ڈھانچے، رہنمائی اور مالی معاونت تک رسائی فراہم کی جائے گی۔ اس مشن میں شمولیت، علاقائی توازن اور حکومت، تعلیمی اداروں، صنعت اور سول سوسائٹی کے درمیان تعاون پر خصوصی زور دیا گیا ہے۔

تریپورہ میں ایس آئی ایم کا آغاز گزشتہ ایک سال کے دوران اے آئی ایم اور ریاست کے درمیان جاری تعاون کا تسلسل ہے اور یہ اس عزم کی عکاسی کرتا ہے کہ اختراع پر مبنی ترقی کے ذریعے وِکست بھارت 2047 کے قومی وژن کو حقیقت میں بدلنے کے لیے ریاستوں اور مرکز کے زیر انتظام علاقوں کو کلیدی شراکت دار بنایا جائے۔

************

ش ح ۔   م    د۔  م  ص

(U :3110 )

(ریلیز آئی ڈی: 2233246) وزیٹر کاؤنٹر : 9