റോഡ് ഗതാഗത, ഹൈവേ മന്ത്രാലയം
റോഡ് നിര്മാണത്തില് ഗുണനിലവാരം ഉറപ്പാക്കുന്ന നൂതന സാങ്കേതിക വിദ്യയുമായി റോഡ് ഗതാഗത& ദേശീയപാത മന്ത്രാലയം
പോസ്റ്റഡ് ഓണ്:
23 FEB 2026 6:32PM by PIB Thiruvananthpuram
രാജ്യത്തെ ദേശീയപാതകള്ക്ക് വാക്കുകളിലൂടെയല്ല, മറിച്ച് ഡാറ്റ, പരിശോധന, നിര്ണായക നടപടികള് എന്നിവയിലൂടെ സംസാരിക്കാന് കഴിഞ്ഞാലോ? രാജ്യം അഭൂതപൂര്വമായ തോതില് റോഡുകള് നിര്മ്മിക്കുമ്പോള്, കേവലം റോഡ് ശൃംഖല വികസിപ്പിക്കുന്നതില് നിന്ന് ലോകോത്തര നിലവാരം, സുരക്ഷ, വിശ്വാസ്യത എന്നിവ ഉറപ്പാക്കുന്നതിലേക്ക് ഇപ്പോള് ശ്രദ്ധ കേന്ദ്രീകരിച്ചിരിക്കുന്നു.
ആ ദിശയിലേക്കുള്ള വ്യക്തമായ ഒരു ചുവടുവയ്പ്പാണ് മൊബൈല് ഗുണനിലവാര പരിശോധന വാനുകള് (MQCV) ഉപയോഗിച്ച് ദേശീയ പാതകളിലെ നിര്മാണ ഗുണനിലവാരം സൂക്ഷ്മമായി നിരീക്ഷിക്കുന്നതിനുള്ള കേന്ദ്ര ഉപരിതല ഗതാഗത, ഹൈവേ മന്ത്രാലയത്തിന്റെ (MoRTH) പൈലറ്റ് പദ്ധതി. രാജസ്ഥാന്, ഗുജറാത്ത്, കര്ണാടക, ഒഡീഷ എന്നീ നാല് സംസ്ഥാനങ്ങളില് പൈലറ്റ് പദ്ധതി നടപ്പിലാക്കിയിട്ടുണ്ട്.
ലക്ഷ്യം ലളിതവും കേന്ദ്രീകൃതവുമാണ്
പുരോഗമിച്ചുകൊണ്ടിരിക്കുന്ന ദേശീയപാത നിര്മാണത്തിന്റെ ഗുണനിലവാരം വേഗത്തില് നിര്ണ്ണയിക്കാന് ഈ മൊബൈല് ഗുണനിലവാര പരിശോധനാ വാനുകള് ഉപയോഗിക്കും. ഓരോ മൊബൈല് വാനും ഒരു സഞ്ചരിക്കുന്ന ലബോറട്ടറിയായി പ്രവര്ത്തിക്കുന്നു. പൂര്ണ്ണമായും സുരക്ഷിതമായ പരിശോധന ഉപകരണങ്ങള് കൊണ്ട് ഇവ സജ്ജീകരിച്ചിരിക്കുന്നു. ഈ വാനില് അള്ട്രാസോണിക് പള്സ് വെലോസിറ്റി മീറ്ററുകള്, റീബൗണ്ട് ഹാമറുകള്, അസ്ഫാല്ട്ട് ഡെന്സിറ്റി ഗേജുകള്, റിഫ്ലക്റ്റോ മീറ്ററുകള് എന്നിവ ഉള്പ്പെടുന്നു.
മൊബൈല് ഗുണനിലവാര പരിശോധന വാനുകള്: ലാബുകള് ഹൈവേയിലേക്ക് എത്തുന്നു
നിര്മാണ പ്രവര്ത്തനത്തെ തടസ്സപ്പെടുത്താതെ, റോഡുകളുടെ നിര്മാണ ഗുണനിലവാരം പരിശോധിക്കാന് സഹായിക്കുന്ന നൂതനമായ നോണ്ഡിസ്ട്രക്റ്റീവ് പരിശോധന ഉപകരണങ്ങളാണ്
MQCVകളുടെ സവിശേഷത.
റീബൗണ്ട് ഹാമറുകള്: ഉപരിതല കാഠിന്യം വിലയിരുത്തുന്നതിനും സൈറ്റിലെ കാഠിന്യമുള്ള കോണ്ക്രീറ്റ് ഘടനകളുടെ കരുത്ത് കണക്കാക്കുന്നതിനും ഈ പരിശോധന ഉപയോഗിക്കുന്നു.
അള്ട്രാസോണിക് പള്സ് വെലോസിറ്റി മീറ്റര്: ഇത് കോണ്ക്രീറ്റിലൂടെ ശബ്ദ തരംഗങ്ങള് അയയ്ക്കുകയും വിള്ളലുകള്, ശൂന്യ ഇടങ്ങള് , ഘടനാ വ്യത്യാസം എന്നിവ പരിശോധിക്കുകയും ചെയ്യുന്നു.
അസ്ഫാല്ട്ട് ഡെന്സിറ്റി ഗേജുകള്: നടപ്പാതയുടെ ദീര്ഘായുസ് ഉറപ്പാക്കാന് ശരിയായ അസ്ഫാല്ട്ട് സാന്ദ്രത പരിശോധിക്കുന്നതിന് നിര്മാണ സ്ഥലത്ത് വേഗതയേറിയതും ന്യൂക്ലിയര് ഇതരവുമായ പരിശോധന നടത്തുന്ന പോര്ട്ടബിള് ഉപകരണങ്ങളാണിവ.
ഭാരം കുറഞ്ഞ ഡിഫ്ലെക്റ്റോ മീറ്റര്: ഹൈവേകള് ദീര്ഘകാലം നിലനില്ക്കുന്നതിന് സ്ഥിരതയുള്ള അടിത്തറ ഉറപ്പാക്കാന് മണ്ണിന്റെയും ഗ്രാനുലാര് പാളിയുടെയും സാന്ദ്രത കണക്കാക്കാന് ഇത് സഹായിക്കുന്നു.
റിഫ്ലെക്റ്റോ മീറ്ററുകള്: റോഡ് അടയാളങ്ങളുടെയും അടയാളപ്പെടുത്തലുകളുടെയും ദൃശ്യപരത ഇത് വിലയിരുത്തുന്നു. അവ വാഹനമോടിക്കുന്നവര്ക്ക് രാവും പകലും വ്യക്തമായി വായിക്കാന് കഴിയുന്നുണ്ടെന്ന് ഉറപ്പാക്കുന്നു.
ഈ സാങ്കേതികവിദ്യകള് ഒരുമിച്ച്, ഗുണനിലവാര നിയന്ത്രണത്തിലൂടെ ഇന്ത്യയിലെ ഹൈവേകളിലെ സുരക്ഷ, ഈട്, വിശ്വാസ്യത എന്നിവ മുന്കൂട്ടിയുള്ള ഉറപ്പാക്കി മാറ്റുന്നു.
പരിശോധനാ ഫലങ്ങള് മന്ത്രാലയം അതിന്റെ ഫീല്ഡ് ഓഫീസുകളുമായി പങ്കിടും. എന്തെങ്കിലും ഗുണനിലവാര പോരായ്മകള് കണ്ടെത്തിയാല്, ഫീല്ഡ് ഓഫീസ് ഉചിതമായ നടപടി സ്വീകരിക്കും. പൈലറ്റ് പ്രോജക്റ്റ് അടുത്ത ഘട്ടത്തിലേക്ക് കടക്കുമ്പോള്, ഈ വാനുകള് സൃഷ്ടിക്കുന്ന ടെസ്റ്റ് റിപ്പോര്ട്ടുകള് ഓണ്ലൈനില് ലഭ്യമാക്കുന്നതിനായി മന്ത്രാലയം, ദേശീയപാത ഗുണനിലവാര നിരീക്ഷണ പോര്ട്ടല് വികസിപ്പിച്ചുകൊണ്ടിരിക്കുകയാണ്. മൊബൈല് വാനുകളുടെ തത്സമയ ജിപിഎസ് ട്രാക്കിംഗ് ഈ പോര്ട്ടല് വഴി നല്കുന്നു. ഇത് ദേശീയ പാതകളിലുടനീളം സുതാര്യമായ നിരീക്ഷണവും ഗുണനിലവാര പരിശോധനകളുടെ ഡാറ്റാധിഷ്ഠിത മേല്നോട്ടവും അനുവദിക്കുന്നു .
അടുത്ത ഘട്ടത്തിലേക്ക്:
ഈ മൊബൈല് ഗുണനിലവാര നിയന്ത്രണ സംവിധാനം കൂടുതല് സംസ്ഥാനങ്ങളിലേക്ക് വ്യാപിപ്പിക്കാന് ഒരുങ്ങുന്നു: ഉത്തര്പ്രദേശ്, മഹാരാഷ്ട്ര, ബീഹാര്, ഝാര്ഖണ്ഡ്, ആന്ധ്രാപ്രദേശ്, തെലങ്കാന, തമിഴ്നാട്, മധ്യപ്രദേശ്, ഛത്തീസ്ഗഢ്, അസം, മേഘാലയ എന്നിവയുള്പ്പെടെ 11 സംസ്ഥാനങ്ങളിലായി എംക്യുസിവികളുടെ അടുത്ത ഘട്ടം ഇതിനകം മന്ത്രാലയം ആസൂത്രണം ചെയ്തിട്ടുണ്ട്. എംക്യുസിവികളുടെ അടുത്ത ഘട്ടത്തിനായുള്ള ടെന്ഡറുകള് ഇതിനോടകം ക്ഷണിച്ചിട്ടുണ്ട്. രാജ്യത്തെ ദേശീയപാതകള് വേഗത്തില് നിര്മിക്കുക മാത്രമല്ല, ഉത്തരവാദിത്വത്തോടെയും നിര്മിക്കുമെന്ന വാഗ്ദാനം ശക്തിപ്പെടുത്തിക്കൊണ്ട് 2026 ജൂണില് ഇവ കമ്മീഷന് ചെയ്യുമെന്ന് പ്രതീക്ഷിക്കുന്നു.
****
( റിലീസ് ഐ.ഡി: 2231949)
സന്ദര്ശക കൗണ്ടര് : 9