ਕੇਂਦਰੀ ਗ੍ਰਹਿ ਅਤੇ ਸਹਿਕਾਰਤਾ ਮੰਤਰੀ ਸ਼੍ਰੀ ਅਮਿਤ ਸ਼ਾਹ ਅੱਜ ਗੁਜਰਾਤ ਦੇ ਵਡੋਦਰਾ ਵਿੱਚ ਮਹਾਸ਼ਿਵਰਾਤ੍ਰੀ ਦੇ ਮੌਕੇ ‘ਤੇ ਸ਼ਿਵ ਪਰਿਵਾਰ ਦੀ ਮਹਾਆਰਤੀ ਵਿੱਚ ਸ਼ਾਮਲ ਹੋਏ। ਇਸ ਮੌਕੇ ‘ਤੇ ਕਈ ਪਤਵੰਤੇ ਮੌਜੂਦ ਸਨ। 

ਇਕੱਠ ਨੂੰ ਸੰਬੋਧਨ ਕਰਦੇ ਹੋਏ, ਕੇਂਦਰੀ ਗ੍ਰਹਿ ਅਤੇ ਸਹਿਕਾਰਤਾ ਮੰਤਰੀ, ਸ਼੍ਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਜਦੋਂ ਕੋਈ ਨੇਕ ਵਿਅਕਤੀ ਸੱਚੇ ਮਨੋਂ ਸੰਕਲਪ ਲੈਂਦਾ ਹੈ, ਤਾਂ ਪ੍ਰਮਾਤਮਾ ਦੀ ਕਿਰਪਾ ਨਾਲ ਮੁਸ਼ਕਲ ਤੋਂ ਮੁਸ਼ਕਲ ਸੰਕਲਪ ਵੀ ਪੂਰਾ ਹੋ ਜਾਂਦਾ ਹੈ ਅਤੇ ਬਹੁਤ ਵਾਰ ਤਾਂ ਉਹ ਇੱਕ ਪਰੰਪਰਾ ਦੇ ਰੂਪ ਵਿੱਚ ਤਬਦੀਲ ਹੋ ਜਾਂਦਾ ਹੈ। ਇਸ ਦੀ ਸਭ ਤੋਂ ਵੱਡੀ ਜੀਵੰਤ ਉਦਾਹਰਣ ਸਰਵੇਸ਼ਵਰ ਮਹਾਦੇਵ ਦੀ ਇਹ ਵਿਸ਼ਾਲ ਪ੍ਰਤਿਮਾ ਹੈ, ਜੋ ਕਿ ਅੱਜ ਸ਼ਿਵਰਾਤ੍ਰੀ ਦੇ ਮੌਕੇ ‘ਤੇ ਸਾਡੇ ਸਾਰਿਆਂ ਦੇ ਸਾਹਮਣੇ ਇੱਕ ਚਮਤਕਾਰ ਵਾਂਗ ਖੜ੍ਹੀ ਹੈ। ਉਨ੍ਹਾਂ ਕਿਹਾ ਕਿ ਸਾਵਲੀ ਵਾਲੇ ਮਹਾਰਾਜ ਨੇ ਤਿੰਨ ਮਹਾਨ ਸੰਕਲਪ ਲਏ ਸਨ- ਸੁਰ ਸਾਗਰ ਦੇ ਵਿਚਕਾਰ ਸ਼ਾਨਦਾਰ ਸ਼ਿਵ ਪ੍ਰਤਿਮਾ ਦੀ ਸਥਾਪਨਾ, ਸ਼ਿਵਰਾਤ੍ਰੀ ਦੇ ਦਿਨ ਵਡੋਦਰਾ ਵਿੱਚ ਸ਼ਿਵਜੀ ਦੀ ਸ਼ਾਨਦਾਰ ਸਵਾਰੀ ਦਾ ਆਯੋਜਨ ਅਤੇ ਗਣੇਸ਼ ਜੀ ਦੀ ਸਥਾਪਨਾ। ਇਹ ਤਿੰਨੋਂ ਸੰਕਲਪ ਸਾਡੀਆਂ ਅੱਖਾਂ ਦੇ ਸਾਹਮਣੇ ਸਾਕਾਰ ਰੂਪ ਵਿੱਚ ਮੌਜੂਦ ਹਨ। ਸ਼੍ਰੀ ਸ਼ਾਹ ਨੇ ਕਿਹਾ ਕਿ ਪੂਜਨੀਕ ਸਾਵਲੀ ਵਾਲੇ ਸਵਾਮੀ ਦੇ ਇਸ ਮਹਾਨ ਸੰਕਲਪ ਨੂੰ ਸਿੱਧ ਕਰਨ ਵਿੱਚ ਅਨੇਕਾਂ ਭਗਤਾਂ ਨੇ ਅਹਿਮ ਭੂਮਿਕਾ ਨਿਭਾਈ ਹੈ। ਉਨ੍ਹਾਂ ਕਿਹਾ ਕਿ ਇਹ ਸੰਕਲਪ ਘਰ-ਪਰਿਵਾਰ ਤੱਕ ਸੀਮਤ ਨਹੀਂ ਰਿਹਾ, ਸਗੋਂ ਇਸ ਨੇ ਪੂਰੇ ਵਡੋਦਰਾ ਸ਼ਹਿਰ ਦੇ ਨਾਗਰਿਕਾਂ ਨੂੰ ਇੱਕ ਸੂਤਰ ਵਿੱਚ ਬੰਨ੍ਹ ਦਿੱਤਾ ਹੈ।

ਅਮਿਤ ਸ਼ਾਹ ਨੇ ਕਿਹਾ ਕਿ ਅੱਜ, ਸ਼ਿਵਰਾਤ੍ਰੀ ਦਾ ਜ਼ਿਕਰ ਕਾਸ਼ੀ, ਕੋਇੰਬਟੂਰ, ਰਾਮੇਸ਼ਵਰਮ ਜਾਂ ਗਿਰ ਸੋਮਨਾਥ ਵਿੱਚ ਕਿਤੇ ਵੀ ਹੋਵੇ, ਸੁਰ ਸਾਗਰ ਦੇ ਸਰਵੇਸ਼ਵਰ ਮਹਾਦੇਵ ਦਾ ਨਾਮ ਪੂਰੇ ਦੇਸ਼ ਵਿੱਚ ਗੂੰਜਦਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਵਿਸ਼ਾਲ ਉਪਰਾਲਾ, ਸਮੂਹਿਕ ਸੰਕਲਪ ਸਾਂਝੇ ਸੰਕਲਪ ਅਤੇ ਸੰਤਾਂ ਦੇ ਆਸ਼ੀਰਵਾਦ ਦਾ ਹੀ ਨਤੀਜਾ ਹੈ, ਜਿਸਨੇ ਇਸ ਝੀਲ ਨੂੰ ਆਸਥਾ ਅਤੇ ਸ਼ਰਧਾ ਦੇ ਮੁੱਖ ਕੇਂਦਰ ਵਿੱਚ ਬਦਲ ਦਿੱਤਾ ਹੈ।

ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਅੱਜ ਦੇਸ਼ ਦਾ ਕੋਈ ਵੀ ਪਿੰਡ ਅਜਿਹਾ ਨਹੀਂ ਹੋਵੇਗਾ ਜਿੱਥੇ ਸ਼ਿਵਰਾਤ੍ਰੀ ਦਾ ਉਤਸਵ ਨਾ ਮਨਾਇਆ ਜਾ ਰਿਹਾ ਹੋਵੇ। ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ ਸਾਡੇ ਆਤਮ ਸਨਮਾਨ ਦੇ ਪ੍ਰਤੀਕਾਂ ਨੂੰ ਉਨ੍ਹਾਂ ਦੇ ਮਾਣ ਦੇ ਸਹੀ ਸਥਾਨ 'ਤੇ ਬਹਾਲ ਕਰਨ ਦਾ ਸੰਕਲਪ ਲਿਆ ਹੈ। ਉਨ੍ਹਾਂ ਦੀ ਅਗਵਾਈ ਵਿੱਚ, ਇਹ ਕੰਮ ਲਗਾਤਾਰ ਅੱਗੇ ਵਧ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਅਯੋਧਿਆ ਵਿੱਚ ਕਈ ਦਹਾਕਿਆਂ ਤੋਂ ਰਾਮ ਲੱਲਾ ਇੱਕ ਸਧਾਰਣ ਟੈਂਟ ਵਿੱਚ ਵਿਰਾਜਮਾਨ ਸਨ, ਪਰ ਪ੍ਰਧਾਨ ਮੰਤਰੀ ਮੋਦੀ ਦੀ ਅਗਵਾਈ ਵਿੱਚ, ਉਨ੍ਹਾਂ ਨੂੰ ਹੁਣ ਇੱਕ ਵਿਸ਼ਾਲ ਮੰਦਿਰ ਵਿੱਚ ਸਥਾਪਿਤ ਕੀਤਾ ਗਿਆ ਹੈ। ਸ਼੍ਰੀ ਸ਼ਾਹ ਨੇ ਕਿਹਾ ਕਿ ਇਹ ਲੱਖਾਂ ਲੋਕਾਂ ਦਾ ਸੰਕਲਪ ਸੀ ਕਿ ਅਯੋਧਿਆ ਵਿੱਚ ਭਗਵਾਨ ਸ਼੍ਰੀ ਰਾਮ ਦੇ ਜਨਮ ਸਥਾਨ 'ਤੇ ਇੱਕ ਸ਼ਾਨਦਾਰ ਮੰਦਿਰ ਬਣਾਇਆ ਜਾਵੇ। ਬਾਬਰ ਦੇ ਸਮੇਂ ਤੋਂ ਲੈ ਕੇ ਅੱਜ ਤੱਕ, ਇਹ ਸੰਕਲਪ ਅਧੂਰਾ ਰਿਹਾ, ਪਰ ਅਸੀਂ ਖੁਸ਼ਕਿਸਮਤ ਹਾਂ ਕਿ ਹੁਣ, ਅਯੋਧਿਆ ਦੀ ਉਸੇ ਪਵਿੱਤਰ ਧਰਤੀ 'ਤੇ, ਭਗਵਾਨ ਸ਼੍ਰੀ ਰਾਮ ਦੀ ਇੱਕ ਸ਼ਾਨਦਾਰ ਮੂਰਤੀ ਸਥਾਪਿਤ ਹੋ ਚੁੱਕੀ ਹੈ। ਗ੍ਰਹਿ ਮੰਤਰੀ ਨੇ ਅੱਗੇ ਕਿਹਾ ਕਿ ਇਸੇ ਤਰ੍ਹਾਂ ਕਾਸ਼ੀ ਵਿੱਚ, ਔਰੰਗਜ਼ੇਬ ਨੇ ਕਾਸ਼ੀ ਵਿਸ਼ਵਨਾਥ ਮੰਦਿਰ ਨੂੰ ਤਬਾਹ ਕਰ ਦਿੱਤਾ ਸੀ। ਅੱਜ, ਮੋਦੀ ਜੀ ਦੀ ਅਗਵਾਈ ਵਿੱਚ, ਕਾਸ਼ੀ ਵਿਸ਼ਵਨਾਥ ਕੌਰੀਡੋਰ ਬਹੁਤ ਸ਼ਾਨ ਨਾਲ ਮੁੜ-ਦੁਬਾਰਾ ਬਣਾਇਆ ਗਿਆ ਹੈ।

ਅਮਿਤ ਸ਼ਾਹ ਨੇ ਕਿਹਾ ਕਿ ਪਿਛਲੇ ਇੱਕ ਹਜ਼ਾਰ ਵਰ੍ਹਿਆਂ ਵਿੱਚ, ਸੋਮਨਾਥ ਦੇ ਜੋਤਿਰਲਿੰਗ 'ਤੇ ਹਮਲਾਵਰਾਂ ਨੇ ਅਣਗਿਣਤ ਵਾਰ ਹਮਲਾ ਕੀਤਾ ਹੈ। ਹਾਲਾਂਕਿ, ਸਰਦਾਰ ਵੱਲਭਭਾਈ ਪਟੇਲ, ਕੇ. ਐੱਮ. ਮੁਨਸ਼ੀ ਅਤੇ ਭਾਰਤ ਦੇ ਪਹਿਲੇ ਰਾਸ਼ਟਰਪਤੀ ਡਾ. ਰਾਜੇਂਦਰ ਪ੍ਰਸਾਦ ਦੇ ਦ੍ਰਿੜ੍ਹ ਇਰਾਦੇ ਕਾਰਨ, ਮੰਦਿਰ ਦੀ ਮੁੜ ਉਸਾਰੀ ਹੋਈ। ਅੱਜ, ਇਹ ਮੰਦਿਰ ਉਨ੍ਹਾਂ ਸਾਰੇ ਹਮਲਿਆਂ ਨੂੰ ਹਰਾਉਂਦੇ ਹੋਏ ਸਨਾਤਨ ਧਰਮ ਦੀ ਪ੍ਰਚੰਡ ਜਿੱਤ ਦਾ ਪ੍ਰਤੀਕ ਬਣ ਕੇ ਅਰਬ ਸਾਗਰ ਦੇ ਕੰਢੇ 'ਤੇ ਮਜ਼ਬੂਤੀ ਨਾਲ ਖੜ੍ਹਾ ਹੈ। ਉਨ੍ਹਾਂ ਕਿਹਾ ਕਿ ਭਾਵੇਂ ਸੋਮਨਾਥ ਮੰਦਿਰ ‘ਤੇ ਹੋਏ ਹਮਲੇ ਦੇ 1000 ਵਰ੍ਹੇ ਪੂਰੇ ਹੋਣ ਦੇ ਮੌਕੇ ‘ਤੇ ਇਸ ਵਰ੍ਹੇ 'ਸੋਮਨਾਥ ਸਵਾਭਿਮਾਨ ਪਰਵ' ਮਨਾਇਆ ਜਾ ਰਿਹਾ ਹੈ। ਸ਼੍ਰੀ ਸ਼ਾਹ ਨੇ ਅੱਗੇ ਕਿਹਾ, ਦੇਸ਼ ਨੂੰ ਬਸਤੀਵਾਦੀ ਗੁਲਾਮੀ ਦੇ ਸਾਰੇ ਪ੍ਰਤੀਕਾਂ ਤੋਂ ਇੱਕ-ਇੱਕ ਕਰਕੇ ਮੁਕਤ ਕਰਦੇ ਹੋਏ, ਮੋਦੀ ਜੀ ਨੇ ਦੇਸ਼ ਵਾਸੀਆਂ ਦੇ ਮਨਾਂ ਵਿੱਚੋਂ ਸਮੂਹਿਕ ਹੀਣ ਭਾਵਨਾ ਨੂੰ ਖਤਮ ਕਰ ਦਿੱਤਾ ਹੈ।

************

ਆਰਕੇ/ਪੀਆਰ/ਪੀਐੱਸ/ਬਲਜੀਤ ਸਿੰਘ