প্রধান মন্ত্রী শ্রী নরেন্দ্র মোদীনা লিশিং অনিগা কুনতরুক্কী ফেব্রুৱারি তরামরিদা অসামদা চৎকনি, অযুক্কি পুং তরা মখাই তাবা মতমদা দিব্রুগরগী মোরান বাইপাসতা লৈবা ইমরজেন্সি লেন্দিং ফেসিলিতি (ই.এল.এফ.)দা লেন্দা তৌগনি, মফম অদুদা মহাক্না ফাইতরশিং, ত্রান্সপোর্তশিং অমসুং হেলিকোপ্তরশিংগী এয়র দিসপ্লে উবা ফংগনি। চাওরাক্না নুংথিলগী পুং অমরোম তাবা মতমদা প্রধান মন্ত্রীনা তুরেল ব্রহ্মপুত্রগী অরাপ্পদা কুমার ভাস্কর বর্মা সেতুদা চৎকনি। মদুগী মতুংদা চাওরাক্না নুংথিলগী পুং অমা মখাইরোম তাবদা প্রধান মন্ত্রীনা গুৱাহাতিগী লাচিৎ ঢাৎতা লুপা কোতি লিশিং মঙাগা চামরি য়াঙ্খৈ হেনবগী তোঙান তোঙানবা প্রোজেক্তশিং শঙ্গাগনি অমসুং ফ্লেগ ওফ তৌগনি।

ইমরজেন্সি লেন্দিং ফেসিলিতি (ই.এল.এফ.) অসি অৱাং-নোংপোক ভারততা মখল অসিগী অহানবা ওইরি। মসি ইমরজেন্সিগী মতমদা মিলিতরি অমসুং সিভিল এয়রক্রাফশিং লেন্দিং অমসুং তেক-ওফ তৌবদা মতেং পাংনবা ইন্দিয়ন এয়র ফোর্সকা কোওরদিনেসন তৌদুনা অখন্ননা দিজাইন তৌখ্রে অমসুং ছাখ্রে। মসিনা ইমরজেন্সি রেসপোন্সকিদমক্তা মরুওইবা লন অমা ওইনা থবক তৌগনি, মসিনা অৱাং-নোংপোক্তা মহৌশাগী ওইবা খুদোংথিবা নত্রগা স্ত্রেতেজিক ওইবা মথৌ তাবশিংদা রেস্ক্যু অমসুং রিলিফ ওপরেসনশিং থুনা শিজিন্নবা য়াহনগনি। দ্যুএল-যুজ ইনফ্রাস্ত্রকচর ওইনা খনগৎলবা ই.এল.এফ.না ফাইতর এয়রক্রাফ তন নিফু ফাওবা হেন্দল তৌবা ঙম্মি অমসুং এয়রক্রাফ তন হুম্ফুতরা মরি ফাওবগী  তেক-ওফ হেন্দল তৌবা ঙম্মি।

প্রধান মন্ত্রীনা কনেক্তিবিতি খোংজেল যাংহনবা, দিজিতেল ইনফ্রাস্ত্রকচর মপাঙ্গল কনখৎহনবা, অৱাংবা থাক্কি মহৈ-মশিং যোকখৎপা, অমসুং মীয়ামগী চত্থোক-চৎশিন হেনগৎহন্নবা পান্দম থম্লিবা মরুওইবা প্রোজেক্তা কয়া অমা হৌদোক্কনি, মদুনা অৱাং-নোংপোক লমদমদা চাওখৎপদা মশক থোকপা থৌনা অমা পিগনি।

প্রধান মন্ত্রীনা চাওরাক্না লুপা কোতি লিশিং অহুমগা কুন্থ্রা চংনা শাবা ব্রহ্মপুত্র তুরেলগী মপান্দা কুমার ভাস্কর বর্মা সেতু শঙ্গাগনি। লেন তরুক্কী এক্সত্রাদোজ তৌরবা প্রিস্ত্রেস কংক্রিৎ (পি.এস.সি.) থোং অসিনা গুৱাহাতিবু নোংপোক গুৱাহাতিগা শম্নহল্লি অমসুং মসি অৱাং-নোংপোক ভারতকি অহানবা এক্সত্রাদোজ থোংনি। মসিনা গুৱাহাতি-নোর্থ গুৱাহাতিগী মরক্তা চত্থোক-চৎশিন তৌবগী মতম মিনিৎ তরেত্তা হন্থহল্লগনি। লমদম অসিগী অৱাংবা সিস্মিক অসি য়েংলগা, থোং অসিদা ফ্রিক্সন পেন্দলম বেরিং শিজিন্নদুনা বেজ আইসোলেসন তেক্নোলোজি য়াওরি। তেক্তা কায়দবা অমসুং মতম শাংনা স্ত্রকচরেল পরফোমেন্স শোয়দনা লৈহন্নবা হাই-পর্ফোর্মেন্স স্তে কেবলশিং অসি দ্যুরেবিলিতী অমসুং মতম শাংবা স্ত্রকচরেল পর্ফোরমেন্স লৈহন্নবা শিজিন্নরি{ রিএল-তাইম কন্দিসন মোনিতরিং, ঙন্না অমাং-অতা খঙদোকপা অমসুং এক্সত্রাদোজ তৌরবা থোং অসিগী সেফতি অমসুং সর্ভিস লাইফ ফগৎহন্নবগীদমক ব্রিজ হেল্থ মোনিতরিং সিস্তেম (বি.ঐচ.এম.এস.) অমসু য়াওহনখ্রে।

প্রধান মন্ত্রীনা অসামগী কামরুপ্ জিলাগী অমিনগাওদা অৱাং নোংপোক লমদমগী নেস্নেল দেতা সেন্তর শঙ্গাগনি। অপুনবা সেঙ্কসন তৌরবা লোদা মেগাৱাৎ নিপানগা দসমিক মঙা অমসুং রেক অমদা চাংচৎতা কিলোৱাৎ তরাগী রেক কেপাসিতী লৈবা অনৌবা মতমগী দেতা সেন্তর অসিনা তোঙান তোঙানবা সরকারগী দিপার্তমেন্তশিংগী মিসন-ক্রিতিকেল এপ্লিকেসনশিং থমগনি অমসুং অতোপ্পা নেস্নেল দেতা সেন্তরশিংগীদমক দিজাছ্ঢ় রিকোভরি সেন্তর অমা ওইনাসু থবক তৌগনি। মসিনা অৱাং-নোংপোককি সরকারশিংনা তঙাইফদবা নাগরিকশিংদা যুম্ফম ওইবা সরভিসশিং দিজিতেল ওইনা ফংহনবা ঙমহল্লগনি। দিজিতেল ইন্দিয়াগী মিৎয়েংগা চুশিন্নদুনা, নেস্নেল দেতা সেন্তর ফোর নোর্থ ইস্তর্ন রিজন অসি রিজন অসিগী আই.সি.তি.গী বেকবোন মপাঙ্গল কনখৎহন্নবা অমসুং অচেৎপা, সেক্যুর অমসুং মতম পুম্নমক্তা ফংগদবা দিজিতেল ইনফ্রাস্ত্রকচর শোয়দনা ফংহন্নবা স্ত্রেতেজিক ইন্তর্ভেন্সন অমা ওইনা খনখ্রে। প্রধান মন্ত্রীনা আই.আই.এম. গুৱাহাতিসু শঙ্গাগনি, মসিনা অৱাং-নোংপোক লমদমদা অৱাংবা থাক্কি মহৈ-মশিং অমসুং মেনেজমেন্ত এজুকেসন্দা অচৌবা ফিল্লিপ্ অমা পিরগনি।

প্রধান মন্ত্রীনা গুৱাহাতি (চামা), নাগপুর (য়াঙ্খৈ), ভাবনগর (য়াঙ্খৈ) অমসুং চন্দিগর (কুনমঙা)দা পি.এম.-ই-বস সেৱা স্কীমগী মখাদা ইলেক্ত্রিক বস চনিগা কুনমঙাসু লমথাগনি। সহর মরি অসিদা পি.এম.-ইবস সেৱা স্কীমগী মখাদা ই-বস ওপরেসনশিং হৌদোকপগা লোয়ননা নাগরিক লাখ য়াঙ্খৈ হেনবনা লু-নাল্লবা, মমল হোঙলবা অমসুং থাজবা য়াবা পব্লিক ত্রান্সপোর্তকি সর্ভিশশিং ফংবগী খুত্থাংদা কান্নবা ফংগনি হায়না পানরি, মসিনা সহরগী চত্থোক-চৎশিন ফগৎহনবা অমসুং পুন্সিগী মগুন হেনগৎহনবদা মতেং পাংগনি।

***