سائنس اور ٹیکنالوجی ، ارضیاتی علوم کے مرکزی وزیر مملکت (آزادانہ چارج) اور وزیر اعظم کے دفتر ، عملہ ، عوامی شکایات ، پنشن ، نیوکلیائی توانائی اور خلا کے وزیر مملکت ڈاکٹر جتیندر سنگھ نے آج راجیہ سبھا میں زور دے کر کہا کہ ہندوستان کا نیوکلیائی توانائی پروگرام فیصلہ کن توسیع کے مرحلے میں ہے ، جس میں پالیسی اصلاحات ، نجی شعبے کی شرکت اور 2047 تک واضح طور پر طے شدہ صلاحیت کے اہداف کی حمایت حاصل ہے ۔

وزیر موصوف نے کہا کہ ہندوستان کی نصب شدہ نیوکلیائی صلاحیت ، جو 2014 میں 4,780 میگاواٹ تھی ، بڑھ کر 8,780 میگاواٹ ہو گئی ہے اور 2031-32 تک 22,380 میگاواٹ ، 2037 تک 47 گیگاواٹ ، 2042 تک 67 گیگاواٹ اور 2047 تک 100 گیگاواٹ تک پہنچنے کا امکان ہے ۔  انہوں نے اس بات کی تصدیق کی کہ ہندوستان خود انحصاری اور اعتماد کے ساتھ آگے بڑھ رہا ہے ، اور یہ کہ جغرافیائی سیاسی پیش رفت جاری نیوکلیائی منصوبوں  میں پیش رفت کو برقراررکھے  گی ۔

آر گری راجن ، جے رام رمیش ، رام گوپال یادو اور ایم تھمبیدورائی کی طرف سے اٹھائے گئے ضمنی سوالات کا جواب دیتے ہوئے ، وزیر موصوف نے ٹائم لائنز ، بین الاقوامی مذاکرات ، ایندھن کی حفاظت ، سی ایس آر اقدامات ، اور پاور شیئرنگ انتظامات سے متعلق تشویشات پر توجہ مرکوزکی ۔

کڈانکولم نیوکلیائی بجلی پلانٹ سے متعلق سوالات کے جواب میں ڈاکٹر جتیندر سنگھ نے کہا کہ یونٹ 3 اور 4 کے 2026-27 تک مکمل کئے  جانے کا ہدف ہے ، جبکہ یونٹ 5 اور 6 کی تکمیل کاہدف  2030 تک طے کیا گیا ہے ۔  انہوں نے کہا کہ ہندوستان اور امریکہ کے تعلقات میں تبدیلیوں سمیت حالیہ جغرافیائی سیاسی پیش رفت کی وجہ سے کسی قسم کی خلل اندازی  کے بارے میں تشویش کی کوئی وجہ نہیں ہے ۔

پروجیکٹ سے متعلق ماضی کے حقائق کے بارے میں بتاتے ہوئے ، انہوں نے کہا کہ کڈانکولم پروجیکٹ کا تصور 1988 میں کیا گیا تھا ، تعمیر 2002 میں شروع ہوئی تھی ، اور موجودہ حکومت کے اقتدار سنبھالنے کے بعد پہلا یونٹ دسمبر 2014 میں کام کرنے لگا ۔  پچھلی دہائی کے اندر پہلے دو یونٹوں میں کام کاج ایک واضح نفاذ کے فریم ورک اور ٹائم لائنز پر نظم و ضبط کی پابندی کی عکاسی کرتا ہے ۔

16 کلومیٹر کے ایمرجنسی پلاننگ زون کے اندر کارپوریٹ سماجی ذمہ داری کے اقدامات کے بارے میں ایک سوال کے جواب میں ، وزیر موصوف نے کہا کہ نیوکلیئر پاور کارپوریشن آف انڈیا لمیٹڈ تمام نیوکلیائی تنصیبات کے آس پاس رہائش پذیر برادریوں کے لیے سی ایس آر اور بحالی اور باز آباد کاری (آر اینڈ آر) سرگرمیاں انجام دیتا ہے ۔

انہوں نے ایوان کو بتایا کہ سی ایس آر کے تحت بڑی رقم مختص کی گئی ہے ، جس میں تمام منصوبوں پر رواں مالی سال میں 168 کروڑ روپے خرچ کیے گئے ہیں ۔  پچھلے چار سالوں کے دوران کڈانکولم کے مخصوص اعداد و شمار الگ سے پیش کیے جائیں گے ۔  انہوں نے مزید کہا کہ اس طرح کے اقدامات مقامی برادریوں کے لیے بنیادی ڈھانچے ، صحت کی دیکھ بھال ، تعلیم اور ہنر مندی کے فروغ پر مرکوز ہیں ۔

جیتا پور نیوکلیئر پاور پروجیکٹ میں 1600 میگاواٹ کے مجوزہ چھ ری ایکٹروں سے متعلق مذاکرات کے بارے میں ایک سوال کاجواب دیتے ہوئے ڈاکٹر جتیندر سنگھ نے کہا کہ بات چیت جاری ہے اور تکنیکی معاہدے کا فریم ورک موجود ہے ، لیکن کچھ تجارتی پہلو زیر غور ہیں ۔  انہوں نے اشارہ دیا کہ اس معاملے کو قومی مفاد کو اولین ترجیح دیتے ہوئے متعلقہ وزارتوں کے ساتھ مل کر آگے بڑھایا جا رہا ہے ۔

یورینیم کی درآمدات اور غیر مستحکم عالمی ماحول میں سپلائی میں ممکنہ رکاوٹوں سے متعلق تشویشات کے بارے میں ، ڈاکٹر جتیندر سنگھ نے کہا کہ ہندوستان نے گزشتہ دہائی کے دوران اپنی توانائی کی حفاظت کو نمایاں طور پر مضبوط کیا ہے ۔  انہوں نے کہا کہ 2014 کے بعد سے نیوکلیائی صلاحیت میں دوگنا اضافہ ہوا ہے اور 2035 تک نیوکلیائی پلانٹ کے سازوسامان کی درآمدات کے لیے حالیہ فعال دفعات اور ڈیوٹی میں چھوٹ سمیت پالیسی اقدامات کا مقصد ملکی صلاحیت کو تیز کرنا ہے ۔  انہوں نے کہا کہ توسیعی روڈ میپ یہ ظاہر کرتا ہے کہ ہندوستان صرف بیرونی ذرائع پر منحصر نہیں ہے بلکہ ا پنی گھریلو صلاحیت  میں مسلسل  اضافہ کررہاہے ۔

بجلی کی تقسیم سے متعلق سوالات کے جواب میں ، وزیر نے کہا کہ نیوکلیائی پلانٹس سے پیدا ہونے والی بجلی کی تقسیم دیرینہ گیڈگل فارمولے کی پیروی کرتی ہے ، جس کے تحت 50فیصد بجلی میزبان ریاست کے پاس رہتی ہے ، 35فیصد پڑوسی ریاستوں کو مختص کی جاتی ہے اور 15فیصد مرکزی گرڈ میں جاتی ہے ۔  یہ طریقہ کار متوازن علاقائی تقسیم کو یقینی بناتا ہے ۔

کڈانکولم خطے میں  سیفٹی سے متعلق تشویشات اور ماضی کے خدشات پر ، وزیر موصوف نے اس بات کا اعادہ کیا کہ ہندوستان کا نیوکلیائی پروگرام ‘‘ پہلےسیفٹی اس کے بعد پیداوار ’’ کے اصول پر چلتا ہے ۔  انہوں نے واضح کیا کہ کڈانکولم میں خرچ شدہ ایندھن کے مرکزی ذخیرہ کرنے کے الزامات سائنسی طور پر بے بنیاد ہیں ، کیونکہ ہر ری ایکٹر اپنے مخصوص ایندھن کے چکر کا انتظام کرتا ہے ۔

ڈاکٹر جتیندر سنگھ نے یہ نتیجہ اخذ کیا کہ حکومت نے نیوکلیائی توسیع کے لیے واضح ٹائم لائنز قائم کی ہیں اور نیوکلیائی توانائی کو ہندوستان کی طویل مدتی توانائی کی منتقلی کی حکمت عملی کے ایک اہم ستون کے طور پر پیش کرتے ہوئے انہیں منظم اور نظم و ضبط کے ساتھ نافذ کر رہی ہے ۔

   ***

UR-2277

(ش ح۔ش ب ۔ ف ر )