وزیرِ دفاع جناب راج ناتھ سنگھ نے 9 فروری 2026 کو نئی دہلی میں ہیلینک جمہوریہ کے وزیرِ دفاع جناب نیکولاؤس-جارجیوس ڈینڈِیاس کے ساتھ ایک دو طرفہ ملاقات کی۔ دونوں وزرائے دفاع نے اس امر کا اعادہ کیا کہ ہند-یونان اسٹریٹجک شراکت داری امن، استحکام، آزادی اور باہمی احترام کی مشترکہ اقدار پر مبنی ہے۔

دونوں ممالک نے بھارت کے ’آتم نربھر بھارت‘ اور ’ایجنڈا 2030‘ کے تحت یونان کی دفاعی اصلاحات کے مابین شراکت داری کے ذریعے اپنے اپنے مقامی (سودیشی) دفاعی صنعتی شعبوں کی صلاحیتوں میں اضافہ کرنے کا فیصلہ کیا۔ بھارت اور یونان کے درمیان دفاعی صنعتی تعاون کو مضبوط بنانے کے لیے ایک مشترکہ لیٹر آف انٹینٹ (ارادے کا خط) پر دستخط کیے گئے، جو ایک پانچ سالہ روڈ میپ کی تیاری کے لیے ابتدائی نقطۂ آغاز ہے۔

وزرائے دفاع نے علاقائی امن اور سلامتی سے متعلق مختلف امور پر تبادلۂ خیال کیا اور دو طرفہ دفاعی تعاون اور اسٹریٹجک تعلقات کو مزید مضبوط بنانے پر اتفاق کیا۔ سال 2026 کے لیے ایک دو طرفہ فوجی تعاون منصوبہ بھی باہم تبادلہ کیا گیا، جس میں دونوں ممالک کی مسلح افواج کے مابین فوجی سرگرمیوں کا خاکہ پیش کیا گیا ہے۔

دونوں قدیم سمندری اقوام کے درمیان مختلف اہم بحری امور پر ہم آہنگی کا بھی ذکر کیا گیا۔ یونان کی جانب سے گروگرام میں قائم اطلاعاتی امتزاج مرکز—ہند بحرِ ہند خطہ (آئی ایف سی-آئی او آر) میں ایک یونانی بین الاقوامی رابطہ افسر کی تقرری کا اعلان کیا گیا۔

ملاقات سے قبل، یونان کے وزیرِ دفاع نے قومی جنگی یادگار (نیشنل وار میموریل) پر پھولوں کی چادر چڑھائی اور قوم کی خدمت میں اعلیٰ ترین قربانی دینے والے بہادر جانبازوں کو خراجِ عقیدت پیش کیا۔ انہوں نے مانیک شاؤ مرکز میں تینوں افواج کے گارڈ آف آنر کا معائنہ بھی کیا۔

اس دورے کے دوران، ہیلینک وفد نے بنگلور میں اہم دفاعی اور صنعتی اداروں کا دورہ کیا اور ساتھ ہی نئی دہلی میں دفاعی عوامی شعبہ جاتی اداروں (ڈی پی ایس یو)، دفاعی صنعت اور اسٹارٹ اپ نمائندوں کے ساتھ تبادلۂ خیال کیا۔ یہ دورہ دونوں ممالک کی حکومتوں اور عوام کے درمیان دیرینہ خوشگوار اور قریبی تعلقات پر استوار بھارت اور ہیلینک جمہوریہ کے مابین اسٹریٹجک شراکت داری کی توثیق کرتا ہے۔

 

***

UR-1993

(ش ح۔اس ک  )

 

(ریلیز آئی ڈی: 2225577) وزیٹر کاؤنٹر : 9