ਕਾਰਪੋਰੇਟ ਮਾਮਲੇ ਮੰਤਰਾਲੇ ਅਤੇ ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰਾਲੇ ਦੇ ਰਾਜ ਮੰਤਰੀ ਸ਼੍ਰੀ ਹਰਸ਼ ਮਲਹੋਤਰਾ ਨੇ ਨਵੇਂ ਲੋਕਆਪਣ ਕੀਤੇ ਗਏ ਕਰਤਵਯ ਭਵਨ ਤੋਂ ਪੇਸ਼ ਕੀਤੇ ਗਏ ਪਹਿਲੇ ਬਜਟ ਨੂੰ 2047 ਤੱਕ ਭਾਰਤ ਦੇ ਪੂਰੀ ਤਰ੍ਹਾਂ ਵਿਕਸਿਤ ਰਾਸ਼ਟਰ ਬਣਨ ਦੀ ਯਾਤਰਾ ਵਿੱਚ ਇੱਕ ਇਤਿਹਾਸਕ ਮੀਲ ਪੱਥਰ ਦੱਸਿਆ। ਉਨ੍ਹਾਂ ਨੇ ਇਹ ਗੱਲ ਕੇਂਦਰੀ ਬਜਟ 2026-27 ਬਾਰੇ ਮੀਡੀਆ ਨੂੰ ਸੰਬੋਧਨ ਕਰਦਿਆਂ ਕਹੀ।

ਮੰਤਰੀ ਨੇ ਕਿਹਾ ਕਿ ਇਹ ਬਜਟ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਦੇ ਵਿਕਸਿਤ ਭਾਰਤ ਲਈ ਦੂਰਦਰਸ਼ੀ ਰੋਡਮੈਪ 'ਤੇ ਅਧਾਰਿਤ ਹੈ। ਇਹ ਇੱਕ ਲਚਕੀਲੇ, ਸਮਾਵੇਸ਼ੀ ਅਤੇ ਭਵਿੱਖ ਲਈ ਤਿਆਰ ਅਰਥਵਿਵਸਥਾ ਦੀ ਨੀਂਹ ਰੱਖਦਾ ਹੈ। ਸ਼੍ਰੀ ਮਲਹੋਤਰਾ ਨੇ ਵਿੱਤ ਮੰਤਰੀ ਸ਼੍ਰੀਮਤੀ ਨਿਰਮਲਾ ਸੀਤਾਰਮਣ ਦੀ ਵੀ ਪ੍ਰਸ਼ੰਸਾ ਕੀਤੀ, ਜੋ ਦੇਸ਼ ਦਾ ਲਗਾਤਾਰ ਨੌਵਾਂ ਬਜਟ ਪੇਸ਼ ਕਰਨ ਵਾਲੀ ਪਹਿਲੀ ਵਿੱਤ ਮੰਤਰੀ ਬਣੀ। ਸ਼੍ਰੀ ਹਰਸ਼ ਮਲਹੋਤਰਾ ਨੇ ਕਿਹਾ ਕਿ ਬਜਟ ਨਿਰੰਤਰਤਾ, ਸਥਿਰਤਾ ਅਤੇ ਸਾਹਸਿਕ ਸੁਧਾਰਾਂ ਨੂੰ ਦਰਸਾਉਂਦਾ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ 140 ਕਰੋੜ ਭਾਰਤੀਆਂ ਦੀਆਂ ਅਕਾਂਖਿਆਵਾਂ ਨੂੰ ਸਾਰਥਕ ਵਿਕਾਸ ਅਤੇ ਖੁਸ਼ਹਾਲੀ ਵਿੱਚ ਬਦਲੇ ।

ਮੰਤਰੀ ਨੇ ਬਜਟ ਦੇ ਤਿੰਨ ਮੁੱਖ ਕਰਤੱਵਾਂ (ਕਰਤਵਯ) ਨੂੰ ਮਾਰਗਦਰਸ਼ਕ ਦੱਸਿਆ। ਇਨ੍ਹਾਂ ਕਰਤੱਵਾਂ ਵਿੱਚ ਮੁਕਾਬਲੇਬਾਜ਼ੀ ਦੇ ਨਾਲ ਉਤਪਾਦਕਤਾ ਨੂੰ ਵਧਾਉਣਾ, ਹੁਨਰ ਵਿਕਾਸ ਨੂੰ ਤੇਜ਼ ਕਰਨਾ, ਅਤੇ ਭਾਈਚਾਰਿਆਂ ਅਤੇ ਖੇਤਰਾਂ ਵਿੱਚ ਬਰਾਬਰ ਭਾਗੀਦਾਰੀ ਨੂੰ ਯਕੀਨੀ ਬਣਾਉਣਾ ਸ਼ਾਮਲ ਹੈ।

ਸ਼੍ਰੀ ਮਲਹੋਤਰਾ ਨੇ ਕਿਹਾ ਕਿ ਕੇਂਦਰੀ ਬਜਟ 2026 ਪ੍ਰਗਤੀਸ਼ੀਲ, ਨਾਗਰਿਕ-ਕੇਂਦ੍ਰਿਤ, ਅਤੇ ਵਿਸ਼ਵਾਸ-ਅਧਾਰਿਤ ਹੈ, ਜੋ ਪਾਰਦਰਸ਼ਤਾ ਅਤੇ ਜੀਵਨ ਦੀ ਪਹੁੰਚਯੋਗਤਾ 'ਤੇ ਜ਼ੋਰ ਦਿੰਦਾ ਹੈ। ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਪਿਛਲੇ ਦਹਾਕੇ ਦੌਰਾਨ, ਸਰਕਾਰ ਨੇ ਘੱਟ ਵਿੱਤੀ ਘਾਟੇ ਨੂੰ ਬਣਾਈ ਰੱਖਦੇ ਹੋਏ ਕੁੱਲ ਬਜਟ ਦੇ ਆਕਾਰ ਨੂੰ ਤਿੰਨ ਗੁਣਾ ਵਧਾ ਦਿੱਤਾ ਹੈ, ਜੋ ਕਿ ਮਹੱਤਵਾਕਾਂਖੀ ਵਿਕਾਸ ਟੀਚਿਆਂ ਦੇ ਨਾਲ ਵਿਵੇਕਪੂਰਣ ਵਿੱਤੀ ਪ੍ਰਬੰਧਨ ਨੂੰ ਦਰਸਾਉਂਦਾ ਹੈ। ਇਸ ਤੋਂ ਇਲਾਵਾ, ਉਨ੍ਹਾਂ ਨੇ 2014 ਤੋਂ ਪੂੰਜੀ ਖਰਚ ਵਿੱਚ ਛੇ ਗੁਣਾ ਵਾਧਾ ਅਤੇ ਬਜਟ ਦੇ ਆਕਾਰ ਵਿੱਚ ਤਿੰਨ ਗੁਣਾ ਵਾਧੇ ਦਾ ਵੀ ਜ਼ਿਕਰ ਕੀਤਾ । ਉਨ੍ਹਾਂ ਨੇ ਕਿਹਾ ਕਿ ਇਸ ਨਾਲ ਬੁਨਿਆਦੀ ਢਾਂਚੇ ਦੇ ਵਿਸਥਾਰ, ਰੁਜ਼ਗਾਰ ਦੀ ਸਿਰਜਣਾ ਅਤੇ ਲੰਬੇ ਸਮੇਂ ਦੀ ਆਰਥਿਕ ਉਤਪਾਦਕਤਾ ਨੂੰ ਹੁਲਾਰਾ ਮਿਲਿਆ ਹੈ।

ਸ਼੍ਰੀ ਮਲਹੋਤਰਾ ਨੇ ਇਹ ਵੀ ਕਿਹਾ ਕਿ ਭਾਰਤ ਦਾ ਨਿਰਯਾਤ ਪ੍ਰਦਰਸ਼ਨ 825 ਬਿਲੀਅਨ ਅਮਰੀਕੀ ਡਾਲਰ ਦੇ ਪ੍ਰਭਾਵਸ਼ਾਲੀ ਪੱਧਰ 'ਤੇ ਪਹੁੰਚ ਗਿਆ ਹੈ, ਜੋ ਆਤਮਨਿਰਭਰ ਭਾਰਤ ਪਹਿਲਕਦਮੀ ਦੇ ਤਹਿਤ ਰੱਖਿਆ ਉਤਪਾਦਨ ਵਿੱਚ ਨਿਰੰਤਰ ਵਾਧੇ ਨੂੰ ਉਜਾਗਰ ਕਰਦਾ ਹੈ। ਉਨ੍ਹਾਂ ਨੇ ਬੈਂਕਿੰਗ ਖੇਤਰ ਵਿੱਚ ਕੁੱਲ ਐਨਪੀਏ ਗ੍ਰਾਸ ਵਿੱਚ ਮਹੱਤਵਪੂਰਨ ਗਿਰਾਵਟ ਅਤੇ ਲਗਾਤਾਰ ਵਧ ਰਹੇ ਵਿਦੇਸ਼ੀ ਸਿੱਧੇ ਨਿਵੇਸ਼ ਦਾ ਵੀ ਜ਼ਿਕਰ ਕੀਤਾ, ਜੋ ਕਿ ਭਾਰਤ ਦੇ ਆਰਥਿਕ ਬੁਨਿਆਦੀ ਸਿਧਾਂਤਾਂ ਵਿੱਚ ਮਜ਼ਬੂਤ ​​ਵਿਸ਼ਵਵਿਆਪੀ ਵਿਸ਼ਵਾਸ ਨੂੰ ਦਰਸਾਉਂਦਾ ਹੈ। ਮੰਤਰੀ ਨੇ ਕਿਹਾ ਕਿ ਸੁਚਾਰੂ ਪ੍ਰਵਾਨਗੀਆਂ, ਕਾਰੋਬਾਰ ਕਰਨ ਦੀ ਸੌਖ ਵਿੱਚ ਸੁਧਾਰ, ਅਤੇ 32 ਕੇਂਦਰੀ ਵਿਭਾਗਾਂ ਅਤੇ ਜ਼ਿਆਦਾਤਰ ਰਾਜਾਂ ਵਿੱਚ ਸਿੰਗਲ-ਵਿੰਡੋ ਪ੍ਰਣਾਲੀਆਂ ਦੀ ਸਥਾਪਨਾ, 300 ਤੋਂ ਵੱਧ ਮੋਬਾਈਲ ਨਿਰਮਾਣ ਇਕਾਈਆਂ ਦੇ ਨਾਲ, ਮੇਕ ਇਨ ਇੰਡੀਆ ਪਹਿਲਕਦਮੀ ਦੀ ਸਫਲਤਾ ਨੂੰ ਹੋਰ ਮਜ਼ਬੂਤ ​​ਕਰਦੇ ਹਨ ਅਤੇ ਭਾਰਤ ਨੂੰ ਇੱਕ ਗਲੋਬਲ ਨਿਰਮਾਣ ਕੇਂਦਰ ਵਜੋਂ ਸਥਾਪਿਤ ਕਰਦੀ ਹੈ ।

ਸ਼੍ਰੀ ਮਲਹੋਤਰਾ ਨੇ ਕਿਹਾ ਕਿ ਸਿੱਖਿਆ ਅਤੇ ਹੁਨਰ ਇਸ ਬਜਟ ਦੇ ਮੁੱਖ ਥੰਮ੍ਹ ਹਨ, ਸਰਕਾਰ ਨੇ ਉਦਯੋਗਿਕ ਕੌਰੀਡੋਰਸ ਦੇ ਨਾਲ-ਨਾਲ ਪੰਜ ਯੂਨੀਵਰਸਿਟੀ ਟਾਊਨਸ਼ਿਪਾਂ ਦੇ ਵਿਕਾਸ ਅਤੇ ਅਕਾਦਮਿਕ ਖੇਤਰ ਨੂੰ ਉਦਯੋਗ ਨਾਲ ਜੋੜਨ ਵਾਲੇ ਈਕੋਸਿਸਟਮ ਦੀ ਸਿਰਜਣਾ ਦਾ ਐਲਾਨ ਕੀਤਾ ਹੈ। ,ਮਹਿਲਾਵਾਂ ਦੀ ਅਗਵਾਈ ਵਾਲੇ ਵਿਕਾਸ ਦੀ ਸ਼ਕਤੀ ਨੂੰ ਪਛਾਣਦੇ ਹੋਏ, ਸਰਕਾਰ ਨੇ ਆਪਣਾ ਲਗਾਤਾਰ ਨੌਵਾਂ ਜ਼ੈਂਡਰ-ਕੇਂਦ੍ਰਿਤ ਬਜਟ ਪੇਸ਼ ਕੀਤਾ ਹੈ। ਸ਼੍ਰੀ ਮਲਹੋਤਰਾ ਨੇ ਕਿਹਾ ਕਿ ਇਸ ਵਿੱਚ ਮਹਿਲਾਵਾਂ ਲਈ ਸਿੱਖਿਆ ਅਤੇ ਰੁਜ਼ਗਾਰ ਦੇ ਮੌਕਿਆਂ ਤੱਕ ਪਹੁੰਚ ਵਧਾਉਣ ਲਈ ਹਰੇਕ ਜ਼ਿਲ੍ਹੇ ਵਿੱਚ ਹੋਸਟਲਾਂ ਦੀ ਵਿਵਸਥਾ ਸ਼ਾਮਲ ਹੈ।

ਮੰਤਰੀ ਨੇ ਕਿਹਾ ਕਿ ਭਾਰਤ ਦੇ ਨੌਜਵਾਨਾਂ ਨੂੰ ਭਵਿੱਖ ਲਈ ਤਿਆਰ ਸਮਰੱਥਾਵਾਂ ਨਾਲ ਲੈਸ ਕਰਨ ਲਈ ਆਰਟੀਫਿਸ਼ੀਅਲ ਇੰਟੈਲੀਜੈਂਸ 'ਤੇ ਧਿਆਨ ਕੇਂਦ੍ਰਿਤ ਕੀਤਾ ਜਾਵੇਗਾ। ਥੋੜ੍ਹੇ ਸਮੇਂ ਦੇ ਮਾਡਿਊਲਰ ਕੋਰਸ ਪੇਸ਼ੇਵਰਾਂ, ਛੋਟੇ ਕਾਰੋਬਾਰੀਆਂ ਅਤੇ ਘੱਟ ਰੁਜ਼ਗਾਰ ਵਿਅਕਤੀਆਂ ਦਾ ਸਮਰਥਨ ਕਰਨਗੇ, ਜਿਸ ਨਾਲ ਕਾਰਜਬਲ ਨੂੰ ਹੁਨਰਮੰਦ ਅਤੇ ਵਿਸ਼ਵ ਪੱਧਰ 'ਤੇ ਪ੍ਰਤੀਯੋਗੀ ਬਣਾਇਆ ਜਾਵੇਗਾ। ਲਗਭਗ ₹1 ਲੱਖ ਕਰੋੜ ਦੇ ਰਿਕਾਰਡ ਅਲਾਟਮੈਂਟ ਨਾਲ ਸਿਹਤ ਸੰਭਾਲ ਨੂੰ ਪ੍ਰਾਪਤ ਹੋਏ ਮਹੱਤਵਪੂਰਨ ਹੁਲਾਰੇ 'ਤੇ ਜ਼ੋਰ ਦਿੰਦੇ ਹੋਏ, ਮੰਤਰੀ ਨੇ ਕਿਹਾ ਕਿ ਬਾਇਓਫਾਰਮਾ ਸ਼ਕਤੀ ਪਹਿਲਕਦਮੀ ਲਈ ₹10,000 ਕਰੋੜ ਰੱਖੇ ਗਏ ਹਨ ਜੋ ਮੈਡੀਕਲ ਟੈਕਨੋਲੋਜੀਆਂ ਵਿੱਚ ਨਵੀਨਤਾ ਅਤੇ ਆਤਮ-ਨਿਰਭਰਤਾ ਨੂੰ ਮਜ਼ਬੂਤ ​​ਕਰਨਗੇ। ਇਸ ਤੋਂ ਇਲਾਵਾ, 100,000 ਸਹਿਯੋਗੀ ਸਿਹਤ ਪੇਸ਼ੇਵਰਾਂ ਨੂੰ ਸਿਖਲਾਈ ਦਿੱਤੀ ਜਾਵੇਗੀ, ਅਤੇ ਤਿੰਨ ਏਮਜ਼-ਆਯੁਰਵੇਦ ਸੰਸਥਾਵਾਂ ਅਤੇ ਪੰਜ ਏਕੀਕ੍ਰਿਤ ਮੈਡੀਕਲ ਕੇਂਦਰਾਂ ਦਾ ਐਲਾਨ ਕੀਤਾ ਗਿਆ ਹੈ, ਜੋ ਇੱਕ ਸੰਪੂਰਨ ਪਹੁੰਚ ਨੂੰ ਦਰਸਾਉਂਦੇ ਹਨ। ਆਯੁਸ਼ਮਾਨ ਭਾਰਤ ਵਰਗੀਆਂ ਪ੍ਰਮੁੱਖ ਯੋਜਨਾਵਾਂ ਦਾ ਲਗਾਤਾਰ ਵਿਸਤਾਰ ਹੋ ਰਿਹਾ ਹੈ, ਜਿਸ ਨਾਲ ਦਿੱਲੀ ਵਿੱਚ ਲੱਖਾਂ ਪਰਿਵਾਰਾਂ ਨੂੰ ਲਾਭ ਹੋ ਰਿਹਾ ਹੈ, ਜਦੋਂ ਕਿ ਪ੍ਰਧਾਨ ਮੰਤਰੀ ਵਯ ਵੰਦਨਾ ਯੋਜਨਾ ਸੀਨੀਅਰ ਨਾਗਰਿਕਾਂ ਪ੍ਰਤੀ ਸਰਕਾਰ ਦੀ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ।

ਮੰਤਰੀ ਨੇ ਬੁਨਿਆਦੀ ਢਾਂਚੇ ਨੂੰ ਇਸ ਬਜਟ ਦੀ ਰੀੜ੍ਹ ਦੀ ਹੱਡੀ ਦੱਸਿਆ। ਸੜਕੀ ਬੁਨਿਆਦੀ ਢਾਂਚੇ ਲਈ ਲਗਭਗ ₹3 ਲੱਖ ਕਰੋੜ ਅਲਾਟ ਕੀਤੇ ਗਏ ਹਨ, ਅਤੇ ਸੱਤ ਹਾਈ-ਸਪੀਡ ਰੇਲ ਕੌਰੀਡੋਰਾਂ ਦੀ ਯੋਜਨਾ ਬਣਾਈ ਗਈ ਹੈ। ਇਹ ਭਾਰਤ ਦੀ ਕਨੈਕਟੀਵਿਟੀ ਨੂੰ ਬੇਮਿਸਾਲ ਪੱਧਰ ਤੱਕ ਵਧਾਏਗਾ। ਉਨ੍ਹਾਂ ਨੇ ਮਹੱਤਵਾਕਾਂਖੀ ਦਿੱਲੀ-ਵਾਰਾਣਸੀ ਰੇਲ ਕੋਰੀਡੋਰ ਅਤੇ ਅਮਰੁਤ ਭਾਰਤ ਪਹਿਲਕਦਮੀ ਦੇ ਤਹਿਤ 1,000 ਸਟੇਸ਼ਨਾਂ ਦੇ ਪੁਨਰ ਵਿਕਾਸ ਦਾ ਜ਼ਿਕਰ ਕੀਤਾ, ਜਿਸ ਨਾਲ ਰੇਲ ਯਾਤਰਾ ਦਾ ਕਾਇਆਕਲਪ ਹੋਵੇਗਾ। ਇਸ ਤੋਂ ਇਲਾਵਾ, ਰੱਖਿਆ ਖੇਤਰ ਲਈ ₹7.5 ਲੱਖ ਕਰੋੜ ਦਾ ਵੱਡਾ ਅਲਾਟਮੈਂਟ ਰਾਸ਼ਟਰੀ ਸੁਰੱਖਿਆ ਪ੍ਰਤੀ ਭਾਰਤ ਦੀ ਵਚਨਬੱਧਤਾ ਨੂੰ ਮਜ਼ਬੂਤ ​​ਕਰੇਗਾ ਅਤੇ ਸਵਦੇਸ਼ੀ ਨਿਰਮਾਣ ਸਮਰੱਥਾਵਾਂ ਨੂੰ ਵਧਾਏਗਾ।

ਸ਼੍ਰੀ ਮਲਹੋਤਰਾ ਨੇ ਦਿੱਲੀ-ਮੁੰਬਈ ਐਕਸਪ੍ਰੈੱਸਵੇਅ ਨੂੰ ਇੱਕ ਮਹੱਤਵਪੂਰਨ ਪ੍ਰੋਜੈਕਟ ਦੱਸਿਆ, ਜਿਸ ਦੇ 2027 ਤੱਕ ਪੂਰਾ ਹੋਣ ਦੀ ਉਮੀਦ ਹੈ। ਇਹ ਯਾਤਰਾ ਦੇ ਸਮੇਂ ਨੂੰ 33 ਘੰਟਿਆਂ ਤੋਂ ਘਟਾ ਕੇ ਸਿਰਫ਼ 12 ਘੰਟੇ ਕਰ ਦੇਵੇਗਾ - ਜਿਸ ਨਾਲ ਲੌਜਿਸਟਿਕਸ ਕੁਸ਼ਲਤਾ ਅਤੇ ਆਰਥਿਕ ਏਕੀਕਰਣ ਵਿੱਚ ਮਹੱਤਵਪੂਰਨ ਸੁਧਾਰ ਹੋਵੇਗਾ।

ਸ਼੍ਰੀ ਮਲਹੋਤਰਾ ਨੇ ਦਿੱਲੀ ਲਈ ਕੀਤੀਆਂ ਗਈਆਂ ਪਹਿਲਕਦਮੀਆਂ ਦਾ ਵੀ ਜ਼ਿਕਰ ਕੀਤਾ। ਉਨ੍ਹਾਂ ਦੱਸਿਆ ਕਿ ਸਰਕਾਰ ਨੇ ਪਹਿਲਾਂ ਹੀ ਇੱਕ ਵਿਆਪਕ ਦਿੱਲੀ ਡੀਕੰਜੈਸ਼ਨ ਯੋਜਨਾ ਲਈ ਲਗਭਗ ₹24,000 ਕਰੋੜ ਦੇ ਬਜਟ ਦਾ ਐਲਾਨ ਕਰ ਦਿੱਤਾ ਹੈ ਜਿਸਦਾ ਉਦੇਸ਼ ਟ੍ਰੈਫਿਕ ਘੱਟ ਕਰਨਾ, ਵਾਹਨਾਂ ਦੇ ਪ੍ਰਦੂਸ਼ਣ ਨੂੰ ਘਟਾਉਣਾ ਅਤੇ ਸ਼ਹਿਰੀ ਗਤੀਸ਼ੀਲਤਾ ਨੂੰ ਬਿਹਤਰ ਬਣਾਉਣਾ ਹੈ। ਇਸ ਤੋਂ ਇਲਾਵਾ, ਆਸ਼ਰਮ ਤੋਂ ਬਦਰਪੁਰ, ਪੰਜਾਬੀ ਬਾਗ ਤੋਂ ਟਿੱਕਰੀ ਬਾਰਡਰ, ਅਤੇ ਮਹਿਰੌਲੀ-ਗੁਰੂਗ੍ਰਾਮ ਸਟ੍ਰੈਚਾਂ ਸਮੇਤ ਮੁੱਖ ਸੜਕੀ ਹਿੱਸਿਆਂ ਨੂੰ ਐਨਐੱਚਏਆਈ ਦੁਆਰਾ ਆਪਣੇ ਹੱਥ ਵਿੱਚ ਲੈ ਲਿਆ ਗਿਆ ਹੈ, ਜਿਸ ਨਾਲ ਆਵਾਜਾਈ ਦੇ ਪ੍ਰਵਾਹ ਵਿੱਚ ਕਾਫ਼ੀ ਸੁਧਾਰ ਹੋਵੇਗਾ। ਮੰਤਰੀ ਨੇ ਕਿਹਾ ਕਿ ਇਹ ਤਿੰਨ ਹਿੱਸੇ - ਆਸ਼ਰਮ ਤੋਂ ਬਦਰਪੁਰ ਬਾਰਡਰ ਤੱਕ ਮਥੁਰਾ ਰੋਡ, ਪੁਰਾਣੀ ਦਿੱਲੀ-ਰੋਹਤਕ ਰੋਡ-ਪੰਜਾਬੀ ਬਾਗ ਤੋਂ ਟਿੱਕਰੀ ਬਾਰਡਰ ਤੱਕ, ਅਤੇ ਮਹਿਰੌਲੀ-ਗੁਰੂਗ੍ਰਾਮ ਸੜਕ ਰੋਡ -ਮਹਿਰੌਲੀ ਤੋਂ ਗੁਰੂਗ੍ਰਾਮ ਸ਼ਹਿਰ ਤੱਕ ਕੁੱਲ 33 ਕਿਲੋਮੀਟਰ ਲੰਬੇ ਹਨ ਅਤੇ ਦਿੱਲੀ ਅਤੇ ਗੁਆਂਢੀ ਖੇਤਰਾਂ ਵਿਚਕਾਰ ਮਹੱਤਵਪੂਰਨ ਲਿੰਕ ਹਨ।

ਸ਼੍ਰੀ ਮਲਹੋਤਰਾ ਨੇ ਦੱਸਿਆ ਕਿ ਦਿੱਲੀ ਡੀਕੰਜੈਸ਼ਨ ਯੋਜਨਾ ਮੁੱਖ ਤੌਰ 'ਤੇ ਦਿੱਲੀ ਅਤੇ ਹਰਿਆਣਾ ਵਿੱਚ ਨੂੰ ਕੇਐਮਪੀਈ ਤੋਂ ਯੂਈਆਰ-II (ਐਨਐੱਚ-344ਐਮ) ਤੱਕ ਦਿੱਲੀ-ਅੰਮ੍ਰਿਤਸਰ-ਕਟੜਾ ਐਕਸਪ੍ਰੈੱਸਵੇਅ (ਐਨਈ-5) ਦੇ ਵਿਸਤਾਰ 'ਤੇ ਕੇਂਦ੍ਰਿਤ ਹੈ, ਜੋ ਕਿ ਯੂਈਆਰ-II ਅਤੇ ਦਵਾਰਕਾ ਐਕਸਪ੍ਰੈੱਸਵੇਅ ਰਾਹੀਂ ਕਟੜਾ ਤੋਂ ਦਿੱਲੀ ਅਤੇ ਗੁਰੂਗ੍ਰਾਮ ਤੱਕ ਸਿੱਧਾ ਸੰਪਰਕ ਲਿੰਕ ਪ੍ਰਦਾਨ ਕਰੇਗਾ, ਅਤੇ ਅਲੀਪੁਰ ਦੇ ਨੇੜੇ ਯੂਈਆਰ-II (ਐਨਐੱਚ-344ਐਮ) ਨੂੰ ਦਿੱਲੀ ਅਤੇ ਉੱਤਰ ਪ੍ਰਦੇਸ਼ ਵਿੱਚ ਟ੍ਰੋਨਿਕਾ ਸਿਟੀ ਦੇ ਨੇੜੇ ਦਿੱਲੀ-ਦੇਹਰਾਦੂਨ ਐਕਸਪ੍ਰੈੱਸਵੇਅ (ਐਨਐੱਚ-709ਬੀ) ਤੱਕ ਵਿਸਤਾਰ ਕਰੇਗਾ। ਇਹ ਐਨਐੱਚ -44/ਦਿੱਲੀ ਆਊਟਰ/ਇਨਰ ਰਿੰਗ ਰੋਡ ਲਈ ਬਾਈਪਾਸ ਦਾ ਵੀ ਕੰਮ ਕਰੇਗਾ ਕਿਉਂਕਿ ਉੱਤਰ/ਉੱਤਰ-ਪੱਛਮ/ਪੱਛਮ/ਦੱਖਣ-ਪੱਛਮ ਦਿੱਲੀ ਅਤੇ ਗੁਰੂਗ੍ਰਾਮ ਵੱਲ ਜਾਣ ਵਾਲਾ ਟ੍ਰੈਫਿਕ ਯੂਈਆਰ-II ਅਤੇ ਦਵਾਰਕਾ ਐਕਸਪ੍ਰੈੱਸਵੇਅ ਰਾਹੀਂ ਆਪਣੀ ਮੰਜ਼ਿਲ 'ਤੇ ਪਹੁੰਚ ਸਕਦਾ ਹੈ। ਦਿੱਲੀ ਵਿੱਚ ਦਵਾਰਕਾ ਐਕਸਪ੍ਰੈੱਸਵੇਅ (ਸ਼ਿਵ ਮੂਰਤੀ ਮਹੀਪਾਲਪੁਰ ਦੇ ਨੇੜੇ) ਤੋਂ ਨੈਲਸਨ ਮੰਡੇਲਾ ਮਾਰਗ, ਵਸੰਤ ਕੁੰਜ ਤੱਕ ਇੱਕ ਰੋਡ ਟਨਲ ਬਣਾਈ ਜਾਵੇਗੀ, ਜੋ ਦਵਾਰਕਾ ਐਕਸਪ੍ਰੈੱਸਵੇਅ ਤੋਂ ਨੈਲਸਨ ਮੰਡੇਲਾ ਮਾਰਗ ਤੱਕ ਆਵਾਜਾਈ ਦੇ ਸੁਚਾਰੂ ਪ੍ਰਵਾਹ ਨੂੰ ਸੁਵਿਧਾਜਨਕ ਬਣਾਏਗੀ।

ਸ਼੍ਰੀ ਮਲਹੋਤਰਾ ਨੇ ਜ਼ੋਰ ਦੇ ਕੇ ਕਿਹਾ ਕਿ ਵਾਤਾਵਰਣ ਸਥਿਰਤਾ ਦਿੱਲੀ ਲਈ ਇੱਕ ਹੋਰ ਤਰਜੀਹ ਹੈ। ਉਨ੍ਹਾਂ ਨੇ ਭਲਸਵਾ, ਗਾਜ਼ੀਪੁਰ ਅਤੇ ਓਖਲਾ ਵਿੱਚ ਤਿੰਨ ਵੱਡੇ ਲੈਂਡਫਿਲ ਨੂੰ ਖਤਮ ਕਰਨ ਲਈ ਸਰਕਾਰ ਦੀ ਵਚਨਬੱਧਤਾ ਦਾ ਜ਼ਿਕਰ ਕੀਤਾ। ਪ੍ਰਧਾਨ ਮੰਤਰੀ ਦੇ "ਕਚਰੇ ਤੋਂ ਧਨ" ਦ੍ਰਿਸ਼ਟੀਕੋਣ ਦੇ ਤਹਿਤ, ਪੁਰਾਣੇ ਅਤੇ ਮੌਜੂਦਾ ਕੂੜੇ ਨੂੰ ਵਪਾਰਕ ਵਰਤੋਂ ਲਈ ਵੱਖ ਕੀਤਾ ਜਾਵੇਗਾ। ਅਯੋਗ ਰਹਿੰਦ-ਖੂੰਹਦ ਨੂੰ ਪਹਿਲਾਂ ਹੀ ਯੂਈਆਰ-II ਅਤੇ ਦਵਾਰਕਾ ਐਕਸਪ੍ਰੈੱਸਵੇਅ ਵਰਗੇ ਸੜਕ ਨਿਰਮਾਣ ਪ੍ਰੋਜੈਕਟਾਂ ਵਿੱਚ ਵਰਤਿਆ ਜਾ ਚੁੱਕਾ ਹੈ, ਜੋ ਕਿ ਨਵੀਨਤਾਕਾਰੀ ਸਰੋਤ ਪ੍ਰਬੰਧਨ ਦਾ ਪ੍ਰਦਰਸ਼ਨ ਕਰਦਾ ਹੈ। ਇਸ ਤੋਂ ਇਲਾਵਾ, ਚੰਦਰਵਾਲ ਵਿੱਚ ਇੱਕ ਨਵੇਂ ਵਾਟਰ ਟ੍ਰੀਟਮੈਂਟ ਪਲਾਂਟ ਲਈ ਲਗਭਗ ₹380 ਕਰੋੜ ਅਲਾਟ ਕੀਤੇ ਗਏ ਹਨ। ਇਹ ਪਲਾਂਟ ਦਿੱਲੀ ਦੇ ਹਰ ਘਰ ਤੱਕ "ਨਲ ਸੇ ਜਲ" ਦੇ ਦ੍ਰਿਸ਼ਟੀਕੋਣ ਨੂੰ ਯਕੀਨੀ ਬਣਾਏਗਾ। ਬਜਟ ਵਿੱਚ ਰਾਜਧਾਨੀ ਵਿੱਚ ਰੇਲਵੇ ਬੁਨਿਆਦੀ ਢਾਂਚੇ ਲਈ ₹2,700 ਕਰੋੜ, ਕੁਦਰਤੀ ਆਫ਼ਤਾਂ ਲਈ ₹15 ਕਰੋੜ ਅਤੇ ਲਗਭਗ ₹1,000 ਕਰੋੜ ਪ੍ਰਦੂਸ਼ਣ ਕੰਟਰੋਲ ਲਈ ਅਤੇ ਸਿੱਖ ਵਿਰੋਧੀ ਦੰਗਿਆਂ ਦੇ ਪੀੜ੍ਹਤਾਂ ਦੀ ਸਹਾਇਤਾ ਲਈ ₹2 ਕਰੋੜ ਅਲਾਟ ਕੀਤੇ ਗਏ ਹਨ। ਮੰਤਰੀ ਨੇ ਜ਼ੋਰ ਦੇ ਕੇ ਕਿਹਾ ਕਿ ਇਹ ਸ਼ਾਸਨ ਦੀ ਇੱਕ ਹਮਦਰਦੀਪੂਰਨ ਅਤੇ ਸਭ ਨੂੰ ਨਾਲ ਲੈ ਕੇ ਚੱਲਣ ਵਾਲੇ ਸ਼ਾਸਨ ਦੇ ਤਰੀਕੇ ਨੂੰ ਦਿਖਾਉਂਦਾ ਹੈ।

ਸ਼੍ਰੀ ਮਲਹੋਤਰਾ ਨੇ ਕਿਹਾ ਕਿ ਸਰਕਾਰ ਦੀ ਕਿਫਾਇਤੀ ਸਿੱਖਿਆ, ਕਿਫਾਇਤੀ ਸਿਹਤ ਸੰਭਾਲ ਅਤੇ ਕਿਫਾਇਤੀ ਰਿਹਾਇਸ਼ ਸੁਵਿਧਾ 'ਤੇ ਧਿਆਨ ਹਰੇਕ ਨਾਗਰਿਕ ਦੇ ਜੀਵਨ ਦੀ ਗੁਣਵੱਤਾ ਨੂੰ ਬਿਹਤਰ ਬਣਾਉਣ ਦੀ ਆਪਣੀ ਵਚਨਬੱਧਤਾ ਨੂੰ ਮਜ਼ਬੂਤ ​​ਕਰਦਾ ਹੈ।

ਮੰਤਰੀ ਨੇ ਕਿਹਾ ਕਿ ਇਹ ਸੱਚਮੁੱਚ "1.4 ਅਰਬ ਭਾਰਤੀਆਂ ਲਈ ਬਜਟ" ਹੈ - ਇੱਕ ਅਜਿਹਾ ਬਜਟ ਜੋ ਵਿਕਾਸ ਅਤੇ ਭਲਾਈ, ਮਹੱਤਵਾਕਾਂਖਿਆ ਅਤੇ ਸੂਝ-ਬੂਝ, ਅਤੇ ਨਵੀਨਤਾ ਅਤੇ ਸਮਾਵੇਸ਼ਿਤਾ ਵਿਚਕਾਰ ਸੰਤੁਲਨ ਕਾਇਮ ਕਰਦਾ ਹੈ। ਮਹੱਤਵਾਕਾਂਖਿਆ ਖੇਤਰਾਂ ਨੂੰ ਮਜ਼ਬੂਤ ​​ਕਰਕੇ, ਬੁਨਿਆਦੀ ਢਾਂਚੇ ਨੂੰ ਹੁਲਾਰਾ ਦੇ ਕੇ, ਅਤੇ ਨਾਗਰਿਕਾਂ ਨੂੰ ਸਸ਼ਕਤ ਬਣਾ ਕੇ, ਕੇਂਦਰੀ ਬਜਟ 2026 ਭਾਰਤ ਦੀ ਲੋਕਲ ਤੋਂ ਗਲੋਬਲ ਲੀਡਰਸ਼ਿਪ ਤੱਕ ਦੀ ਯਾਤਰਾ ਨੂੰ ਤੇਜ਼ ਕਰੇਗਾ।

ਸ਼੍ਰੀ ਮਲਹੋਤਰਾ ਨੇ ਅੰਤ ਵਿੱਚ ਇਹ ਕਿਹਾ ਕਿ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਦੀ ਗਤੀਸ਼ੀਲ ਅਗਵਾਈ ਅਤੇ ਵਿੱਤ ਮੰਤਰੀ ਸ਼੍ਰੀਮਤੀ ਨਿਰਮਲਾ ਸੀਤਾਰਮਣ ਦੇ ਸਥਿਰ, ਸੁਧਾਰ-ਮੁਖੀ ਮਾਰਗਦਰਸ਼ਨ ਵਿੱਚ ਭਾਰਤ ਇੱਕ ਬੇਮਿਸਾਲ ਗਤੀ ਨਾਲ ਅੱਗੇ ਵਧ ਰਿਹਾ ਹੈ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਇਹ ਬਜਟ ਸਿਰਫ਼ ਇੱਕ ਸਲਾਨਾ ਵਿੱਤੀ ਵੇਰਵਾ ਨਹੀਂ ਹੈ - ਇਹ ਇੱਕ ਵਿਕਸਿਤ ਭਾਰਤ ਲਈ ਆਰਕੀਟੈਕਚਰਲ ਬਲੂਪ੍ਰਿੰਟ ਹੈ। ਨਿਰੰਤਰ ਸੁਧਾਰਾਂ, ਰਣਨੀਤਕ ਨਿਵੇਸ਼ਾਂ ਅਤੇ ਰਾਸ਼ਟਰੀ ਤਰੱਕੀ ਪ੍ਰਤੀ ਅਟੁੱਟ ਵਚਨਬੱਧਤਾ ਦੇ ਨਾਲ, 2047 ਵਿੱਚ ਇੱਕ ਵਿਕਸਿਤ ਭਾਰਤ ਦਾ ਸੁਪਨਾ ਹੁਣ ਬਹੁਤ ਦੂਰ ਨਹੀਂ ਹੈ - ਇਹ ਯਕੀਨੀ ਤੌਰ 'ਤੇ ਪਹੁੰਚ ਦੇ ਵਿੱਚ ਹੈ।

*****

ਐਮਬੀ/ਪੀਕੇ

(Release ID: 2225044) ਵਿਜ਼ੀਟਰ ਕਾਊਂਟਰ : 10