ਰੇਲ ਮੰਤਰਾਲਾ
ਭਾਰਤੀ ਰੇਲਵੇ ਲਈ 2.93 ਲੱਖ ਕਰੋੜ ਰੁਪਏ ਦਾ ਰਿਕਾਰਡ ਪੂੰਜੀਗਤ ਖ਼ਰਚ (ਕੈਪੇਕਸ); ਹਾਈ-ਸਪੀਡ ਕਨੈਕਟੀਵਿਟੀ, ਮਾਲ ਭਾੜੇ ਅਤੇ ਸੁਰੱਖਿਆ ਖ਼ਰਚ ’ਤੇ ਮੁੱਖ ਧਿਆਨ
ਦੇਸ਼ ਭਰ ਵਿੱਚ ਸੱਤ ਨਵੇਂ ਹਾਈ-ਸਪੀਡ ਕੌਰੀਡੋਰ ਚੋਟੀ ਦੇ ਭਾਰਤੀ ਸ਼ਹਿਰਾਂ ਨੂੰ ਨੇੜੇ ਲਿਆਉਣਗੇ; ਦੱਖਣੀ ਹਾਈ-ਸਪੀਡ ਡਾਇਮੰਡ ਨਾਲ ਕਰਨਾਟਕ, ਤੇਲੰਗਾਨਾ, ਆਂਧਰਾ ਪ੍ਰਦੇਸ਼, ਤਾਮਿਲਨਾਡੂ, ਕੇਰਲ ਅਤੇ ਪੁਡੂਚੇਰੀ ਨੂੰ ਲਾਭ ਮਿਲੇਗਾ
ਲਗਭਗ 4,000 ਕਿੱਲੋਮੀਟਰ ਦੇ ਹਾਈ-ਸਪੀਡ ਰੇਲ ਕੌਰੀਡੋਰਜ਼ ਤੋਂ ਲਗਭਗ 16 ਲੱਖ ਕਰੋੜ ਰੁਪਏ ਦੇ ਨਿਵੇਸ਼ ਦੀ ਉਮੀਦ: ਅਸ਼ਵਿਨੀ ਵੈਸ਼ਣਵ
ਪੂਰਬ-ਪੱਛਮ ਵਪਾਰ ਨੂੰ ਮਜ਼ਬੂਤ ਪ੍ਰਦਾਨ ਕਰਨ ਲਈ ਡੰਕੁਨੀ (ਪੱਛਮ ਬੰਗਾਲ) ਅਤੇ ਸੂਰਤ ਦਰਮਿਆਨ 2,052 ਕਿੱਲੋਮੀਟਰ ਲੰਬਾ ਨਵਾਂ ਸਮਰਪਿਤ ਮਾਲ ਢੋਆ-ਢੁਆਈ ਕੌਰੀਡੋਰ ਦਾ ਐਲਾਨ
ਲਗਭਗ 1.20 ਲੱਖ ਕਰੋੜ ਰੁਪਏ ਦੇ ਪ੍ਰਬੰਧ ਦੇ ਨਾਲ, ਸੁਰੱਖਿਆ ਸਭ ਤੋਂ ਵੱਡੀ ਤਰਜੀਹ ਬਣੀ ਹੋਈ ਹੈ: ਅਸ਼ਵਿਨੀ ਵੈਸ਼ਣਵ
ਭਾਰਤ ਵਿੱਚ ਡਿਜ਼ਾਈਨ ਅਤੇ ਵਿਕਸਿਤ ਪ੍ਰੋਪਲਸ਼ਨ ਸਿਸਟਮ ਅਮਰੀਕਾ, ਜਰਮਨੀ, ਫਰਾਂਸ, ਸਵਿਟਜ਼ਰਲੈਂਡ ਅਤੇ ਸਪੇਨ ਸਮੇਤ ਪ੍ਰਮੁੱਖ ਦੇਸ਼ਾਂ ਨੂੰ ਸਪਲਾਈ ਕੀਤੇ ਜਾ ਰਹੇ ਹਨ: ਅਸ਼ਵਿਨੀ ਵੈਸ਼ਣਵ
Posted On:
01 FEB 2026 7:51PM by PIB Chandigarh
ਭਾਰਤੀ ਰੇਲਵੇ ਤੇਜ਼ੀ ਨਾਲ ਵਿਸਥਾਰ ਲਈ ਤਿਆਰ ਹੈ। ਇਸ ਸਾਲ ਦੇ ਕੇਂਦਰੀ ਬਜਟ ਵਿੱਚ 2,78,000 ਕਰੋੜ ਰੁਪਏ ਦੀ ਵੱਡੀ ਵੰਡ ਦੇ ਨਾਲ, ਰੇਲਵੇ ਆਪਣਾ ਖ਼ਰਚ ਹਾਈ-ਸਪੀਡ ਕਨੈਕਟੀਵਿਟੀ, ਮਾਲ ਢੋਆ-ਢੁਆਈ ਅਤੇ ਸੁਰੱਖਿਆ ’ਤੇ ਕਰਨ ਵਿੱਚ ਧਿਆਨ ਕੇਂਦ੍ਰਿਤ ਕਰ ਰਿਹਾ ਹੈ।
ਕੇਂਦਰੀ ਬਜਟ 2026-27 ਵਿੱਚ ਭਾਰਤੀ ਰੇਲਵੇ ਲਈ 2,93,030 ਕਰੋੜ ਰੁਪਏ ਦੇ ਰਿਕਾਰਡ ਪੂੰਜੀ ਖ਼ਰਚ (ਕੈਪੇਕਸ) ਦੀ ਯੋਜਨਾ ਬਣਾਈ ਗਈ ਹੈ। ਇਹ ਭਾਰਤੀ ਰੇਲਵੇ ਲਈ ਹੁਣ ਤੱਕ ਦਾ ਸਭ ਤੋਂ ਵੱਧ ਪੂੰਜੀ ਖ਼ਰਚ (ਕੈਪੇਕਸ) ਅਤੇ ਵੰਡ ਹੈ।
ਇਹ ਵੰਡ ਰੇਲਵੇ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ, ਸਮਰੱਥਾ ਵਧਾਉਣ ਅਤੇ ਯਾਤਰੀ ਸੁਰੱਖਿਆ ਨੂੰ ਵਧਾਉਣ ’ਤੇ ਸਰਕਾਰ ਦੇ ਨਿਰੰਤਰ ਧਿਆਨ ਨੂੰ ਦਰਸਾਉਂਦੀ ਹੈ। ਇਹ ਆਰਥਿਕ ਵਿਕਾਸ ਅਤੇ ਲੌਜਿਸਟਿਕਸ ਕੁਸ਼ਲਤਾ ਦੇ ਮੁੱਖ ਚਾਲਕ ਵਜੋਂ ਰੇਲਵੇ ਬੁਨਿਆਦੀ ਢਾਂਚੇ ਦਾ ਲਾਭ ਉਠਾਉਣ ’ਤੇ ਸਰਕਾਰ ਦੇ ਜ਼ੋਰ ਨੂੰ ਵੀ ਦਰਸਾਉਂਦੀ ਹੈ। ਇਸ ਨਿਰੰਤਰ ਨਿਵੇਸ਼ ਦਾ ਉਦੇਸ਼ ਮਾਲ ਢੋਆ-ਢੁਆਈ ਵਿੱਚ ਸੁਧਾਰ, ਲੌਜਿਸਟਿਕਸ ਲਾਗਤਾਂ ਵਿੱਚ ਕਮੀ, ਉੱਚ-ਘਣਤਾ ਵਾਲੇ ਕੌਰੀਡੋਰਾਂ ਵਿੱਚ ਭੀੜ ਨੂੰ ਘੱਟ ਕਰਨਾ ਅਤੇ ਆਧੁਨਿਕ ਰੇਲਗੱਡੀਆਂ ਅਤੇ ਪੁਨਰ-ਵਿਕਸਿਤ ਸਟੇਸ਼ਨਾਂ ਰਾਹੀਂ ਯਾਤਰੀ ਅਨੁਭਵ ਨੂੰ ਬਿਹਤਰ ਬਣਾਉਣਾ ਹੈ।
ਆਪਣੇ ਲੰਬੇ ਸਮੇਂ ਦੇ ਦ੍ਰਿਸ਼ਟੀਕੋਣ ਦੇ ਹਿੱਸੇ ਵਜੋਂ, ਸਰਕਾਰ ਨੇ ਵਾਤਾਵਰਣ ਪੱਖੋਂ ਟਿਕਾਊ ਯਾਤਰੀ ਆਵਾਜਾਈ ਨੂੰ ਉਤਸ਼ਾਹਿਤ ਕਰਨ ਲਈ ਸ਼ਹਿਰਾਂ ਦਰਮਿਆਨ "ਗ੍ਰੋਥ ਕਨੈਕਟਰਸ" ਵਜੋਂ ਸੱਤ ਹਾਈ-ਸਪੀਡ ਰੇਲ ਕੌਰੀਡੋਰਾਂ ਦੇ ਵਿਕਾਸ ਦਾ ਐਲਾਨ ਕੀਤਾ ਹੈ। ਇਨ੍ਹਾਂ ਵਿੱਚ ਮੁੰਬਈ-ਪੁਣੇ, ਪੁਣੇ-ਹੈਦਰਾਬਾਦ, ਹੈਦਰਾਬਾਦ-ਬੈਂਗਲੁਰੂ, ਹੈਦਰਾਬਾਦ-ਚੇਨਈ, ਚੇਨਈ-ਬੈਂਗਲੁਰੂ, ਦਿੱਲੀ-ਵਾਰਾਣਸੀ ਅਤੇ ਵਾਰਾਣਸੀ-ਸਿਲੀਗੁੜੀ ਸ਼ਾਮਲ ਹਨ। ਇਨ੍ਹਾਂ ਪ੍ਰਸਤਾਵਿਤ ਕੌਰੀਡੋਰਾਂ ਨਾਲ ਸ਼ਹਿਰਾਂ ਦਰਮਿਆਨ ਯਾਤਰਾ ਦੇ ਸਮੇਂ ਵਿੱਚ ਜ਼ਿਕਰਯੋਗ ਕਮੀ ਆਵੇਗੀ ਅਤੇ ਯਾਤਰੀਆਂ ਲਈ ਨਿਰਵਿਘਨ, ਬਹੁ-ਮਾਡਲ ਯਾਤਰਾ ਦੀ ਸਹੂਲਤ ਹੋਵੇਗੀ।
ਨਵੇਂ ਕੌਰੀਡੋਰਾਂ ਦੇ ਐਲਾਨ ਨਾਲ ਰੇਲ-ਅਧਾਰਤ ਟ੍ਰਾਂਸਪੋਰਟ ਈਕੋਸਿਸਟਮ ਵਿੱਚ ਇੱਕ ਬੁਨਿਆਦੀ ਤਬਦੀਲੀ ਆਉਣ ਦੀ ਉਮੀਦ ਹੈ। ਦੱਖਣੀ ਭਾਰਤ ਵਿੱਚ ਚੇਨਈ-ਬੈਂਗਲੁਰੂ-ਹੈਦਰਾਬਾਦ ਹਾਈ-ਸਪੀਡ ਨੈੱਟਵਰਕ ਇੱਕ ਦੱਖਣੀ ਹਾਈ-ਸਪੀਡ ਤਿਕੋਣ (ਜਾਂ ਡਾਇਮੰਡ) ਬਣਾਏਗਾ, ਜੋ ਪ੍ਰਮੁੱਖ ਆਰਥਿਕ ਅਤੇ ਆਈਟੀ ਹੱਬਾਂ ਨੂੰ ਜੋੜੇਗਾ। ਰੇਲਵੇ, ਸੂਚਨਾ ਅਤੇ ਪ੍ਰਸਾਰਣ ਅਤੇ ਇਲੈਕਟ੍ਰੌਨਿਕਸ ਅਤੇ ਸੂਚਨਾ ਤਕਨਾਲੋਜੀ ਮੰਤਰੀ, ਸ਼੍ਰੀ ਅਸ਼ਵਿਨੀ ਵੈਸ਼ਣਵ ਨੇ ਅੱਜ ਰੇਲ ਭਵਨ ਵਿਖੇ ਇੱਕ ਪ੍ਰੈੱਸ ਕਾਨਫ਼ਰੰਸ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਯਾਤਰਾ ਦਾ ਸਮਾਂ ਬਹੁਤ ਘੱਟ ਹੋ ਜਾਵੇਗਾ।
ਸ਼੍ਰੀ ਵੈਸ਼ਨਵ ਨੇ ਦੱਸਿਆ ਕਿ ਚੇਨਈ-ਬੈਂਗਲੁਰੂ ਯਾਤਰਾ ਵਿੱਚ ਲਗਭਗ 1 ਘੰਟਾ 13 ਮਿੰਟ, ਬੰਗਲੁਰੂ-ਹੈਦਰਾਬਾਦ ਵਿੱਚ ਲਗਭਗ 2 ਘੰਟੇ ਅਤੇ ਚੇਨਈ-ਹੈਦਰਾਬਾਦ ਵਿੱਚ ਲਗਭਗ 2 ਘੰਟੇ 55 ਮਿੰਟ ਲੱਗਣਗੇ। ਇਹ ਨੈੱਟਵਰਕ ਕਰਨਾਟਕ, ਤੇਲੰਗਾਨਾ, ਆਂਧਰਾ ਪ੍ਰਦੇਸ਼, ਤਾਮਿਲਨਾਡੂ, ਕੇਰਲ ਅਤੇ ਪੁਡੂਚੇਰੀ ਲਈ ਇੱਕ ਸ਼ਕਤੀਸ਼ਾਲੀ ਵਿਕਾਸ ਗੁਣਕ ਵਜੋਂ ਕੰਮ ਕਰੇਗਾ, ਜਿਸ ਨਾਲ ਖੇਤਰੀ ਵਿਕਾਸ ਨੂੰ ਬਹੁਤ ਹੁਲਾਰਾ ਮਿਲੇਗਾ।
ਪੱਛਮ ਅਤੇ ਮੱਧ ਭਾਰਤ ਵਿੱਚ, ਪ੍ਰਸਤਾਵਿਤ ਮੁੰਬਈ-ਪੁਣੇ ਹਾਈ-ਸਪੀਡ ਕੌਰੀਡੋਰ ਯਾਤਰਾ ਦੇ ਸਮੇਂ ਨੂੰ ਲਗਭਗ 48 ਮਿੰਟ ਤੱਕ ਘਟਾ ਦੇਵੇਗਾ, ਜੋ ਇਨ੍ਹਾਂ ਦੋ ਪ੍ਰਮੁੱਖ ਸ਼ਹਿਰੀ ਕੇਂਦਰਾਂ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਜੋੜੇਗਾ। ਪੂਣੇ ਤੋਂ ਹੈਦਰਾਬਾਦ ਤੱਕ ਲਗਭਗ 1 ਘੰਟਾ 55 ਮਿੰਟ ਵਿੱਚ ਅਤੇ ਅੱਗੇ ਦੱਖਣੀ ਕੇਂਦਰਾਂ ਨਾਲ ਜੁੜਨਾ, ਵੱਖ-ਵੱਖ ਖੇਤਰਾਂ ਵਿੱਚ ਇੱਕ ਨਿਰੰਤਰ ਹਾਈ-ਸਪੀਡ ਨੈੱਟਵਰਕ ਬਣਾਏਗਾ, ਜਿਸ ਨਾਲ ਯਾਤਰੀਆਂ ਅਤੇ ਖੇਤਰੀ ਅਰਥ-ਵਿਵਸਥਾਵਾਂ ਦੋਵਾਂ ਨੂੰ ਲਾਭ ਹੋਵੇਗਾ।
ਉੱਤਰੀ ਅਤੇ ਪੂਰਬੀ ਭਾਰਤ ਵਿੱਚ, ਦਿੱਲੀ-ਵਾਰਾਣਸੀ ਹਾਈ-ਸਪੀਡ ਕੌਰੀਡੋਰ ਰਾਹੀਂ ਯਾਤਰਾ ਲਗਭਗ 3 ਘੰਟੇ ਅਤੇ 50 ਮਿੰਟ ਵਿੱਚ ਪੂਰੀ ਹੋਵੇਗੀ। ਇਸ ਤੋਂ ਇਲਾਵਾ ਵਾਰਾਣਸੀ ਤੋਂ ਪਟਨਾ ਹੁੰਦੇ ਹੋਏ ਪੱਛਮ ਬੰਗਾਲ ਦੇ ਸਿਲੀਗੁੜੀ ਤੱਕ ਹਾਈ-ਸਪੀਡ ਰੇਲ ਕੌਰੀਡੋਰ ਨਾਲ ਵਾਰਾਣਸੀ-ਸਿਲੀਗੁੜੀ ਦੀ ਯਾਤਰਾ ਲਗਭਗ 2 ਘੰਟੇ 55 ਮਿੰਟ ਵਿੱਚ ਪੂਰੀ ਕੀਤੀ ਜਾ ਸਕੇਗੀ। ਇਹ ਕਨੈਕਟੀਵਿਟੀ ਦਿੱਲੀ, ਉੱਤਰ ਪ੍ਰਦੇਸ਼, ਬਿਹਾਰ ਅਤੇ ਪੱਛਮ ਬੰਗਾਲ ਨੂੰ ਜੋੜਨ ਵਾਲਾ ਇੱਕ ਨਵਾਂ ਆਰਥਿਕ ਕੌਰੀਡੋਰ ਵਿਕਸਿਤ ਕਰੇਗਾ, ਜਿਸ ਨਾਲ ਖੇਤਰੀ ਵਿਕਾਸ ਅਤੇ ਆਰਥਿਕ ਗਤੀਵਿਧੀਆਂ ਵਿੱਚ ਬਹੁਤ ਵਾਧਾ ਹੋਵੇਗਾ।
ਸ਼੍ਰੀ ਵੈਸ਼ਣਵ ਨੇ ਕਿਹਾ ਕਿ ਇਹ ਸੱਤ ਹਾਈ-ਸਪੀਡ ਕੌਰੀਡੋਰ ਇਕੱਠੇ ਲਗਭਗ 4,000 ਕਿੱਲੋਮੀਟਰ ਤੱਕ ਫੈਲਣਗੇ ਅਤੇ ਇਨ੍ਹਾਂ ਤੋਂ ਲਗਭਗ 16 ਲੱਖ ਕਰੋੜ ਰੁਪਏ ਦੇ ਨਿਵੇਸ਼ ਦੀ ਉਮੀਦ ਹੈ, ਜਿਸ ਨਾਲ ਰੇਲਵੇ ਭਵਿੱਖ ਦੀ ਗਤੀਸ਼ੀਲਤਾ ਦਾ ਇੱਕ ਮੁੱਖ ਥੰਮ੍ਹ ਬਣ ਜਾਵੇਗਾ।
ਮਾਲ ਢੋਆ-ਢੁਆਈ ਅਤੇ ਲੌਜਿਸਟਿਕਸ ਕੁਸ਼ਲਤਾ ਨੂੰ ਵਧਾਉਣ ਲਈ, ਕੇਂਦਰੀ ਬਜਟ ਵਿੱਚ ਪੱਛਮ ਬੰਗਾਲ ਦੇ ਡੰਕੁਨੀ ਤੋਂ ਗੁਜਰਾਤ ਦੇ ਸੂਰਤ ਤੱਕ ਇੱਕ ਨਵੇਂ ਸਮਰਪਿਤ ਮਾਲ ਢੋਆ-ਢੁਆਈ ਕੌਰੀਡੋਰ ਦਾ ਪ੍ਰਸਤਾਵ ਵੀ ਕੀਤਾ ਗਿਆ ਹੈ, ਜੋ ਕਿ ਓਡੀਸ਼ਾ, ਛੱਤੀਸਗੜ੍ਹ, ਮੱਧ ਪ੍ਰਦੇਸ਼ ਅਤੇ ਮਹਾਰਾਸ਼ਟਰ ਵਿੱਚੋਂ ਲੰਘਦਾ ਹੈ। 2,052 ਕਿੱਲੋਮੀਟਰ ਲੰਬਾ ਇਹ ਕੌਰੀਡੋਰ ਮੌਜੂਦਾ ਪੱਛਮੀ ਸਮਰਪਿਤ ਮਾਲ ਢੋਆ-ਢੁਆਈ ਕੌਰੀਡੋਰ ਨਾਲ ਜੁੜ ਜਾਵੇਗਾ, ਜਿਸ ਨਾਲ ਪੱਛਮ ਤੱਟ ਦੇ ਬੰਦਰਗਾਹਾਂ ਤੱਕ ਮਾਲ ਦੀ ਨਿਰਵਿਘਨ ਆਵਾਜਾਈ ਸੰਭਵ ਹੋ ਸਕੇਗੀ। ਕੇਂਦਰੀ ਮੰਤਰੀ ਸ਼੍ਰੀ ਵੈਸ਼ਣਵ ਨੇ ਦੱਸਿਆ ਕਿ ਮੌਜੂਦਾ ਪੂਰਬੀ ਅਤੇ ਪੱਛਮ ਡੀਐੱਫਸੀ ਪਹਿਲਾਂ ਤੋਂ ਹੀ ਲਗਭਗ ਪੂਰੀ ਸਮਰੱਥਾ ਨਾਲ ਕੰਮ ਕਰ ਰਹੇ ਹਨ, ਜਿੱਥੇ ਰੋਜ਼ਾਨਾ ਲਗਭਗ 400 ਮਾਲ ਗੱਡੀਆਂ ਨੂੰ ਕਾਰਜਸ਼ੀਲ ਹਨ, ਇਸ ਲਈ ਭਵਿੱਖ ਦੀ ਮੰਗ ਨੂੰ ਪੂਰਾ ਕਰਨ ਲਈ ਨਵੇਂ ਕੌਰੀਡੋਰਾਂ ਦੀ ਜ਼ਰੂਰਤ ਹੈ।
ਇਹ ਪੂਰਬ-ਪੱਛਮ ਕੌਰੀਡੋਰ ਵੱਖ-ਵੱਖ ਖੇਤਰਾਂ ਦਰਮਿਆਨ ਨਿਰਵਿਘਨ ਵਪਾਰ ਪ੍ਰਵਾਹ ਦੀ ਸਹੂਲਤ ਦੇਵੇਗਾ, ਮੌਜੂਦਾ ਰੇਲ ਨੈੱਟਵਰਕ ’ਤੇ ਦਬਾਅ ਘਟਾਏਗਾ ਅਤੇ ਮਾਲ ਭਾੜੇ ਦੀ ਕੁਸ਼ਲਤਾ ਵਧਾਏਗਾ, ਜਿਸ ਨਾਲ ਉਦਯੋਗਿਕ ਵਿਕਾਸ ਅਤੇ ਸਪਲਾਈ ਚੇਨਾਂ ਨੂੰ ਮਹੱਤਵਪੂਰਨ ਲਾਭ ਹੋਵੇਗਾ।
ਕੇਂਦਰੀ ਮੰਤਰੀ ਨੇ ਇਸ ਗੱਲ ’ਤੇ ਜ਼ੋਰ ਦਿੱਤਾ ਕਿ ਸੁਰੱਖਿਆ ਸਭ ਤੋਂ ਵੱਡੀ ਤਰਜੀਹ ਹੈ, ਜਿਸ ਲਈ ਲਗਭਗ 1.20 ਲੱਖ ਕਰੋੜ ਰੁਪਏ ਵਿਸ਼ੇਸ਼ ਤੌਰ ’ਤੇ ਸੁਰੱਖਿਆ ਨਾਲ ਸਬੰਧਤ ਕੰਮਾਂ ਲਈ ਰੱਖੇ ਗਏ ਹਨ। ਉਨ੍ਹਾਂ ਨੇ ਕਿਹਾ ਕਿ ਪਿਛਲੇ ਸਾਲਾਂ ਵਿੱਚ ਕੀਤੇ ਗਏ ਨਿਰੰਤਰ ਨਿਵੇਸ਼ਾਂ ਦੇ ਨਤੀਜੇ ਵਜੋਂ ਰੇਲਵੇ ਹਾਦਸਿਆਂ ਵਿੱਚ ਲਗਭਗ 95 ਪ੍ਰਤੀਸ਼ਤ ਦੀ ਕਮੀ ਆਈ ਹੈ, ਅਜਿਹੇ ਵਿੱਚ ਹੁਣ ਸੁਰੱਖਿਆ ਨੂੰ ਹੋਰ ਮਜ਼ਬੂਤ ਕਰਨ ਲਈ ਯਤਨ ਤੇਜ਼ ਕੀਤੇ ਜਾ ਰਹੇ ਹਨ। ਫੋਕਸ ਵਾਲੇ ਖੇਤਰਾਂ ਵਿੱਚ ਪਟੜੀਆਂ, ਲੋਕੋਮੋਟਿਵ, ਵੈਗਨ ਅਤੇ ਕੋਚਾਂ ਦੀ ਬਿਹਤਰ ਦੇਖਭਾਲ, ਕਵਚ ਆਟੋਮੈਟਿਕ ਟ੍ਰੇਨ ਪ੍ਰੋਟੈਕਸ਼ਨ ਸਿਸਟਮ ਦਾ ਤੇਜ਼ੀ ਨਾਲ ਵਿਸਥਾਰ, ਸੀਸੀਟੀਵੀ ਕੈਮਰਿਆਂ ਦੀ ਸਥਾਪਨਾ, ਓਵਰਹੈੱਡ ਇਲੈਕਟ੍ਰੀਕਲ (ਓਐੱਚਈ) ਸਿਸਟਮਾਂ ਦਾ ਅਪਗ੍ਰੇਡੇਸ਼ਨ, ਸਟੇਸ਼ਨ ਦਾ ਪੁਨਰ ਵਿਕਾਸ ਅਤੇ ਬਿਹਤਰ ਗਾਹਕ ਸੇਵਾ ਅਤੇ ਯਾਤਰੀ ਸਹੂਲਤਾਂ ਸ਼ਾਮਲ ਹਨ।
ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਪ੍ਰੋਪਲਸ਼ਨ ਸਿਸਟਮ ਰੇਲਵੇ ਤਕਨਾਲੋਜੀ ਦਾ ਸਭ ਤੋਂ ਮਹੱਤਵਪੂਰਨ ਹਿੱਸਾ ਹਨ ਅਤੇ ਭਾਰਤ ਵਿੱਚ ਡਿਜ਼ਾਈਨ ਅਤੇ ਨਿਰਮਿਤ ਪ੍ਰੋਪਲਸ਼ਨ ਸਿਸਟਮ ਹੁਣ ਅਮਰੀਕਾ, ਸਵਿਟਜ਼ਰਲੈਂਡ, ਜਰਮਨੀ, ਫਰਾਂਸ ਅਤੇ ਸਪੇਨ ਵਰਗੇ ਪ੍ਰਮੁੱਖ ਦੇਸ਼ਾਂ ਨੂੰ ਨਿਰਯਾਤ ਕੀਤੇ ਜਾ ਰਹੇ ਹਨ।
ਕੇਂਦਰੀ ਮੰਤਰੀ ਨੇ ਬੁਨਿਆਦੀ ਢਾਂਚੇ ਦੇ ਵਿਕਾਸ ਵਿੱਚ ਰਿਕਾਰਡ ਪ੍ਰਾਪਤੀਆਂ ਨੂੰ ਵੀ ਉਜਾਗਰ ਕੀਤਾ, ਜਿਸ ਵਿੱਚ 35,000 ਕਿੱਲੋਮੀਟਰ ਨਵੇਂ ਪਟੜੀਆਂ ਦਾ ਨਿਰਮਾਣ, 47,000 ਕਿੱਲੋਮੀਟਰ ਬਿਜਲੀਕਰਨ ਅਤੇ ਬ੍ਰੌਡਗੇਜ ਨੈੱਟਵਰਕ ਦਾ 99.5 ਪ੍ਰਤੀਸ਼ਤ ਤੋਂ ਵੱਧ ਬਿਜਲੀਕਰਨ ਸ਼ਾਮਲ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਵੰਦੇ ਭਾਰਤ ਸਲੀਪਰ ਅਤੇ ਚੇਅਰ ਕਾਰ ਟ੍ਰੇਨਾਂ, ਅੰਮ੍ਰਿਤ ਭਾਰਤ ਅਤੇ ਨਮੋ ਭਾਰਤ ਟ੍ਰੇਨਾਂ ਦਾ ਉਤਪਾਦਨ ਅਤੇ ਰਿਕਾਰਡ ਗਿਣਤੀ ਵਿੱਚ ਵੈਗਨਾਂ ਦੀ ਸਪਲਾਈ ਬੇਮਿਸਾਲ ਰਫ਼ਤਾਰ ਨਾਲ ਅੱਗੇ ਵਧ ਰਹੀ ਹੈ।
ਟਿਕਾਊਤਾ ’ਤੇ ਜ਼ੋਰ ਦਿੰਦੇ ਹੋਏ ਸ਼੍ਰੀ ਵੈਸ਼ਣਵ ਨੇ ਕਿਹਾ ਕਿ ਰੇਲ ਆਵਾਜਾਈ ਸੜਕ ਆਵਾਜਾਈ ਨਾਲੋਂ ਲਗਭਗ 95 ਪ੍ਰਤੀਸ਼ਤ ਘੱਟ ਪ੍ਰਦੂਸ਼ਣ ਛੱਡਦੀ ਹੈ, ਜੋ ਕਿ ਸਰਕਾਰ ਦੀਆਂ ਵਾਤਾਵਰਨ ਅਤੇ ਜਲਵਾਯੂ ਪ੍ਰਤੀ ਵਚਨਬੱਧਤਾਵਾਂ ਦੇ ਅਨੁਸਾਰ ਹੈ ਅਤੇ ਰੇਲਵੇ ਨੂੰ ਇੱਕ ਹਰੇ ਜਨ ਆਵਾਜਾਈ ਮੋਡ ਵਜੋਂ ਵਿਕਸਿਤ ਕਰਨ ਦੇ ਪ੍ਰਧਾਨ ਮੰਤਰੀ ਦੇ ਦ੍ਰਿਸ਼ਟੀਕੋਣ ਨੂੰ ਦਰਸਾਉਂਦੀ ਹੈ।
ਇਹ ਰਿਕਾਰਡ ਵੰਡ ਰਾਸ਼ਟਰੀ ਵਿਕਾਸ, ਆਰਥਿਕ ਵਿਕਾਸ ਅਤੇ ਸਮਾਵੇਸ਼ੀ ਕਨੈਕਟੀਵਿਟੀ ਦੀ ਰੀੜ੍ਹ ਦੀ ਹੱਡੀ ਵਜੋਂ ਭਾਰਤੀ ਰੇਲਵੇ ਦੀ ਭੂਮਿਕਾ ਨੂੰ ਹੋਰ ਮਜ਼ਬੂਤ ਕਰਦੀ ਹੈ। ਕੇਂਦਰੀ ਬਜਟ 2026-27 ਵਿੱਚ ਐਲਾਨੀਆਂ ਗਈਆਂ ਪਹਿਲਕਦਮੀਆਂ ਦੇ ਨਾਲ, ਭਾਰਤੀ ਰੇਲਵੇ 'ਵਿਕਸਿਤ ਭਾਰਤ' ਦੇ ਦ੍ਰਿਸ਼ਟੀਕੋਣ ਦੇ ਅਨੁਸਾਰ ਤੇਜ਼ ਕਨੈਕਟੀਵਿਟੀ, ਕੁਸ਼ਲ ਲੌਜਿਸਟਿਕਸ ਅਤੇ ਮਜ਼ਬੂਤ ਬੁਨਿਆਦੀ ਢਾਂਚਾ ਪ੍ਰਦਾਨ ਕਰਕੇ ਰਾਸ਼ਟਰ-ਨਿਰਮਾਣ ਵਿੱਚ ਇੱਕ ਮਹੱਤਵਪੂਰਨ ਭੂਮਿਕਾ ਨਿਭਾਉਣ ਲਈ ਤਿਆਰ ਹੈ।
***************
ਧਰਮੇਂਦਰ ਤਿਵਾਰੀ/ਡਾ. ਨਯਨ ਸੋਲੰਕੀ/ਰਿਤੂ ਰਾਜ/ਮਣਿਕ ਸ਼ਰਮਾ
(Release ID: 2223226)
ਵਿਜ਼ੀਟਰ ਕਾਊਂਟਰ : 3