நாடு முழுவதும் முதன்மை சுகாதார சேவைகளை வலுப்படுத்தும் நோக்கில், 15 ஜூலை 2025 நிலவரப்படி மொத்தம் 1,78,154 ஆயுஷ்மான் சுகாதார மையங்கள் செயல்பாட்டுக்கு கொண்டு வரப்பட்டுள்ளதாக மத்திய சுகாதார மற்றும் குடும்ப நலத்துறை இணையமைச்சர் திரு. பிரதாப்ராவ் ஜாதவ் இன்று மக்களவையில் தெரிவித்தார். துணை சுகாதார நிலையங்கள் மற்றும் முதன்மை சுகாதார நிலையங்களை மேம்படுத்துவதன் மூலம், மக்களுக்கு அருகிலேயே விரிவான மருத்துவச் சேவைகளை இந்த மையங்கள் வழங்கி வருகின்றன.

தொற்றுநோய்கள், தொற்றா நோய்கள் மற்றும் மகப்பேறு நலன் உள்ளிட்ட 12 வகையான மருத்துவச் சேவைத் தொகுப்புகள் இங்கு வழங்கப்படுகின்றன. 'இலவச நோயறிதல் சேவைத் திட்டத்தின்' கீழ், துணை சுகாதார நிலையங்களில் 14 சோதனைகளும், முதன்மை சுகாதார நிலையங்களில் 63 சோதனைகளும் கட்டணமில்லாமல் மேற்கொள்ளப்படுகின்றன. மேலும், நோய் தடுப்பு நடவடிக்கையாக யோகா மற்றும் தியானம் போன்ற 5.73 கோடிக்கும் அதிகமான நலவாழ்வு அமர்வுகள் இதுவரை நடத்தப்பட்டுள்ளன.

டிஜிட்டல் சுகாதாரக் கட்டமைப்பை வலுப்படுத்தும் வகையில், ஆயுஷ்மான் பாரத் டிஜிட்டல் திட்டத்தின் கீழ் இதுவரை 79.75 கோடி ஆயுஷ்மான் பாரத் சுகாதாரக் கணக்குகள் உருவாக்கப்பட்டுள்ளன. ஒரு ஆயுஷ்மான் ஆரோக்கிய மையத்தை நிறுவி பராமரிக்க ஆண்டுக்கு சுமார் ₹17.03 லட்சம் செலவாகும் என மதிப்பிடப்பட்டுள்ளது. பொது மற்றும் தனியார் மருத்துவமனைகளுக்கிடையே தடையற்ற தகவல் பரிமாற்றத்தை உறுதி செய்வதன் மூலம், ஏழை எளிய மக்களுக்கான மருத்துவச் செலவைக் குறைப்பதே இத்திட்டத்தின் முக்கிய நோக்கமாகும்.

****

TV/SE/SH