زراعت اور کسانوں کی بہبود اور دیہی ترقیات کے مرکزی وزیر جناب شیوراج سنگھ چوہان نے   اقتصادی جائزے پر اپنا ردعمل ظاہر کرتے ہوئے کہا  ہے کہ  اقتصادی جائزے  کے اعداد و شمار واضح طور پر ظاہر کرتے ہیں کہ وزیر اعظم جناب نریندر مودی کی قیادت میں  ، ملک نے زراعت اور دیہی ترقی ، دونوں محاذ پر بے مثال ترقی کی ہے ۔

زراعت میں پائیدار اور مستحکم ترقی

جناب شیوراج سنگھ چوہان نے کہا کہ پچھلے پانچ سالوں میں زراعت اور اس سے وابستہ شعبوں میں مسلسل قیمتوں پر اوسط سالانہ شرح نمو 4.4 فی صد  درج  کی گئی ہے ، جو عالمی اوسط سے زیادہ ہے ۔ مالی سال 2016  ء سے 2025 ء  کی دہائی کے دوران ، زرعی شعبے نے 4.45 فی صد کی شرح نمو درج کی ، جو پچھلی دہائیوں کے مقابلے میں سب سے زیادہ ہے ۔

انہوں نے مزید کہا کہ مالی سال 26-2025 ء  کی دوسری سہ ماہی میں بھی زراعت کے شعبے نے 3.5 فی صد کی شرح نمو درج کی ، جو اس کی پائیداری اور  طاقت کی عکاسی کرتی ہے ۔

 

مرکزی وزیر نے کہا کہ مالی سال 25-2024 ء  میں ملک کی غذائی اجناس کی پیداوار 357.73 ملین ٹن کی ریکارڈ سطح پر پہنچ گئی ۔ یہ اضافہ بنیادی طور پر چاول ، گندم ، مکئی اور موٹے اناج بشمول  ‘ شری اَنّ ’  ( موٹا اناج) کی بہتر پیداوار کی وجہ سے ہوا ۔ آج بھارت نہ صرف غذائی اجناس کی پیداوار میں خود کفیل ہے بلکہ عالمی سطح پر متعدد فصلوں میں بھی اہم کردار ادا کر رہا ہے ۔

باغبانی  ، زرعی ترقی میں ایک روشن مقام کے طور پر ابھری  ہے

جناب چوہان نے کہا کہ زرعی مجموعی ویلیو ایڈڈ (جی وی اے) میں تقریباً 33 فی صد حصے کے ساتھ باغبانی کا شعبہ بھارتی زراعت میں روشن ترین شعبہ کے طور پر ابھرا ہے ۔ باغبانی کی پیداوار مالی سال 14-2013 ء   میں 280.70 ملین ٹن سے بڑھ کر 25-2024 ء  میں 367.72 ملین ٹن ہو گئی ۔

اس عرصے کے دوران پھلوں کی پیداوار 114.51 ملین ٹن ، سبزیوں کی پیداوار 219.67 ملین ٹن اور دیگر باغبانی فصلوں کی پیداوار 33.54 ملین ٹن رہی ۔

زراعت کے مرکزی وزیر نے کہا کہ بھارت اب دنیا کا سب سے بڑا پیاز پیدا کرنے والا ملک بن گیا ہے ، جو  عالمی سطح پر پیاز کی  ہونے والی پیداوار میں تقریباً 25 فی صد کا  تعاون پیش کرتا ہے ۔ اسی طرح ، بھارت سبزیوں ، پھلوں اور آلو کا دنیا کا دوسرا سب سے بڑا پروڈیوسر ہے ، جس میں ان زمروں میں سے ہر ایک میں تقریباً 12-13 فی صد کا عالمی  تعاون پیش کرتا ہے ۔

 

 

دیہی بھارت میں بنیادی ڈھانچے کی تاریخی توسیع

دیہی ترقی کی کامیابیوں  کو اجاگر کرتے ہوئے ، جناب چوہان نے کہا کہ سڑکوں ، ہاؤسنگ ، پینے کے پانی اور ڈیجیٹل کنکٹیویٹی سمیت دیہی بنیادی ڈھانچے میں قابل ذکر پیش رفت ہوئی ہے ۔ پردھان منتری گرام سڑک یوجنا (پی ایم جی ایس وائی) کے تحت 99.6 فی صد سے زیادہ اہل گاؤوں کو اب ہر موسم میں استعمال ہونے والی  سڑکوں سے جوڑا گیا ہے ۔

انہوں نے کہا کہ پی ایم جی ایس وائی کے مختلف مراحل کے تحت لاکھوں کلومیٹر سڑکوں اور ہزاروں پلوں کی تعمیر مکمل ہو چکی ہے ۔ پی ایم جی ایس وائی-IV کے تحت 10,000 کلومیٹر سے زیادہ کا احاطہ کرنے والے سڑک پروجیکٹوں کو منظوری دی گئی ہے ، جو جموں و کشمیر ، چھتیس گڑھ ، اتراکھنڈ ، راجستھان ، سکم اور ہماچل پردیش میں تقریباً 3270 غیر منسلک گاؤوں کے لیے ضروری خدمات تک رسائی کو یقینی بنائیں گے ۔

ہاؤسنگ ، ڈیجیٹل  طور پر بااختیار بنانے اور ذریعۂ معاش میں تبدیلی

مرکزی وزیر جناب شیوراج سنگھ چوہان نے کہا کہ سبھی کے لیے مکانات مشن کے تحت گزشتہ 11 برسوں کے دوران ، دیہی علاقوں میں 3.70 کروڑ پکے مکانات تعمیر کیے گئے ہیں ۔ پردھان منتری آواس یوجنا-گرامین کے تحت 4.14 کروڑ مکانات کا ہدف مقرر کیا گیا ہے ، جن میں سے بیشتر مکانات کو پہلے ہی منظوری دی جا چکی ہے ۔

ڈیجیٹل اور تکنیکی اقدامات کا حوالہ دیتے ہوئے ، جناب چوہان نے کہا کہ سوامتو ( گاؤں کے علاقوں میں بہترین ٹیکنا لوجی کے ساتھ گاؤں کا سروے اور نقشہ سازی) اسکیم کے تحت 3.28 لاکھ گاؤوں میں ڈرون سروے مکمل کیے گئے ہیں اور 2.76 کروڑ پراپرٹی کارڈ جاری کیے گئے ہیں ۔ ڈیجیٹل انڈیا لینڈ ریکارڈز ماڈرنائزیشن پروگرام کے تحت دیہی علاقوں میں 99.8 فی صد اراضی  کے ریکارڈ کا ڈیجیٹلائزیشن مکمل ہو چکا ہے ۔

دیہی ذریعہ ٔ معاش کے قومی مشن کے تحت 10 کروڑ سے زیادہ دیہی خواتین اب 90 لاکھ سے زیادہ اپنی مدد آپ کرنے والے گروپوں سے منسلک ہیں ۔ ‘  لکھ پتی دیدیوں ’  کی تعداد 2.5 کروڑ سے تجاوز کر گئی ہے ، جو دیہی خواتین کو معاشی طور پر بااختیار بنانے میں ایک بڑی کامیابی ہے ۔

جناب چوہان نے کہا کہ اقتصادی جائزہ  ، اس بات کی عکاسی کرتا ہے کہ کس طرح پالیسی پر مستقل مرکوز توجہ ، ادارہ جاتی اصلاحات اور ہدف شدہ سرمایہ کاری نے زراعت کو مضبوط کیا ہے اور دیہی بھارت کو تبدیل کیا ہے ۔ انہوں نے مزید کہا کہ یہ نتائج جامع ترقی ، کسانوں کی فلاح و بہبود اور پائیدار دیہی ترقی کے لیے حکومت کے عزم کی نشاندہی کرتے ہیں  اور  اس بات کو یقینی بناتے ہیں کہ گاؤں ایک ترقی یافتہ ملک بننے کی طرف  بھارت کے سفر میں مرکزی کردار ادا کریں ۔

۔۔۔۔۔۔۔۔۔۔۔۔۔۔۔۔۔۔۔۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔۔۔۔۔۔۔۔۔۔۔۔۔۔۔۔۔۔۔۔

( ش ح۔م م ۔ع ا  )

U.No. 1433

(ریلیز آئی ڈی: 2222154) وزیٹر کاؤنٹر : 23