تاریخی لال قلعہ میں منعقد ہونے والے بھارت پرو 2026 کے مبارک موقع پر 30 جنوری 2026 کو فیسٹیول کے مقام پر آندھرا پردیش ڈے منایا گیا، جس کے دوران ریاست کے بھرپور ثقافتی، فنی اور سیاحتی ورثے کی شاندار جھلک پیش کی گئی۔

وزارتِ سیاحت، حکومتِ ہند کے زیرِ اہتمام، یومِ جمہوریہ کی تقریبات کے حصے کے طور پر منعقد ہونے والا بھارت پرو ایک عظیم قومی پلیٹ فارم ہے، جو ایک بھارت، شریشٹھ بھارت کے جذبے کے تحت ریاستوں اور مرکز کے زیرِ انتظام علاقوں کی ثقافت، سیاحت، کھانوں، ہینڈلومز اور ورثے کو نمایاں کرتا ہے۔

آندھرا پردیش پویلین ایک بڑی توجہ کا مرکز بن کر ابھرا، جہاں موضوعاتی انداز پر مبنی سیاحتی نمائش، روایتی فوڈ کورٹ اور نفیس ہینڈلوم نمائش پیش کی گئی۔ زائرین کو ریاست کے تاریخی ورثے، فنی روایات اور تخلیقی برتری کی ایک ہمہ گیر جھلک دیکھنے کا موقع ملا۔

آندھرا پردیش ڈے کی ایک نمایاں خصوصیت 46 ممتاز فنکاروں کی جانب سے پیش کیا گیا شاندار کُچی پُڑی کلاسیکی رقص تھا، جس نے آندھرا پردیش کی کلاسیکی رقص روایت کی لطافت، نزاکت اور روحانی گہرائی کو زندہ کر دیا۔ اس پیشکش نے ناظرین کو مسحور کر دیا اور ریاست کے گہرے ثقافتی اقدار اور کلاسیکی فنون کے تحفظ کے عزم کی بھرپور عکاسی کی۔

بھارتی ثقافت کے قدردانوں، سیاحوں اور فیسٹیول کے شرکاء نے بڑی تعداد میں اس تقریب میں شرکت کی، فنکاروں کی حوصلہ افزائی کی اور اس بڑے قومی پلیٹ فارم پر آندھرا پردیش کے وقار اور فخر میں شریک ہوئے۔

بھارت پرو 2026 میں آندھرا پردیش ڈے کی تقریب بھارت کے ثقافتی تنوع اور اتحاد کے ایک مؤثر اظہار کے طور پر سامنے آئی، جس نے ثقافتی تبادلے اور قومی یکجہتی کے فروغ میں اس فیسٹیول کے کردار کو مزید مضبوط کیا۔

******

ش ح۔ ش ا ر۔ ول

Uno-1350