नवी दिल्‍ली, 31 जानेवारी 2026

इंडियन इन्स्टिट्यूट ऑफ कॉर्पोरेट अफेअर्सने (आयआयसीए) प्रशिक्षण, संशोधन, उत्पादकता, शाश्वतता आणि अनुपालन समर्थनाच्या क्षेत्रांमध्ये सहकार्याच्या संधी शोधण्यासाठी, महासंचालक नीरजा शेखर आणि उपमहासंचालक (गट) उमाशंकर प्रसाद यांच्या नेतृत्वाखालील नॅशनल प्रोडक्टिव्हिटी कौन्सिलच्या (एनपीसी) एका उच्च-स्तरीय शिष्टमंडळाचे आयोजन केले.

आयआयसीएचे महासंचालक आणि मुख्य कार्यकारी अधिकारी ज्ञानेश्वर कुमार सिंह यांनी शिष्टमंडळाचे हार्दिक स्वागत केले आणि मान्यवरांना शाल व स्मृतिचिन्ह देऊन सन्मानित केले.

आपल्या भाषणात, आयआयसीएचे महासंचालक आणि मुख्य कार्यकारी अधिकारी यांनी उद्योगाकडून वाढत्या आणि बदलत्या मागण्यांवर आणि राष्ट्रीय प्राधान्यांशी सुसंगत राहण्याच्या संस्थांच्या गरजेवर भर दिला. भारताच्या नेतृत्वाने भविष्यासाठी एक स्पष्ट दृष्टिकोन मांडला आहे आणि विकसित भारताचे ध्येय साध्य करण्यासाठी संस्थांनी वैयक्तिक आणि सामूहिक अशा दोन्ही प्रकारे एकत्रितपणे योगदान दिले पाहिजे हे त्यांनी अधोरेखित केले.

या भेटीदरम्यान, विविध शाळा आणि केंद्रांच्या प्रमुखांनी आयआयसीएच्या कार्यकक्षा आणि कार्यांवर सविस्तर सादरीकरणे केली. या सादरीकरणांमध्ये सरकारी आणि खाजगी दोन्ही क्षेत्रांच्या उपक्रमांना पाठिंबा देणाऱ्या शिक्षण, प्रशिक्षण, संशोधन, जनजागृती आणि सल्लागार सेवा या क्षेत्रांमध्ये आयआयसीएच्या बहुआयामी भूमिकेवर प्रकाश टाकण्यात आला .

या संवाद सत्रात बोलताना, नीरजा शेखर, महासंचालक, एनपीसी यांनी अधोरेखित केले की, भारताच्या स्वातंत्र्यानंतर लगेचच, जेव्हा देशाला मर्यादित संसाधनांचा सामना करावा लागत होता आणि उत्पादकता सुधारण्याची तातडीची गरज होती, तेव्हा 1958 मध्ये एनपीसीची स्थापना करण्यात आली. त्यांनी जपानला गेलेल्या ऐतिहासिक उत्पादकता शिष्टमंडळाची आठवण करून दिली, ज्याने भारतात उत्पादकता प्रयत्नांना संस्थात्मक स्वरूप देण्याचा पाया घातला.  

तेव्हापासून, एनपीसीने आपले कार्य औद्योगिक क्षेत्रापासून कृषी, सेवा, एमएसएमई, शाश्वतता, हरित उत्पादकता आणि ईएसजी-संबंधित उपक्रमांपर्यंत विस्तारले आहे.

शेखर यांनी पुढे नमूद केले की, एनपीसीचा एशियन प्रोडक्टिव्हिटी ऑर्गनायझेशन (एपीओ) सोबत सक्रिय सहभाग आहे, ज्यामुळे आंतरराष्ट्रीय अनुभव, आंतर-देशीय अभ्यास दौरे, तज्ञांची देवाणघेवाण आणि उत्पादकता बेंचमार्किंग फ्रेमवर्क सुलभ होतात. हे उपक्रम, विशेषतः एमएसएमईसाठी, औद्योगिक सज्जता, संस्थात्मक सामर्थ्य, आर्थिक क्षमता आणि उत्पादन परिपक्वता यांचे मूल्यांकन करण्यास मदत करतात.

भारताच्या उच्च-उत्पन्न, स्पर्धात्मक, नाविन्यपूर्ण आणि शाश्वत अर्थव्यवस्थेकडे होणाऱ्या संक्रमणाला पाठिंबा देण्यासाठी, धोरण संशोधन, प्रशिक्षण आणि सल्लागार सेवांमधील आयआयसीएच्या सामर्थ्याला एनपीसीच्या प्रत्यक्ष, अंमलबजावणी-केंद्रित उत्पादकता कौशल्यासोबत एकत्रित करून, एकत्रितपणे पुढे जाण्याचा दृढ मानस दोन्ही संस्थांनी व्यक्त केला. या कार्यक्रमाचे समन्वय आयआयसीए च्या स्कूल ऑफ फायनान्स अँड मॅनेजमेंटचे प्रमुख डॉ. नवीन सिरोही यांनी केले.

* * *

नितीन फुल्लुके/हेमांगी कुलकर्णी/दर्शना राणे

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai