ਵਿਸ਼ਵ ਦੇ ਸਭ ਤੋਂ ਵੱਡੇ ਸਲਾਨਾ ਖੁਰਾਕ ਅਤੇ ਪੇਅ ਵਪਾਰ ਪ੍ਰਦਰਸ਼ਨੀ, ਗਲਫੂਡ 2026 ਵਿੱਚ ਕੰਟ੍ਰੀ ਪਾਰਟਨਰ ਵਜੋਂ ਭਾਰਤ ਨੇ ਆਪਣੀ ਸਸ਼ਕਤ ਅਤੇ ਰਣਨੀਤਕ ਮੌਜੂਦਗੀ ਦਰਜ ਕਰਵਾਈ ਹੈ, ਜੋ ਆਲਮੀ ਐਗਰੀ-ਫੂਡ ਅਤੇ ਪ੍ਰੋਸੈੱਸਿੰਗ ਖੁਰਾਕ ਖੇਤਰ ਵਿੱਚ ਭਾਰਤ ਦੀ ਵਧਦੀ ਅਗਵਾਈ ਨੂੰ ਰੇਖਾਂਕਿਤ ਕਰਦਾ ਹੈ। ਪ੍ਰਦਰਸ਼ਕਾਂ ਦੀ ਗਿਣਤੀ ਅਤੇ ਕੁੱਲ ਪ੍ਰਦਰਸ਼ਨੀ ਖੇਤਰ ਦੋਵਾਂ ਦੇ ਲਿਹਾਜ਼ ਨਾਲ, ਗਲਫੂਡ 2026 ਵਿੱਚ ਹਿੱਸਾ ਲੈਣ ਵਾਲੇ ਸਾਰੇ ਦੇਸ਼ਾਂ ਵਿੱਚ ਭਾਰਤ ਦੀ ਭਾਗੀਦਾਰੀ ਸਭ ਤੋਂ ਵੱਧ ਹੈ। ਗਲਫੂਡ 2026 ਵਿੱਚ ਭਾਰਤ ਵੱਲੋਂ ਪ੍ਰਦਰਸ਼ਿਤ ਕੀਤੇ ਜਾ ਰਹੇ ਪ੍ਰਮੁੱਖ ਉਤਪਾਦਾਂ ਵਿੱਚ ਬਾਸਮਤੀ ਚੌਲ, ਦਸ ਤੋਂ ਵੱਧ ਭਾਰਤੀ ਜੀਆਈ-ਟੈਗ ਵਾਲੀਆਂ ਚੌਲਾਂ ਦੀਆਂ ਕਿਸਮਾਂ, ਪ੍ਰੋਸੈੱਸਿੰਗ ਫੂਡ ਪ੍ਰੌਡਕਟਸ, ਬਾਜਰਾ, ਮੂੰਗਫਲੀ, ਚਾਹ, ਮਸਾਲੇ, ਹਲਦੀ, ਜੈਵਿਕ ਉਤਪਾਦ ਅਤੇ ਤਾਜ਼ੇ ਫਲ ਅਤੇ ਸਬਜ਼ੀਆਂ ਸ਼ਾਮਲ ਹਨ। 

ਫੂਡ ਪ੍ਰੋਸੈੱਸਿੰਗ ਇੰਡਸਟ੍ਰੀਜ਼ ਮੰਤਰਾਲੇ ਦੇ ਸਕੱਤਰ ਸ਼੍ਰੀ ਏਪੀ ਦਾਸ ਜੋਸ਼ੀ ਨੇ ਅੱਜ ਦੁਬਈ ਐਕਸਪੋ ਸਿਟੀ ਸਥਿਤ ਏਪੀਡਾ ਪਵੇਲੀਅਨ ਵਿੱਚ ਭਾਰਤੀ ਪਵੇਲੀਅਨ ਦਾ ਉਦਘਾਟਨ ਕੀਤਾ। ਇਸ ਮੌਕੇ 'ਤੇ ਸੰਯੁਕਤ ਅਰਬ ਅਮੀਰਾਤ ਵਿੱਚ ਭਾਰਤ ਦੇ ਰਾਜਦੂਤ ਡਾ. ਦੀਪਕ ਮਿੱਤਲ ਅਤੇ ਭਾਰਤ ਸਰਕਾਰ ਦੇ ਹੋਰ ਸੀਨੀਅਰ ਪਤਵੰਤੇ, ਜਿਨ੍ਹਾਂ ਵਿੱਚ ਏਪੀਡਾ ਦੇ ਚੇਅਰਮੈਨ ਸ਼੍ਰੀ ਅਭਿਸ਼ੇਕ ਦੇਵ, ਆਈਟੀਪੀਓ ਦੇ ਪ੍ਰਬੰਧ ਨਿਰਦੇਸ਼ਕ ਡਾ. ਨੀਰਜ ਖਰਵਾਲ ਅਤੇ ਭਾਰਤ ਦੇ ਵੱਡੀ ਗਿਣਤੀ ਵਿੱਚ ਪ੍ਰਦਰਸ਼ਕ ਸ਼ਾਮਲ ਸਨ, ਮੌਜੂਦ ਸਨ।

ਸੰਯੁਕਤ ਅਰਬ ਅਮੀਰਾਤ, ਏਪੀਡਾ ਦੇ ਨਿਰਧਾਰਿਤ ਉਤਪਾਦਾਂ ਦਾ ਸਭ ਤੋਂ ਵੱਡਾ ਬਜ਼ਾਰ ਹੈ ਅਤੇ ਖਾੜੀ ਖੇਤਰ ਦਾ ਪ੍ਰਵੇਸ਼ ਦੁਆਰ ਹੈ, ਜੋ ਕਿ ਭਾਰਤ ਦੇ ਖੇਤੀਬਾੜੀ ਨਿਰਯਾਤ ਦਾ ਸਭ ਤੋਂ ਵੱਡਾ ਡੈਸਟੀਨੈਸ਼ਨ ਹੈ। ਭਾਰਤ-ਯੂਏਈ ਵਿਆਪਕ ਆਰਥਿਕ ਸਾਂਝੇਦਾਰੀ ਸਮਝੌਤੇ ਦਾ ਦੁਵੱਲੇ ਵਪਾਰ 'ਤੇ, ਖ਼ਾਸ ਤੌਰ 'ਤੇ ਫੂਡ ਪ੍ਰੋਸੈੱਸਿੰਗ ਉਦਯੋਗ ਅਤੇ ਖੇਤੀਬਾੜੀ ਨਿਰਯਾਤ 'ਤੇ ਮਹੱਤਵਪੂਰਨ ਪ੍ਰਭਾਵ ਪਿਆ ਹੈ।

ਗਲਫੂਡ ਵਿੱਚ ਭਾਰਤ ਦੀ ਪਰੰਪਰਾਗਤ ਤੌਰ 'ਤੇ ਮਜ਼ਬੂਤ ਮੌਜੂਦਗੀ ਰਹੀ ਹੈ, ਪਰ 2026 ਐਡੀਸ਼ਨ ਵਿੱਚ ਭਾਰਤ ਦੀ ਹੁਣ ਤੱਕ ਦੀ ਸਭ ਤੋਂ ਵੱਡੀ ਭਾਗੀਦਾਰੀ ਦਰਜ ਕੀਤੀ ਗਈ ਹੈ, ਜਿਸ ਵਿੱਚ 600 ਤੋਂ ਵੱਧ ਭਾਰਤੀ ਕੰਪਨੀਆਂ ਮੁੱਖ ਖੁਰਾਕ ਪਦਾਰਥ, ਤਾਜ਼ੇ ਉਤਪਾਦ, ਪ੍ਰੋਸੈੱਸਡ ਖੁਰਾਕ ਪਦਾਰਥ, ਪੇਅ ਪਦਾਰਥ, ਖੇਤੀਬਾੜੀ ਤਕਨਾਲੋਜੀ ਅਤੇ ਫੂਡ ਪ੍ਰੋਸੈੱਸਿੰਗ ਸਮੇਤ ਵੱਖ-ਵੱਖ ਸ਼੍ਰੇਣੀਆਂ ਵਿੱਚ ਆਪਣੇ ਉਤਪਾਦ ਪ੍ਰਦਰਸ਼ਿਤ ਕਰ ਰਹੀਆਂ ਹਨ। ਕੰਟ੍ਰੀ ਪਾਰਟਨਰ ਵਜੋਂ, ਭਾਰਤ ਨੂੰ ਇੱਕ ਏਕੀਕ੍ਰਿਤ ਡਿਜ਼ਾਈਨ ਥੀਮ ਦੇ ਤਹਿਤ ਪ੍ਰਦਰਸ਼ਨੀ ਸਥਾਨਾਂ 'ਤੇ ਪ੍ਰਮੁੱਖ ਬ੍ਰਾਂਡਿੰਗ, ਸਮਰਪਿਤ ਕਾਨਫਰੰਸ ਸੈਸ਼ਨਾਂ ਅਤੇ ਬਿਹਤਰ B2B ਸ਼ਮੂਲੀਅਤ ਦੇ ਮੌਕੇ ਪ੍ਰਦਾਨ ਕੀਤੇ ਗਏ ਹਨ।

ਏਪੀਡਾ ਨੇ ਗਲਫੂਡ ਦੇ ਵੱਖ-ਵੱਖ ਪਵੇਲੀਅਨਾਂ ਵਿੱਚ ਲਗਭਗ 1,500 ਵਰਗ ਮੀਟਰ ਦਾ ਪ੍ਰਦਰਸ਼ਨੀ ਸਥਾਨ ਲਿਆ ਹੈ, ਜਿਨ੍ਹਾਂ ਵਿੱਚ ਦਾਲਾਂ, ਅਨਾਜ, ਵਰਲਡ ਫੂਡ, ਪੀਣ ਵਾਲੇ ਪਦਾਰਥ ਅਤੇ ਗਲਫੂਡ ਗ੍ਰੀਨ ਸ਼ਾਮਲ ਹਨ, ਜਿੱਥੇ 170 ਤੋਂ ਵੱਧ ਪ੍ਰਦਰਸ਼ਕ ਆਪਣੇ ਉਤਪਾਦਾਂ ਦਾ ਪ੍ਰਦਰਸ਼ਨ ਕਰ ਰਹੇ ਹਨ। ਇਨ੍ਹਾਂ ਵਿੱਚ ਵਣਜ ਵਿਭਾਗ ਦੇ ਅਧੀਨ ਆਉਣ ਵਾਲੀਆਂ ਸੰਸਥਾਵਾਂ ਜਿਵੇਂ ਕਿ ਚਾਹ ਬੋਰਡ, ਮਸਾਲਾ ਬੋਰਡ ਅਤੇ ਹਲਦੀ ਬੋਰਡ; ਭਾਰਤ ਸਰਕਾਰ ਦੇ ਸੰਗਠਨ ਜਿਵੇਂ ਕਿ ਰਾਸ਼ਟਰੀ ਬਾਗਬਾਨੀ ਬੋਰਡ, ਖੇਤੀਬਾੜੀ ਅਤੇ ਕਿਸਾਨ ਭਲਾਈ ਮੰਤਰਾਲੇ ਦੇ ਅਧੀਨ ਕੈਮਪਕੋ, ਐੱਨਸੀਈਐੱਲ ਅਤੇ ਸਹਿਕਾਰਤਾ ਮੰਤਰਾਲੇ ਅਧੀਨ ਐੱਨਏਐੱਫਈਡੀ; ਨਾਲ ਹੀ ਕਈ ਰਾਜ ਸਰਕਾਰਾਂ ਅਤੇ ਰਾਜ ਸੰਸਥਾਵਾਂ ਜਿਵੇਂ ਕਿ ਮੇਘਾਲਿਆ ਸਰਕਾਰ, ਮਾਰਕਫੈੱਡ ਪੰਜਾਬ, ਸਿੱਕਿਮ-ਆਈਐੱਫਐੱਫਸੀਓ, ਬਿਹਾਰ ਸਟੇਟ ਮਿਲਕ ਕੋਪਰੇਟਿਵ  ਫੈਡਰੇਸ਼ਨ ਲਿਮਿਟੇਡ (ਕੌਮਫੇਡ),ਬਿਹਾਰ ਸਰਕਾਰ ਦਾ ਖੇਤੀਬਾੜੀ ਵਿਭਾਗ ਅਤੇ ਉੱਤਰਾਖੰਡ ਹੌਰਟੀਕਲਚਰ ਬੋਰਡ ਸ਼ਾਮਲ ਹਨ। 

ਇਸ ਤੋਂ ਇਲਾਵਾ, 500 ਤੋਂ ਵਧ ਭਾਰਤੀ ਕੰਪਨੀਆਂ, ਜਿਨ੍ਹਾਂ ਵਿੱਚ ਜ਼ਿਆਦਾਤਰ ਸੰਸਥਾਗਤ ਅਤੇ ਵੱਡੇ ਖਿਡਾਰੀ ਸ਼ਾਮਲ ਹਨ, ਦੋਵਾਂ ਪ੍ਰਦਰਸ਼ਨੀ ਸਥਾਨਾਂ 'ਤੇ ਸੁਤੰਤਰ ਤੌਰ 'ਤੇ ਹਿੱਸਾ ਲੈ ਰਹੀਆਂ ਹਨ।

ਗਲਫੂਡ 2026 ਦਾ ਇੱਕ ਪ੍ਰਮੁੱਖ ਆਕਰਸ਼ਨ ਏਪੀਡਾ ਪਵੇਲੀਅਨ ਵਿੱਚ ਸਥਿਤ ਭਾਰਤੀ ਭੋਜਨ ਚੱਖਣ ਅਤੇ ਪਕਵਾਨ ਕਲਾ ਹੈ, ਜਿਸ ਨੂੰ ਪ੍ਰਸਿੱਧ ਸ਼ੈੱਫ ਸ਼੍ਰੀ ਹਰਪਾਲ ਸਿੰਘ ਸੋਖੀ ਨੇ ਤਿਆਰ ਕੀਤਾ ਹੈ। ਇਸ ਖੇਤਰ ਵਿੱਚ 10 ਭਾਰਤੀ ਜੀਆਈ-ਟੈਗ ਵਾਲੀਆਂ ਚੌਲਾਂ ਦੀਆਂ ਕਿਸਮਾਂ ਤੋਂ ਤਿਆਰ ਵਿਅੰਜਨ ਪ੍ਰਦਰਸ਼ਿਤ ਕੀਤੇ ਜਾ ਰਹੇ ਹਨ, ਜਿਨ੍ਹਾਂ ਵਿੱਚ ਉੱਤਰ ਪ੍ਰਦੇਸ਼ ਦਾ ਕਾਲਾ ਨਮਕ, ਅਸਾਮ ਦਾ ਜੋਹਾ, ਛੱਤੀਸਗੜ੍ਹ ਦਾ ਨਾਗਰੀ ਦੁਬਰਾਜ, ਓਡੀਸ਼ਾ ਦਾ ਜੀਰਾਫੂਲ, ਮਹਾਰਾਸ਼ਟਰ ਦਾ ਅੰਬੇਮੋਹਰ, ਪੱਛਮ ਬੰਗਾਲ ਦਾ ਗੋਵਿੰਦ ਭੋਗ, ਜੰਮੂ ਅਤੇ ਕਸ਼ਮੀਰ ਦਾ ਮੁਸ਼ਕਬੂਜੀ, ਬਿਹਾਰ ਤੋਂ ਕਟਾਰਨੀ, ਮਣੀਪੁਰ ਦਾ ਚੱਕ ਹਾਓ ਕਾਲੇ ਚੌਲ ਅਤੇ ਅਸਾਮ ਦਾ ਬੋਕਾ ਚੌਲ ਸ਼ਾਮਲ ਹਨ। ਨਾਲ ਹੀ, ਆਲ ਇੰਡੀਆ ਰਾਈਸ ਐਕਸਪੋਰਟਰਜ਼ ਐਸੋਸੀਏਸ਼ਨ ਦੁਆਰਾ ਪੇਸ਼ ਕੀਤੀ ਬਿਰਿਆਨੀ ਵੀ ਇੱਥੇ ਉਪਲਬਧ ਹੈ।

ਗਲਫੂਡ 2026 ਵਿੱਚ ਭਾਰਤ ਦੀ ਭਾਗੀਦਾਰੀ ਦਾ ਇੱਕ ਹੋਰ ਮਹੱਤਵਪੂਰਨ ਪਹਿਲੂ ਏਪੀਡਾ ਦੀ ਭਾਰਤੀ ਪਹਿਲਕਦਮੀ ਅਧੀਨ ਅੱਠ ਸਟਾਰਟਅੱਪਸ ਦੀ ਮੌਜੂਦਗੀ ਹੈ। ਭਾਰਤੀ ਪਹਿਲਕਦਮੀ ਖੇਤੀਬਾੜੀ ਤਕਨਾਲੋਜੀ, ਲਚਕੀਲਾਪਣ, ਵਿਕਾਸ ਅਤੇ ਨਿਰਯਾਤ ਨੂੰ ਉਤਸ਼ਾਹਿਤ ਕਰਨ ਲਈ ਭਾਰਤ ਦਾ ਕੇਂਦਰ ਹੈ। ਇਹ ਸਟਾਰਟਅੱਪ ਉਦਯੋਗ ਸਾਂਝੇਦਾਰਾਂ M/s LuLu Group ਅਤੇ M/s Allanasons ਦੇ ਸਹਿਯੋਗ ਨਾਲ ਖੇਤੀਬਾੜੀ-ਖੁਰਾਕ ਅਤੇ ਖੇਤੀਬਾੜੀ-ਤਕਨੀਕੀ ਖੇਤਰ ਵਿੱਚ ਨਵੀਨਤਾਕਾਰੀ ਉਤਪਾਦਾਂ ਅਤੇ ਤਕਨਾਲੋਜੀਆਂ ਦਾ ਪ੍ਰਦਰਸ਼ਨ ਕਰ ਰਹੇ ਹਨ। ਏਪੀਡਾ ਦੁਆਰਾ ਖੇਤੀਬਾੜੀ-ਖੁਰਾਕ ਅਤੇ ਖੇਤੀਬਾੜੀ-ਤਕਨੀਕੀ ਖੇਤਰਾਂ ਵਿੱਚ ਕੰਮ ਕਰਦੇ ਸਟਾਰਟਅੱਪਸ ਦੀਆਂ ਨਿਰਯਾਤ ਸਮਰੱਥਾਵਾਂ ਨੂੰ ਮਜ਼ਬੂਤ ​​ਕਰਨ ਲਈ ਭਾਰਤੀ ਪਹਿਲਕਦਮੀ ਸ਼ੁਰੂ ਕੀਤੀ ਗਈ ਹੈ।

ਗਲਫੂਡ 2026 ਵਿੱਚ ਕੰਟ੍ਰੀ ਪਾਰਟਨਰ ਵਜੋਂ ਭਾਰਤ ਦੀ ਭਾਗੀਦਾਰੀ ਆਲਮੀ ਬਜ਼ਾਰਾਂ ਵਿੱਚ ਉੱਚ-ਗੁਣਵੱਤਾ ਵਾਲੇ, ਸੁਰੱਖਿਅਤ, ਟਿਕਾਊ ਅਤੇ ਨਵੀਨਤਾਕਾਰੀ ਖੁਰਾਕ ਉਤਪਾਦਾਂ ਦੀ ਸਪਲਾਈ ਪ੍ਰਤੀ ਦੇਸ਼ ਦੀ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ। ਭਾਰਤੀ ਪਵੇਲੀਅਨ ਤਾਜ਼ੇ ਅਤੇ ਪ੍ਰੋਸੈੱਸਡ  ਖੁਰਾਕ ਪਦਾਰਥ, ਪੇਅ ਪਦਾਰਥ, ਅਨਾਜ, ਬਾਜਰਾ, ਸਿਹਤ ਉਤਪਾਦਾਂ ਅਤੇ ਨਿਰਯਾਤ-ਸਮਰੱਥ ਤਕਨਾਲੋਜੀਆਂ ਵਿੱਚ ਭਾਰਤ ਦੀਆਂ ਮਜ਼ਬੂਤ ​​ਸਮਰੱਥਾਵਾਂ ਨੂੰ ਉਜਾਗਰ ਕਰਦਾ ਹੈ ਅਤੇ ਇਸ ਨਾਲ ਵਪਾਰ ਸਬੰਧਾਂ ਨੂੰ ਹੋਰ ਮਜ਼ਬੂਤ ​​ਕਰਨ, ਖਰੀਦਦਾਰਾਂ ਦੀ ਸ਼ਮੂਲੀਅਤ ਵਧਾਉਣ ਅਤੇ ਭਾਰਤ ਨੂੰ ਦੁਨੀਆ ਦੀ ਫੂਡ ਬਾਸਕਿਟ ਬਣਾਉਣ ਦੇ ਸਰਕਾਰ ਦੇ ਦ੍ਰਿਸ਼ਟੀਕੋਣ ਦੇ ਅਨੁਸਾਰ ਇੱਕ ਭਰੋਸੇਯੋਗ ਗਲੋਬਲ ਫੂਡ ਪਾਰਟਨਰਸ਼ਿਪ ਵਜੋਂ ਸਥਾਪਿਤ ਕਰਨ ਦੀ ਉਮੀਦ ਹੈ। 

************

ਅਭਿਸ਼ੇਕ ਦਿਆਲ/ ਗਰਿਮਾ ਸਿੰਘ/ ਇਸ਼ਿਤਾ ਬਿਸਵਾਸ

(रिलीज़ आईडी: 2219587) आगंतुक पटल : 4