ہندوستان میڈیکل ویلیو ٹریول (ایم وی ٹی) کے لیے تیزی سے ترقی کرتی ہوئی اہم ترین منزلوں میں شامل ہو رہا ہے جس میں عالمی معیار کے بنیادی طبی ڈھانچے ، انتہائی ہنر مند صحت کی دیکھ بھال کرنے والے پیشہ ور افراد اور  کم لاگت سے موثر علاج کو روایتی نظام طب اور مجموعی تندرستی میں ملک کی منفرد صلاحیت کو شامل کیا گیا ہے۔

پیچیدہ جراحی کے طریقہ کار سے لے کر طویل مدتی تندرستی کے علاج تک ، ہندوستان آج ایک مربوط صحت کی دیکھ بھال کا ایکو- نظام پیش کرتا ہے جو معیار ، کفایتی سہولیات اور اعتماد کے خواہاں بین الاقوامی مریضوں کو تیزی سے اپنی جانب متوجہ کر رہا ہے۔ ہندوستان میں عالمی معیار پر پرکھے گئے  اسپتالوں میں معروف ماہرین کے ذریعہ کم لاگت پر  موثر علاج فراہم کیا جاتا ہے ، جبکہ روایتی آیوش نظام ملک کی طبی سیاحت کو متوجہ کرنے  میں ایک منفرد حفاظتی اور تندرستی کی جہت کا اضافہ کرتے ہیں۔

عالمی صحت کے لیے میڈیکل ویلیو ٹریول کی اہمیت کو اجاگر کرتے ہوئے ، ون ارتھ ون ہیلتھ-ایڈوانٹیج ہیلتھ کیئر انڈیا 2023 میں اپنے خطاب کے دوران ، عزت مآب وزیر اعظم نے کہا تھا ، "ہندوستان میڈیکل ویلیو ٹریول  اور صحت کے شعبے میں افرادی قوت کی نقل و حرکت کو ایک صحت مند کرہ ارض کے لیے نہایت اہم سمجھتا ہے"۔ عزت مآب وزیر اعظم نے مزید کہا تھا ، "ہزاروں برسوں سے ، صحت کے تئیں ہندوستان کا نقطہ نظر جامع رہا ہے ۔ ہمارے پاس احتیاطی  اور فروغ ِ صحت کی ایک عظیم روایت ہے۔ یوگا اور مراقبہ جیسے نظام اب عالمی تحریک بن چکے ہیں۔ یہ جدید دنیا کے لیے قدیم ہندوستان کا تحفہ ہیں۔ اسی طرح ہمارا آیوروید نظام تندرستی کا ایک مکمل نظم ہے۔ یہ صحت کے جسمانی اور ذہنی ، دونوں پہلوؤں کا خیال رکھتا ہے۔ دنیا تناؤ اور طرز زندگی کی بیماریوں کا حل تلاش کر رہی ہے۔ ہندوستان کے روایتی صحت کی دیکھ بھال کے نظام میں اس کے بہت سے جوابات موجود ہیں۔ ہماری روایتی غذا ، جو موٹے اناج  پر مشتمل ہے ، غذائی تحفظ اور غذائیت میں بھی مدد کر سکتی ہے ۔

عالمی اعتماد اور معیار کی یقین دہانی کو تقویت دینے کی کوششوں کےتحت  ، وزیر اعظم جناب نریندر مودی نے حال ہی میں روایتی ادویات پر ڈبلیو ایچ او کے دوسرے عالمی اجلاس کے دوران بھارت منڈپم میں 19 دسمبر 2025 کو 'آیوش کوالٹی مارک' کا آغاز کیا۔ آیوش کوالٹی مارک آیوش مصنوعات اور خدمات کے لیے بین الاقوامی سطح پر ہم آہنگ یقین دہانی کا فریم ورک فراہم کرتا ہے ، جو مستند اور معیاری نگہداشت کے بین الاقوامی متلاشیوں کے درمیان اعتماد کو مزید مضبوط کرتا ہے ۔

روایتی صحت کی دیکھ بھال کے نظام کے ساتھ روایتی ادویات کو یکجا کرنے والے میڈیکل ویلیو ٹریول کے لیے ہندوستان کے مربوط نقطہ نظر کو تقویت دیتے ہوئے آیوش کی وزارت کے مرکزی وزیر مملکت (آزادانہ چارج) جناب پرتاپ راؤ جادھو نے اس بات پر زور دیا کہ ہندوستان کی طاقت اس کے مربوط صحت کی دیکھ بھال کے نقطہ نظر میں مضمر ہے۔وزیر موصوف نے کہا "میڈیکل ویلیو ٹریول صرف کفایتی سہولیات کے بارے میں نہیں ہے ، بلکہ اعتماد ، معیار اور نتائج کے بارے میں ہے ۔ ہندوستان کا آیوش نظام ہر دور میں آزمودہ ، ثبوت پر مبنی حل پیش کرتا ہے جو روایتی ادویات کی تکمیل کرتا ہے اور مجموعی صحت اور تندرستی کی عالمی مانگ کو پورا کرتا ہے" ۔

عالمی مریضوں کو متوجہ کرنے میں ساکھ اور معیاری کاری کی اہمیت کو اجاگر کرتے ہوئے آیوش کی وزارت کے سکریٹری ویدیہ راجیش کوٹیچا نے اس بات پر زور دیا کہ عالمی ترقی کو برقرار رکھنے کے لیے ساکھ اور معیاری کاری کلیدی حیثیت رکھتی ہے۔ روایتی اور تندرستی پر مبنی دیکھ بھال میں بڑھتی ہوئی بین الاقوامی دلچسپی کے ساتھ ، ہندوستان معیار کی یقین دہانی ، ڈیجیٹل سہولت اور بین الاقوامی معیارات کے ذریعے اپنے میڈیکل ویلیو ٹریول فریم ورک کو مضبوط کر رہا ہے ۔ یہ مربوط نقطہ نظر ہندوستان کو صحت کی دیکھ بھال کے لیے ایک قابل اعتماد عالمی منزل  کے طور پر قائم کر رہا ہے ۔

اعداد وشمار  اس بڑھتی ہوئی رفتار کی عکاسی کرتے ہیں۔ ہندوستان کا دورہ کرنے والے  بین الاقوامی مریضوں کی تعداد 2020 میں 1,82,945 سے بڑھ کر 2024 میں 6,44,387 ہو گئی ۔ حالیہ برسوں میں یوگا ، آیوروید ،اور تندرستی پر مبنی علاج اس ترقی میں اہم معاون کے طور پر ابھرے ہیں ، جس سے ہندوستان جامع ، ثبوت پر مبنی دیکھ بھال کے لیے ایک ترجیحی مقام کے طور پر قائم ہوا ہے۔

ایک مضبوط پبلک پرائیویٹ پارٹنرشپ ماڈل نے ہندوستان کے قومی میڈیکل ویلیو ٹریول روڈ میپ کو آگے بڑھانے میں اہم کردار ادا کیا ہے ۔ طبی بنیادی ڈھانچے میں 100 فیصد براہ راست غیر ملکی سرمایہ کاری ، طبی خدمات کی برآمدات کے لیے مالی مراعات اور ہدف شدہ عالمی رسائی جیسے پالیسی اقدامات  نے عالمی سطح پر مسابقتی صحت کی دیکھ بھال کا ماحولیاتی نظام بنانے میں مدد کی ہے۔

آیوش کی وزارت نے قدرتی ، احتیاطی اور مربوط صحت کی دیکھ بھال کے حل کی عالمی مانگ کو تسلیم کرتے ہوئے آیوش میڈیکل ویلیو ٹریول کو مضبوط بنانے پر خاص زور دیا ہے ۔ ہندوستان کے روایتی نظام-آیوروید ، یوگا ، نیچروپیتھی ، یونانی ، سدھا اور ہومیوپیتھی-کو بین الاقوامی مریضوں کی طرف سے پرانی  بیماریوں ، طرز زندگی کے عوارض، بحالی اور تندرستی کے پروگراموں کے انتظام کے لیے تیزی سے منتخب کیا جا رہا ہے ۔

بلا رکاوٹ رسائی کو آسان بنانے کے لیے ، حکومت ہند نے 27 جولائی 2023 کو آیوش نظام طب کے تحت علاج کے خواہاں غیر ملکی شہریوں اور ان کے تیمارداروں  کے لیے ایک وقف آیوش ویزا متعارف کرایا ۔

آیوش کی وزارت ، میڈیکل ویلیو ٹریول پر توجہ مرکوز کرتے ہوئے ، بین الاقوامی معیار اور ریگولیٹری معیارات کے ساتھ تیزی سے ہم آہنگی قائم کئے ہوئے ہے ۔ بیورو آف انڈین اسٹینڈرڈز (بی آئی ایس) نے معیاری اور قابل اعتماد صحت کی دیکھ بھال اور تندرستی کی خدمات کو آسان بنانے کے لیے میڈیکل ویلیو ٹریول کے لیے عالمی معیار آئی ایس او 22525 کو اپنایا ہے۔ انشورنس کوریج میں بھی توسیع ہو رہی ہے ، تقریبا 27 انشورنس کمپنیاں آیوش کے علاج کے لیے کوریج پیش کر رہی ہیں، جس سے بین الاقوامی مریضوں کا اعتماد مزید بڑھ رہا ہے ۔

بڑے آیوش پلیٹ فارمز پر میڈیکل ویلیو ٹریول  ایک مرکزی موضوع رہا ہے ، جس میں "آیوش میں عالمی ہم آہنگی: میڈیکل ویلیو ٹریول کے ذریعے صحت اور تندرستی کو تبدیل کرنا" اجلاس  شامل ہے ، جو 2024 میں ممبئی اور مئی 2025 میں چنئی میں منعقد ہوا تھا۔ ہندوستان کے وسیع تر سیاحت اور صحت کی دیکھ بھال کے برانڈ کےتحت  آیوش پر مبنی تندرستی کی خدمات کو فروغ دینے کے لیے وزارت ،آئی ٹی ڈی سی جیسی تنظیموں کے ساتھ بھی مصروف عمل  ہے ۔

صلاحیت سازی اور عالمی رسائی ہندوستان کے آیوش کی قیادت والے میڈیکل ویلیو ٹریول ایکو سسٹم کو مضبوط کر رہی ہے ۔ ہیلتھ سیکٹر اسکل کونسل (ایچ ایس ایس سی) نے 2018 میں آیوش کے لیے ایک خصوصی ذیلی کونسل قائم کی، جس کا مقصد مہارتوں کے فروغ اور روزگار کے مواقع میں اضافہ کرنا ہے، 2021 سے اب تک ملک بھر میں آیوش سے متعلق مختلف شعبوں میں 37 ہزار سے زائد افراد کو سرٹیفائیڈ کیا جا چکا ہے، جس سے خدمات کے معیار میں نمایاں بہتری آئی ہے۔ روایتی ادویات پر دوسری ڈبلیو ایچ او گلوبل سمٹ میں دکھائی گئی فلم کے ذریعے آیوش اور وقف آیوش ویزا کے بارے میں عالمی بیداری کو تقویت ملی ہے ، جسے 100 سے زائد ممالک کے شرکاء نے دیکھا۔ نو انڈیا (ہندوستان کو جانیں) پروگرام کے تحت باقاعدہ دوروں اور مہا کمبھ میلہ 2025 ، جس میں قومی آیوش مشن کے تحت آیوش کے اقدامات شامل ہیں ، نے بین الاقوامی اور عوامی رسائی کو مزید وسعت دی ہے ۔

پالیسی معاونت، ویزا سہولت کاری، انشورنس کوریج اور معیاری پیمانوں کے باہم امتزاج کے ساتھ، بھارت کی میڈیکل ویلیو ٹریول کی کہانی مسلسل ارتقا پذیر ہے-کم لاگت کے فائدے سے آگے بڑھتے ہوئے مربوط، ہمہ جہتی اور شواہد پر مبنی صحت کی دیکھ بھال میں عالمی اعتماد کی علامت بنتی جا رہی ہے۔

*****

U.N. 918

ش ح۔ م ش۔ خ م

(रिलीज़ आईडी: 2217311) आगंतुक पटल : 17