ಕೇಂದ್ರ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವರಾದ ಶ್ರೀ ಪ್ರಲ್ಹಾದ್ ಜೋಶಿ ಅವರು ಇಂದು ದಾವೋಸ್‌ ನಲ್ಲಿ ನಡೆದ ವಿಶ್ವ ಆರ್ಥಿಕ ವೇದಿಕೆಯ 2026 ರ ವಾರ್ಷಿಕ ಸಭೆಯಲ್ಲಿ ಉನ್ನತ ಮಟ್ಟದ ಸರಣಿ ಕಾರ್ಯಕ್ರಮಗಳಲ್ಲಿ ಪಾಲ್ಗೊಂಡರು. ಈ ಸಂದರ್ಭದಲ್ಲಿ ಅವರು ನ್ಯಾಯಸಮ್ಮತ, ಕೈಗೆಟುಕುವ ಮತ್ತು ಒಳಗೊಳ್ಳುವ ಜಾಗತಿಕ ಇಂಧನ ಪರಿವರ್ತನೆಯನ್ನು ಮುನ್ನಡೆಸುವಲ್ಲಿ ಭಾರತದ ನಾಯಕತ್ವವನ್ನು ಒತ್ತಿಹೇಳಿದರು.

ವಿಶ್ವ ಆರ್ಥಿಕ ವೇದಿಕೆಯ ಅಧ್ಯಕ್ಷ ಮತ್ತು ಸಿಇಒ ಬೋರ್ಗೆ ಬ್ರೆಂಡೆ ಮತ್ತು ಕೇಂದ್ರ ರೈಲ್ವೆ, ಎಲೆಕ್ಟ್ರಾನಿಕ್ಸ್ ಮತ್ತು ಐಟಿ ಹಾಗೂ ವಾರ್ತಾ ಮತ್ತು ಪ್ರಸಾರ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರೊಂದಿಗೆ ಶ್ರೀ ಪ್ರಲ್ಹಾದ್ ಜೋಶಿ ಅವರು ರಚನಾತ್ಮಕ ಚರ್ಚೆ ನಡೆಸಿದರು. ಈ ಚರ್ಚೆಗಳು ಹಂಚಿಕೆಯ ಆರ್ಥಿಕ ಮತ್ತು ಅಭಿವೃದ್ಧಿ ಸವಾಲುಗಳನ್ನು ಎದುರಿಸುವಲ್ಲಿ ಜಾಗತಿಕ ಸಹಕಾರದ ಪ್ರಾಮುಖ್ಯತೆ, ಜಾಗತಿಕ ಒಮ್ಮತವನ್ನು ನಿರ್ಮಿಸುವಲ್ಲಿ ವಿಶ್ವ ಆರ್ಥಿಕ ವೇದಿಕೆಯಂತಹ ಬಹುಪಕ್ಷೀಯ ವೇದಿಕೆಗಳ ಪಾತ್ರ ಮತ್ತು ಇಂಧನ ಹಾಗೂ ಅಭಿವೃದ್ಧಿ ಕ್ಷೇತ್ರಗಳಲ್ಲಿ ಸುಸ್ಥಿರ, ಸ್ಥಿತಿಸ್ಥಾಪಕ ಮತ್ತು ಒಳಗೊಳ್ಳುವ ಬೆಳವಣಿಗೆಯನ್ನು ಉತ್ತೇಜಿಸಲು ಸರ್ಕಾರಗಳು, ಉದ್ಯಮಗಳು ಮತ್ತು ಪಾಲುದಾರರ ನಡುವೆ ನಿರಂತರ ಸಂವಾದದ ಅಗತ್ಯತೆಯ ಮೇಲೆ ಕೇಂದ್ರೀಕರಿಸಿದ್ದವು.

ಜಾಗತಿಕ ದಕ್ಷಿಣದೊಂದಿಗೆ ಹಂಚಿಕೊಳ್ಳಲಾದ ಭಾರತದ ವಿಕೇಂದ್ರೀಕೃತ ನವೀಕರಿಸಬಹುದಾದ ಇಂಧನ ಅನುಭವ

ವಿಶ್ವ ಆರ್ಥಿಕ ವೇದಿಕೆಯಲ್ಲಿ ನಡೆದ ದುಂಡುಮೇಜಿನ ಚರ್ಚೆಯ ಸಂದರ್ಭದಲ್ಲಿ, ಶ್ರೀ ಪ್ರಲ್ಹಾದ್ ಜೋಶಿ ಅವರು ಮೇಲ್ಛಾವಣಿ, ಕೃಷಿ ಮತ್ತು ವಿಕೇಂದ್ರೀಕೃತ ನವೀಕರಿಸಬಹುದಾದ ಇಂಧನ ಪರಿಹಾರಗಳನ್ನು ವೇಗವಾಗಿ ವಿಸ್ತರಿಸುವಲ್ಲಿ ಭಾರತದ ಅನುಭವವನ್ನು ಹಂಚಿಕೊಂಡರು, ಇದು ವಿಶೇಷವಾಗಿ ಜಾಗತಿಕ ದಕ್ಷಿಣದ ದೇಶಗಳಿಗೆ ಪ್ರಸ್ತುತವಾಗಿದೆ. ಈ ದುಂಡುಮೇಜಿನ ಸಭೆಯಲ್ಲಿ ಮಹಾರಾಷ್ಟ್ರದ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಮತ್ತು ಜಿಂಬಾಬ್ವೆ ಗಣರಾಜ್ಯದ ವಿದೇಶಾಂಗ ವ್ಯವಹಾರ ಮತ್ತು ಅಂತರರಾಷ್ಟ್ರೀಯ ವ್ಯಾಪಾರ ಸಚಿವರಾದ ಅಮೋನ್ ಮುರ್ವಿರಾ ಉಪಸ್ಥಿತರಿದ್ದರು.

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ದೂರದೃಷ್ಟಿಯಿಂದ ಮಾರ್ಗದರ್ಶನ ಪಡೆದ ಭಾರತದ ಸ್ವಚ್ಛ ಇಂಧನ ಪರಿವರ್ತನೆಯು, ಕ್ಷಿಪ್ರ ಬೆಳವಣಿಗೆ, ಕೈಗೆಟುಕುವ ದರ ಮತ್ತು ಸುಸ್ಥಿರತೆ ಒಟ್ಟಾಗಿ ಸಾಗಬಹುದು ಎಂಬುದನ್ನು ಪ್ರದರ್ಶಿಸುತ್ತದೆ ಎಂದು ಕೇಂದ್ರ ಸಚಿವರಾದರು ಹೇಳಿದರು. ಮೇಲ್ಛಾವಣಿ ಸೌರ ಅಳವಡಿಕೆಗಾಗಿ 'ಪಿಎಂ ಸೂರ್ಯ ಘರ್ ಉಚಿತ ವಿದ್ಯುತ್‌ ಯೋಜನೆ' ಮತ್ತು ಸೌರಶಕ್ತಿ ಚಾಲಿತ ಕೃಷಿಗಾಗಿ 'ಪಿಎಂ-ಕುಸುಮ್' ನಂತಹ ಪ್ರಮುಖ ಉಪಕ್ರಮಗಳ ಬಗ್ಗೆ ಅವರು ವಿವರಿಸಿದರು. ಇವು ಮನೆಗಳು ಮತ್ತು ರೈತರಿಗೆ ಸ್ವಚ್ಛ ಇಂಧನದ ಪ್ರವೇಶವನ್ನು ವಿಸ್ತರಿಸುತ್ತಿವೆ, ವೆಚ್ಚವನ್ನು ಕಡಿಮೆ ಮಾಡುತ್ತಿವೆ ಮತ್ತು ಇಂಧನ-ನೀರು-ಆಹಾರದ ನಡುವಿನ ಸಂಬಂಧವನ್ನು ಬಲಪಡಿಸುತ್ತಿವೆ ಎಂದು ಹೇಳಿದರು.

ದೂರದ ಮತ್ತು ದುರ್ಬಲ ಗ್ರಿಡ್ ಪ್ರದೇಶಗಳಲ್ಲಿ ವಿಶ್ವಾಸಾರ್ಹತೆ ಮತ್ತು ಸ್ಥಿರತೆಯನ್ನು ಸುಧಾರಿಸುವಲ್ಲಿ ವಿಕೇಂದ್ರೀಕೃತ ನವೀಕರಿಸಬಹುದಾದ ಇಂಧನ ವ್ಯವಸ್ಥೆಗಳು ಮತ್ತು ಮಿನಿ-ಗ್ರಿಡ್‌ ಗಳ ಪಾತ್ರವನ್ನು ಶ್ರೀ ಜೋಶಿ ಅವರು ಹೇಳಿದರು.

ಗೌರವಾನ್ವಿತ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನಾಯಕತ್ವದಲ್ಲಿ ಕೈಗೊಳ್ಳಲಾಗುತ್ತಿರುವ ಸ್ವಚ್ಛ ಇಂಧನ ಉಪಕ್ರಮಗಳನ್ನು ಮಹಾರಾಷ್ಟ್ರದ ಮುಖ್ಯಮಂತ್ರಿ ಶ್ರೀ ದೇವೇಂದ್ರ ಫಡ್ನವೀಸ್ ಅವರು ಶ್ಲಾಘಿಸಿದರು ಮತ್ತು ಕೇಂದ್ರ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವರಾದ ಶ್ರೀ ಪ್ರಲ್ಹಾದ್ ಜೋಶಿ ಅವರ ಮಾರ್ಗದರ್ಶನದಲ್ಲಿ ನವೀಕರಿಸಬಹುದಾದ ಇಂಧನ ಕ್ಷೇತ್ರದಲ್ಲಿ ಸಾಧಿಸಿರುವ ಕ್ಷಿಪ್ರ ಪ್ರಗತಿ ಮತ್ತು ಸಾಧನೆಗಳನ್ನು ಉಲ್ಲೇಖಿಸಿದರು.

ಸಮಗ್ರ ಇಂಧನ ಪರಿವರ್ತನೆಗಳು ಮತ್ತು ಆಳವಾದ ದಕ್ಷಿಣ-ದಕ್ಷಿಣ ಸಹಕಾರಕ್ಕೆ ಭಾರತದ ಬದ್ಧತೆಯನ್ನು ಪುನರುಚ್ಚರಿಸಿದ ಕೇಂದ್ರ ಸಚಿವರಾದರು, ಜಾಗತಿಕ ಸಮುದಾಯವು ಸ್ಥಿರ ಮತ್ತು ಹವಾಮಾನ-ಸುರಕ್ಷಿತ ಭವಿಷ್ಯಕ್ಕಾಗಿ ಸಾಮೂಹಿಕವಾಗಿ ಕೆಲಸ ಮಾಡುತ್ತಿರುವಾಗ, ಅಂತರರಾಷ್ಟ್ರೀಯ ಸೌರ ಒಕ್ಕೂಟದಂತಹ ವೇದಿಕೆಗಳ ಮೂಲಕ ಭಾರತವು ಪ್ರಾಯೋಗಿಕ ಮತ್ತು ವಿಸ್ತರಿಸಬಹುದಾದ ಪರಿಹಾರಗಳನ್ನು ಹಂಚಿಕೊಳ್ಳುವುದನ್ನು ಮುಂದುವರಿಸುತ್ತದೆ ಎಂದು ಒತ್ತಿ ಹೇಳಿದರು.

ಇಂಧನ ಪರಿವರ್ತನೆಯ ಇಂಜಿನ್‌ ಗಳಾಗಿ ಭಾರತದ ರಾಜ್ಯಗಳು

ಮಧ್ಯಪ್ರದೇಶದ ಮುಖ್ಯಮಂತ್ರಿ ಶ್ರೀ ಮೋಹನ್ ಯಾದವ್ ಅವರೊಂದಿಗೆ ‘ಡಿ-ರಿಸ್ಕಿಂಗ್ ದಿ ಗ್ರೀನ್ ಲೀಪ್: ಸಬ್‌ನ್ಯಾಷನಲ್ ಬ್ಲೂಪ್ರಿಂಟ್ಸ್ ಫಾರ್ ಯುಟಿಲಿಟಿ-ಸ್ಕೇಲ್ ಎನರ್ಜಿ ಟ್ರಾನ್ಸಿಶನ್’ ಎಂಬ ಅಧಿವೇಶನವನ್ನು ಉದ್ದೇಶಿಸಿ ಮಾತನಾಡಿದ ಕೇಂದ್ರ ಸಚಿವರಾದ ಜೋಶಿ ಅವರು, ಇಂದು ಭಾರತವು ಜಾಗತಿಕ ನವೀಕರಿಸಬಹುದಾದ ಇಂಧನ ಪರಿವರ್ತನೆಯನ್ನು ಮುನ್ನಡೆಸುವಲ್ಲಿ ಜಾಗತಿಕ ಗಮನ ಸೆಳೆದಿದೆ ಎಂದು ಹೇಳಿದರು. ಭಾರತದ ಇಂಧನ ಪರಿವರ್ತನೆಯು ಕೇವಲ ರಾಷ್ಟ್ರ ಮಟ್ಟದಲ್ಲಿ ಮಾತ್ರವಲ್ಲದೆ, ನೀತಿಯನ್ನು ಸ್ಪಷ್ಟ ಫಲಿತಾಂಶಗಳಾಗಿ ಪರಿವರ್ತಿಸುತ್ತಿರುವ ಬಲವಾದ, ಸುಧಾರಣಾ-ಆಧಾರಿತ ರಾಜ್ಯಗಳ ಮೂಲಕವೂ ಮುಂದುವರಿಯುತ್ತಿದೆ ಎಂದು ಹೇಳಿದರು.

ಪ್ರಮಾಣ, ವೇಗ ಮತ್ತು ವ್ಯವಸ್ಥೆಯ ದೃಷ್ಟಿಯಿಂದ ಮಧ್ಯಪ್ರದೇಶವನ್ನು ಒಂದು ಪ್ರಮುಖ ಉದಾಹರಣೆಯಾಗಿ ಅವರು ಪ್ರಸ್ತಾಪಿಸಿದರು. ಈ ರಾಜ್ಯವು ಬಲವಾದ ಅನುಷ್ಠಾನ ಸಾಮರ್ಥ್ಯಗಳನ್ನು ಪ್ರದರ್ಶಿಸಿದೆ, ದೇಶದಲ್ಲೇ ಅತ್ಯಂತ ಕಡಿಮೆ ವೆಚ್ಚದ ಸೌರಶಕ್ತಿ ಮತ್ತು ಬ್ಯಾಟರಿ ಸಂಗ್ರಹಣೆಯನ್ನು ಹೊಂದಿದೆ ಮತ್ತು ಜಾಗತಿಕವಾಗಿ ಸ್ಪರ್ಧಾತ್ಮಕವಾದ ಹಸಿರು ಹೈಡ್ರೋಜನ್ ಬೆಲೆಗಳನ್ನು ಹೊಂದಿದೆ ಎಂದರು.

ಇಂದಿನ ಜಾಗತಿಕ ಇಂಧನ ಪರಿವರ್ತನೆಯ ಪ್ರಮುಖ ಸವಾಲು ಮಹತ್ವಾಕಾಂಕ್ಷೆ ಅಥವಾ ಬಂಡವಾಳವಲ್ಲ, ಬದಲಿಗೆ ಪರಿಣಾಮಕಾರಿ ಅನುಷ್ಠಾನವಾಗಿದೆ ಎಂದು ಕೇಂದ್ರ ಸಚಿವರಾದರು ಒತ್ತಿ ಹೇಳಿದರು ಮತ್ತು ಭಾರತದ ರಾಜ್ಯಗಳ ನೇತೃತ್ವದ ನವೀಕರಿಸಬಹುದಾದ ಇಂಧನ ಯಶಸ್ಸಿನ ಕಥೆಗಳು ಜಗತ್ತಿಗೆ ಅಮೂಲ್ಯವಾದ ಪಾಠಗಳನ್ನು ನೀಡುತ್ತವೆ ಎಂದು ಹೇಳಿದರು.

ಸ್ವಚ್ಛ ಇಂಧನ ಸಹಯೋಗ

ಡಬ್ಲ್ಯೂಇಎಫ್‌ 2026 ರ ಸಂದರ್ಭದಲ್ಲಿ, ಶ್ರೀ ಪ್ರಲ್ಹಾದ್ ಜೋಶಿ ಅವರು ಮೆರ್ಕ್ಯುರಿಯಾ ಗ್ರೂಪ್‌ ನ ಮುಖ್ಯ ಹಣಕಾಸು ಅಧಿಕಾರಿ ಗುಯಿಲೌಮ್ ವರ್ಮರ್ಶೆ ಅವರೊಂದಿಗೆ ರಚನಾತ್ಮಕ ಸಭೆಯನ್ನು ನಡೆಸಿದರು. ಮಾರುಕಟ್ಟೆ-ಆಧಾರಿತ ಕಾರ್ಯವಿಧಾನಗಳ ಮೂಲಕ ನವೀಕರಿಸಬಹುದಾದ ಇಂಧನವನ್ನು ವಿಸ್ತರಿಸುವುದು, ಕಾರ್ಬನ್ ಮಾರುಕಟ್ಟೆಗಳು ಮತ್ತು ಹವಾಮಾನ ಹಣಕಾಸನ್ನು ಬಲಪಡಿಸುವುದು ಹಾಗೂ ಹಸಿರು ಹೈಡ್ರೋಜನ್, ಜೈವಿಕ ಇಂಧನಗಳು ಮತ್ತು ಇಂಧನ ಸಂಗ್ರಹಣೆಯನ್ನು ಉತ್ತೇಜಿಸುವುದು ಸೇರಿದಂತೆ ಭಾರತದ ಸ್ವಚ್ಛ ಇಂಧನ ಮತ್ತು ಇಂಧನ ಪರಿವರ್ತನೆಯ ಆದ್ಯತೆಗಳಿಗೆ ಅನುಗುಣವಾಗಿ ಸಹಯೋಗವನ್ನು ಹೆಚ್ಚಿಸುವ ಬಗ್ಗೆ ಚರ್ಚೆಗಳು ಕೇಂದ್ರೀಕರಿಸಿದ್ದವು. ಹಸಿರು ಇಂಧನದಲ್ಲಿ ಸುಮಾರು 50 ಪ್ರತಿಶತದಷ್ಟು ಹೂಡಿಕೆ ಮಾಡುವ ಮೆರ್ಕ್ಯುರಿಯಾ ಗ್ರೂಪ್‌ ನ ಬದ್ಧತೆ ಮತ್ತು ಭಾರತದ ವಿಸ್ತರಿಸುತ್ತಿರುವ ಸ್ವಚ್ಛ ಇಂಧನ ಪರಿಸರ ವ್ಯವಸ್ಥೆಯಲ್ಲಿ ಅದರ ಆಸಕ್ತಿಯನ್ನು ಕೇಂದ್ರ ಸಚಿವರಾದರು ಸ್ವಾಗತಿಸಿದರು.

ಬೆಳವಣಿಗೆ ಮತ್ತು ಸ್ಪರ್ಧಾತ್ಮಕತೆಯನ್ನು ಉತ್ತೇಜಿಸುತ್ತಿರುವ ಸ್ವಚ್ಛ ಇಂಧನ ಪರಿವರ್ತನೆ

ಜನವರಿ 20 ರಂದು, ದಾವೋಸ್‌ ನಲ್ಲಿ ನಡೆದ ವಿಶ್ವ ಆರ್ಥಿಕ ವೇದಿಕೆಯ 2026 ರ ವಾರ್ಷಿಕ ಸಭೆಯಲ್ಲಿ ಕಾಂಗ್ರೆಸ್ ಸೆಂಟರ್‌ ನಲ್ಲಿ ಕೇಂದ್ರ ಸಚಿವರಾದ ಶ್ರೀ ಪ್ರಲ್ಹಾದ್ ಜೋಶಿ ಅವರು ರೈಲ್ವೆ, ವಾರ್ತಾ ಮತ್ತು ಪ್ರಸಾರ ಹಾಗೂ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಮತ್ತು ನಾಗರಿಕ ವಿಮಾನಯಾನ ಸಚಿವರಾದ ಶ್ರೀ ರಾಮ ಮೋಹನ್ ನಾಯ್ಡು ಕಿಂಜರಾಪು ಅವರ ಉಪಸ್ಥಿತಿಯಲ್ಲಿ ಭಾರತದ ಕುರಿತಾದ ದೇಶ ಕಾರ್ಯತಂತ್ರದ ಸಂವಾದವನ್ನು ಪ್ರಸ್ತುತಪಡಿಸಿದರು.

 

ಭಾರತದ ಅನುಷ್ಠಾನದ ಪ್ರಮಾಣ ಮತ್ತು ವೇಗವನ್ನು ಒತ್ತಿಹೇಳಿದ ಅವರು, ಸೌರ ದರಗಳು ಸುಮಾರು 80 ಪ್ರತಿಶತದಷ್ಟು ಕಡಿಮೆಯಾಗಿವೆ, ಸಂಗ್ರಹಣೆಯೊಂದಿಗೆ ಕೂಡಿದ ನವೀಕರಿಸಬಹುದಾದ ಇಂಧನವು ವೆಚ್ಚ-ಸ್ಪರ್ಧಾತ್ಮಕವಾಗಿದೆ, ಭಾರತದ ಹಸಿರು ಹೈಡ್ರೋಜನ್ ಮತ್ತು ಹಸಿರು ಅಮೋನಿಯಾ ಬೆಲೆಗಳು ಜಾಗತಿಕವಾಗಿ ಅತ್ಯಂತ ಸ್ಪರ್ಧಾತ್ಮಕವಾಗಿವೆ ಮತ್ತು ದೇಶೀಯ ನವೀಕರಿಸಬಹುದಾದ ಇಂಧನ ಉತ್ಪಾದನಾ ಸಾಮರ್ಥ್ಯವು 144 ಗಿಗಾವ್ಯಾಟ್‌ ಗೆ ಏರಿದೆ ಎಂದು ಹೇಳಿದರು. ಇದು ಭಾರತವನ್ನು ಕೇವಲ ಪ್ರಮುಖ ಸ್ವಚ್ಛ ಇಂಧನ ಮಾರುಕಟ್ಟೆಯಾಗಿ ಮಾತ್ರವಲ್ಲದೆ, ವಿಕಸಿತ ಭಾರತ್ 2047 ರ ಹಾದಿಯಲ್ಲಿ ವಿಶ್ವಾಸಾರ್ಹ ಜಾಗತಿಕ ಉತ್ಪಾದನಾ ಮತ್ತು ಹೂಡಿಕೆ ಕೇಂದ್ರವಾಗಿ ರೂಪಿಸಿದೆ ಎಂದರು.

ಇಂಧನಕ್ಕಾಗಿ ಕೃತಕ ಬುದ್ಧಿಮತ್ತೆ ಕುರಿತ ಜಾಗತಿಕ ಮಿಷನ್‌ ಗೆ ಭಾರತದ ಬದ್ಧತೆ ಪುನರುಚ್ಚಾರ

ಶ್ರೀ ಪ್ರಲ್ಹಾದ್ ಜೋಶಿ ಅವರು ದಾವೋಸ್‌ ನಲ್ಲಿ ನಡೆಯುತ್ತಿರುವ ವಿಶ್ವ ಆರ್ಥಿಕ ವೇದಿಕೆಯ 2026 ರ ವಾರ್ಷಿಕ ಸಭೆಯಲ್ಲಿ “ಕಾಲ್ ಟು ಆಕ್ಷನ್: ಸ್ಪಾಟ್‌ಲೈಟ್ ಆನ್ ದಿ ಗ್ಲೋಬಲ್ ಮಿಷನ್ ಆನ್ ಎಐ ಫಾರ್ ಎನರ್ಜಿ” ಎಂಬ ಅಧಿವೇಶನದಲ್ಲಿ ಮುಖ್ಯ ಭಾಷಣ ಮಾಡಿದರು. ಭಾರತದ ಇಂಧನ ಪರಿವರ್ತನೆಯ ಪ್ರಯಾಣ ಮತ್ತು ಜಾಗತಿಕ ಸಮುದಾಯಕ್ಕೆ, ವಿಶೇಷವಾಗಿ ಜಾಗತಿಕ ದಕ್ಷಿಣದ ದೇಶಗಳಿಗೆ ಅದರ ಪ್ರಸ್ತುತತೆಯನ್ನು ಅವರು ಉಲ್ಲೇಖಿಸಿದರು.

ಇಂಧನ ಕ್ಷೇತ್ರದಲ್ಲಿ ಕೃತಕ ಬುದ್ಧಿಮತ್ತೆಯ (ಎಐ) ಪರಿವರ್ತಕ ಸಾಮರ್ಥ್ಯವನ್ನು ಶ್ರೀ ಜೋಶಿ ಅವರು ಒತ್ತಿಹೇಳಿದರು. ಎಐ ಮುನ್ಸೂಚನೆಯನ್ನು ಸುಧಾರಿಸುತ್ತದೆ, ನಷ್ಟವನ್ನು ಕಡಿಮೆ ಮಾಡುತ್ತದೆ, ವೆಚ್ಚವನ್ನು ತಗ್ಗಿಸುತ್ತದೆ ಮತ್ತು ಗ್ರಿಡ್ ವಿಶ್ವಾಸಾರ್ಹತೆಯನ್ನು ಬಲಪಡಿಸುತ್ತದೆ ಎಂದು ಅವರು ಹೇಳಿದರು. ಪೈಲಟ್-ಆಧಾರಿತ ಮಧ್ಯಸ್ಥಿಕೆಗಳಿಂದ ಇಂಧನಕ್ಕಾಗಿ ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯದ ಮೂಲಕ ಪ್ಲಾಟ್‌ಫಾರ್ಮ್-ಆಧಾರಿತ ನಿಯೋಜನೆಗೆ ಭಾರತದ ಬದಲಾವಣೆಯನ್ನು ಅವರು ಹಂಚಿಕೊಂಡರು, ಇದು ಎಐ-ಚಾಲಿತ ಪರಿಹಾರಗಳ ದೊಡ್ಡ ಪ್ರಮಾಣದ ಮತ್ತು ವ್ಯವಸ್ಥಿತ ಅಳವಡಿಕೆಯನ್ನು ಸಕ್ರಿಯಗೊಳಿಸುತ್ತದೆ ಎಂದು ಹೇಳಿದರು.

 

*****

 

(रिलीज़ आईडी: 2217093) आगंतुक पटल : 19