کمیشن فار ایئر کوالٹی مینجمنٹ (سی اے کیو ایم) کی گریڈیڈ رسپانس ایکشن پلان (جی آر اے پی) سے متعلق ذیلی کمیٹی نے ہوا کے معیار اور پیش گوئی کے رجحانات میں نمایاں بہتری کے پیش نظر 20 جنوری 2026 کو دہلی-این سی آر میں جی آر اے پی کے چوتھے مرحلے کے تحت نافذ تمام اقدامات کو فوری طور پر منسوخ کر دیا۔

واضح رہے کہ ذیلی کمیٹی نے دہلی میں اوسط ایئر کوالٹی انڈیکس (اے کیو آئی) میں اچانک اضافے کے بعد 17 جنوری 2026 کو جی آر اے پی کے چوتھے مرحلے کو نافذ کیا تھا۔ اس کے بعد دہلی کے ہوا کے معیار میں مسلسل بہتری دیکھنے میں آئی۔ مرکزی آلودگی کنٹرول بورڈ (سی پی سی بی) کی جانب سے جاری یومیہ اے کیو آئی بلیٹن کے مطابق، اوسط اے کیو آئی 18 جنوری 2026 کو 440 تھا، جو 19 جنوری 2026 کو کم ہو کر 410 اور بعد ازاں 378 تک آ گیا۔

ہوا کے معیار میں اس مسلسل بہتری کے رجحان اور ہندوستانی محکمہ موسمیات (آئی ایم ڈی) اور انڈین انسٹی ٹیوٹ آف ٹراپیکل میٹرولوجی (آئی آئی ٹی ایم) کی جانب سے فراہم کردہ ہوا کے معیار اور موسمی حالات سے متعلق پیش گوئیوں کو مدنظر رکھتے ہوئے، سی اے کیو ایم کی ذیلی کمیٹی نے صورتحال کا جائزہ لینے کے لیے آج اجلاس منعقد کیا۔

ذیلی کمیٹی نے نوٹ کیا کہ ہوا کی رفتار میں اضافے سمیت سازگار موسمی حالات کے باعث دہلی کے ایئر کوالٹی انڈیکس (اے کیو آئی) میں بہتری آئی ہے، جو فی الوقت ’’بہت خراب‘‘ کے زمرے میں ہے۔ پیش گوئیوں کے مطابق آئندہ دنوں میں اے کیو آئی کے اسی حد میں برقرار رہنے کا امکان ہے۔ ہوا کے معیار میں بہتری، پیش گوئی کے رجحانات، اور جی آر اے پی کے چوتھے مرحلے کے تحت عائد پابندیوں کی خلل انداز نوعیت—جو اسٹیک ہولڈرز اور عوام کی بڑی تعداد کو متاثر کرتی ہیں—کو مدنظر رکھتے ہوئے، ذیلی کمیٹی نے متفقہ طور پر پورے این سی آر میں موجودہ جی آر اے پی کے چوتھے مرحلے کے تحت نافذ تمام اقدامات کو فوری طور پر منسوخ کرنے کا فیصلہ کیا۔

تاہم، جی آر اے پی کے مراحل اوّل، دوم اور سوم کے تحت تمام اقدامات بدستور نافذ رہیں گے اور این سی آر میں متعلقہ تمام ایجنسیوں کے ذریعے ان پر عمل درآمد کا جائزہ لیا جاتا رہے گا، تاکہ آئندہ دنوں میں اے کیو آئی کی سطح میں مزید اضافہ نہ ہو۔ تمام متعلقہ ایجنسیوں کو ہدایت کی گئی ہے کہ وہ ان مراحل کے تحت اقدامات کو سختی سے نافذ کریں اور ان میں تیزی لائیں، تاکہ ہوا کے معیار میں مزید بگاڑ کو روکا جا سکے اور مرحلہ چہارم کے دوبارہ نفاذ کی ضرورت پیش نہ آئے۔

تعمیراتی اور انہدامی منصوبہ جاتی مقامات وغیرہ، جن کے خلاف مختلف قانونی ہدایات، قواعد اور رہنما خطوط کی خلاف ورزی یا عدم تعمیل کے باعث مخصوص بندش کے احکامات جاری کیے گئے ہیں، کمیشن کی جانب سے اس ضمن میں کسی مخصوص حکم کے بغیر کسی بھی صورت اپنی سرگرمیاں دوبارہ شروع نہیں کریں گے۔

شہریوں سے اپیل کی جاتی ہے کہ وہ جی آر اے پی کے مراحل اوّل، دوم اور سوم کے تحت شہری چارٹر پر سختی سے عمل کریں، بالخصوص سردیوں کے موسم کے دوران جب موسمی حالات عموماً سازگار نہیں ہوتے۔ ذیلی کمیٹی ہوا کے معیار کی صورتحال کی باریک بینی سے نگرانی جاری رکھے گی اور دہلی میں ہوا کے معیار، نیز ہندوستانی محکمہ موسمیات (آئی ایم ڈی) اور انڈین انسٹی ٹیوٹ آف ٹراپیکل میٹرولوجی (آئی آئی ٹی ایم) کی جانب سے دستیاب موسمی حالات اور اے کیو آئی کی پیش گوئیوں کی روشنی میں مناسب فیصلوں کے لیے وقتاً فوقتاً جائزہ لیتی رہے گی۔

موجودہ جی آر اے پی شیڈول (نومبر 2025) کمیشن کی ویب سائٹ پر دستیاب ہے۔https://caqm.nic.in/.

***

UR-830

(ش ح۔اس ک  )

(रिलीज़ आईडी: 2216588) आगंतुक पटल : 6