کامرس اور صنعت کے مرکزی وزیر جناب پیوش گوئل نے نئی دہلی کے بھارت منڈپم میں "اسٹارٹ اپ پے چرچا" پروگرام  سے خطاب کرتے ہوئے اس بات پر روشنی ڈالی کہ نئے ہندوستان میں سب سے زیادہ نظر آنے والی تبدیلیوں میں سے ایک ملک کے نوجوانوں میں بڑھتی ہوئی خود اعتمادی ہے ۔  انہوں نے کہا کہ آج کے ہندوستانی نوجوان تیزی سے خطرہ مول لینے ، صنعت کاری کو آگے بڑھانے اور نظریات کے ساتھ تجربات کرنے کے لیے تیار ہیں ، جو کیریئر کے انتخاب سے متعلق پیشتر ہچکچاہٹ سے ایک اہم تبدیلی کی نشاندہی کرتا ہے ۔  وزیر موصوف نے کہا کہ یہ خود اعتمادی اختراع اور مستقبل کے لیے تیار ترقی کے تئیں ہندوستان کی ذہنیت میں بنیادی تبدیلی کی عکاسی کرتی ہے ۔

بات چیت کے دوران ، جناب گوئل نے تقریب میں موجود اداروں کے کئی بانیوں اور کامیاب افراد کے ساتھ بات چیت کی ۔  ترقی کی زیادہ صلاحیت والے شعبوں کے بارے میں ایک سوال کے جواب میں ، وزیر موصوف نے سیاحت اور ہنر مندی کی ترقی کو قومی ضروریات اور کاروباری کامیابی دونوں کے لحاظ سے اہم مواقع فراہم کرنے والے شعبوں کے طور پر شناخت کیا ۔  انہوں نے آبادی کے وسیع تر طبقات ، خاص طور پر دیہی علاقوں تک پہنچنے کے لیے ان شعبوں میں ٹیکنالوجی کو مربوط کرنے کی ضرورت پر زور دیا ۔  انہوں نے مصنوعی ذہانت ، کوانٹم کمپیوٹنگ اور سائبر سیکورٹی جیسی ابھرتی ہوئی ٹیکنالوجیز کے لیے ہندوستان کی افرادی قوت کو تیار کرنے کے لیے تربیت  اور مزید تربیت سازی اور  مزید ہنر مندی کی اہمیت پر بھی زور دیا ۔

آزاد تجارتی معاہدوں (ایف ٹی اے) کے بارے میں وزیر موصوف نے کہا کہ ترقی یافتہ معیشتوں کے ساتھ ہندوستان کے حالیہ معاہدے اسٹارٹ اپس اور کاروباریوں کے لیے اہم مواقع فراہم کرتے ہیں ۔  انہوں نے وضاحت کی کہ یہ معاہدے ہندوستانی اشیا اور خدمات کے لیے نئی منڈیاں کھولتے ہوئے سرمایہ کاروں کے لیے یقین اور استحکام پیدا کرتے ہیں ۔  انہوں نے اسٹارٹ اپس کی حوصلہ افزائی کی کہ وہ سرمایہ کاری کو راغب کرنے اور عالمی سطح پر توسیع کرنے کے لیے بیرونی ممالک کے ساتھ اسٹارٹ اپ سے اسٹارٹ اپ تعاون اور شراکت داری کے مواقع تلاش کریں  اور ساتھ  ہی خدمات ، نقل و حرکت ، ادائیگیوں ، پائیداری ، قابل تجدید توانائی اور جدید ٹیکنالوجیز میں بھی مواقع  کو اجاگر کریں ۔

ڈیپ ٹیک اختراع کے بارے میں، وزیر موصوف نے ملک بھر میں ہونے والی پیش رفت کے بارے میں امید کا اظہار کیا ۔  انہوں نے کہا کہ حالیہ پالیسی مباحثوں نے ڈیپ ٹیک کی ترقی پر زیادہ توجہ مرکوز کی ہے اور کہا کہ حکومت کی طرف سے اعلان کردہ دوسرا  10,000 کروڑ روپے کا اسٹارٹ اپ فنڈ، خاص طور پر ترقی کے ابتدائی اور اہم مراحل میں ڈیپ ٹیک اسٹارٹ اپس کی نمایاں مدد کرے گا ۔  انہوں نے مزید کہا کہ ملک بھر میں انکیوبیٹرز اور تعلیمی اداروں کے ساتھ ان کی بات چیت اس شعبے میں مضبوط رفتار کی عکاسی کرتی ہے ۔

دستکاری جیسے شعبوں سے متعلقہ خدشات کو دور کرتے ہوئے جناب گوئل نے انوینٹری مینجمنٹ میں ٹیکنالوجی کو مربوط کرنے کی اہمیت پر روشنی ڈالی، تاکہ کاریگروں کو ڈیجیٹل اور ای کامرس پلیٹ فارم تک رسائی حاصل ہو سکے ۔  انہوں نے کہا کہ گورنمنٹ ای - مارکیٹ پلیس (جی ای ایم) اوپن نیٹ ورک فار ڈیجیٹل کامرس (او این ڈی سی) کے ساتھ انضمام سمیت آن بورڈنگ ، انوینٹری ڈیجیٹائزیشن اور مارکیٹ تک رسائی میں سہولت فراہم کرکے اس طرح کی کوششوں کی حمایت کرنے کے لیے تیار ہے ۔

ہندوستان کے خلائی اسٹارٹ اپ ایکو سسٹم کا حوالہ دیتے ہوئے جناب گوئل نے کہا کہ اس وقت اس شعبے میں 350 سے زیادہ اسٹارٹ اپ کام کر رہے ہیں ، جن کے مرکز میں ڈیپ  ٹیک اختراعات ہیں ۔   انہوں نے کہا کہ اس شعبے کی قیمت 2  ارب امریکی ڈالر سے تجاوز کر گئی ہے ، حکومت کا مقصد آنے والے سالوں میں متعدد یونیکورنز کے ابھرنے میں مدد کرنا ہے ۔

تقریب میں صنعت اور داخلی تجارت کے فروغ کے محکمے (ڈی پی آئی آئی ٹی) کے سکریٹری جناب امردیپ سنگھ بھاٹیہ، ڈی پی آئی آئی ٹی کے جوائنٹ سکریٹری جناب سنجیو،  بوٹ کے شریک بانی اور چیف مارکیٹنگ آفیسر جناب امان گپتا ،  اویو رومز کے بانی اور گروپ چیف ایگزیکٹو آفیسر جناب رتیش اگروال   اور منیملسٹ کے شریک بانی جناب موہت یادو کی موجودگی میں یہ بات چیت ہوئی ۔

بات چیت کا اختتام کرتے ہوئے وزیر موصوف نے اسٹارٹ اپس اور چھوٹے کاروباری اداروں کو بڑے سرمایہ کاروں اور مینوفیکچررز سے جوڑ کر مضبوط گھریلو سپلائی چین بنانے کی اہمیت پر زور دیا ۔  انہوں نے کہا کہ انویسٹ انڈیا اور ڈی پی آئی آئی ٹی جیسے ادارے ان روابط کو آسان بنانے کے لیے کام کر رہے ہیں ، جس سے اسٹارٹ اپس کو کیپٹو  ڈمانڈ ، سرمایہ اور پیمانے تک رسائی حاصل کرنے میں مدد مل رہی ہے ۔   انہوں نے کاروباریوں کی حوصلہ افزائی کی کہ وہ ابھرتے ہوئے مواقع تلاش کریں ،حسب استطاعت خطرات اٹھائیں اور اختراع پر مبنی ترقی کو آگے بڑھانے کے لیے ہندوستان کی بے مثال صلاحیتوں کا فائدہ اٹھائیں ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

(ش ح –م م ع۔ ق ر)

U. No.684

(रिलीज़ आईडी: 2215367) आगंतुक पटल : 10