પારાદીપ પોર્ટના જયદેવ સદન ખાતે યોજાયેલી 25મી ઓલ ઇન્ડિયા મેજર પોર્ટ કલ્ચરલ મીટ 2025-26, ચાર દિવસની જીવંત અને મનમોહક સાંસ્કૃતિક ઉજવણી બાદ 11મી જાન્યુઆરીની સાંજે સંપન્ન થઈ હતી. આ કાર્યક્રમનું સફળ આયોજન પારાદીપ પોર્ટ ઓથોરિટી (PPA) દ્વારા મેજર પોર્ટ્સ સ્પોર્ટ્સ કંટ્રોલ બોર્ડના સહયોગથી કરવામાં આવ્યું હતું.

સમાપન સમારોહમાં પારાદીપ પોર્ટ ઓથોરિટીના અધ્યક્ષ શ્રી પી. એલ. હરનાધ મુખ્ય અતિથિ તરીકે ઉપસ્થિત રહ્યા હતા. સભાને સંબોધતા શ્રી હરનાધે તમામ સહભાગીઓને તેમના પ્રભાવશાળી પ્રદર્શન અને ચાર દિવસીય કાર્યક્રમ દરમિયાન બંદર નગરના રહેવાસીઓને મંત્રમુગ્ધ કરવા બદલ પ્રશંસા વ્યક્ત કરી હતી. તેમણે અભૂતપૂર્વ સંખ્યામાં ઉપસ્થિત મહિલા કલાકારોની પણ પ્રશંસા કરી હતી, જેમના સમર્પણ અને પ્રતિભાએ આ વર્ષના કાર્યક્રમમાં શ્રેષ્ઠતાનો નવો બેન્ચમાર્ક સ્થાપિત કર્યો છે.

આ સાંસ્કૃતિક સંમેલનમાં દેશના 9 મુખ્ય બંદરોના આશરે 200 કલાકારોએ ઉત્સાહભેર ભાગ લીધો હતો, જેમણે વિવિધ સાંસ્કૃતિક વિષયોમાં સ્પર્ધા કરી હતી. શ્યામા પ્રસાદ મુખર્જી પોર્ટ ઓથોરિટીની ટીમ આ સ્પર્ધામાં એકંદર ચેમ્પિયન (Overall Champion) તરીકે ઉભરી આવી હતી. મુંબઈ પોર્ટ ઓથોરિટીએ રનર્સ-અપ સ્થાન મેળવ્યું હતું, જ્યારે દીનદયાળ પોર્ટ ઓથોરિટી અને કોચીન પોર્ટ ઓથોરિટીને સંયુક્ત રીતે સેકન્ડ રનર્સ-અપ જાહેર કરવામાં આવ્યા હતા.

પારાદીપ પોર્ટ ઓથોરિટીના કલાકારોએ પણ પ્રશંસનીય પ્રદર્શન કર્યું હતું, જેમાં શ્રીમતી સ્વર્ણલતા ત્રિપાઠી દ્વારા ભજવાયેલા માલતી પાત્રને શ્રેષ્ઠ સહાયક કલાકાર (મહિલા) તરીકે પુરસ્કાર આપવામાં આવ્યો હતો, જ્યારે પારાદીપ પોર્ટ ઓથોરિટીની ટીમોએ બિક્રમ પરિડા દ્વારા નાટક (મનુ), હર્ષિતા મહાપાત્રા દ્વારા લાઈટ મ્યુઝિક અને નૃત્ય શ્રેણીઓમાં પ્રશંસા મેળવી હતી.

કાર્યક્રમનું અધ્યક્ષપદ PPA કલ્ચરલ ઓર્ગેનાઈઝિંગ કમિટીના ચેરમેન શ્રી એચ. એસ. રાઉતે સંભાળ્યું હતું. આ પ્રસંગે શ્રી એ.કે. બોઝ, એડવાઈઝર, ટ્રાફિક, PPA, શ્રી અશોક કુમાર સાહુ, વાઈસ ચેરમેન, ઓર્ગેનાઈઝિંગ કમિટી, ડૉ. ડી. પી. સેઠી, સેક્રેટરી અને ઓર્ગેનાઈઝિંગ કમિટીના જોઈન્ટ સેક્રેટરી પણ ઉપસ્થિત રહ્યા હતા.

25મી ઓલ ઇન્ડિયા મેજર પોર્ટ કલ્ચરલ મીટના સફળ સમાપને ફરી એકવાર બંદરના કર્મચારીઓની સમૃદ્ધ સાંસ્કૃતિક પ્રતિભાનું પ્રદર્શન કર્યું અને દેશના મુખ્ય બંદરો વચ્ચે એકતા, સાંસ્કૃતિક સંવાદિતા અને પરસ્પર સન્માનની ભાવનાને મજબૂત બનાવી.

SM/BS/GP/JD