వికసిత్ భారత్ -  గ్యారంటీ ఫర్ రోజ్‌గార్ ఔర్ ఆజీవికా మిషన్ (గ్రామీణ్) (వీ బీ– జీ రామ్ జీ) చట్టం, 2025 గ్రామీణ భారత ముఖ చిత్రం మార్పులో ఒక ముఖ్యమైన మైలురాయిని సూచిస్తుందని కేంద్ర విద్య, ఈశాన్య ప్రాంత అభివృద్ధి  శాఖ సహాయ మంత్రి డాక్టర్ సుకాంత మజుందార్ అన్నారు.

ఈ రోజు న్యూఢిల్లీలో మీడియాతో మాట్లాడుతూ, ఈ చట్టం గ్రామీణ కుటుంబాలకు ఒక ఆర్థిక సంవత్సరానికి చట్టబద్ధమైన వేతన ఉపాధి హామీని 125 రోజుల వరకు పెంచుతుందని డాక్టర్ సుకాంత మజుందార్ తెలిపారు. ఈ చట్టం సాధికారత, సమగ్ర వృద్ధి, అభివృద్ధి చర్యల సమన్వయాన్ని, సంతృప్త స్థాయి సేవలను ప్రోత్సహించే లక్ష్యంతో రూపుదిద్దుకుంది. తద్వారా సంపన్నమైన, సుస్థిర, స్వావలంబన గల గ్రామీణ భారతదేశానికి పునాదిని బలోపేతం చేస్తుంది.

భారతదేశ గ్రామీణ ఉపాధి,  అభివృద్ధి రంగంలో నిర్ణయాత్మక సంస్కరణకు నాంది పలుకుతూ, పార్లమెంట్ వికసిత్ భారత్ -  గ్యారంటీ ఫర్ రోజ్‌గార్ ఔర్ ఆజీవికా మిషన్ (గ్రామీణ్) చట్టం, 2025 ను ఆమోదించిందని డాక్టర్ మజుందార్ తెలిపారు. సాధికారత, అభివృద్ధి, ఏకీకరణ, సంతృప్తత అనే సూత్రాలతో ఈ చట్టం గ్రామీణ ఉపాధిని కేవలం ఒక స్వతంత్ర సంక్షేమ కార్యక్రమంగా గాకుండా  సమగ్ర అభివృద్ధి సాధనంగా మార్చాలని లక్ష్యంగా పెట్టుకుంది.

ఈ చట్టం గ్రామీణ కుటుంబాల ఆదాయ భద్రతను బలోపేతం చేస్తుందని, పాలన, జవాబుదారీతనం యంత్రాంగాలను ఆధునికీకరిస్తుందని, వేతన ఉపాధిని నాణ్యమైన, ఉత్పాదక గ్రామీణ ఆస్తుల  సృష్టితో అనుసంధానిస్తుందని మంత్రి వివరించారు. తద్వారా సంపన్నమైన,  సుస్థిరమైన గ్రామీణ భారతదేశానికి పునాది వేస్తుందని తెలిపారు.

విద్యారంగంపై దృష్టి

వీ బీ - జీ రామ్ జీ చట్టం గ్రామీణ విద్యా మౌలిక సదుపాయాలను నేరుగా బలోపేతం చేసేందుకు, భౌతిక సౌకర్యాలు,  ప్రాథమిక వసతులలో దీర్ఘకాలంగా ఉన్న లోపాలను పూడ్చేందుకు వీలుగా అనేక రకాల పనులకు వీలు కల్పిస్తుందని మంత్రి తెలియజేశారు. ప్రభుత్వ పాఠశాలల్లో అదనపు తరగతి గదులు, ప్రయోగశాలలు, ఆట స్థలాలు, ప్రహరీ గోడలు, మరుగుదొడ్లు, వంటశాలల నిర్మాణం, నిర్వహణకు సంబంధించిన నిబంధనలు సురక్షితమైన, మరింత క్రియాత్మకమైన,  బాలల-స్నేహపూర్వక అభ్యాస వాతావరణాలను సృష్టించడానికి సహాయపడతాయి.

అదేవిధంగా, అంగన్‌వాడీ భవనాలు,  మరుగుదొడ్ల నిర్మాణం, నిర్వహణ గౌరవాన్ని, పరిశుభ్రతను,  నిరంతర సేవలను అందించడం ద్వారా బాల్య దశ విద్యా మౌలిక సదుపాయాల పునాదిని బలోపేతం చేస్తాయి.

గ్రామీణ గ్రంథాలయ భవనాలు,  శిక్షణ-నైపుణ్యాభివృద్ధి కేంద్రాలను ఇందులో చేర్చడం వల్ల అభ్యాస అవకాశాలు  పాఠశాల విద్య స్థాయిని  దాటి విస్తరిస్తాయని, తద్వారా గ్రామంలోనే విజ్ఞాన వనరులు, వృత్తిపరమైన మార్గాలకు ప్రవేశం కల్పించడం ద్వారా యువత, మహిళలు,  వయోజన అభ్యాసకులకు మద్దతు లభిస్తుందని డాక్టర్ మజుందార్ చెప్పారు.

వికసిత్ భారత్ -  గ్యారంటీ ఫర్ రోజ్‌గార్,  ఆజీవికా మిషన్ (గ్రామీణ్) చట్టం, 2025 ఆమోదం భారత గ్రామీణ ఉపాధి హామీలో ఒక ముఖ్యమైన పునరుద్ధరణకు సంకేతమని మంత్రి స్పష్టం చేశారు. చట్టబద్ధమైన ఉపాధిని 125 రోజులకు పెంచడం ద్వారా, వికేంద్రీకృత,  భాగస్వామ్య ప్రణాళికను పొందుపరచడం, జవాబుదారీతనాన్ని బలోపేతం చేయడం,  సంబంధిత పథకాల విలీనం,  సంతృప్తత-ఆధారిత అభివృద్ధిని సంస్థాగతం చేయడం ద్వారా, ఈ చట్టం గ్రామీణ ఉపాధిని సాధికారత, సమ్మిళిత వృద్ధి, సంపన్నమైన, సుస్థిరమైన గ్రామీణ భారత్ సృష్టికి ఒక వ్యూహాత్మక సాధనంగా తిరిగి స్థానం కల్పిస్తుంది. దీనిని వికసిత్ భారత్ @2047 విజన్‌కు పూర్తి అనుగుణంగా రూపొందించారు. 

***