ইলেক্ট্ৰনিকছ আৰু তথ্য প্ৰযুক্তি মন্ত্ৰালয় (MeitY) আৰু ইণ্ডিয়াএআই মিছনে অসম চৰকাৰ আৰু আইআইটি-গুৱাহাটীৰ সহযোগত আয়োজন কৰা হিউমেন কেপিটেল ৱৰ্কিং গ্ৰুপৰ বৈঠকৰ আজি সামৰণি পৰে। এই বৈঠকৰ দ্বিতীয় দিনটোত ভাষাৰ প্ৰৱেশৰ ব্যৱহাৰিক ৰূপায়ণৰ পথ, ৰাষ্ট্ৰীয় ভাষা অনুবাদ অভিযান (NLTM), এআই-চালিত শিক্ষা আৰু ভাষিণী (BHASHINI) প্লেটফৰ্ম সন্দৰ্ভত গভীৰ আলোচনা কৰা হয়।

আজি আৰম্ভণিতে “ৰাষ্ট্ৰীয় ভাষা অনুবাদ অভিযানৰ কাঠামো (NLTM)” শীৰ্ষক অধিবেশন অনুষ্ঠিত হয়। ইয়াত এআই৪ভাৰত (AI4Bharat) ৰ মুৰব্বী, আইআইটি-মাদ্ৰাজৰ অধ্যাপক মিতেশ খাপ্ৰেয়ে ভাৰতৰ ভাষিক বৈচিত্ৰ্যৰ বাবে মৌলিক এআই আৰু ভাষা প্ৰযুক্তি সৃষ্টিৰ উদ্দেশ্যত আলোকপাত কৰি বিগত চাৰি বছৰত এই পদক্ষেপৰ বিৱৰ্তন সম্পৰ্কে ব্যক্ত কৰে। তেওঁ উল্লেখ কৰে যে এই অভিযানে সাংবিধানিকভাৱে স্বীকৃতিপ্ৰাপ্ত ২২ টা ভাৰতীয় ভাষাক অগ্ৰাধিকাৰ প্ৰদান কৰিছে। প্ৰায় ৯৯% জনসংখ্যাই এই ভাষাসমূহ কয়। ইয়াৰ পৰিপ্ৰেক্ষিতত এই অভিযানে অন্তৰ্ভুক্তি আৰু ব্যৱহাৰ্য্যতাৰ মাজত ভাৰসাম্য ৰক্ষা কৰিছে। ইংৰাজী-কেন্দ্ৰিক এআই ব্যৱস্থাৰ বিশ্বব্যাপী আধিপত্যৰ ওপৰত গুৰুত্ব আৰোপ কৰি তেওঁ ভাৰতীয় ভাষাসমূহ বিশ্বব্যাপী এআই বাতাবৰণত পিছ পৰি নথকাটো নিশ্চিতকৰণৰ প্ৰয়োজনীয়তা সম্পৰ্কে কয়।

আইআইটি-গুৱাহাটীৰ বৈদ্যুতিক অভিযান্ত্ৰিক বিভাগ তথা ভাষিক বিজ্ঞান আৰু প্ৰযুক্তি কেন্দ্ৰৰ অধ্যাপক ৰোহিত সিনহাই “উত্তৰ-পূব ভাষা প্ৰযুক্তি বিকাশ আৰু এনএলটিএম” বিষয়ত ভাষণ প্ৰদান কৰে। তেওঁ অঞ্চলটোৰ অনন্য ভাষিক বাতাবৰণৰ ওপৰত আলোকপাত কৰি কয় যে উত্তৰ-পূৰ্বাঞ্চলত ভাৰতৰ জনসংখ্যাৰ মাত্ৰ ৩–৪% লোকে বসবাস কৰাৰ বিপৰীতে অঞ্চলটোত প্ৰায় ২০০ টা ভাষা প্ৰচলিত। তেওঁ আঞ্চলিক ভিত্তিত তথ্য সংগ্ৰহ, নেটিভ-স্পীকাৰ এন’টেচন আৰু মেচিন অনুবাদ, অ’চিআৰ, স্বয়ংক্ৰিয় স্পীচ চিনাক্তকৰণ তথা টেক্সট-টু-স্পীচ চিষ্টেমৰ বিকাশৰ জৰিয়তে চৰকাৰ-নেতৃত্বাধীন ভাষা প্ৰযুক্তি অভিযানলৈ সমৰ্থন আগবঢ়োৱাত কেন্দ্ৰৰ ভূমিকাত আলোকপাত কৰে। অসমীয়া আৰু মিজোৰ দৰে কম-সম্পদ আৰু অনুসূচীবিহীন ভাষাৰ ওপৰত গুৰুত্ব আৰোপ কৰি কেন্দ্ৰই শিক্ষা, শাসন আৰু ডিজিটেল সেৱাৰ সুবিধা প্ৰদান কৰাৰ লগতে জটিল তথ্যৰ ব্যৱধান দূৰ কৰাত সহায় কৰিছে বুলি কয়।

ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ৰ ডিজিটেল ইণ্ডিয়া ভাষিণী বিভাগৰ উত্তৰ-পূব ভাৰতৰ এংগেজমেন্ট মেনেজাৰ শ্ৰীমতী জ্যোতিস্মিতা দেৱীয়ে ভাষিণী পদক্ষেপ আৰু ইয়াৰ অভিযানৰ ওপৰত এক আভাস দাঙি ধৰে। তেওঁ ভাষিণীৰ ভইচ-ফাৰ্ষ্ট, অন্তৰ্ভুক্ত ভাষা প্ৰযুক্তিৰ দৃষ্টিভংগীৰ বিষয়ে আলোচনা কৰি ই নাগৰিকসকলক সাক্ষৰতাৰ স্তৰ বা ইন্টাৰনেট দক্ষতা নিৰ্বিশেষে নিজৰ ভাষাত ডিজিটেল ব্যৱস্থাৰ সৈতে যোগাযোগ কৰিবলৈ সক্ষম কৰিছে বুলি কয়। ভাষাক পৰিচয়ৰ এটা মূল উপাদান হিচাপে অভিহিত কৰি তেওঁ কয় যে স্পীচ-ভিত্তিক এআয়ে চৰকাৰী সেৱা, শিক্ষা আৰু ৰাজহুৱা মঞ্চসমূহত প্ৰৱেশ প্ৰক্ৰিয়াক সৰল কৰিব পাৰে, ভইচ-সক্ষম ফৰ্ম-ফিলিঙৰ পৰা আৰম্ভ কৰি ৱেবছাইট আৰু ম’বাইল এপ্লিকেচনসমূহত বাস্তৱ-সময়ৰ অনুবাদলৈকে প্ৰক্ৰিয়াটো সহজ কৰি তুলিব পাৰে। এপিআই (API), ডাটাছেট আৰু গুণগত মানদণ্ড আগবঢ়োৱা এটা মুক্ত, কেন্দ্ৰীভূত প্লেটফৰ্মৰ জৰিয়তে ভাষিণীয়ে কম-সম্পদ বিশিষ্ট ভাষাসমূহক সমৰ্থন কৰিছে, গৱেষক আৰু ছাত্ৰ-ছাত্ৰীসকলৰ সবলীকৰণ কৰিছে তথা ইতিমধ্যে লিগেচি ৰেকৰ্ডসমূহৰ ডিজিটাইজেচনত ইয়াক মোতায়েন কৰা হৈছে।

“এআই শিক্ষাৰ ৰিভাৰ্ছ অভিযান্ত্ৰিক পদ্ধতি” বিষয়ত দিনটোৰ অন্তিম অধিবেশন অনুষ্ঠিত হয়। ইয়াত আইআইটি-গুৱাহাটীৰ কম্পিউটাৰ বিজ্ঞান আৰু অভিযান্ত্ৰিক বিভাগৰ অধ্যাপক অমিত আৱেকাৰে ভাষণ প্ৰদান কৰে। ইয়াত ছাত্ৰ-ছাত্ৰীসকলক সম্বোধন কৰি তেওঁ ৰিভাৰ্ছ ইঞ্জিনিয়াৰিঙৰ মূল ধাৰণাটো সম্পৰ্কে ব্যক্ত কৰে আৰু শিক্ষাৰ পাইপলাইনৰ আৰম্ভণিতে সমস্যা-সমাধান, কৌতূহল আৰু চিষ্টেম-লেভেলৰ চিন্তাধাৰাক সন্নিৱিষ্ট কৰি ভৱিষ্যতৰ এআই প্ৰতিভাক সাজু কৰি তুলিবলৈ নতুন আৰ্হিৰ ৰূপৰেখা দাঙি ধৰে। এই অধিবেশনত চাৰফেছ-লেভেল টুলৰ ব্যৱহাৰৰ ওপৰিও এআই চিষ্টেম কাঠামো, মডিউলাৰ ডিজাইন, ডুকুমেন্টেচন, ডিবাগিং আৰু নৈতিক মোতায়েনৰ গভীৰ বুজাবুজিৰ দিশত গুৰুত্ব আৰোপ কৰা হয়। অধ্যাপক আৱেকাৰে ছাত্ৰ-ছাত্ৰী আৰু কেৰিয়াৰৰ প্ৰাৰম্ভিক পেছাদাৰীসকলৰ মাজত সমালোচনাত্মক চিন্তা, সৃষ্টিশীলতা আৰু বাস্তৱ-জগতৰ সমস্যা-সমাধানৰ দক্ষতা গঢ়ি তোলাৰ এক শিক্ষামূলক পদ্ধতি হিচাপে ৰিভাৰ্ছ ইঞ্জিনিয়াৰিঙত আলোকপাত কৰে।

আইআইটি-গুৱাহাটীৰ কম্পিউটাৰ বিজ্ঞান আৰু অভিযান্ত্ৰিক বিভাগৰ অধ্যাপক তথা ভাষিক বিজ্ঞান আৰু প্ৰযুক্তি কেন্দ্ৰৰ মুৰব্বী ডঃ সনাসম ৰণবীৰ সিঙে সামৰণি ভাষণ প্ৰদান কৰে। তেওঁ বিশিষ্ট ব্যক্তি, কেন্দ্ৰীয় আৰু অসম চৰকাৰৰ বিষয়া, শিক্ষাবিদ আৰু ছাত্ৰ-ছাত্ৰীসকলক হিউমেন কেপিটেল ৱৰ্কিং গ্ৰুপৰ বৈঠকত সক্ৰিয় অংশগ্ৰহণৰ বাবে আৰু ইয়াক সাফল্যমণ্ডিত কৰাত অৰিহণা যোগোৱাৰ বাবে ধন্যবাদ জ্ঞাপন কৰে।

অধিবেশনসমূহত বক্তাসকলে শিক্ষা আৰু দক্ষতা ব্যৱস্থাসমূহক বাস্তৱ-জগতৰ এআই নিয়োগ বাতাবৰণৰ সৈতে সংপৃক্তকৰণৰ প্ৰয়োজনীয়তাৰ ওপৰত গুৰুত্ব আৰোপ কৰে। যিয়ে শিক্ষাৰ্থীসকলক কেৱল এআই টুলসমূহ ব্যৱহাৰ কৰিবলৈকে নহয়, বৰঞ্চ ইয়াৰ দায়বদ্ধ ডিজাইন, মূল্যায়ন আৰু পৰিচালনা কৰিবলৈয়ো সাজু কৰি তুলিব। ইয়াত ভাৰতৰ এক বিশ্বব্যাপী প্ৰতিযোগিতামূলক আৰু সামাজিকভাৱে গুৰুত্বপূৰ্ণ এআই কৰ্মশক্তি গঢ়ি তোলাৰ আকাংক্ষাৰ সৈতে সংগতি ৰাখি তথ্য, এলগৰিদম, আন্তঃগাঁথনি আৰু নৈতিকতাক সামৰি লোৱা আন্তঃশাখা ভেটিৰ ওপৰত গুৰুত্ব আৰোপ কৰা হয়।

এইদৰে হিউমেন কেপিটেল ৱৰ্কিং গ্ৰুপৰ গুৱাহাটী বৈঠক ২০২৬-ৰ ১৫ – ২০ ফেব্ৰুৱাৰীত নতুন দিল্লীত অনুষ্ঠিতব্য ইণ্ডিয়া এআই ইম্পেক্ট ছামিট, ২০২৬-ৰ এক মূল আঞ্চলিক প্ৰাক-কাৰ্য্যসূচী হিচাপে পৰিগণিত হয়। ৱৰ্কিং গ্ৰুপৰ বৈঠকৰ অন্তৰ্দৃষ্টি আৰু পৰামৰ্শৰাজিৰ সন্মিলনৰ ৰাষ্ট্ৰীয় আৰু বিশ্বব্যাপী আলোচনাসমূহত অৱতাৰণা কৰা হ’ব। যিয়ে এআই-ৰ যুগত ভাৰতৰ এটি অন্তৰ্ভুক্ত, স্থিতিস্থাপক আৰু ভৱিষ্যতৰ বাবে সাজু হিউমেন কেপিটেল বাতাবৰণ গঢ়ি তোলাৰ অংগীকাৰক সুদৃঢ় কৰিব।

****

MSZ/SB
 

(रिलीज़ आईडी: 2211881) आगंतुक पटल : 19