‘പരിഷ്‌ക്കാരങ്ങളുടെ വർഷമായ 2025’ വിട പറയുമ്പോൾ, വിപുലമായ പരിഷ്‌ക്കാരങ്ങൾ നടപ്പിലാക്കുന്നതിൽ ഗണ്യമായ പുരോഗതി കൈവരിക്കാൻ രാജ്യരക്ഷ മന്ത്രി ശ്രീ രാജ്‌നാഥ് സിങ്ങിന്റെ നേതൃത്വത്തിലുള്ള പ്രതിരോധ മന്ത്രാലയത്തിന് സാധിച്ചു എന്ന് നിസംശയം വിലയിരുത്താവുന്നതാണ്. സംയുക്ത പ്രവർത്തനങ്ങൾ ശക്തിപ്പെടുത്തുന്നതും പ്രതിരോധ തയ്യാറെടുപ്പ് മെച്ചപ്പെടുത്തുന്നതും സ്വാശ്രയത്വം പ്രോത്സാഹിപ്പിക്കുന്നതും ക്ഷേമ വിതരണ സംവിധാനങ്ങൾ മെച്ചപ്പെടുത്തുന്നതും ലക്ഷ്യമിട്ടുള്ള വിവിധ പദ്ധതികൾ വിജയകരമായി നടപ്പിലാക്കാൻ മന്ത്രാലയത്തിനായി. ഈ സമഗ്ര പരിഷ്‌ക്കാരങ്ങൾ, ആധുനികവും സംയോജിതവും ഭാവിസജ്ജവുമായ പ്രതിരോധ ആവാസവ്യവസ്ഥ രൂപപ്പെടുത്തുന്നതിനായി സ്വീകരിച്ച ഏകീകൃതമായ സമഗ്ര സർക്കാർ സമീപനം വെളിവാക്കുന്നു.

 

പ്രതിരോധ ഏറ്റെടുക്കലിനുള്ള അംഗീകാരങ്ങൾ:

തദ്ദേശീയവൽക്കരണം അടിസ്ഥാനമാക്കിയുള്ള ആധുനികവത്ക്കരണത്തിന് മുൻഗണന നൽകി, പ്രതിരോധ മേഖലയിലെ രാജ്യത്തിന്റെ ശേഷി ഗണ്യമായി വർദ്ധിപ്പിക്കുന്നതിനായി 2025 ജനുവരി മുതൽ 3.84 ലക്ഷം കോടി രൂപയലധികം ചെലവു വരുന്ന മൂലധന നിർദ്ദേശങ്ങൾ ഡിഫൻസ് അക്വിസിഷൻ കൗൺസിൽ (DAC) അംഗീകരിച്ചു.

 

ഒപ്പുവച്ച കരാറുകൾ:

2025–26 സാമ്പത്തിക വർഷം, 2025 ഡിസംബർ അവസാനം വരെയുള്ള കാലയളവിൽ, സായുധ സേനയുടെ ആധുനികവത്ക്കരണമെന്ന ലക്ഷ്യത്തോടെ പ്രതിരോധ മന്ത്രാലയം 1.82 ലക്ഷം കോടി രൂപയുടെ മൂലധന കരാറുകളിൽ ഒപ്പുവച്ചു.

 

ചെലവ്:

2025 ഡിസംബർ അവസാനം വരെ, ക്യാപിറ്റൽ അക്വിസിഷൻ ബജറ്റിന് കീഴിലുള്ള ചെലവിന്റെ ഏകദേശം 80% ലക്‌ഷ്യം (ഏകദേശം 1.2 ലക്ഷം കോടി രൂപ) പ്രതിരോധ മന്ത്രാലയം കൈവരിച്ചു. ഈ പണം പ്രധാനമായും സായുധ സേനയുടെ ആധുനികവത്ക്കരണത്തിനായി വിനിയോഗിച്ചു. മൂലധന ഏറ്റെടുക്കലുകൾക്കു പുറമേ അടിസ്ഥാന സൗകര്യ വികസനം, ഭൂമി ഏറ്റെടുക്കൽ, ഗവേഷണവും വികസനവും ഉൾപ്പെടെയുള്ള മേഖലകളിലെ ചെലവുകൾ കൂടി പരിഗണിക്കുമ്പോൾ, പ്രതിരോധ മന്ത്രാലയത്തിന്റെ മൊത്തത്തിലുള്ള മൂലധന ചെലവ് 76% വരെ ഉയർന്നിട്ടുണ്ട്.

 

പ്രതിരോധ വ്യവസായവും നൂതനാശയങ്ങളുടെ പ്രോത്സാഹനവും:

പ്രതിരോധ മേഖലയിലും സുരക്ഷിത വിതരണ ശൃംഖലകളിലും കൂടുതൽ തദ്ദേശീയവത്ക്കരണം ഉറപ്പാക്കുന്നതിനായി സ്വകാര്യ മേഖലയുടെ പങ്കാളിത്തം ഗണ്യമായി വർദ്ധിപ്പിച്ചിട്ടുണ്ട്. പ്രതിരോധ നിർമ്മാണ ലൈസൻസിംഗ് നടപടികൾ ലളിതമാക്കൽ, സൂക്ഷ്മ ചെറുകിട ഇടത്തരം സംരംഭങ്ങളുടെ ശേഷി സംബന്ധിച്ച സമഗ്രമായ അവലോകനം, പ്രതിരോധ സംഭരണ രംഗത്ത് ഡിമാൻഡ്–സപ്ലൈ (ആവശ്യകതയും വിതരണവും) വിശകലനം മെച്ചപ്പെടുത്തുന്നതിനായി മാർക്കറ്റ് ഇന്റലിജൻസ് റിപ്പോർട്ടുകൾ തയ്യാറാക്കൽ എന്നിവ ഈ ഉദ്യമങ്ങളുടെ ഭാഗമാണ്. ഇതിനുപുറമേ, ടെസ്റ്റിംഗ്, ട്രയൽ, ഇൻഫ്രാസ്ട്രക്ചർ ലാബ് സൗകര്യങ്ങൾ സ്വകാര്യ മേഖലയുമായി പങ്കിടുന്നതിലൂടെ നൂതനാശയങ്ങൾക്ക് കൂടുതൽ പ്രോത്സാഹനമേകുന്നു. പ്രതിരോധ രംഗത്തെ ഗവേഷണവും നൂതനാശയങ്ങളും പ്രോത്സാഹിപ്പിക്കുന്നതിനും സഹകരണം ശക്തമാക്കുന്നതിനുമായി, പ്രതിരോധ ഗവേഷണ ഗ്രാന്റുകളുടെ 25% അക്കാദമിക് സ്ഥാപനങ്ങൾക്കും MSME കൾക്കുമായി നീക്കി വച്ചിട്ടുണ്ട്.

 

ഏറ്റെടുക്കൽ, സംഭരണ പരിഷ്‌ക്കാരങ്ങൾ :

സമയബന്ധിതമായ ഏറ്റെടുക്കലും സംഭരണവും ഉറപ്പാക്കുന്നതിനായി നടപടിക്രമങ്ങൾ സമഗ്രവും ലളിതവുമാക്കി. ഇതിന്റെ ഭാഗമായി iDEX മാനുവലിന്റെ ലളിതവത്ക്കരണം, പ്രതിരോധ കയറ്റുമതി അനുമതികൾ യുക്തിസഹമാക്കൽ, പ്രതിരോധ EXIM പോർട്ടലിന്റെ നവീകരണം, സാങ്കേതിക വിദ്യാ കൈമാറ്റ നയത്തിന്റെ ലളിതവത്ക്കരണം, സാമ്പത്തിക അധികാരങ്ങളുടെ വികേന്ദ്രീകരണം, സംഭരണ മാനുവലുകൾ മുഖേനയുള്ള വികേന്ദ്രീകരണം എന്നിവ നടപ്പിലാക്കി. ഈ പരിഷ്‌ക്കാരങ്ങളുടെ ഭാഗമായി പുതുക്കിയ പ്രതിരോധ സംഭരണ മാനുവൽ–2025, 2025 നവംബർ 1 മുതൽ പ്രാബല്യത്തിൽ വന്നു.

 

പ്രതിരോധ നയവും അന്താരാഷ്ട്ര ഇടപെടലുകളും:

ഡിഫൻസ് അക്വിസിഷൻ പ്രോസീജ്യർ 2020-ന്റെ അവലോകനവും പരിഷ്ക്കരണവും പുരോഗമിക്കുന്നു. നേരിട്ടുള്ള വിദേശ നിക്ഷേപം പ്രോത്സാഹിപ്പിക്കുന്നതിനുള്ള നടപടികൾ ശക്തമാക്കുകയും, സൗഹൃദ രാജ്യങ്ങളുമായി ഫലപ്രദമായ പ്രതിരോധ സഹകരണം സ്ഥാപിക്കുകയും ചെയ്യുന്നു. ഇതിന്റെ ഭാഗമായി ഭാരത് മൈത്രി ശക്തി ഉൾപ്പെടെയുള്ള പ്രതിരോധ വായ്പാ പദ്ധതികളും പ്രതിരോധ സ്ഥാപനങ്ങളുമായി ബന്ധപ്പെട്ട ദൂര മാനദണ്ഡങ്ങൾ യുക്തിസഹമാക്കുന്നതിനുള്ള നടപടികളും പുരോഗമിക്കുന്നു.

 

പ്രതിരോധ ഉത്പാദനവും ഗുണനിലവാര വർദ്ധനവും:

പ്രതിരോധ ഉത്പാദനം ശക്തിപ്പെടുത്താനും ഗുണനിലവാരം ഉയർത്താനും ഒട്ടേറെ നടപടികൾ സ്വീകരിച്ചു. കയറ്റുമതി പ്രോത്സാഹന ബോർഡ് രൂപീകരിക്കൽ, പ്രതിരോധ പൊതുമേഖലാ യുണിറ്റുകളിൽ ഗുണനിലവാര ഉറപ്പിനുള്ള Quality Assurance 4.0 & Industry 4.0 സംവിധാനങ്ങളുടെ നടപ്പാക്കൽ, പ്രതിരോധ പ്ലാറ്റ്‌ഫോമുകൾക്കായി ദേശീയ തലത്തിൽ സംയോജിത ടെസ്റ്റ് ലബോറട്ടറി സ്ഥാപിക്കൽ എന്നിവ ഇതിൽ ഉൾപ്പെടുന്നു.

 

സംയുക്ത പ്രവർത്തനങ്ങളും ഭാവി ലക്ഷ്യമിട്ടുള്ള തയ്യാറെടുപ്പുകളും:

സംയുക്ത പ്രവർത്തന നിയന്ത്രണ കേന്ദ്രം സ്ഥാപിക്കൽ, സായുധ സേനകൾക്കായുള്ള വിഷൻ 2047 പ്രഖ്യാപനം, ഭാവി പ്രവർത്തനങ്ങളുമായി ബന്ധപ്പെട്ട വിശകലന ഗ്രൂപ്പിന്റെ സൃഷ്ടി, സംയുക്ത പരിശീലന പരിപാടികളുടെ പ്രോത്സാഹനം, സംയോജിത ശേഷി വികസന പദ്ധതി എന്നിവ നിർവ്വഹണത്തിന്റെ വിവിധ ഘട്ടങ്ങളിലാണ്. ആസൂത്രണത്തിലും നിർവ്വഹണത്തിലും ഈ ദിശയിൽ സ്വീകരിച്ച നടപടികൾ  ഓപ്പറേഷൻ സിന്ദൂറിൽ ഫലം കണ്ടു.

 

പ്രവർത്തന സംയോജനവും കാര്യക്ഷമത മെച്ചപ്പെടുത്തലും:

മൂന്ന് സേനകളുടെയും ഭൂമിശാസ്ത്ര വിവരവിനിമയ സംവിധാനത്തിന്റെ വിന്യാസം, നയങ്ങൾ, എസ്‌ഒ‌പികൾ, തന്ത്രങ്ങൾ എന്നിവയുടെ അവലോകനവും ഏകീകരണവും, മൂന്ന് സേനകളുടെ ഏകീകരണത്തിനുള്ള സാങ്കേതിക വിദ്യകളും നടപടിക്രമങ്ങളും, യുദ്ധസാഹചര്യങ്ങളിലും നേതൃ സ്ഥാനങ്ങളിലും വനിതാ പങ്കാളിത്തത്തിന്റെ വിപുലീകരണം, സൈനിക വിനോദസഞ്ചാരത്തിന്റെ പ്രോത്സാഹനം, പ്രവർത്തന അടിസ്ഥാന സൗകര്യങ്ങൾക്കും താമസ സൗകര്യങ്ങൾക്കുമായി ദീർഘകാല രൂപരേഖ  തയ്യാറാക്കൽ എന്നിവ പൂർത്തിയായി.

 

വിമുക്തഭടന്മാർക്കുള്ള ക്ഷേമ പരിഷ്‌ക്കാരങ്ങൾ:

ECHS ന് കീഴിൽ വിമുക്തഭടന്മാരുടെയും ആശ്രിതരുടെയും മെഡിക്കൽ പരിരക്ഷ മെച്ചപ്പെടുത്തുന്നതിനായി ഒട്ടേറെ നടപടികൾ സ്വീകരിച്ചു. 70 വയസ്സിന് മുകളിലുള്ള വിമുക്തഭടന്മാർക്ക് (ESM) മരുന്നുകൾ വാതിൽപ്പടിയിൽ എത്തിക്കുന്ന പദ്ധതി അവതരിപ്പിച്ചു. ഓതറൈസ്ഡ് ലോക്കൽ കെമിസ്റ്റ് പരിധി ഇരട്ടിയാക്കി, eSeHAT ടെലി-മെഡിസിൻ സേവനം ഇന്ത്യയിലുടനീളം വ്യാപിപ്പിച്ചു. ECHS ൽ ആയുഷ് ചികിത്സ ഒരുക്കി, സമ്മർദ്ദ ലഘൂകരണ സൗകര്യങ്ങൾ സൃഷ്ടിച്ചു, പൊതുവായ ഔഷധങ്ങളുടെ പട്ടിക പുതുക്കി. പോളിക്ലിനിക്കുകൾ നവീകരിക്കുകയും, പുതിയ പോളിക്ലിനിക്കുകൾ സ്ഥാപിക്കുകയും ചെയ്തു. ഇതോടൊപ്പം, ESM നും  ആശ്രിതർക്കും ക്ഷേമ ഗ്രാന്റുകൾ വർദ്ധിപ്പിച്ചു; ഇതിൽ പെൻഷൻ, വിദ്യാഭ്യാസം, വിവാഹ ഗ്രാന്റുകൾ എന്നിവ ഉൾപ്പെടുന്നു.

 

സ്പർശ് പെൻഷൻ പോർട്ടൽ:

ഇന്ത്യയിലെ ഏറ്റവും വലിയ ഡിജിറ്റൽ പെൻഷൻ പ്ലാറ്റ്‌ഫോമായ സ്പർശിൽ 31.69 ലക്ഷം പ്രതിരോധ പെൻഷൻകാർക്ക് പ്രവേശനം ലഭിച്ചു. മുൻ സംവിധാനങ്ങളിൽ നിന്ന് മാറിയ 6.43 ലക്ഷം പേരിൽ 6.07 ലക്ഷം പെൻഷൻകാരുടെ അവകാശങ്ങളെ ബാധിക്കാത്ത നിലയിൽ പരിഷ്‌ക്കാരം നടപ്പിലാക്കി.

 

'പരിഷ്‌ക്കാര വർഷം 2025' ൽ കൊണ്ട് വന്ന സുസ്ഥിര പരിഷ്‌ക്കാരങ്ങളുടെ വേഗത ഇന്ത്യയുടെ പ്രതിരോധ തയ്യാറെടുപ്പിനെയും സ്ഥാപന കാര്യക്ഷമതയെയും ഗണ്യമായി ശക്തിപ്പെടുത്തി. ഈ നടപടികൾ ഒറ്റപ്പെട്ട സംരംഭങ്ങളല്ല; മറിച്ച്, വരും ദശകങ്ങളിൽ രാജ്യത്തിന്റെ സുരക്ഷാ താത്പര്യങ്ങൾ ഉറപ്പാക്കാൻ ശേഷിയുള്ള, ആധുനികവും സംയോജിതവും സ്വാശ്രയവുമായ പ്രതിരോധ ആവാസവ്യവസ്ഥ കെട്ടിപ്പടുക്കുന്നതിനായി  നടപ്പിലാക്കുന്ന നിരന്തരവും സമഗ്രവുമായ പ്രക്രിയകളുടെ ഭാഗമാണ്.

 

****

(रिलीज़ आईडी: 2211112) आगंतुक पटल : 16