Ka Tnad Textiles ryngkat ka jingïatreilang bad ka Sorkar Assam, kan pynlong ïa ka National Textiles Ministers’ Conference ha ka 8–9 tarik Kyllalyngkot 2026 ha Guwahati, Assam. Ia kane ka jingialang yn pynlong hapoh ka phang “India’s Textiles: Weaving Growth, Heritage & Innovation.”

Kane ka jingialang kaba ar sngi ka thmu ban pyniasoh lang ia ki Myntri ka Tnad Textiles jong ka Sorkar Pdeng bad ki Jylla, ki ophisar jong ka sorkar pdeng & ki sorkar jylla, ban iamir jingmut ia ka rukom treikam kaba iasohlang ha ka ri na ka bynta ban kyntiew ia ka India kum ka jaka pdeng jong ki kam pynmih jain ha ka pyrthei. Ki jingïamir jingmut ki ïahap bad ka jingthmu jong ka ri ban kyntiew ïa ka kam shna jain kaba kot sha ka USD 350 billion bad ban kot sha ka USD 100 billion ha ka jingshalan jaiñ shabar ri shuwa u snem 2030.

Ha ka Jingialang plie paidbah ha ka 8 tarik Kyllalyngkot 2026 yn iadonlang u Myntri ka Tnad Textiles jong ka sorkar pdeng u Giriraj Singh, u Myntri Rangbah ka jylla Assam, u Himanta Biswa Sarma, u Myntri khynnah ba dei peit ia ka Tnad Textiles, u Pabitra Margherita ryngkat kiwei pat ki kynrem ki lyndan.

Kane ka jingialang kaba ar sngi kan don ki jingialang kiba pynleit jingmut halor ki jingdon jingem & ka jingbei tyngka, ka jingkyntiew ia ka jingshalan mar shabar ri, ka jinglah iakhun, ki tiar ba donkam & ki fibre, ki lad ba thymmai, kynthup ia ka technical textiles, ka jingwad bniah bad jingpynroi, ka jingpynthymmai ia ki jain tynrai, da kaba pynleit jingmut ha ki jain bad ki tiar ba shna da ka kti na ka bynta ki iew kiba mynta.

La khmih lynti ba ki Myntri bad ki ophisar sorkar na ki Jylla bad ki Union Territory kin iashim bynta bad iasam ia ki rukom treikam kiba bha tam, ki jingeh bad ki jingai jingmut ha ka polisi kiba thmu ban pynkhlain ia ka jingpynbha ia ki kam ba iadei bad ki jain ha kylleng ki thain bad ki distrik.

Yn pynlong ruh ia ka jingialang halor ka “Strengthening and Empowering the Textiles Sector of the North-Eastern Region of India” ha ka 8 tarik Kyllalyngkot 2026, ha kaba yn iashim bynta da u Myntri ka Tnad Textiles jong ka Sorkar Pdeng, u Myntri Khynnah ka Tnad Textiles, ki Myntri Sorkar Jylla na baroh ki jylla ka thain shatei lammihngi, ki dkhot jong ka Parliament bad ki heh ophisar. Ka jingialang kan pynleit jingmut ha ki jain silk, ki jain shna kti bad ki jain ba la shna na ki siej, ka jingkyntiew ia ki kam ba la ialam da ki kynthei, bad ka jingpynpaw ia ka “Textiles from Nort-East”, kaba thmu ban plie ia ki bor ba kyrpang jong ka thain ha ki kam jain bad ban pyniasoh ia ki bad ki kam pynbha ha ka ri bad ka pyrthei.

La pynlong ruh ia ka exhibition kaba kyrpang ban pyni ia ki jain bad ki tiar ba shna da ka kti na kylleng ka ri da ka ophis jong u DC Handlooms bad DC Handicrafts.

****