మహాశయులారా, సోదరీసోదరులారా, నమస్కారం!

చారిత్రకమైన, శక్తివంతమైన ఇండోర్‌కు మిమ్మల్ని ఆహ్వానిస్తున్నాను. పాకశాస్త్ర సంప్రదాయాల పట్ల గర్వం నిండిన నగరమిది. ఈ నగర సౌందర్యాన్ని, రుచులను మీరు ఆస్వాదిస్తారని ఆశిస్తున్నాను.

స్నేహితులారా,

ఆర్థిక, సామాజిక రంగాల్లో అతి ముఖ్యమైన వాటిలో ఒకటైన ఉపాధి కల్పన గురించి మీ బృందం చర్చిస్తోంది. ఉపాధి కల్పనా రంగంలో వస్తున్న కొన్ని ప్రధాన మార్పుల ముంగిట మనం ఉన్నాం. ఈ వేగవంతమైన మార్పులను పరిష్కరించేలా ప్రతిస్పందనతో కూడిన, సమర్థవంతమైన వ్యూహాలను మనం సిద్ధం చేయాల్సిన అవసరం ఉంది. ఈ నాలుగో పారిశ్రామిక విప్లవ యుగంలో ఉపాధిని అందించే ప్రధాన శక్తిగా సాంకేతికత కొనసాగుతోంది. గతంలో వచ్చిన సాంకేతికత ఆధారిత మార్పులో పెద్ద సంఖ్యలో సాంకేతిక ఉద్యోగాలను కల్పించిన దేశంలో ఈ సమావేశం జరగడం ముదావహం. ఇలాంటి మార్పులతో కూడిన నూతన అధ్యాయానికి అంకుర సంస్థలు నాయకత్వం వహిస్తున్నాయి. అలాంటి అనేక అంకుర సంస్థలకు కేంద్రమైన ఇండోర్ నగరం మీకు ఆతిథ్యమిస్తోంది.

స్నేహితులారా,

అధునాతన సాంకేతిక పరిజ్ఞానాలను, పద్ధతులను ఉపయోగించడానికి అవసరమైన నైపుణ్యాలను శ్రామిక శక్తికి మనం అందించాలి. నైపుణ్యాలను సాధించడం, వాటికి పదును పెట్టుకోవడమే మన భవిష్యత్ కార్మిక శక్తి అనుసరించాల్సిన మంత్రాలు. వీటికి భారతదేశంలో అమలు చేస్తున్న ‘‘స్కిల్ ఇండియా మిషన్’’ వాస్తవ రూపమిస్తోంది. ‘ప్రధాన మంత్రి కౌశల్ వికాస్ యోజన’ ద్వారా ఇప్పటి వరకు 12.5 మిలియన్లకు పైగా యువత శిక్షణ పొందారు. కృత్రిమ మేధ, రోబోటిక్స్, ఇంటర్నెట్ ఆఫ్ థింగ్స్, డ్రోన్లు వంటి ‘‘ఫోర్ పాయింట్ ఓ’’ రంగాలపై ప్రత్యేక దృష్టి సారించాం.

స్నేహితులారా,

కొవిడ్ సమయంలో భారత్‌లో ఆరోగ్యం, ఇతర రంగాల్లో విధులు నిర్వర్తించిన వారు తమ నైపుణ్యాలను, అంకితభావాన్ని ప్రదర్శించారు. సేవ, కరుణ అనే మా సంస్కృతిని కూడా ఇది ప్రతిబింబిస్తుంది. వాస్తవానికి, ప్రపంచం కోసం నైపుణ్యాలున్న శ్రామికశక్తిని అందించే అతిపెద్ద దేశాల్లో ఒకటిగా ఎదిగే సామర్థ్యం భారత్‌కు ఉంది. భవిష్యత్తులో అంతర్జాతీయంగా ఎక్కడైనా పనిచేసే శ్రామిక శక్తి వాస్తవరూపం దాల్చనుంది. కాబట్టి, అభివృద్ధిని ప్రపంచీకరించాల్సిన, నైపుణ్యాలను పంచుకోవాల్సిన అవసరం ఆసన్నమైంది. ఈ అంశంలో జీ20 నాయకత్వ పాత్ర పోషించాలి. అవసరమైన నైపుణ్యాలు, అర్హతల ఆధారంగా అంతర్జాతీయంగా ఉద్యోగాలను అందించేలా మీరు ప్రారంభించిన చర్యలను అభినందిస్తున్నాను. దీనికి అంతర్జాతీయ సహకారం, సమన్వయం, వలస, రవాణాకు సంబంధించిన భాగస్వామ్యాల్లో కొత్త నమూనాలు అవసరం. ఈ అంశంలో యజమానులకు, ఉద్యోగులకు సంబంధించిన గణాంకాలు, సమాచారాన్ని పంచుకోవడం ద్వారా పనిని ప్రారంభించవచ్చు. ఇది మెరుగైన నైపుణ్యాలు, శ్రామికశక్తి ప్రణాళిక, లాభదాయకమైన ఉపాధి నుంచి ప్రపంచవ్యాప్తంగా సాక్ష్యం ఆధారిత విధానాలను సూత్రీకరించే శక్తిని దేశాలకు అందిస్తుంది.

స్నేహితులారా,

గిగ్, ప్లాట్‌ఫామ్ ఆర్థిక వ్యవస్థలకు సంబంధించిన కార్మికుల్లో నూతన విభాగాల ఏర్పాటుతో మరో మార్పు వచ్చింది. ఇది మహమ్మారి సమయంలో స్థిరత్వం సాధించేందుకు మూలాధారంగా ఉద్భవించింది. ఇది అనుకూలమైన పని విధానాలను, అదనపు ఆదాయ వనరులను అందిస్తుంది. ప్రధానంగా యువతకు లాభదాయకమైన ఉపాధిని అందించే సామర్థ్యం దీనికి ఉంది. మహిళల సామాజిక ఆర్థిక సాధికారతకు ఇది సాధనంగా పనిచేస్తుంది. దీని సామర్థ్యాన్ని గుర్తించేలా కార్మికుల కోసం ఆధునిక విధానాలను, కార్యక్రమాలను రూపొందించాలి. అలాగే నిరంతరాయంగా, సరిపడినంత ఉపాధి అవకాశాలను కల్పించడానికి సుస్థిరమైన పరిష్కారాలను మనం కనుగొనాలి. వారికి సామాజిక భద్రతను అందించేందుకు, వారి రక్షణకు, ఆరోగ్యానికి మనం నూతన విధానాలను రూపొందించాల్సిన అవసరం ఉంది. ఈ కార్మికుల కోసం లక్షిత పథకాలను అమలు చేసేందుకు ‘ఈశ్రామ్ పోర్టల్’ను భారత్‌లో మేం తయారు చేశాం. ఏడాది వ్యవధిలో దాదాపు 280 మిలియన్ల మంది కార్మికులు ఈ పోర్టల్లో నమోదు చేసుకున్నారు. ఇప్పుడు, బహుళజాతి పని విధానం ఉన్న నేపథ్యంలో ప్రతి దేశం ఇలాంటి పరిష్కారాలను స్వీకరించడం అవసరం. ఈ విషయంలో మా అనుభవాలను పంచుకొనేందుకు మేం సిద్ధంగా ఉన్నాం.

స్నేహితులారా,

ప్రజలకు సామాజిక భద్రతను కల్పించడమే అజెండా 2030లో ఉన్న ప్రధానాంశం. కానీ అంతర్జాతీయ సంస్థలు ప్రస్తుతం అనుసరిస్తున్న విధానం కొన్ని పరిమిత రూపాల్లో అందించే ప్రయోజనాలకు మాత్రమే జవాబుదారీ వహిస్తుంది. ఇతర రూపాల్లో లభించే ప్రయోజనాలు ఈ విధానం పరిధిలోకి రావు. సార్వత్రిక ఆరోగ్యం, ఆహార భద్రత, బీమా, పింఛను కార్యక్రమాలను మనం పరిగణించడం లేదు. ఈ ప్రయోజనాలను అందించడం గురించి మనం పునరాలోచించాలి. అప్పుడే సామాజిక భద్రత కవరేజికి సంబంధించిన పూర్తి స్వరూపాన్ని మనం చూడొచ్చు. ప్రతి దేశానికి ఉన్న ప్రత్యేక ఆర్థిక సామర్థ్యాలు, బలాలు, సవాళ్లను మనం పరిగణనలోకి తీసుకోవాలి. సామాజిక భద్రతకు సుస్థిర ఆర్థిక సాయం అందించేందుకు అందరూ ఒకటే పద్ధతిని అవలంబించడం సరికాదు. వివిధ దేశాలు ఇలాంటి ప్రయత్నాలను కచ్చితంగా ప్రతిబింబించే వ్యవస్థను రూపొందించడంలో మీ అనుభవాన్ని ఉపయోగిస్తారని ఆశిస్తున్నాను.

మహాశయులారా,

ఈ రంగంలో అత్యవసర సమస్యలను పరిష్కరించేలా మీ అందరూ చేసిన ప్రయత్నాలను నేను ప్రశంసిస్తున్నాను. ప్రపంచవ్యాప్తంగా ఉన్న కార్మికుల సంక్షేమం కోసం బలమైన సందేశాన్ని మీరు ఈ రోజు పంపిస్తారని నేను విశ్వసిస్తున్నాను. ఇది మీ అందరికీ ఉత్పాదకమైన, విజయవంతమైన సమావేశం కావాలని ఆకాంక్షిస్తున్నాను.

ధన్యవాదాలు.

***