مرکزی وزیر صحت جناب جگت پرکاش نڈا نے آج لکھنؤ میں کنگ جارجز میڈیکل کالج (کے جی ایم یو) کی تقریب جلسۂ اسناد سے خطاب کیا۔ اس موقع پر محترمہ آنندی بین، گورنر اترپردیش، جناب برجیش پاٹھک، نائب وزیر اعلیٰ اور طبی تعلیم ، طب، صحت اور خاندانی بہبود کے وزیر، حکومت اترپردیش؛  جناب پنکج کمار، وزیر مملکت برائے خزانہ، حکومت ہند؛ جناب مینکیشور شرن سنگھ، صحت و خاندانی بہبود کے وزیر مملکت ، حکومت اترپردیش، اور پروفیسر اجے کمار سود، حکومت ہند کے پرنسپل سائنٹفک ایڈوائزر بھی موجود تھے۔

اجتماع سے خطاب کرتے ہوئے، جناب نڈا نے فارغ التحصیل طلباء کو مبارکباد دی اور ہندوستان میں میڈیکل سائنس کی تعلیم اور مریضوں کی دیکھ بھال کو آگے بڑھانے میں کے جی ایم یو کے تعاون کے لیے اس کی تعریف کی۔ انہوں نے کہا، "کے جی ایم یو 2025 این آئی آر ایف کی درجہ بندی میں 8 ویں نمبر پر ہے اور اس کی 12 فیکلٹیوں کو اسٹینفورڈ یونیورسٹی کے ذریعہ سرکردہ 2فیصد  سائنسدانوں میں درج کیا گیا ہے جو کہ ایک قابل ذکر کامیابی ہے"۔

پچھلی دہائی کے دوران ہندوستان کے صحت کی دیکھ بھال اور طبی تعلیم کے شعبے میں حاصل کی گئی قابل ذکر پیش رفت کو اجاگر کرتے ہوئے، جناب نڈا نے نوٹ کیا کہ جب کہ گزشتہ صدی کے آخر میں ملک میں صرف ایک ایمس تھا، آج ہندوستان بھر میں 23 ایمس ادارے ہیں، جو ہر خطے میں معیاری حفظانِ صحت اور طبی تربیت کو پھیلانے کے حکومت کے عزم کی عکاسی کرتے ہیں۔

انہوں نے مزید بتایا کہ گزشتہ 11 برسوں میں ملک میں میڈیکل کالجوں کی تعداد 387 سے بڑھ کر 819 ہو گئی ہے۔ اسی طرح انڈر گریجویٹ میڈیکل کی سیٹیں 51,000 سے بڑھ کر 1,19,000 اور پوسٹ گریجویٹ کی سیٹیں 31,000 سے بڑھ کر 80,000 ہو گئی ہیں۔ جناب نڈا نے مزید کہا کہ 2029 تک، وزیر اعظم جناب نریندر مودی کی ہدایت کے تحت، انڈر گریجویٹ اور پوسٹ گریجویٹ دونوں سطحوں میں اضافی 75,000 سیٹیں شامل کی جائیں گی، جن میں سے ایک سال میں 23,000 سے زیادہ سیٹیں پہلے ہی شامل کی جا چکی ہیں۔

جناب نڈا نے روشنی ڈالی کہ آج ملک میں 1.82 لاکھ سے زیادہ آیوشمان آروگیہ مندر کام کر رہے ہیں جو لوگوں کو بنیادی دیکھ بھال کی جامع خدمات فراہم کر رہے ہیں۔ انہوں نے یہ بھی بتایا کہ 62 کروڑ سے زیادہ لوگوں کو، جو کہ ہندوستان کی آبادی کا 40 فیصد سے زیادہ ہیں، کو آیوشمان بھارت – پی ایم جے اے وائی اسکیم کے تحت 5 لاکھ روپے تک کا ہیلتھ کوریج فراہم کیا جا رہا ہے، جو دنیا کی سب سے بڑی ہیلتھ کوریج اسکیم ہے۔

مرکزی وزیر صحت نے کہا کہ "بنیادی تعلیم ہر ایک کا پیدائشی حق ہے لیکن پیشہ ورانہ تعلیم ایک ایسا اعزاز ہے جو معاشرہ صرف چند کو دیتا ہے"۔ اس بات کو اجاگر کرتے ہوئے کہ حکومت ایم بی بی ایس کے ہر طالب علم کے لیے 30-35 لاکھ کے درمیان خرچ کرتی ہے، انہوں نے نئے ڈاکٹروں سے اپیل کی کہ وہ اپنے پیشہ ورانہ کیریئر کا آغاز کرتے ہوئے معاشرے کے تئیں مزید ذمہ داریاں نبھائیں۔

اپنے خطاب کے آخر میں ، جناب نڈا نے فارغ التحصیل طلباء سے اپیل کی کہ وہ تعلیم اور تحقیق میں فعال طور پر تعاون دیں، اور اپنے پیشہ ورانہ اور اخلاقی طرز عمل میں بہترین کارکردگی کے ذریعے کے جی ایم یو کی باوقار میراث کو برقرار رکھیں۔ انہوں نے ان کی حوصلہ افزائی کی کہ وہ تاحیات سیکھنے والے اور اختراع کار بنے رہیں، وہ میڈیکل سائنس کو آگے بڑھانے اور ہمدردی کے ساتھ معاشرے کی خدمت کرنے کے لیے پرعزم ہیں۔

نوجوان ڈاکٹروں کو ان کی حصولیابی کے لیے مبارکباد دیتے ہوئے جناب برجیش نے کہا، ’’120 برسوں سے زائد عرصے سے، کے جی ایم یو طبی تعلیم، تحقیق اور انسانیت کی خدمت کی علامت کے طور پر کھڑی ہے۔‘‘ انہوں نے اس امر کو بھی اجاگر کیا کہ اترپریش میں طبی شعبے میں پیشرفت ہوئی ہے، اور کہا کہ ’’2017 میں سرکاری شعبے میں 17 طبی کالج اور نجی شعبے میں 23 طبی کالج تھے، یہ تعداد اب بڑھ کر 81 کے بقدر پہنچ چکی ہے  اور یہ تمام کالج ریاست میں آج مکمل طور پر مصروف عمل ہیں۔ آج تمام 75 اضلاع میں ڈائیلیسس کی سہولت موجود ہے اور سی ٹی مشینیں دستیاب ہیں۔ اس کے علاوہ 5000 سے زائد افراد پر مشتمل آبادی کے کلسٹروں میں این ایچ ایم کے توسط سے آیوشمان آروگیہ مندر قائم کیے گئے ہیں، اور اضافی آئی سی یو بستروں کے ذریعہ ٹرشری سہولتوں کو مضبوط بنایا گیا ہے۔‘‘

اس موقع پر ایم بی بی ایس، بی ڈی ایس، ایم ڈی/ایم ایس، ڈی ایم/ایم سی ایچ، ایم ڈی ایس، ایم ایس سی، نرسنگ اور فیکلٹی زمروں  میں 81 طلباء اور ایک فیکلٹی ممبر کو ان کی شاندار تعلیمی، طبی اور تحقیقی کامیابیوں کے لیے اعزاز سے نوازا گیا۔ ایوارڈز میں سونے اور چاندی کے تمغے، سرٹیفکیٹ آف میرٹ، کتابی انعامات، نقد انعامات کے ساتھ ساتھ بہترین مقالہ اور بہترین رہائش کے لیے ایوارڈز شامل ہیں۔ اس کے علاوہ ایک سینئر فیکلٹی ممبر کو میڈیکل اور متعلقہ شعبوں میں شاندار خدمات کے خصوصی اعزاز سے نوازا گیا۔

پروفیسر سونیا نتیہ نند (پدم شری ایوارڈ یافتہ)، نائب چانسلر، کے جی ایم یو؛ پروفیسر اپجیت کور، ڈین، کے جی ایم یو ، اور یونیورسٹی اسمبلی اور اگزیکیوٹیو کونسل کے رکن اور مرکزی حکومت و اترپردیش  حکومت کے سینئر افسران بھی اس تقریب میں موجود تھے۔

******

 (ش ح –ا ب ن)

U.No:3627

(रिलीज़ आईडी: 2207010) आगंतुक पटल : 10