ਵਿਸ਼ਵ ਸਿਹਤ ਸੰਗਠਨ (ਡਬਲਿਊਐੱਚਓ) ਸਿਹਤ ਅਤੇ ਤੰਦਰੁਸਤੀ 'ਤੇ ਇੱਕ ਵਿਸ਼ਵਵਿਆਪੀ ਸੰਵਾਦ ਨੂੰ ਉਤਸ਼ਾਹਿਤ ਕਰਨ ਲਈ 17-19 ਦਸੰਬਰ, 2025 ਤੱਕ ਨਵੀਂ ਦਿੱਲੀ ਵਿੱਚ ਦੂਜੇ ਗਲੋਬਲ ਪਰੰਪਰਾਗਤ ਚਿਕਿਤਸਾ ਸੰਮੇਲਨ ਦੀ ਮੇਜ਼ਬਾਨੀ ਕਰੇਗਾ। ਵਿਸ਼ਵ ਸਿਹਤ ਸੰਗਠਨ ਅਤੇ ਭਾਰਤ ਸਰਕਾਰ ਦੇ ਆਯੂਸ਼ ਮੰਤਰਾਲੇ ਦੁਆਰਾ ਸਹਿਯੋਗ ਨਾਲ ਆਯੋਜਿਤ, ਇਹ ਸੰਮੇਲਨ ਸੰਤੁਲਿਤ, ਸਮਾਵੇਸ਼ੀ ਅਤੇ ਟਿਕਾਊ ਸਿਹਤ ਪ੍ਰਣਾਲੀਆਂ ਲਈ ਇੱਕ ਸਾਂਝੇ ਦ੍ਰਿਸ਼ਟੀਕੋਣ ਨੂੰ ਅੱਗੇ ਵਧਾਉਣ ਲਈ ਦੁਨੀਆ ਭਰ ਦੇ ਨੀਤੀ ਨਿਰਮਾਤਾਵਾਂ, ਵਿਗਿਆਨੀਆਂ, ਪ੍ਰੈਕਟੀਸ਼ਨਰਾਂ, ਸਵਦੇਸ਼ੀ ਗਿਆਨ ਧਾਰਕਾਂ ਅਤੇ ਸਿਵਲ ਸੋਸਾਇਟੀ ਦੇ ਨੇਤਾਵਾਂ ਨੂੰ ਇਕੱਠੇ ਕਰੇਗਾ।

ਇਸ ਸਮਿਟ ਦਾ ਵਿਸ਼ਾ ਹੈ "ਸੰਤੁਲਨ ਬਹਾਲ ਕਰਨਾ: ਸਿਹਤ ਅਤੇ ਤੰਦਰੁਸਤੀ ਦਾ ਵਿਗਿਆਨ ਅਤੇ ਅਭਿਆਸ।" ਵਿਸ਼ਵਵਿਆਪੀ ਸਿਹਤ ਪ੍ਰਣਾਲੀ ਦੀਆਂ ਅਸਮਾਨਤਾਵਾਂ, ਵਾਤਾਵਰਣ ਤਣਾਅ ਅਤੇ ਵਧਦੀਆਂ ਪੁਰਾਣੀਆਂ ਬਿਮਾਰੀਆਂ ਦੇ ਸਮੇਂ ਵਿੱਚ ਇਹ ਸੰਮੇਲਨ ਰਵਾਇਤੀ ਚਿਕਿਤਸਾ ਦੀ ਸਾਰਥਕਤਾ ਨੂੰ ਮੁੜ ਸਥਾਪਿਤ ਕਰਨ ਦੇ ਨਾਲ-ਨਾਲ ਵਿਗਿਆਨ, ਸਬੂਤ ਅਤੇ ਜ਼ਿੰਮੇਵਾਰ ਅਭਿਆਸ ਦੇ ਅਧਾਰ ‘ਤੇ ਇਸ ਦੀ ਭੂਮਿਕਾ ਨੂੰ ਮਜ਼ਬੂਤ ​​ਕਰੇਗਾ। 2023 ਵਿੱਚ ਗੁਜਰਾਤ ਦੇ ਗਾਂਧੀਨਗਰ ਵਿੱਚ ਹੋਏ ਪਹਿਲੇ ਸਮਿਟ ਦੀ ਸਫਲਤਾ ਦੇ ਅਧਾਰ 'ਤੇ ਅੱਗੇ ਵੱਧਦੇ ਹੋਏ, ਨਵੀਂ ਦਿੱਲੀ ਵਿੱਚ ਇਹ ਸੰਮੇਲਨ ਵਿਸ਼ਵਵਿਆਪੀ ਸਿਹਤ ਏਜੰਡੇ 'ਤੇ ਰਵਾਇਤੀ ਚਿਕਿਤਸਾ ਸਥਾਪਿਤ ਕਰਨ ਦੀ ਦਿਸ਼ਾ ਵੱਲ ਇੱਕ ਮਹੱਤਵਪੂਰਨ ਕਦਮ ਹੈ।

ਵਿਸ਼ਵ ਸਿਹਤ ਸੰਗਠਨ (ਡਬਲਿਊਐੱਚਓ) ਦੀ ਗਲੋਬਲ ਪਰੰਪਰਾਗਤ ਚਿਕਿਤਸਾ ਰਣਨੀਤੀ 2025-2034 ਦੇ ਮਾਰਗਦਰਸ਼ਨ ਹੇਠ ਆਯੋਜਿਤ, ਇਹ ਸਮਿਟ ਇਸ ਗੱਲ 'ਤੇ ਕੇਂਦ੍ਰਿਤ ਹੋਵੇਗਾ ਕਿ ਕਿਵੇਂ ਰਵਾਇਤੀ ਚਿਕਿਤਸਾ ਪ੍ਰਣਾਲੀਆਂ ਜਨ-ਕੇਂਦ੍ਰਿਤ ਸਿਹਤ ਸੰਭਾਲ ਅਤੇ ਵਿਸ਼ਵਵਿਆਪੀ ਤੰਦਰੁਸਤੀ ਵਿੱਚ ਸਾਰਥਕ ਯੋਗਦਾਨ ਦੇ ਸਕਦੀਆਂ ਹਨ। ਇਹ ਉੱਭਰ ਰਹੇ ਸਬੂਤਾਂ, ਨਵੀਨਤਾਵਾਂ ਅਤੇ ਨੀਤੀਗਤ ਮਾਰਗਾਂ ਨੂੰ ਉਜਾਗਰ ਕਰੇਗਾ, ਜੋ ਰਾਸ਼ਟਰੀ ਸਿਹਤ ਪ੍ਰਣਾਲੀਆਂ ਵਿੱਚ ਰਵਾਇਤੀ ਚਿਕਿਤਸਾ ਦੇ ਸੁਰੱਖਿਅਤ, ਪ੍ਰਭਾਵਸ਼ਾਲੀ ਅਤੇ ਨੈਤਿਕ ਏਕੀਕਰਣ ਦਾ ਸਮਰਥਨ ਕਰਦੇ ਹਨ।

ਸਮਿਟ ਦੀਆਂ ਤਕਨੀਕੀ ਚਰਚਾਵਾਂ ਸੰਤੁਲਨ ਬਹਾਲ ਕਰਨ 'ਤੇ ਇੱਕ ਉੱਚ-ਪੱਧਰੀ ਪੂਰਨ ਸੈਸ਼ਨ ਨਾਲ ਸ਼ੁਰੂ ਹੋਣਗੀਆਂ, ਜੋ ਗਿਆਨ, ਪਹੁੰਚ, ਸ਼ਾਸਨ ਅਤੇ ਵਿਸ਼ਵ ਸਿਹਤ ਵਿੱਚ ਅਸੰਤੁਲਨ ਦੇ ਕਾਰਨਾਂ ਦੀ ਜਾਂਚ ਕਰੇਗਾ ਅਤੇ ਇਹ ਦੇਖੇਗਾ ਕਿ ਅੱਜ ਦੇ ਸਮਾਜਾਂ ਲਈ ਸੰਤੁਲਨ ਬਹਾਲ ਕਰਨ ਦਾ ਕੀ ਅਰਥ ਹੋ ਸਕਦਾ ਹੈ। ਗਲੋਬਲ ਲੀਡਰਜ਼ ਅਤੇ ਮਾਹਿਰ ਇਸ ਗੱਲ 'ਤੇ ਚਰਚਾ ਕਰਨਗੇ ਕਿ ਵਿਗਿਆਨਿਕ ਸ਼ੁੱਧਤਾ, ਸਮਾਨ ਸ਼ਾਸਨ, ਜੈਵ ਵਿਭਿੰਨਤਾ ਸੰਭਾਲ, ਸਵਦੇਸ਼ੀ ਅਧਿਕਾਰ ਅਤੇ ਵਿਭਿੰਨ ਗਿਆਨ ਪ੍ਰਣਾਲੀਆਂ ਕਿਵੇਂ ਇੱਕ ਹੋਰ ਸਮਾਨ ਅਤੇ ਲਚਕੀਲੇ ਵਿਸ਼ਵ ਸਿਹਤ ਭਵਿੱਖ ਦੇ ਨਿਰਮਾਣ ਲਈ ਇਕੱਠੇ ਕੰਮ ਕਰ ਸਕਦੀਆਂ ਹਨ। ਇਹ ਸੈਸ਼ਨ ਗਲੋਬਲ ਪਰੰਪਰਾਗਤ ਚਿਕਿਤਸਾ ਰਣਨੀਤੀ ਨੂੰ ਲਾਗੂ ਕਰਨ ਵਿੱਚ ਸਹਾਇਤਾ ਲਈ ਤਾਲਮੇਲ ਵਾਲੀ ਗਲੋਬਲ ਕਾਰਵਾਈ ਲਈ ਉੱਭਰ ਰਹੇ ਵਿਚਾਰ ਵੀ ਪੇਸ਼ ਕਰੇਗਾ।

ਸੰਮੇਲਨ ਦੇ ਦੂਜੇ ਦਿਨ ਵਿਗਿਆਨ ਅਤੇ ਨਵੀਨਤਾ 'ਤੇ ਵਿਸ਼ੇਸ਼ ਜ਼ੋਰ ਦਿੱਤਾ ਜਾਵੇਗਾ। ਇੱਕ ਪੂਰਾ ਸੈਸ਼ਨ ਰਵਾਇਤੀ ਚਿਕਿਤਸਾ ਨੂੰ ਅੱਗੇ ਵਧਾਉਣ ਲਈ ਵਿਗਿਆਨ ਵਿੱਚ ਨਿਵੇਸ਼ ਕਰਨ 'ਤੇ ਕੇਂਦ੍ਰਿਤ ਕਰੇਗਾ, ਸਖ਼ਤ ਖੋਜ, ਨਿਰੰਤਰ ਫੰਡਿੰਗ, ਵਿਧੀਗਤ ਤਾਲਮੇਲ ਅਤੇ ਇੱਕ ਨਵੀਨਤਾ ਵਾਤਾਵਰਣ ਪ੍ਰਣਾਲੀ ਦੀ ਮਹੱਤਤਾ ਨੂੰ ਉਜਾਗਰ ਕਰੇਗਾ। ਚਰਚਾਵਾਂ ਇਸ ਗੱਲ 'ਤੇ ਜ਼ੋਰ ਦੇਣਗੀਆਂ ਕਿ ਕਿਵੇਂ ਰਣਨੀਤਿਕ ਨਿਵੇਸ਼ ਅਤੇ ਵਿਗਿਆਨਿਕ ਸਹਿਯੋਗ ਰਵਾਇਤੀ ਚਿਕਿਤਸਾ ਨੂੰ ਟਿਕਾਊ ਵਿਕਾਸ ਅਤੇ ਵਿਸ਼ਵਵਿਆਪੀ ਸਿਹਤ ਕਵਰੇਜ ਲਈ ਸਬੂਤ-ਅਧਾਰਿਤ ਯੋਗਦਾਨਕਰਤਾ ਵਜੋਂ ਸਸ਼ਕਤ ਬਣਾਉਣ ਲਈ ਜ਼ਰੂਰੀ ਹਨ।

ਇੱਕ ਹੋਰ ਪੂਰਾ ਸੈਸ਼ਨ ਸੰਤੁਲਨ, ਸੁਰੱਖਿਆ ਅਤੇ ਲਚਕੀਲੇਪਣ ਦੇ ਲਈ ਸਿਹਤ ਪ੍ਰਣਾਲੀਆਂ ਦੀ ਮੁੜ ਕਲਪਨਾ ਕਰਨ 'ਤੇ ਧਿਆਨ ਕੇਂਦ੍ਰਿਤ ਕਰੇਗਾ, ਗਲੋਬਲ ਪਰੰਪਰਾਗਤ ਚਿਕਿਤਸਾ ਰਣਨੀਤੀ 2025-2034 ਦੇ ਦ੍ਰਿਸ਼ਟੀਕੋਣ ਅਤੇ ਤਰਜੀਹਾਂ ਦੀ ਰੂਪਰੇਖਾ ਦੇਵੇਗਾ। ਖੇਤਰੀ ਅਤੇ ਅੰਤਰ-ਦੇਸ਼ ਅਨੁਭਵਾਂ, ਖਾਸ ਕਰਕੇ ਦੱਖਣ-ਪੂਰਬੀ ਏਸ਼ੀਆ ਅਤੇ ਪੱਛਮੀ ਪ੍ਰਸ਼ਾਂਤ ਦੇ ਅਨੁਭਵਾਂ 'ਤੇ ਆਧਾਰਿਤ, ਇਹ ਸੈਸ਼ਨ ਇਹ ਦਰਸਾਏਗਾ ਕਿ ਨੀਤੀ, ਵਿਧਾਨਕ ਅਤੇ ਰੈਗੂਲੇਟਰੀ ਤਰੱਕੀਆਂ ਰਾਹੀਂ ਰਵਾਇਤੀ ਚਿਕਿਤਸਾ ਨੂੰ ਪ੍ਰਾਇਮਰੀ ਸਿਹਤ ਸੰਭਾਲ ਵਿੱਚ ਕਿਵੇਂ ਜੋੜਿਆ ਜਾ ਰਿਹਾ ਹੈ। ਮਜ਼ਬੂਤ ​​ਸ਼ਾਸਨ ਢਾਂਚੇ, ਗੁਣਵੱਤਾ ਭਰੋਸਾ ਅਤੇ ਅੰਤਰਰਾਸ਼ਟਰੀ ਰੈਗੂਲੇਟਰੀ ਸਹਿਯੋਗ ਦੀ ਮਹੱਤਤਾ ਇੱਕ ਮੁੱਖ ਫੋਕਸ ਹੋਵੇਗੀ।

ਇਹ ਸਮਿਟ ਜਵਾਬਦੇਹੀ, ਮਿਆਰਾਂ ਅਤੇ ਡੇਟਾ 'ਤੇ ਵੀ ਕੇਂਦ੍ਰਿਤ ਹੋਵੇਗਾ, ਇਹ ਖੋਜ ਕਰੇਗਾ ਕਿ ਰਵਾਇਤੀ ਚਿਕਿਤਸਾ ਵਿੱਚ ਪ੍ਰਗਤੀ ਨੂੰ ਕਿਵੇਂ ਮਾਪਿਆ ਜਾ ਸਕਦਾ ਹੈ ਅਤੇ ਜ਼ਿੰਮੇਵਾਰੀ ਨਾਲ ਕਿਵੇਂ ਮਾਰਗਦਰਸ਼ਨ ਕੀਤਾ ਜਾ ਸਕਦਾ ਹੈ। ਇੱਕ ਸਮਰਪਿਤ ਪੂਰਾ ਸੈਸ਼ਨ ਮਾਨਕੀਕ੍ਰਿਤ ਡੇਟਾ, ਪਾਰਦਰਸ਼ੀ ਰਿਪੋਰਟਿੰਗ ਅਤੇ ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਸਮੇਤ ਡਿਜੀਟਲ ਤਕਨਾਲੋਜੀਆਂ ਦੀ ਜ਼ਿੰਮੇਵਾਰ, ਮਨੁੱਖ-ਕੇਂਦ੍ਰਿਤ ਵਰਤੋਂ ਦੀ ਭੂਮਿਕਾ ਦੀ ਜਾਂਚ ਕਰੇਗਾ। ਚਰਚਾਵਾਂ ਪ੍ਰਾਚੀਨ ਗਿਆਨ, ਸੱਭਿਆਚਾਰਕ ਅਖੰਡਤਾ ਅਤੇ ਭਾਈਚਾਰਕ ਵਿਸ਼ਵਾਸ ਲਈ ਸਤਿਕਾਰ 'ਤੇ ਜ਼ੋਰ ਦੇਣਗੀਆਂ, ਜਦਕਿ ਜਵਾਬਦੇਹੀ ਢਾਂਚੇ ਦੀ ਮੰਗ ਕੀਤੀ ਜਾਵੇਗੀ ਜੋ ਸਰੋਤਾਂ ਦੀ ਨਿਰਪੱਖ ਅਤੇ ਨੈਤਿਕ ਵਰਤੋਂ ਨੂੰ ਜਾਣਨ ਅਤੇ ਯਕੀਨੀ ਬਣਾਉਂਦੇ ਹਨ।

ਤਿੰਨ ਦਿਨਾਂ ਸੰਮੇਲਨ ਵਿੱਚ ਭਵਿੱਖਮੁਖੀ ਮੁੱਦਿਆਂ ਦੀ ਇੱਕ ਵਿਸ਼ਾਲ ਸ਼੍ਰੇਣੀ 'ਤੇ ਚਰਚਾ ਕੀਤੀ ਜਾਵੇਗੀ, ਜਿਸ ਵਿੱਚ ਜਨਤਕ ਸਿਹਤ ਢਾਂਚੇ ਦੇ ਅੰਦਰ ਰਵਾਇਤੀ ਚਿਕਿਤਸਾ ਦੇ ਨਿਯਮਨ ਅਤੇ ਏਕੀਕਰਨ; ਸਵਦੇਸ਼ੀ ਲੋਕਾਂ ਨਾਲ ਗਿਆਨ ਦਾ ਸਤਿਕਾਰਯੋਗ ਆਦਾਨ-ਪ੍ਰਦਾਨ; ਜੈਵ ਵਿਭਿੰਨਤਾ ਦੀ ਸੰਭਾਲ ਅਤੇ ਚਿਕਿਤਸਕ ਸਰੋਤਾਂ ਦੀ ਟਿਕਾਊ ਵਰਤੋਂ; ਬੌਧਿਕ ਸੰਪਦਾ ਅਧਿਕਾਰਾਂ ਦੀ ਸੁਰੱਖਿਆ; ਅਤੇ ਖੋਜ, ਸਿੱਖਿਆ ਅਤੇ ਅਭਿਆਸ ਵਿੱਚ ਅਤਿ-ਆਧੁਨਿਕ ਤਕਨਾਲੋਜੀਆਂ ਦੀ ਜ਼ਿੰਮੇਵਾਰ ਵਰਤੋਂ ਸ਼ਾਮਲ ਹੈ।

ਇਸ ਸਮਾਗਮ ਵਿੱਚ 25 ਸੈਸ਼ਨਾਂ ਵਿੱਚ 170 ਤੋਂ ਵੱਧ ਮਾਹਰ ਬੁਲਾਰੇ ਸ਼ਾਮਲ ਹੋਣਗੇ ਜੋ ਵਿਗਿਆਨ, ਨੀਤੀ, ਅਭਿਆਸ ਅਤੇ ਭਾਈਚਾਰਕ ਲੀਡਰਸ਼ਿਪ ਦੇ ਦ੍ਰਿਸ਼ਟੀਕੋਣਾਂ ਨੂੰ ਪ੍ਰਦਰਸ਼ਿਤ ਕਰਨਗੇ। 21 ਚੁਣੀਆਂ ਗਈਆਂ ਨਵੀਨਤਾਵਾਂ ਪੇਸ਼ ਕੀਤੀਆਂ ਜਾਣਗੀਆਂ, ਜੋ ਦੁਨੀਆ ਦੇ ਵੱਖ-ਵੱਖ ਖੇਤਰਾਂ ਤੋਂ ਉੱਭਰ ਰਹੇ ਨਵੇਂ ਦ੍ਰਿਸ਼ਟੀਕੋਣਾਂ, ਉਤਪਾਦਾਂ ਅਤੇ ਸਮਾਧਾਨਾਂ ਨੂੰ ਉਜਾਗਰ ਕਰਦੀਆਂ ਹਨ। ਇਹ ਸੰਮੇਲਨ ਵਿਸ਼ਵ ਸਿਹਤ ਸੰਗਠਨ (ਡਬਲਿਊਐੱਚਓ) ਅਤੇ ਜੈਵਿਕ ਸੱਭਿਆਚਾਰਕ ਖੇਤਰਾਂ ਦੇ ਤਜ਼ਰਬਿਆਂ ਨੂੰ ਵੀ ਉਜਾਗਰ ਕਰੇਗਾ, ਜੋ ਸਿਹਤ, ਸੱਭਿਆਚਾਰ ਅਤੇ ਵਾਤਾਵਰਣ ਪ੍ਰਣਾਲੀਆਂ ਵਿਚਕਾਰ ਡੂੰਘੇ ਸਬੰਧਾਂ ਨੂੰ ਉਜਾਗਰ ਕਰੇਗਾ।

ਇਸ ਵਿੱਚ ਸਰਕਾਰੀ ਆਗੂ, ਵਿਗਿਆਨੀ, ਪਰੰਪਰਾਗਤ ਚਿਕਿਤਸਾ ਮਾਹਿਰ, ਕਬਾਇਲੀ ਭਾਈਚਾਰਿਆਂ ਦੇ ਪ੍ਰਤੀਨਿਧੀ, ਉਦਯੋਗ ਹਿੱਸੇਦਾਰ ਅਤੇ ਸਿਵਲ ਸੁਸਾਇਟੀ ਸੰਗਠਨ ਸ਼ਾਮਲ ਹੋਣਗੇ। 100 ਤੋਂ ਵੱਧ ਦੇਸ਼ਾਂ ਦੀ ਪ੍ਰਤੀਨਿਧਤਾ ਦੇ ਨਾਲ, ਇਹ ਸੰਮੇਲਨ ਸੰਵਾਦ ਅਤੇ ਸਹਿਯੋਗ ਲਈ ਇੱਕ ਵਿਸ਼ਵਵਿਆਪੀ ਪਲੈਟਫਾਰਮ  ਵਜੋਂ ਕੰਮ ਕਰੇਗਾ। ਆਪਣੀ ਸਮਾਵੇਸ਼ੀ ਪਹੁੰਚ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਇਹ ਸਮਿਟ ਇੱਕ ਹਾਈਬ੍ਰਿਡ ਫਾਰਮੈਟ ਵਿੱਚ ਆਯੋਜਿਤ ਕੀਤਾ ਜਾਵੇਗਾ, ਜਿਸ ਨਾਲ ਦੁਨੀਆ ਭਰ ਦੇ ਭਾਗੀਦਾਰ ਨਵੀਂ ਦਿੱਲੀ ਵਿੱਚ ਸਾਈਟ 'ਤੇ ਅਤੇ ਔਨਲਾਈਨ ਦੋਵੇਂ ਤਰ੍ਹਾਂ ਨਾਲ ਆ ਸਕਣਗੇ।

ਇਸ ਸਮਿਟ ਦਾ ਇੱਕ ਮੁੱਖ ਨਤੀਜਾ ਨਵੀਆਂ ਪਹਿਲਕਦਮੀਆਂ, ਸਹਿਯੋਗ, ਵਾਅਦੇ ਅਤੇ ਵਚਨਬੱਧਤਾਵਾਂ ਦਾ ਐਲਾਨ ਹੋਵੇਗਾ ਜਿਨ੍ਹਾਂ ਦਾ ਉਦੇਸ਼ ਸਬੂਤ ਅਧਾਰ, ਨੀਤੀਗਤ ਵਾਤਾਵਰਣ ਅਤੇ ਰਵਾਇਤੀ ਚਿਕਿਤਸਾ ਵਿੱਚ ਵਿਸ਼ਵਵਿਆਪੀ ਸਹਿਯੋਗ ਨੂੰ ਮਜ਼ਬੂਤ ​​ਕਰਨਾ ਹੈ। ਇਨ੍ਹਾਂ ਨਤੀਜਿਆਂ ਤੋਂ ਸਿਹਤ ਪ੍ਰਤੀ ਵਧੇਰੇ ਸੰਪੂਰਨ, ਲਚਕੀਲਾ ਅਤੇ ਟਿਕਾਊ ਪਹੁੰਚਾਂ ਵੱਲ ਲੈ ਜਾਣ ਦੀ ਉਮੀਦ ਹੈ, ਜੋ ਕਿ ਵਿਆਪਕ ਵਿਸ਼ਵਵਿਆਪੀ ਸਿਹਤ ਅਤੇ ਵਿਕਾਸ ਤਰਜੀਹਾਂ ਦੇ ਅਨੁਕੂਲ ਹਨ।

ਵਿਸ਼ਵ ਸਿਹਤ ਸੰਗਠਨ (ਡਬਲਿਊਐੱਚਓ) ਦੇ 2023 ਵਿੱਚ ਆਯੋਜਿਤ ਪਰੰਪਰਾਗਤ ਚਿਕਿਤਸਾ 'ਤੇ ਪਹਿਲੇ ਗਲੋਬਲ ਸੰਮੇਲਨ ਨੇ ਇਸ ਖੇਤਰ ਵੱਲ ਵਿਸ਼ਵਵਿਆਪੀ ਧਿਆਨ, ਡੇਟਾ ਅਤੇ ਤਕਨਾਲੋਜੀਆਂ ਲਿਆ ਕੇ ਇੱਕ ਮਜ਼ਬੂਤ ​​ਨੀਂਹ ਰੱਖੀ। 2025 ਦਾ ਸਮਿਟ ਵਿਗਿਆਨਿਕ ਨਵੀਨਤਾ, ਸ਼ਾਸਨ ਅਤੇ ਜਵਾਬਦੇਹੀ ਵਿੱਚ ਡੂੰਘਾਈ ਨਾਲ ਖੋਜ ਕਰਕੇ ਇਸ ਵਿਰਾਸਤ ਨੂੰ ਅੱਗੇ ਵਧਾਏਗਾ, ਜਦਕਿ ਰਵਾਇਤੀ ਗਿਆਨ ਪ੍ਰਣਾਲੀਆਂ ਅਤੇ ਉਨ੍ਹਾਂ 'ਤੇ ਨਿਰਭਰ ਕੁਦਰਤੀ ਸਰੋਤਾਂ ਦੀ ਰੱਖਿਆ ਦੀ ਮਹੱਤਤਾ 'ਤੇ ਵੀ ਜ਼ੋਰ ਦੇਵੇਗਾ, ਜਿਨ੍ਹਾਂ ‘ਤੇ ਉਹ ਨਿਰਭਰ ਹੈ।

ਜਿਵੇਂ ਕਿ ਦੁਨੀਆ ਅਜਿਹੇ ਸਿਹਤ ਹੱਲ ਲੱਭ ਰਹੀ ਹੈ ਜੋ ਨਾ ਸਿਰਫ਼ ਪ੍ਰਭਾਵਸ਼ਾਲੀ ਹੋਣ ਸਗੋਂ ਬਰਾਬਰ ਅਤੇ ਟਿਕਾਊ ਵੀ ਹੋਣ, ਵਿਸ਼ਵ ਸਿਹਤ ਸੰਗਠਨ (ਡਬਲਿਊਐੱਚਓ) ਦਾ ਦੂਜਾ ਪਰੰਪਰਾਗਤ ਚਿਕਿਤਸਾ ਗਲੋਬਲ ਸੰਮੇਲਨ ਇੱਕ ਮਹੱਤਵਪੂਰਨ ਮੌਕਾ ਪੇਸ਼ ਕਰਦਾ ਹੈ। ਵਿਭਿੰਨ ਆਵਾਜ਼ਾਂ ਅਤੇ ਗਿਆਨ ਪ੍ਰਣਾਲੀਆਂ ਨੂੰ ਇਕੱਠਾ ਕਰਕੇ, ਸੰਮੇਲਨ ਦਾ ਉਦੇਸ਼ ਵਿਅਕਤੀਆਂ, ਭਾਈਚਾਰਿਆਂ ਅਤੇ ਗ੍ਰਹਿ ਲਈ ਸੰਤੁਲਨ ਬਹਾਲ ਕਰਨ ਵੱਲ ਇੱਕ ਸਮੂਹਿਕ ਮਾਰਗ ਦਰਸਾਉਣਾ ਹੈ, ਇੱਕ ਅਜਿਹੇ ਸਮੇਂ ਵਿੱਚ ਜਦੋਂ ਸਿਹਤ ਅਤੇ ਤੰਦਰੁਸਤੀ ਦੇ ਭਵਿੱਖ ਦੀ ਵਿਸ਼ਵ ਪੱਧਰ 'ਤੇ ਮੁੜ ਕਲਪਨਾ ਕੀਤੀ ਜਾ ਰਹੀ ਹੈ।

***

ਐੱਸਆਰ/ ਜੀਐੱਸ/ ਐੱਸਡੀਜੀ /ਏਕੇ