نئی دہلی، 14 دسمبر: وزیرِ اعظم کے دفتر میں وزیرِ مملکت ڈاکٹر جتیندر سنگھ نے آج اُدھم پور–کٹھوعہ–ڈوڈہ لوک سبھا حلقے کے ڈپٹی کمشنروں (ڈی سیز) اور اراکینِ قانون ساز اسمبلی (ایم ایل ایز) کے ساتھ ایک ورچوئل اجلاس منعقد کیا، جس میں 25 دسمبر 2025 کو منعقد ہونے والے سنسد کھیل مہوتسو کے اختتامی پروگرام کی تیاریوں کا جائزہ لیا گیا۔

اجلاس میں اضلاع اور اسمبلی حلقوں کے درمیان مؤثر اور ہموار ہم آہنگی پر توجہ مرکوز کی گئی تاکہ اختتامی تقریب کی کامیاب انجام دہی یقینی بنائی جا سکے، جس سے وزیرِ اعظم جناب نریندر مودی ورچوئل طور پر خطاب کریں گے۔

ڈاکٹر جتیندر سنگھ نے کہا کہ 25 دسمبر کو اختتامی تقریب اسمبلی حلقوں میں بیک وقت منعقد کی جائے گی، جس میں ضلعی انتظامیہ، ایم ایل ایز اور ایم پیز کی فعال شمولیت ہوگی۔ یہ تقریب 25 اگست 2025 کو شروع ہونے والے سنسد کھیل مہوتسو کے کامیاب اختتام کی علامت ہوگی۔ انہوں نے واضح کیا کہ یہ پروگرام ایک ہمہ گیر، ملک گیر اور بڑے پیمانے پر ترتیب دیا گیا اقدام ہے، جس کا مقصد نچلی سطح پر موجود کھیلوں کے ہنر کو سراہنا اور فِٹ انڈیا موومنٹ کے تحت صحت مند، توانا اور کھیل دوست بھارت کے ویژن کو تقویت دینا ہے۔

وزیر نے زور دیا کہ حتمی ہدایات کے مطابق تمام اضلاع کو مختلف نفاذی ماڈلز بشمول ضلع سطح اور حلقہ جاتی سطح کی شمولیت کے لیے پوری طرح تیار رہنا چاہیے۔ انہوں نے افسران کو ہدایت دی کہ وزیرِ اعظم کے ورچوئل خطاب کے پیشِ نظر مناسب مقامات کی نشاندہی کی جائے، جہاں مضبوط کنیکٹیوٹی اور مناسب بنیادی ڈھانچہ دستیاب ہو۔

سنسد کھیل مہوتسو کے طویل مدتی ویژن کو اجاگر کرتے ہوئے ڈاکٹر جتیندر سنگھ نے کہا کہ یہ اقدام کسی ایک تقریب تک محدود نہیں بلکہ پورے ملک میں پائیدار کھیلوں کے نظام کی تعمیر کے لیے ڈیزائن کیا گیا ہے۔ انہوں نے ہدایت کی کہ پنچایت، بلاک، ضلع اور اس سے اعلیٰ سطحوں پر کامیاب کھلاڑیوں کی تفصیلات مقررہ پورٹلز پر بروقت اپ لوڈ کی جائیں تاکہ باصلاحیت کھلاڑیوں کی شناخت ہو سکے، انہیں معاونت فراہم کی جا سکے اور اعلیٰ تربیت، بہتر مواقع، نمائش اور مستقبل میں اعلیٰ مقابلہ جاتی پلیٹ فارمز پر شرکت کے لیے تیار کیا جا سکے۔

وزیر نے یہ بھی نشاندہی کی کہ 25 دسمبر کو ہونے والا اختتام گڈ گورننس ڈے (سوشاسن دیوس) اور سابق وزیرِ اعظم اٹل بہاری واجپائی کی یومِ پیدائش کے ساتھ ہم آہنگ ہے، جو حکمرانی، نوجوانوں کو بااختیار بنانے اور قوم سازی جیسے موضوعات کو یکجا کرنے کا بہترین موقع فراہم کرتا ہے۔ انہوں نے اضلاع کی حوصلہ افزائی کی کہ عوامی رسائی اور نمایاں اثر کے لیے مقامی پروگراموں کو ان قومی مواقع کے ساتھ ہم آہنگ کیا جائے۔

اجلاس کے دوران بتایا گیا کہ اختتامی تقریبات میں مقامی نوجوانوں، کھلاڑیوں، سماجی نمائندوں اور کھیلوں کے شعبے کی ممتاز شخصیات کی شرکت متوقع ہے۔ یہ پروگرام ’’مائی بھارت‘‘ پلیٹ فارم کے وسیع تر فریم ورک کے تحت منعقد کیے جائیں گے، جنہیں وزارتِ امورِ نوجوانان و کھیل، وزارتِ ثقافت، وزارتِ تعلیم اور ضلعی انتظامیہ کی معاونت حاصل ہوگی تاکہ وسیع عوامی رسائی اور شمولیت یقینی بنائی جا سکے۔

ڈاکٹر جتیندر سنگھ نے اختتام پر تمام شراکت داروں سے قریبی ہم آہنگی کے ساتھ کام کرنے کی اپیل کی اور اس بات کو یقینی بنانے پر زور دیا کہ سنسد کھیل مہوتسو کا اختتام ایک مثالی قومی تقریب کے طور پر سامنے آئے، جو کھیلوں کے فروغ، نوجوان صلاحیتوں کی آبیاری اور ملک بھر میں فِٹ انڈیا موومنٹ کو مضبوط بنانے کے لیے حکومت کے عزم کی عکاسی کرے۔ انہوں نے یقین دہانی کرائی کہ تفصیلی رہنما خطوط جلد جاری کیے جائیں گے اور اس بات کو دہرایا کہ ہر سطح پر بروقت تیاری پروگرام کی کامیابی کی کلید ہوگی۔

******

ش ح۔ ش ا ر۔ ول

Uno-3135