નેશનલ હોર્ટિકલ્ચર બોર્ડ (NHB) ના બોર્ડ ઓફ ડિરેક્ટર્સની 33મી બેઠક આજે કૃષિ ભવન, નવી દિલ્હી ખાતે કેન્દ્રીય કૃષિ અને ખેડૂત કલ્યાણ અને ગ્રામીણ વિકાસ મંત્રી, શ્રી શિવરાજ સિંહ ચૌહાણની અધ્યક્ષતામાં યોજાઈ હતી. બેઠકમાં કેન્દ્રીય કૃષિ રાજ્ય મંત્રી શ્રી રામનાથ ઠાકુર પણ ઉપસ્થિત રહ્યા હતા.

બેઠકમાં, શ્રી શિવરાજ સિંહ ચૌહાણે NHB ની યોજનાઓની સમીક્ષા કરી, અને ચર્ચામાં મુખ્યત્વે વાણિજ્યિક બાગાયત વિકાસ યોજનાઓ, કોલ્ડ-ચેઇન ઇન્ફ્રાસ્ટ્રક્ચર પ્રોજેક્ટ્સ, ક્લસ્ટર ડેવલપમેન્ટ પ્રોગ્રામ (CDP) - જે પ્રદેશ-વિશિષ્ટ બાગાયત ક્લસ્ટરો દ્વારા ઉત્પાદકતા અને બજાર જોડાણને વધારવા માટેની નવી પહેલ છે - અને ક્લીન પ્લાન્ટ પ્રોગ્રામ - જે ઉચ્ચ મૂલ્યના પાકો માટે રોગ-મુક્ત રોપણી સામગ્રી પ્રદાન કરવાની યોજના છે, તેના પર ધ્યાન કેન્દ્રિત કરવામાં આવ્યું હતું.

કેન્દ્રીય મંત્રી શ્રી શિવરાજ સિંહે નિર્દેશ આપ્યો હતો કે યોજનાનો અમલ સમયસર, પારદર્શક અને ખેડૂત-કેન્દ્રીત હોવો જોઈએ, જેમાં ખેડૂતોને સબસિડી સમયસર પૂરી પાડવામાં આવે અને આ સંબંધમાં કોઈ ફરિયાદ ન આવે. તેમણે ખેડૂતોના હિતમાં બગડી જતી બાગાયતી પેદાશો માટે વિશેષ વ્યૂહરચના વિકસાવવા પર પણ ભાર મૂક્યો, જેથી તેમની શેલ્ફ લાઇફ વધે, ખેડૂતોને નુકસાન ન થાય અને નુકસાન ટાળવા માટે જાગૃતિ કાર્યક્રમો ચલાવવામાં આવે.

બેઠક દરમિયાન, કેન્દ્રીય મંત્રી શ્રી ચૌહાણે બાગાયત ક્ષેત્રમાં ઉત્પાદકતા, ગુણવત્તા અને સ્પર્ધાત્મકતાને પ્રોત્સાહન આપવા માટે અનેક વ્યૂહાત્મક સૂચનો આપ્યા હતા. તેમણે ગુણવત્તાયુક્ત રોપણી સામગ્રી, લણણી પછીના વ્યવસ્થાપન (post-harvest management) અને ઉત્પાદકતા વધારવા પર વિશેષ ધ્યાન કેન્દ્રિત કરવા સૂચના આપી હતી. શ્રી શિવરાજ સિંહે જણાવ્યું હતું કે ખેડૂતોને બજારો, કોલ્ડ-ચેઇન નેટવર્ક્સ અને મૂલ્ય-વર્ધન (value-addition) તકો સાથે વ્યાપકપણે જોડવા માટેની સિસ્ટમોને મજબૂત કરવી આવશ્યક છે. તેમણે કહ્યું કે NHB એ રાજ્ય-વાર અને પ્રદેશ-વાર માર્ગદર્શિકા (roadmaps) તૈયાર કરવી જોઈએ અને ખેડૂતોના લાભ માટે પૂરી તાકાતથી કામ કરવું જોઈએ.

કેન્દ્રીય મંત્રી શ્રી શિવરાજ સિંહ ચૌહાણે ગુડ એગ્રીકલ્ચરલ પ્રેક્ટિસિસ, ઓર્ગેનિક ફાર્મિંગ મોડલ અને અદ્યતન બાગાયત ટેકનોલોજી પર નેશનલ હોર્ટિકલ્ચર બોર્ડ દ્વારા તૈયાર કરાયેલા ટેકનિકલ પ્રકાશન પણ રજૂ કર્યા. આ સંસાધનો ખેડૂતો, ઉદ્યોગસાહસિકો અને કૃષિ નિષ્ણાતો માટે મૂલ્યવાન સંદર્ભ સામગ્રી તરીકે સેવા આપશે. બેઠકમાં કેન્દ્રીય કૃષિ સચિવ ડૉ. દેવેશ ચતુર્વેદી, ICAR ના ડાયરેક્ટર જનરલ ડૉ. માંગીલાલ જાટ, કૃષિ અને વિવિધ વિભાગોના વરિષ્ઠ અધિકારીઓ અને બાગાયત ઉદ્યોગના બિન-સરકારી સભ્યો ઉપસ્થિત રહ્યાં હતા. આ વ્યાપક પ્રતિનિધિત્વે બેઠકમાં પ્રાદેશિક પરિપ્રેક્ષ્ય અને સહભાગી સંવાદને મજબૂત બનાવ્યો હતો.

નેશનલ હોર્ટિકલ્ચર બોર્ડ એ કૃષિ અને ખેડૂત કલ્યાણ વિભાગ હેઠળની એક સ્વાયત્ત સંસ્થા છે, જે દેશભરમાં વાણિજ્યિક બાગાયત અને કોલ્ડ-ચેઇન ઇન્ફ્રાસ્ટ્રક્ચરના મજબૂત વિકાસ માટે કાર્યરત છે.

SM/NP/GP/JD