صحت و خاندانی بہبود کے مرکزی وزیرجناب  جگت پرکاش نڈا نے آج ایکسٹینڈڈ پارلیمنٹ ہاؤس اینیکس (ای پی ایچ اے) آڈیٹوریم میں تمام سیاسی جماعتوں کے ارکانِ پارلیمنٹ کو‘ٹی بی مُکت بھارت ابھیان’ کے بارے میں آگاہ کیا۔ اس موقع پر ان کے ساتھ سماجی انصاف و تفویضِ اختیارات کی وزارت میں مرکزی وزیر مملکت جناب  بی ایل ورما ، وزارت خزانہ میں وزیر مملکت جناب  پنکج چودھری ،دیہی ترقی کی وزارت میں وزیر مملکت جناب  کملیش پاسوان، تجارت و صنعت، الیکٹرانکس و انفارمیشن ٹیکنالوجی کی وزارت میں وزیر مملکت جناب  جتن پرساد اور خارجہ، ماحولیات، جنگلات و موسمیاتی تبدیلی کی وزارت میں وزیر مملکت جناب  کرتی وردھن سنگھ بھی موجود تھے۔

آج اراکین پا رلیمنٹ کے ساتھ سلسلہ وار مشاورت کے پہلے اجلاس کا انعقاد کیا گیا، جس میں خاص طور پر اتر پردیش کے ارکانِ پارلیمنٹ پر توجہ مرکوز کی گئی۔ ریاست کے ایم پیز نے اجلاس میں شرکت کی اور اپنے حلقوں میں اس مہم کو مضبوط بنانے اور کمیونٹی کی شمولیت بڑھانے کے عزم کا اظہار کیا۔ انہیں مہم کے مقاصد، جاری کلیدی سرگرمیوں اور مہم کی کامیابی میں ان کے کردار سے آگاہ کیا گیا۔

اجلاس سے خطاب کرتے ہوئے، جناب  نڈا نے ٹی بی کے خاتمے کے ہدف کے حصول میں ارکانِ پارلیمنٹ کی قیادت اور ان کے کلیدی کردار پر زور دیا۔ انہوں نے ایم پیز سے اپیل کی کہ وہ اپنے اپنے حلقوں میں مہم کی نگرانی کریں، بیماری سے متعلق آگاہی بڑھائیں، بدنامی کو کم کریں اور مقامی آبادی کو مہم میں سرگرم شرکت کے لیے متحرک کریں۔

مرکزی وزیر نے اس بات کو اجاگر کیا کہ بھارت میں ٹی بی کے واقعات (ہر سال سامنے آنے والے نئے کیسز) میں 21 فیصد کمی آئی ہے،جو 2015 میں فی ایک لاکھ آبادی پر 237 سے گھٹ کر 2024 میں 187 رہ گئی اور یہ کمی عالمی اوسط 12 فیصد کے مقابلے میں تقریباً دوگنی رفتار سے ہے، جیسا کہ عالمی ادارۂ صحت کی گلوبل ٹی بی رپورٹ 2025 میں درج ہے۔ انہوں نے مزید کہا کہ “اسی طرح بھارت میں ٹی بی سے اموات کی شرح بھی 2015 میں فی ایک لاکھ آبادی پر 28 سے کم ہو کر 2024 میں 21 رہ گئی ہے، جو اس بیماری سے ہونے والی اموات میں نمایاں کمی کی عکاسی کرتی ہے۔”

اراکین پارلیمنٹ کو گزشتہ دس برسوں میں شروع کئےگئے اقدامات کے بارے میں بھی آگاہ کیا گیا، جن میں اے آئی سے چلنے والےچیسٹ ایکس رے مشینیں، ٹرو نیٹ مشینیں، زیادہ مؤثر اور مختصر علاج کے نظام، آیوشمان آروگیہ مندرز کے نیٹ ورک کے ذریعے ٹی بی نگہداشت کی عدم مرکزیت اور کمیونٹی کی شمولیت شامل ہیں۔ جناب  نڈا نے زمینی سطح پر ٹی بی کی جانچ کی خدمات کی مزید توسیع اور عوامی آگاہی کو مہم کی کامیابی کے لیے انتہائی اہم قرار دیا اوراراکین پارلیمنٹ سے اپیل کی کہ وہ اسے ایک جن آندولن بنانے میں اپنا بھرپور کردار ادا کریں۔

صحت کی مرکزی سکریٹری محترمہ پنیہ سلیلہ سریواستو نے ملک میں ٹی بی کے معاملات  کم کرنے کے لیے اس مہم کی اہمیت پر روشنی ڈالی۔

نیشنل ہیلتھ مشن کے ایڈیشنل سکریٹری اور مشن ڈائریکٹر نے وزارتِ صحت کی جانب سے چلائے جا رہے ٹی بی کےخاتمہ کی مہم کا ایک جامع جائزہ پیش کیا۔

 

*****

UR-2254

(ش ح۔ع ح۔ ف ر )

 

(रिलीज़ आईडी: 2197992) आगंतुक पटल : 7