नवी दिल्ली, 1 डिसेंबर 2025

भारतीय रेल्वेने प्रतिका रावत, स्नेह राणा आणि रेणुका सिंह ठाकूर तीन नामवंत महिला क्रिकेटपटूंना, विशेष बाब म्हणून (Out-of-Turn Promotion) पदोन्नती दिली आहे. या पदोन्नतीच्या माध्यमातून भारतीय रेल्वेने या तीनही महिला क्रिकेटपटूंनी 2025 च्या आंतरराष्ट्रीय क्रिकेट परिषदेच्या महिला विश्वचषक स्पर्धेतील, भारताच्या विजयात दिलेले उत्कृष्ट योगदान आणि कामगिरीचा गौरव केला आहे. या तिघींनाही विशेष कार्य अधिकारी (क्रीडा) या गट ब अधिकारी श्रेणीच्या पदावर पदोन्नती दिली गेली आहे.

सातव्या केंद्रीय वेतन आयोगाच्या वेतन संरचनेनुसार स्तर 8 अंतर्गत या तिन्ही खेळाडूंना गट ब राजपत्रित अधिकाऱ्यांचे वेतन आणि लाभ मिळणार आहेत. रेल्वे क्रीडा प्रोत्साहन मंडळाच्या या उपक्रमाच्या माध्यमातून या तिन्ही महिला क्रिकेटपटूंना आर्थिक सुरक्षेसोबतच, प्रशासकीय जबाबदाऱ्याही सांभाळण्याचा मानही प्राप्त झाला आहे.

उत्तर रेल्वेमध्ये वरिष्ठ लिपिक म्हणून कार्यरत असलेल्या प्रतिका रावत यांना आता विशेष कार्य अधिकारी (क्रीडा) या गट ब राजपत्रित पदावर पदोन्नती मिळाली आहे. दिल्लीची सलामीची फलंदाज असलेल्या रावत यांनी भारतासाठी विश्वचषक स्पर्धेच्या विजयात महत्त्वाचे योगदान दिले होते.

उत्तर रेल्वेमध्ये कनिष्ठ लिपिक म्हणून कार्यरत असलेल्या रेणुका सिंह ठाकूर यांनाही आता विशेष कार्य अधिकारी (क्रीडा) या गट ब राजपत्रित पदावर पदोन्नती मिळाली आहे. उजव्या हाताची मध्यम-वेगवान गोलंदाज असलेल्या ठाकूर यांनी महत्त्वाच्या सामन्यांमध्ये निर्णायक स्पेल टाकून सातत्याने सामना जिंकून देणारी कामगिरी केली आहे.

उत्तर रेल्वेमध्ये व्यावसायिक सह तिकीट लिपिक म्हणून कार्यरत असलेल्या स्नेह राणा यांना आता विशेष कार्य अधिकारी (क्रीडा) या गट ब राजपत्रित पदावर पदोन्नती मिळाली आहे. उत्तराखंडची अष्टपैलू खेळाडू असलेल्या राणा यांनी फलंदाजी आणि गोलंदाजी अशा दोन्हीमध्ये महत्त्वाचे योगदान दिले आहे.

भारतीय रेल्वेने क्रीडा क्षेत्रातील प्रतिभावंतांना पाठबळ देण्याची आणि त्यांना प्रोत्साहन देण्याची जुनी परंपरा कायम जपली आहे. रेल्वेचे अनेक खेळाडू सातत्याने जागतिक स्तरावर भारताचे प्रतिनिधित्व करत आले आहेत.

सुषमा काणे/तुषार पवार/प्रिती मालंडकर

 

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com

 

 

(रिलीज़ आईडी: 2197319) आगंतुक पटल : 20