ஜெய்சால்மர் ரயில் நிலையத்திலிருந்து ஜெய்சால்மர்-தில்லி (ஷகூர் பஸ்தி) புதிய ரயில் சேவையை இன்று மத்திய ரயில்வே, தகவல் ஒலிபரப்பு, மின்னணுவியல் மற்றும் தகவல் தொழில்நுட்பத்துறை அமைச்சர் திரு அஸ்வினி வைஷ்ணவ், மத்திய கலாச்சார மற்றும் சுற்றுலாத் துறை அமைச்சர் திரு கஜேந்திர சிங் ஷெகாவத் ஆகியோர் இணைந்து   தொடங்கி வைத்தனர்.

பொதுமக்களின் தேவைகளைக் கருத்தில் கொண்டு, ஜெய்சால்மர்-தில்லி (ஷகூர் பஸ்தி) இடையே ஸ்வர்ன் நகரி எக்ஸ்பிரஸ் என்று பெயரில் விரைவு ரயில் சேவை இயக்கப்படும் என்று மத்திய ரயில்வே அமைச்சர் திரு அஸ்வினி வைஷ்ணவ் அறிவித்தார்.

ஜெய்சால்மர்-தில்லி (ஷகூர் பஸ்தி) ஜெய்சால்மர் எக்ஸ்பிரஸ் அறிமுகப்படுத்தப்படுவது தேசிய தலைநகருக்கும், ராஜஸ்தானின் மேற்குப் பகுதிக்கும் இடையிலான ரயில் போக்குவரத்துக்கான இணைப்பை கணிசமான அளவில் மேம்படுத்தும் என்று அவர் தெரிவித்தார். ராம்தேவ்ரா, ஜோத்பூர், மக்ரானா, ஜெய்ப்பூர் மற்றும் அல்வார் போன்ற நகரங்கள் தற்போது தேசிய தலைநகருடன்  எளிதாகவும், கூடுதல் வசதிகளுடன் இணைக்கப்படும்.

புதிய ரயில் சேவை மேம்பட்ட மருத்துவ மற்றும் கல்வி வசதிகளை எளிதாக அணுகவும், முக்கிய சுற்றுலா தலங்களுக்கான போக்குவரத்து இணைப்பை மேம்படுத்தவும், சுற்றியுள்ள பகுதிகளில் பொருளாதார வளர்ச்சிக்கும் உதவிடும். நம்பகமான மற்றும் வசதியான ரயில் பயண அனுபவத்தை வழங்குவதன் மூலம், இந்த ரயில் அப்பகுதிகளில் வசிக்கும் மக்கள், சுற்றுலாப் பயணிகள், மாணவர்கள் மற்றும் வர்த்தகர்களுக்குப்  பெரிதும் பயனளிப்பதாக அமைவதுடன், மண்டல அளவிலான போக்குவரத்து வசதிகள் மற்றும் பொருளாதார வளர்ச்சியை வலுப்படுத்தும்.

இந்த நிகழ்ச்சியில் உரையாற்றிய அவர், இந்திய ரயில்வே துறை விரைவான வளர்ச்சி கண்டு வருவதாகவும், ஒவ்வொரு நாளும் புதிய சாதனைகளை படைத்து வருவதாகவும் மத்திய அமைச்சர் திரு அஸ்வினி வைஷ்ணவ் தெரிவித்தார். பிரதமர் திரு நரேந்திர மோடியின் வழிகாட்டுதலின் பேரில், இந்திய ரயில்வே அதன் வளர்ச்சிப் பயணத்தை புதிய உச்சத்திற்கு கொண்டு செல்ல உறுதியுடன் உள்ளதாக அவர் கூறினார்.

ராஜஸ்தானில் ரயில்வே மேம்பாட்டிற்காக முன்னெப்போதும் இல்லாத அளவிற்கு பணிகள் மேற்கொள்ளப்பட்டு வருவதாகவும், தற்போது சுமார் 55,000 கோடி ரூபாய் மதிப்பிலான திட்டங்கள் நடைபெற்று வருவதாகவும் மத்திய அமைச்சர் திரு அஸ்வினி வைஷ்ணவ் தெரிவித்தார். எல்லைப் பகுதிகளில் ரயில் போக்குவரத்துக்கான கட்டமைப்புக்களை விரிவுபடுத்துவதன் ஒரு பகுதியாக, அனுப்கரில் இருந்து கஜுவாலா, பிகானர், ஜெய்சால்மர், பார்மர் மற்றும் பாபர் வரையிலான புதிய ரயி வழித்தடத்திற்கான பாதை அமைக்கும் திட்டம் பல்வேறு கட்டங்களில் முன்னேற்றம் அடைந்து வருவதாக அவர் தெரிவித்தார். இந்த புதிய வழித்தடங்கள் பொதுமக்களுக்கு பயனளிப்பதுடன், பாதுகாப்புப் படைகளுக்கான உத்திசார் நடவடிக்கைகளிலும் முக்கிய பங்கு வகிக்கும் என்று திரு அஸ்வினி வைஷ்ணவ் தெரிவித்தார்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்: https://www.pib.gov.in/PressReleasePage.aspx?PRID=2196337

***

AD/SV/RJ