Ka India ka la ioh ia ka 2030 Commonwealth Games, bad la pynbna ba yn pynlong ia kane ka lympung ha ka nongbah Amdavad (Ahmedabad). Kane ka jingpynbna ka la wan ha ka Commonwealth Games Federation (CGF) General Assembly ha Glasgow ha ka Sngi Balang.

U Myntri Rangbahduh Narendra Modi u la ialam lynti ia ka ri ha ka jingrakhe mynta ka janmiet ha kaba u la post ha ka X: "Dap da ka jingsngewkmen ba ka India ka la jop ia ka jingtyrwa ban dei ka jaka ba pynlong ia ka Centenary Commonwealth Games 2030! Nga ai khublei ia ki briew jong ka India bad ki kam kiba iadei bad ka jingialehkai. Ka dei ka jingkut jingmut lang jong ngi baroh bad ka mynsiem jong ka kam ialehkai kaba la buh ia ka India ha ka bynta kaba kongsan jong ki kam ialehkai jong ka pyrthei.

"Da ka jingngeit ha ka Vasudhaiva Kutumbakam, ngi khmih lynti ban rakhe ia kine ki jingialehkai da ka jingshongshit. Ngi khmih lynti ban pdiang sngewbha ia ka pyrthei!" u la ong ha ka tweet.

Kum ka dak jong ka jingwanphai biang jong ka India kum ka nongpynïaid ïa ki jingïalehkai ba long man ka saw snem hadien 20 snem, kane ka jingpynbna ka la sdang ïa ki jingrakhe ba heh bha ha ka Major Dhyan Chand National Stadium ha New Delhi. Ka Tnad kam ïalehkai jong ka sorkar pdeng ka la pynlong ïa ka jingïalang kaba kyrpang ha ka nongbah, ha kaba la ïashim bynta da u Myntri ka Tnad kam ïalehkai jong ka sorkar pdeng u Dr. Mansukh Mandaviya, ki nongmihkhmat na ka Indian Olympic Association, u Secretary (Ka tnad kam ialehkai) bad ki ophisar na ka MYAS bad SAI. Ki nongialehkai Olympic, ki nongjop takma ha ka Commonwealth bad ki riew pawkhmat ha ka jingialehkai ki la don lang, kaba pyni ia ka jingkiew biang jong ka India ha ka kam ialehkai.

Haba ai jingkren ia ki paidbah, u Dr. Mandaviya u la ong ïa kane ka sngi ka dei ka sngi ka ban sah ha ka histori. "Ka jingpynlong ïa ka snem kaba 100 jong ka CWG ha u snem 2030 ka long kaba kongsan na ka bynta ka CGF bad kumjuh ruh ïa ngi kum ki nongpynïaid kam. Hapoh ka jingïalam jong u Myntri Rangbahduh ka ri, Narendra Modi, ka kam ïalehkai jong ka ri India ka dang mad ia ka jingkylla. Ka jingpynlong ia ki lympung kum ka Boxing World Cup, Hockey World Cup, World Para Athletics bad kiwei kiwei ka pyni ba ngi la kloi ban pynlong ia ki lympung ialehkai kiba heh tam hapdeng ki ri."

"Ngi dang pynkhreh ruh ban pynlong ïa ka 2029 World Police Games bad kine baroh kin iarap shuh shuh ïa ki jingpynbeit na ka bynta ki jingïalehkai Olympic 2036, kiba ngi kyrmen ban pynlong ha ka ri,” u la bynrap.

Ka Khelo Bharat Niti bad ka Sports Governance Act ruh kin ai bor ia ka jingkylla ha ki kam ialehkai ha ri India. Ha ki 10 snem ban wan, ka India kan don ha ki 10 kyrdan ba halor tam, bad ha u snem 2047, ngin don ha ki 5 kyrdan ba halor tam. Mynta nga kyntu ia baroh ki nongialehkai ba kin pynkhreh ban wanrah burom ia ka ri," la ong u Myntri ka sorkar pdeng.

U Dr. Mandaviya u la pynpaw ruh ïa ka jingshaniah kaba nangroi jong ka pyrthei ha ka bor treikam jong ka India ban pdiang ïa ki lympung ialehkai, da kaba ong ïa ki jingïaroh ba dang shen na ki nongïalam ka pyrthei ba kynthup ïa u President ka World Para Athletics Paul Fitzgerald, President ka World Boxing Boris Van Der Vorst, bad u nongïalehkai Olympics ba pawnam jong ka Cuba u Javier Sotomayor. "Kum kane ka jingithuh ka pynskhem ia kaei kaba ka pyrthei ka la sngewthuh lypa: Ka India ka long kaba la khreh. Ka India ka long kaba lah. Ka India ka la poi”, u la bynrap.

Ka jingpynbna na ka CGF ha kane ka sngi ka la ong - “Ka rai ka pynthikna ba ka ri kaba bun briew tam ha ka pyrthei kan pynlong ïa ka bynta kaba kongsan tam jong kane ka lympung, hadien ba ki nongmihkhmat na ki 74 tylli ki ri bad ki jaka kiba long ki dkhot jong ka Commonwealth ki la mynjur ïa ka jingtyrwa jong ka India ha ka Commonwealth Sports General Assembly ha Glasgow.

"Ka India ka la wanrah ïa ka jingpynkhreh kaba hun na ka bynta ka 2030 Games, kaba buh nongrim ha ka nongbah Amdavad (Ahmedabad) jong ka Gujarat, ka ban iaid shakhmat na ki nongrim ba la buh da ka Glasgow 2026, kaba plie lad ïa ka India ban rakhe ïa ka jingdap shispah snem ha ka rukom kaba itynnad," la ong shuh shuh ha ka jingpynbna.

Ha ka jingïalang ha New Delhi ha ka janmiet jong ka Sngi Balang, la pyni ïa ka phlim ba la shna kyrpang kaba pyni ïa ka pateng jong ka India ha ka lympung Commonwealth Games, naduh ki jingïoh takma haduh ka jingpynlong ïa ka lympung ha u snem 2010. Hadien kane ka jingpynbna la don ka jingpyni laser kaba itynnad bad ki jingpynbthei, kaba la pynkut noh da ka jingpyllait paidbah ïa ka hashtag: #CWG2030InBHARAT, kaba pyni ïa ka jingangnud bad jingthmu jong ka India na ka bynta ka Viksit Bharat 2047. Katkum ka jingngeit jong ka India ban pynlong ia ki kam ialehkai kiba heh hynrei ki bym ktah ia ka mariang, ki jingpynbthei ba la pyndonkam ha kane ka jingialang ki dei ki bym ktah lane pynjaboh ia ka mariang.

Ka India ka la ioh ban khur haduh 101 tylli ki takma, ba kynthup ia 38 tylli ki takma ksiar ha ka CWG ha u snem 2010 ha New Delhi, ha kaba 30 tylli ki takma ki wan tang na ka jingialehkai Shooting. Ha u snem 2022, ka India ka la khur 61 tylli ki takma, kynthup ïa 22 tylli ki takma ksiar. Ka jingialehkai Shooting kam shym la don ha ka bynta jong kane ka lympung ba la pynlong ha Birmingham.

*****

(रिलीज़ आईडी: 2195528) आगंतुक पटल : 4