صدر جمہوریہ ہند، محترمہ دروپدی مرمو نے آج (26 نومبر 2025) نئی دہلی میں سپریم کورٹ آف انڈیا کی جانب سے منعقدہ یومِ آئین کی تقریبات میں شرکت کی۔

اس موقع پر خطاب کرتے ہوئے، صدر جمہوریہ ہند نے آئین کے بانیوں کو خراجِ عقیدت پیش کیا، جنہوں نے دنیا کی تاریخ کی سب سے بڑی جمہوریت کے لیے سب سے بڑا تحریری آئین تیار کیا۔

صدر جمہوریہ ہند نے کہا کہ ہمارا آئین دنیا کی تاریخ کی سب سے بڑی جمہوریت کا سرچشمہ ہے۔ یہ کثرت میں وحدت کا ذریعہ ہے۔ یہ عدم توازن کے پس منظر میں قائم مساوات کا سرچشمہ ہے۔ یہ دنیا کی سب سے بڑی جمہوریت میں پُرامن سماجی، معاشی اور سیاسی انقلاب کا سرچشمہ ہے۔ یہ فرد کی عزت و وقار اور قومی اتحاد کو یقینی بنانے کا ذریعہ ہے۔ یہ ہمارے کثیر سطحی اور کثیر جہتی نظامِ حکومت کا سرچشمہ ہے۔ یہ تسلسل اور تبدیلی کا ذریعہ ہے۔

صدر جمہوریہ ہند نے کہا کہ ہندوستان کا آئین ہمارا قومی متن ہے۔ یہ ہمارا قومی فرض ہے کہ ہم اداروں اور ذاتی زندگیوں کو آئین میں درج اقدار کے مطابق چلائیں۔

صدر جمہوریہ ہند نے کہا کہ یہ قومی فخر کی بات ہے کہ عام عوام سے لے کر ماہرین تک سب ہمارے آئین پر بڑھتی ہوئی اعتماد کا مظاہرہ کر رہے ہیں۔ "اس موضوع پر آئین کیا کہتا ہے؟" کے سوال کا جواب کسی بھی عمل یا نظام کی مناسبت کا معیار بن گیا ہے۔

صدر جمہوریہ ہند نے کہا کہ اگرچہ ہمارا آئین ایک قانون سازی کا دستاویز ہے، لیکن عوامی شمولیت اور وسیع نمائندگی کے ذریعے یہ عوام کے لیے ایک حوالہ جاتی کتاب بن گیا۔ تاکہ آئندہ نسلیں آئین سے جڑے رہنے کا احساس قائم رکھیں، بچوں کو آئین کے بارے میں دلچسپ معلومات فراہم کی جانی چاہئیں۔ بچوں کو شہریات کی کتابوں میں آئین کے بارے میں پڑھایا جاتا ہے۔ تاہم، آئین کا بچوں کے لیے دوستانہ ورژن تیار کرنا بچوں میں دلچسپی اور آگاہی پیدا کرنے میں بہت مددگار ہوگا۔ یہ مختلف بھارتی زبانوں میں آئینی ماہرین اور بچوں کے ادب کے مصنفین کی مشترکہ کوششوں کے ذریعے ممکن بنایا جا سکتا ہے۔جب بچے کی زندگی کے اُس مرحلے میں، جب اُس کا نظریۂ حیات بنتا ہے، آئینی اقدار اور فرائض کو شامل کیا جائے تو ایک اچھے اور متوازن شخصیت کی تشکیل ممکن ہے۔

صدر جمہوریہ ہند نے کہا کہ ہمارے آئین کے سازندگان نے وسیع غور و فکر کے بعد پارلیمانی نظام کو اپنایا۔ آئین میں انتظامیہ، مقننہ اور عدلیہ کے اختیارات، فرائض اور طریقۂ کار کے لیے تفصیلی دفعات فراہم کی گئی ہیں۔ انہوں نے اس اعتماد کا اظہار کیا کہ حکومت کے یہ تینوں ادارے باہمی ہم آہنگی کے ذریعے اپنے فرائض کی انجام دہی میں ہمارے آئینی نظام کو مضبوط کرتے رہیں گے۔ انہوں نے کہا کہ ہمارے شہری منسجم آئینی نظام سے مستفید ہوں گے اور ہمارا ملک ترقی یافتہ قوم بننے کے ہدف کی طرف تیز رفتاری سے آگے بڑھے گا۔

صدر جمہوریہ ہند نے کہا کہ انصاف بھی دیگر خدمات کی طرح دروازے تک پہنچایا جانا چاہیے۔ انہوں نے زور دیا کہ قانونی معاونت عوام کے لیے بنیادی سطح پر آسان دستیاب ہونی چاہیے۔ انہوں نے یہ بھی کہا کہ ہمیں آزادی کے بعد حاصل ہونے والی پیش رفت پر غور کرنا چاہیے اور سب کو انصاف فراہم کرنے کے لیے نہ تھمنے والی کوششیں کرنی چاہئیں۔

Please click here to see the President's speech-

************

ش ح ۔   س ک ۔  م  ص

(U :     1885  )

(Release ID: 2195008) Visitor Counter : 5