Guwahati, Jymmang 19, 2025 — U Myntri Sorkar Pdeng ba dei khmih ia ka tnad Ports, Shipping & Waterways (MoPSW), Sarbananda Sonowal u la peit bniah ia ki projek kiba dang iaid shakhmat ha Assam bad ka thain shatei lammihngi ha ryngkat ki ophisar na ka Tnad Ports, Shipping & Waterways (MoPSW), Inland Waterways Authority of India (IWAI), Public Works Department (PWD), Indian Port Rail and Ropeway Corporation Limited (IPRCL) bad Cochin Shipyard Limited (CSL). U Myntri u la ban jur ia ka jingdonkam ban pyndep ia ki projek ha ka por kaba biang katkum ka jingthmu kaba iar jong u Myntri Rangbahduh Narendra Modi na ka bynta ka Viksit Bharat. “Ka thaiñ shatei lammihngi ka dei kaba kongsan tam na ka bynta u Myntri Rangbah duh Narendra Modi, ka kam jong ngi ha kane ka thaiñ ki dei ban ïahap bad ka jingthmu jong ka Viksit Bharat,” la ong u Sarbananda Sonowal ha ka jingïalang.

Haba ai jingkren hadien ka jingïalang, u Myntri Sorkar Pdeng Sarbananda Sonowal u la ong, “Katkum ka jingïohi jngai jong u Myntri Rangbahduh Narendra Modi ji, ngi dang kyntiew ïa ki jingdon jingem ba iadei bad ka leit ka wan lyngba ki jaka shong um ha Assam bad ka thaiñ Shatei Lammihngi da ki projek ki ban wan ba shongdor T.1,000 klur, kaba la buh thong ban pyndep shuwa u snem 2026. Ha ki arsnem ba ladep, palat T. 1, 000 klur la bei tyngka, bad ki projek ba shongdor T. 300 klur ladep pyndep. Hadien ka jingbishar bniah jong nga ïa ki kam kiba dang ïaid shakhmat ha ka thaiñ, ngi don ha ka lynti ban pyndep ïa ki projek kiba dang sah haduh T. 700 klur ha kaba kut jong u snem 2025. Kine ki sienjam ki thmu ban kyntiew ia ka jingkit ia ki mar bad kumjuh ruh ia ki nongleit nongwan, kyntiew ia ka jingpyniasoh, kyntiew ia ka jingkiew shaphrang ka ioh ka kot ha ka thain shatei lammihngi, bad bad pynïahap bad ka jingthmu ba iar jong ka Atmanirbhar Bharat lyngba ki lad ka leit ka wan kaba iaineh bad kaba kynthup lang.”

Ka sorkar pdeng ka dang pyntreikam ia ki projek ba kongsan ba iadei bad ki jingdon jingem ha shilynter ka NW2 (Brahmaputra) bad NW16 (Barak), kynthup ia ka jingshna ia ki lieng kiba kit ia ki nongleit nongwan, ki jaka pynieng ia ki lieng, bad ki sienjam ban kyntiew ia ki sap treikam. U Myntri Sorkar Pdeng Sarbananda Sonowal u la peit bniah ruh ia ka jingiaid shaphrang ka projek Inland Water Transport (IWT) ha ka pung Doyang, bad bishar bniah ia ki lad ki lynti ba don ha ki pung Noune bad Shilloi ha Nagaland na ka bynta ki water sports bad kam jngoh kai. La bishar bniah ruh ia ka bynta ka jinglah ban pyntrei ia ka IWT ha ka wah Tiawng bad ka wah Chhimtuipui ha Mizoram, kumjuh ruh ha ka pung Umiam bad ka wah Ummgot (NW106) ha Meghalaya.

Haba ai jingkren ha ka jingïalang, u Myntri Sorkar Pdeng Sarbananda Sonowal u la ong, “Hapoh ka jingïalam ba ïohi jngai jong u Myntri Rangbahduh Narendra Modi, ka India ka ïaid shaphrang sha ka thong jong ka Viksit Bharat. Ka Assam bad ka thain shatei lammihngi kilong ki jaka pdeng jong kane ka jingkiew shaphrang, bad ki lad ka leit ka wan lyngba ki jaka shong um ki don ka bynta ba kongsan. Naduh u snem 2014, ka sorkar Modi ka la peit bniah ia kane ka lad ka leit ka wan kaba la ju shah ieh bein, khamtam lyngba ka wah Brahmaputra (NW2) bad wah Barak (NW16). Ki Skhim kum ka Jalvahak ki pynshlur ia ki kam khaii pateng ban shim ia kane ka rukom pynlut pisa, ka rukom kaba biang bad kaba iadei bad ka mariang, kaba pynduna ia ka jingeh ha surok bad lynti rel, bad buh ia ka Assam kum ka nongpyniaid ba kongsan ha ka jingiaid lynti jong ka India sha ka ioh ka kot kaba lah ban kyrshan dalade shuwa u snem 2047.”

Haba peit bniah ia ki projek ba bun naduh ka jingkyntiew ia ki jingdon jingem ba thymmai na ka bynta ka jingkyntiew ia ki lad ka leit ka wan lyngba ki jaka shong um jong ka ri haduh ka jingkyntiew ia ki ia ki sap na ka bynta ki samla jong ka Assam bad ka thain shatei lammihngi ha kaba iadei bad ka kam duriaw, u Myntri sorkar pdeng Sarbananda Sonowal u la ban jur ia ka jingdonkam kyrkieh bad ka jingdonkam ban pyndonkam ia ki jingbei tyngka.

Shuh shuh, u Sarbananda Sonowal u la ong, “Hapoh ka jingïalam ba ïohi jngai jong u Myntri Rangbahduh ka ri Narendra Modi ji, ka sorkar ka dang shna ïa ki lad ki lynti kiba thymmai na ka bynta ki samla jong ka jylla Assam bad ka thaiñ Shatei Lammihngi ba kin ïashim bynta ha ka jingkiew shaphrang ka kam duriaw jong ka India. Lyngba ki jaka pule kum ka Maritime Skill Development Centre ha Guwahati bad ka Centre of Excellence for Inland Water Transport ha Dibrugarh, ngi dang ai jinghikai ia ka bor treikam kaba la pynkhreh na ka bynta ka lawei kaba la pynkhreh na ka bynta ki lad ki lynti ha ka kam duriaw hapoh ka ri bad ha kylleng ka pyrthei. Kine ki sienjam  ki long shi bynta jong ka jingialeh ban kyntiew ia ka sap, pynkupbor bad ai kam ia ki samla jong ngi ha kaba iadei bad ka jingpynpoi mar, ka jingpeit ia ki mar, ka jingpyniaid ia ki lieng bad kiwei kiwei—khamtam eh katba ngi nang pyniar ia ki jingdon jingem ha ka NW2 bad NW16. Ka thain shatei lammihngi kam dei tang ka khyrdop sha Southeast Asia, hynrei ka nongnoh synniang ba kongsan ha ka jingïaid lynti jong ka India ban long u nongïalam ha ka kam duriaw ha ka pyrthei bad ban kot sha ka Viksit Bharat shuwa u snem 2047.”

Ban kyntiew shuh shuh ia ka kam jngohkai pyrthei kaba pyndonkam da ki lieng bad ka jinglah ban kit ia ki mar kylleng ka National Waterways 2 (Brahmaputra) bad 16 (Barak), palat T. 1,500 klur la mang na ka bynta ki projek ba kongsan ba la buh ban pyndep ha u snem 2027-28. Kine ki kynthup ia ka jingshna ia ki kad jhad kiba katkum ka juk mynta kiba la pynbiang da ki jingdon jingem kiba don harud duriaw ha Silghat, Bishwanath Ghat, Neamati Ghat, bad Guijan. Nalor kata, yn tei ruh ïa ka ïing thymmai na ka bynta ka Regional Office jong ka Mercantile Marine Department (MSDC), ryngkat bad ka guest house bad ka jaka treikam na ka bynta ka ITAT, ha Fancy Bazar ha Guwahati.

U Sonowal u la kren ruh shaphang ka jingïaid shaphrang ki jingshakri Water Metro ha Guwahati bad Dhubri, da ka jingbei tyngka kaba T. 315 klur bad ar tylli ki lieng electric catamarans ba la shna da ka Cochin Shipyard Ltd. Ka jaka buh lieng ba shongdor T. 100 klur ha Guwahati bad kawei ka Regional Centre of Excellence (RCoE) ha Dibrugarh kaba shongdor T. 120 klur ruh ki don ha ka jingpynkhreh.

Ki jingdon jingem ha shilynter ka Brahmaputra (NW2) ki kynthup san tylli ki jaka pynshai harud wah ha ki jaka ba kongsan, ka jingkyntiew ïa ka lynti hapdeng ka Pandu bad ka Bogibeel kaba T. 150 klur, bad ka jingthied ar tylli ki kor weng ktieh. Ka IWAI ka la pyntreikam ia ki projek ba shongdor T. 1,010 klur ha ka NW2 bad NW16, kynthup ia ki terminal ha Bogibeel bad Jogighopa, bad ka jaka maramot lieng kaba T. 208 klur ha Pandu.

Halor ka wah Barak (NW16), u Sonowal u la pynskhem biang ba ki tiar peit bniah bad ki tiar weng ktieh, bad ki projek na ka bynta ka jaka kiew lieng kiba don ha ki jaka shong um ha Karimganj bad Badarpur ki pyni ïa ka jingkut jingmut jong ka Sorkar Modi ban pynlong ïa ka thaiñ Shatei Lammihngi kum ka jaka pdeng jong ka lawei jong ka India ha ka kam duriaw.

Ban pynthikna ïa ka jingïaid lynti kaba ryntih ha shilynter ka wah Brahmaputra, la shaniah ha ka Dredging Corporation of India (DCI) ban pynneh pynsah ïa ka jingjngai kaba 2.5 meter naduh khappud Bangladesh sha Pandu hapoh ka NW-2 haduh u snem 2026-27. Na ka bynta kane ka jingpyrshang, la mynjur sa T. 191 klur. Kine ki sienjam ki long shi bynta ka sienjam ba iar jong ka Sorkar Pdeng ban pynïasoh ïa ka thaiñ Shatei Lam Mihngi jong ka ri ha ka jingkiew ka kam jong ka ri kiba iadei bad ka duriaw, kaba ïahap bad ka jingthmu jong ka Viksit Bharat shuwa u snem 2047.

Ha kane ka jingialang peit bniah la iadonlang ruh ki heh ophisar na ka MoPSW, IWAI, CSL IPRCL bad kiwei kiwei.