Ka Inland Waterways Authority of India (IWAI), ka Tnad pyntreikam na ka bynta ban kyntiew ïa ki lad ka leit ka wan lyngba ki jaka shong um hapoh ka Tnad Ports, Shipping & Waterways (MoPSW), ka la ïasoi ïa artylli ki Memoranda of Understanding (MoU) ban pynkhlain ïa ka leit ka wan lyngba ki jaka shong um jong ka Assam bad ka jingpynpoi mar ha ki karkhana. Ki jingiateh—kawei bad ka Assam Petro-Chemicals Ltd. (APL) bad kawei pat bad ka Sorkar Assam—ki thmu ban kyntiew ia ka jingkit ia ki mar bad ka leit ka wan jong ki briew lyngba ki wah kiba bun ha ka jylla, ban kyntiew ia ki thong jong ka jingpyniasoh kaba iaineh bad ka jingkiew shaphrang jong ka thain.

Ha kaba iadei bad ka jingkyntiew ïa ki projek ba bun jait ha ka thain shatei lammihngi, u Myntri Sorkar Pdeng ba dei khmih ia ka Tnad Ports, Shipping & Waterways (MoPSW), u Sarbananda Sonowal u la pynïaid ïa ka jingïalang bishar bniah bad ki heh ophisar jong ka Tnad bad kumjuh ruh ka IWAI halor ki projek baroh kiba don ha Assam, Mizoram, Arunachal Pradesh, Manipur, Tripura, Nagaland bad Meghalaya, kynthup kito kiba hap hapoh ka Central Sector Scheme (CSS).

Ha ka IMW, ka MoU kaba nyngkong hapdeng ka IWAI bad ka Assam Petro-Chemicals Ltd. (APL) ka thmu ban ïatreilang na ka bynta ban shalan ïa ka Methanol bad Formalin lyngba ka Indo-Bangladesh Protocol Route (IBPR) bad ka National Waterways (NW). Kane ka sienjam kan pynsuk ïa ka jingshalan mar shabar ri na ki jaka pynieng lieng jong ka IWAI ha Bogibeel, Pandu, bad Jogighopa sha ki jaka ha Bangladesh bad Southeast Asia, ha kajuh ka por kan pynkhlaiñ ruh ïa ka jingpynpoi mar hapoh ka ri lyngba ka National Waterways-1 bad 2.

Kane ka projek ka ïahap bad ka sienjam ba kongsan jong ka Sorkar India, ka PM Gati Shakti – ka jingthmu ba kongsan jong ka ri na ka bynta ka jingpynïasoh ba bun rukom, bad la khmih lynti ba kan kyntiew shibun ïa ka jingshalan mar shabar ri bad ka lad jong ka Assam ha ka kam karkhana. Ka APL mynta ka pynmih 1.98 lak metric ton ka Methanol bad 1.15 lak metric ton ka Formalin man ka snem, bad kane ka jingpynbeit ba thymmai kan iarap ban shalan bun, kaba pynduna ia ka jinglut, bad ka rukom pynpoi ia kine ki mar ka bym ktah ia ka mariang. Ka jingbei tyngka baroh na ka bynta kane ka sienjam ka long T.400 klur, kaba kynthup ïa ka jingthied ïa ki lieng kit um bad ki jingdon jingem kiba ïadei bad kane.

Ka IWAI kan ai ka jingkyrshan ba pura ha ka jingpyntreikam bad ha ka liang ka teknikal, kynthup ia ki jingdonkam ha ki jaka buh lieng jong ka ha Bogibeel, Pandu, bad Jogighopa, ka jingiarap ban pyniaid lieng, ki jaka buh bunker, bad ki rukom pynlip ding. Kan iarap ruh ia ka APL ban shna 10 tylli ki jhad kit um kiba lah ban kit hapdeng 500 bad 1,000 metric ton. Ka APL kan pynbiang ia ki kam pynpoi mar, ki jingtreikam jong ki lieng, bad ki jingpynbna katkum ka ain ban pynthikna ka jingkit ia ki mar kaba iaid beit iaid ryntih.

Ka MoU kaba ar, kaba la iasoi hapdeng ka IWAI bad ka sorkar Assam, ka pynleit jingmut halor ka jingpynkhreh bad jingkyntiew ia ka Urban Water Transport (UWT) System, lane ka Water Metro, ha Tezpur, Guwahati, bad Dibrugarh. Ka projek ka thmu ban seng ia ka lad ka leit ka wan lyngba ki jaka shong um ha shilynter ka wah Brahmaputra, kaba la pyniasoh bad ka leit ka wan kaba la don lypa kum ki surok, ki lynti rel, bad ki rukom pyniaid bos.

Haba ai jingkren ha kane ka sngi, u Sarbananda Sonowal u la ong, “Kine ki MoU ki dei ka sienjam kaba khraw ban pynurlong ïa ka jingthmu jong u Myntri Rangbahduh ka ri u Narendra Modi ji, uba ka jingïalam jong u ka dang ïai bteng ban pynkylla ïa ka thaiñ shatei lammihngi sha ka jaka pdeng jong ka jingpynïasoh ïa ki lad ka leit ka wan lyngba ki jaka shong um bad ka lad ba iadei bad ki kam karkhana. Ngi dang skhem ha ka jingthmu jong ngi ban kyntiew ïa ka jinglong ka leit ka wan lyngba ki jaka shong um ha ka thaiñ na ka bynta ban pyndonkam pura bad wad ïa ki lad ki lynti bad pynkylla ïa ki sha ki lad ki lynti kiba lah ban ïohi kiba kyntiew ïa ka roi ka par, ka khaii pateng, bad ka jingpynneh pynsah.”

Ka projek UWT kan pynkhreh ia ki fairway, ki tiar iarap ban iaid, bad ki jaka na ka bynta ki nongleit nongwan, ba la kyrshan da ki lieng kit nongleit nongwan ba la pyndonkam da ka bording ban thaw ia ka lad ka leit ka wan kaba katkum ka juk mynta bad kaba iahap  bad ka mariang. La sdang ia ka jingwad bniah da ka Kochi Metro Rail Ltd. (KMRL) ha ka jingiamir jingmut bad ka Sorkar Jylla. Ka jinglut ba la antad na ka bynta ka projek kalong T. 1,000 klur, khlem da kheiñ ïa ka bai jaka.

Ka jingialang peit bniah, kaba la long ha Maritime Skill Development Centre (MSDC) ka pynleit jingmut ha ki 15 tylli ki projek ba kongsan kiba dang iaid shakhmat bad kumjuh ruh ki 10 tylli ki projek Central Sector Scheme (CSS) ba kynthup 3 tylli ha Mizoram, 2 tylli ha Nagaland, 2 tylli ha Tripura bad mar kawei ha Assam, Meghalaya bad Manipur. Ha kane ka jingïalang la ïakren ruh halor artylli ki projek ba thymmai ba la ai jingmut hapoh ka CSS, mar kawei ha Arunachal Pradesh bad Assam. Ka jingialang ka la pyndep ia ka Jingpeit bniah ia ka surok kaba baroh shi aiom ha Bogibeel na ka bynta ka leit ka wan kaba iaid beit iaid ryntih sha ka jaka kit mar bad ka jaka kiew lieng ki nongjngoh kai.

Da ka jing thmu ban pyniar ia ka kam jngoh kai da ki lieng, ka Inland Waterways Authority of India ka la ïasoi ïa ka soskular bad ka Heritage River Journeys Pvt. Ltd. ban pynkhreh bad wanrah ia ki lieng thymmai bad ban pyniar ia ki kam jngoh kai da ki lieng ha ki national waterways. Ka jingiatreilang ka thmu ban pynkhlain ia ki jingshem jong ki nongjngohkai pyrthei bad ban ioh jingmyntoi na ka jingitynnad jong ka wah Brahmaputra bad kiwei kiwei ki wah kiba heh. Ka dor jong ka MoU ka long T.500 klur.

Ka IWAI bad ka Directorate General of Lighthouses and Lightships (DGLL) ki la iasoi ia ka MoU ban thaw ia ka rukom iatreilang kaba thmu ban kyntiew ia ka jingshngain ha ki wah bad ban kyntiew ia ka kam jngohkai pyrthei ha shi lynter jong ka National Waterway 2 (NW-2) ha Assam. Ka jingïatreilang ka thmu ban kyntiew bad buh ïa ki lighthouse ha ki wah bad ki jingdon jingem kiba ïadei bad kane ha Bogibeel, Silghat, Biswanath Ghat, bad Pandu, ki ban long kum ki lad jingïarap ba kongsan ha ka jingiaid lynti bad ïarap ban pynthikna ïa ka jingïaid lynti kaba kham suk na ka bynta ki jhad kiba ïaid ha shilynter ka wah Brahmaputra. Kane ka jingïasoi ia ka MoU ka thmu ban plie lad ïa ka kam jngohkai pyrthei ha ki lighthouse ha ki wah da kaba kyntiew ïa ki kum ki jaka pdeng na ka bynta ka kam jngoh kai pyrthei ka bym ktah ia ka mariang.

Ka MoU ba kongsan bad ka Rhenus Logistics kaba T. 1,000 klur kan iarap ban pynrung ïa ki jhad kit mar ba katkum ka juk mynta ha ka wah Ganga bad Brahmaputra, kaba kyntiew shibun ïa ka jingkit mar bad kyntiew ïa ka jingseisoh ki lad kit mar ba bun jait na ka bynta ka thaiñ shatei lammihngi. Nalor kata, na ka bynta ban kyntiew ïa ki jaka pynïeng jhad ha Neamati, Silghat, Biswanath Ghat bad Guijan, la mang ïa ka jingbei tyngka kaba T.299 klur.

Khnang ban pynbiang ïa ka Regional Centre of Excellence ha Dibrugarh kaba shongdor T.188 klur, ha ryngkat ka plan kaba T.55 klur na ka bynta ban kyntiew ïa ka jaka ba kongsan ha Guwahati, la ïasoi ruh ïa artylli kiwei pat ki MoU. Kine ki projek, kiba la kyrshan lyngba ka jingïatreilang bad ki nongai jingmut da ka IPRCL, ki pyni ïa ka por jong ka jingkylla ha ka ïoh ka kot na ki wah jong ka Assam bad ki buh ïa ka jylla kum ka jaka ba kongsan jong ka jingpynïasoh ïa ki lad ka leit ka wan ha ki jaka shong um bad ka kam jngoh kai da ki lieng ha India.

“Ka jingiatreilang jong ngi ban shalan ia ki mar sha ki iew ba marjan bad ka jingthaw ia ka Regional Centre of Excellence ha Dibrugarh ka pyni ia ka jingaiti jong ngi ha ka jingpynwandur thymmai bad ka jingpyniasoh lang ha ka pyrthei. Da ka jingïalam lynti kaba ïohi jngai jong u Myntri Rangbah duh Narendra Modi, ngi pynkylla ïa ki lad ka leit ka wan ha ki jaka shong um sha ki kor jong ka roi ka par, ka jingseisoh bad ka jingsarong — kaba pynwan dur thymmai ïa ka lawei jong ka thaiñ Shatei Lammihngi,” ong u Sarbananda Sonowal.

Ha Mizoram, ka IWAI ka dang kyntiew ia ki projek ba kongsan na ka bynta ki lad ka leit ka wan lyngba ki jaka shong um ha Mizoram ban pynkhlain ia ka jingpyniasoh ha ki thain bad ki lad ka leit ka wan lynga ki wah. Ka jingwad bniah ka dang ïaid shakhmat na ka bynta ki jingdon jingem jong ka IWT ha ka wah Tlawng bad ka wah Chhimtuipui, ha kaba ka dor jong ka projek ka long T.0.89 klur bad T.1.42 klur. Nalor kata, ka jingtrei ka la sdang hapoh ka Stage-I jong ka projek kaba T.9.82 klur na ka bynta ban kyntiew ïa ki jingdon jingem jong ka IWT ha ka thaiñ Khawthlangtuipui–Tuichawng ha ka district Lunglei. Kane ka projek ka kynthup ia artylli ki jaka ieng lieng ha Thekaduar bad Tlabung, artylli ki jaka kiew lieng HDPE, bad ki lieng kit passenjar kiba thymmai kiba la pynbiang da ki outboard jet, kaba iarap ia ka leit ka wan jong ki passenjar kaba kham shngain bad kaba kham biang ha kane ka thain.

Ha Nagaland, ka IWAI ka dang pynkhreh ia ki DPR na ka bynta ban kyntiew ia ki lad ka leit ka wan ha ki jaka shong um ha ka pung Doyang bad na ka bynta ban kyntiew ia ki water sports bad ki kam jngohkai pyrthei ha ka pung Noune bad Shilloi hapoh ka CSS. Ha Manipur, la tyrwa ia ka Techno-Economic Feasibility study bad ka DPR na ka bynta ban kyntiew ia ka IWT ha ka wah Barak bad ki wah ba mih na ka, kumjuh ruh ia ka wah Imphal bad wah Nambul ha Manipur hapoh ka CSS. Ha Meghalaya dang pynkhreh ia ka DPR na ka bynta ban kyntiew ia ki jingdon jingem jong ka IWT ha ka pung Umiam bad ka wah Umngot (NW-106).

Ha Tripura, ka IWAI ka dang pynïaid shakhmat ïa ar tylli ki sienjam ba kongsan ban pynkhlain ïa ka jingpyniasoh ha ki thaiñ bad ka kam jngohkai pyrthei. La shim ia ka projek kaba shongdor haduh T.24.53 klur ban kyntiew ia ka wah Gumti bad ban wanrah ia ka jingpyniasoh bad ka wah Meghna ha Bangladesh. Ka projek ka kynthup ia ka jingpynwandur ia ka lynti iaid lieng, ki kam iada ia ki rud wah, ka jingtei ia khyndai tylli ki jaka ieng lieng bad ka jingbuh ia ki tiar iarap ban iaid lieng. Nalor kata, ka jingwad bniah ka dang ïaid shakhmat na ka bynta ban wanrah ïa ka lad shong lieng ha ka pung Dumbur ha ka distrik Dhalai kaba thmu ban kyntiew ïa ka kam jngohkai pyrthei bad ka leit ka wan ha ki wah ha ka jylla.

La sdang ia ka jingtyrwa na ka bynta ban kyntiew ia ki jingdon jingem jong ka Inland Water Transport (IWT) ha ka wah Siang ha Arunachal Pradesh. Ka projek ka kynthup ia ka jingtei ia ki jaka ieng lieng ryngkat bad ki jingdonkam kiba iadei kum ki iing, ki surok hapoh, ki lynti iaid kjat, ki jingker, ki jaka sangeh leing, bad ki jingtei ba pyndonkam da ka sngi, ryngkat bad ka jingbuh ia ki jaka ieng liengsuin kiba tuid ha um, ka jingpynroi ia ki lynti liengsuin bad ki tiar iarap ban iaid liengsuin. Ka jingtyrwa ka kynthup ruh ia ka jingpynbiang ia ki lieng kum ki lieng kit mar, ki lieng FRP bad ki lieng lehkai ba stet bha ban kyrshan ia ka jingleit jingwan jong ki nongleit nongwan bad ka kam jngohkai pyrthei.

“Ki projek kiba dang ïaid shakhmat ha kylleng ka Mizoram, Nagaland, Manipur, Meghalaya, Tripura bad Arunachal Pradesh ki pynpaw ïa ka jingangnud jong ka Sorkar Modi ban pynkylla ïa ka thaiñ lyngba ki jingtei IWT  kiba katkum ka juk mynta. Da kaba kyntiew ia ka jingpyniasoh jong ki wah, ka kam jngohkai pyrthei bad ki lynti khaii pateng, ngi plie ia ki lad kamai kiba thymmai bad pyniasoh kham jan ia ka thain bad ki iew jong ka ri bad ka pyrthei. Hapoh ka jingialam ba shlur jong u Myntri Rangbahduh Narendra Modi, ka thain shatei lammihngi ka poi ha ka juk thymmai jong ka jingpyniasoh bad ka jingkhie biang ka ioh ka kot kaba la ioh bor na ka jingkhie im biang jong ki wah ba khlain bor jong ngi. Ngi thmu ban bei tyngka palat T 5,000 klur ban kyntiew ia ka IWT ha ka thain ha ki snem ban wan. Da ki jingïatreilang kiba thymmai ban pynkhlaiñ ïa ka jingkit mar, ka kam jngohkai pyrthei lyngba ki wah bad ka khaii pateng sha shiliang pud, ki Inland Waterways ki kylla long kum u budlum na ka bynta ki briew jong ngi,” ong u Sarbananda Sonowal.

Kine ki sienjam ki long kum ka kam kaba kongsan ban plie ia ki lad kiba bun ha ki jaka shong um bad ki wah jong ka thain kiba long kum ki kor jong ka jingkylla ha ka ioh ka kot.

****