కృత్రిమ మేధ (ఏఐ) ప్రపంచాన్ని భారత్ లో అందరికీ, ముఖ్యంగా యువతకు పరిచయం చేసే లక్ష్యంతో ఎలక్ట్రానిక్స్, ఇన్ఫర్మేషన్ టెక్నాలజీ మంత్రిత్వ శాఖ (ఎంఈఐటీవై) ‘ఇండియాఏఐ‘ మిషన్ కింద, మొట్టమొదటిసారిగా  'యువ ఏఐ  ఫర్ ఆల్' ఉచిత కోర్సును ప్రారంభించింది.

విద్యార్థులు, , నిపుణులు,  ఇతర ఆసక్తిగల అభ్యాసకులు నాలుగైదు గంటల స్వల్ప వ్యవధిలో సులభంగా ఏఐ  ప్రాథమిక అంశాలను తెలుసుకోవడానికి, ఇది ప్రపంచాన్ని ఎలా మారుస్తుందో అవగాహన పొందడానికి వీలుగా  ఈ కోర్సును రూపొందించారు. ఇది సులభంగా, ఆచరణాత్మకంగా ఉంటుంది. దీనిని నేర్చుకోవడంలో ఆసక్తి, ఉత్సాహం కోసం కోర్సులో నిజ జీవిత భారతీయ ఉదాహరణలను జోడించారు.

ఈ కోర్సు ప్రముఖ అభ్యసన వేదికలైన ఫ్యూచర్‌స్కిల్స్ ప్రైమ్,  ఐగాట్ కర్మయోగి, ఇతర ప్రముఖ ఎడ్‌ - టెక్ పోర్టల్స్‌లో ఉచితంగా అందుబాటులో ఉంది.కోర్సును పూర్తి చేసిన ప్రతి అభ్యాసకుడికి భారత ప్రభుత్వం నుంచి అధికారిక సర్టిఫికెట్ లభిస్తుంది.

ఆరు చిన్న, ఆకర్షణీయమైన మాడ్యూళ్ల ద్వారా, అభ్యాసకులు కింద అంశాలు తెలుసుకుంటారు. 

• నిజంగా ఏఐ అంటే ఏమిటి, అది ఎలా పనిచేస్తుందో తెలుసుకుంటారు

• విద్య, సృజనాత్మకత,  పనిని ఏఐ  ఎలా మారుస్తుందో అర్థం చేసుకుంటారు

• ఏఐ  సాధనాలను సురక్షితంగా బాధ్యతాయుతంగా ఎలా ఉపయోగించాలో నేర్చుకుంటారు

• భారత్ లో విజయవంతమైన వాస్తవ ప్రపంచ ఏఐ  వినియోగ కేసులను అన్వేషిస్తారు.

• ఏఐ భవిష్యత్, రాబోయే కొత్త అవకాశాల గురించి ముందస్తు ఆలోచన చేస్తారు. 

'యువ ఏఐ ఫర్ ఆల్‘ ఎందుకు?

*ఇది 100% ఉచితం. అందరికీ అందుబాటులో ఉంటుంది

*ఎప్పుడైనా, ఎక్కడైనా స్వయంగా త్వరగా నేర్చుకునే అవకాశాన్ని ఇస్తుంది

*కోర్సు పూర్తి చేశాక భారత ప్రభుత్వ సర్టిఫికెట్ పొందవచ్చు

*భవిష్యత్తుకు సిద్ధంగా ఉండేందుకు అవసరమైన నైపుణ్యాలను పొందవచ్చు.

*ఇది ఏఐ ఆధారిత దేశంగా మారే భారత ప్రయాణంలో ఒక భాగంగా ఉంటుంది

భారత ఏఐ భవిష్యత్ నిర్మాణం

ఎలక్ట్రానిక్స్, ఇన్ఫర్మేషన్ టెక్నాలజీ మంత్రిత్వ శాఖ ఈ కార్యక్రమం ద్వారా కోటి మంది పౌరులకు మౌలిక ఏఐ  నైపుణ్యాలను అందించాలని లక్ష్యంగా పెట్టుకుంది — దీని ద్వారా డిజిటల్ అంతరాన్ని తగ్గించడం, నైతిక ఏఐ వినియోగాన్ని ప్రోత్సహించడం, భారతీయ పనివారిని భవిష్యత్తుకు సిద్ధం చేయడం సాధ్యమవుతుంది.

ఈ కోర్సును దేశంలోని ప్రతి మూలకు చేర్చడానికి సంస్థలు, పాఠశాలలు,  విశ్వవిద్యాలయాలు ఇండియాఏఐ తో భాగస్వామ్యం చేసుకోవచ్చు. భాగస్వామ్య సంస్థలు ఈ కోర్సును అనుసంధానం చేయడంతో పాటు, అభ్యాసకుల కోసం ప్రచారం చేయవచ్చు. సర్టిఫికెట్‌లను కో-బ్రాండ్ చేయవచ్చు.

ఇండియా ఏఐ మిషన్ కోసం, ప్రముఖ ఏఐ నిపుణుడు,  రచయిత, ఏఐ అండ్ బియాండ్, టెక్ విస్పరర్ లిమిటెడ్ వ్యవస్థాపకుడు జస్ప్రీత్ బింద్రా  ఈ కోర్సును తయారు చేశారు. ఈ కోర్సు ప్రపంచ పరిజ్ఞానాన్ని భారతదేశ నేపథ్యంతో మేళవించి, నైతిక, బాధ్యతాయుత,   సమ్మిళిత  ఏఐ వినియోగంపై దృష్టి పెడుతుంది.

https://www.futureskillsprime.in/course/yuva-ai-for-all/  లో ఈ కోర్సును యాక్సెస్ చేయవచ్చు:

***