న్యూఢిల్లీలో నేడు  ప్రపంచ ఇంధన నేతల సదస్సు (జీఈఎల్ఎస్) 2025 లోగో, వెబ్‌సైట్‌ను విద్యుత్ శాఖ సహాయ మంత్రి శ్రీ శ్రీపద్ నాయక్ ప్రారంభించారు. టోనీ బ్లెయిర్ ఇనిస్టిట్యూట్ ఫర్ గ్లోబల్ చేంజ్‌ సంస్థతో కలిసి ఒడిశా ప్రభుత్వం నిర్వహిస్తున్న ఈ సమావేశం..  డిసెంబర్ 5 నుంచి 7 వరకు పూరీ నగరంలో జరగనుంది.

ఈ ప్రారంభోత్సవ కార్యక్రమంలో ఒడిశా ఉపముఖ్యమంత్రి శ్రీ కనక్ వర్ధన్ సింగ్ డీయో, ఒడిశా విద్యుత్ శాఖ ప్రధాన కార్యదర్శి శ్రీ విశాల్ దేవ్, ఐఐటీ కాన్పూర్ ప్రొఫెసర్ అనూప్ సింగ్,  టోనీ బ్లెయిర్ ఇనిస్టిట్యూట్ (భారత్) అధినేత శ్రీవివేక్ అగర్వాల్ పాల్గొన్నారు.

ఇంధన మార్పు, వాతావరణ నాయకత్వం, సాంకేతిక ఆధారిత మార్పులపై కీలక జాతీయ, అంతర్జాతీయ సంభాషణకు ఈ జీఈఎల్ఎస్ 2025 నాంది పలుకుతుందని కేంద్ర సహాయ మంత్రి శ్రీ శ్రీపద్ నాయక్ తెలిపారు. విద్యుత్ ఉత్పత్తి, పునరుత్పాదక ఇంధనం, ప్రసార సామర్థ్యం, డిజిటల్ ఆధునీకరణలో దేశ ప్రగతిని ప్రస్తావిస్తూ.. ప్రపంచంలో అత్యంత వేగంగా అభివృద్ధి చెందుతున్న ఇంధన  మార్కెట్లలో భారత్ ఒకటిగా పేర్కొన్నారు.

దేశ ఇంధన పరివర్తనను ముందుకు తీసుకెళ్లడంలో, సహకార, పోటీతత్వ సమాఖ్యవాదాన్ని  ప్రోత్సహించడంలో నాయకత్వం వహిస్తున్న ఒడిశా ప్రభుతాన్ని నాయక్‌ ప్రశంసించారు.

1990లోనే విద్యుత్ రంగ సంస్కరణలు చేపట్టిన దేశంలోని తొలి రాష్ట్రంగా ఒడిశా నిలిచిందని మంత్రి ప్రశంసించారు.  సమర్థత, స్థైర్యం, స్థిరత్వం పట్ల బలమైన నిబద్ధతను రాష్ట్రం కొనసాగిస్తోందని ఆయన పేర్కొన్నారు. ఒడిశా మోడల్‌ ద్వారా వృద్ధి, పర్యావరణ బాధ్యతతో సమన్వయం సాధించగలదని, స్వచ్ఛమైన ఇంధన పెట్టుబడులు పరిశ్రమల అభివృద్ధి, ఉపాధి సృష్టికి దోహదపడతాయని చూపించిందని తెలిపారు.

ఈ సదస్సు ఇతివృత్తం.. ‘‘శక్తిమంతమైన భారత్‌: సమృద్ధి, సమతుల్యత, ఆవిష్కరణ’’ గురించి కేంద్రమంత్రి మాట్లాడుతూ.. ఇంధన ప్రాప్యత, సమర్థత, స్థిరత్వం, భద్రత వంటి నాలుగు కీలక అంశాలతో ప్రధానమంత్రి దార్శనికతను ప్రతిబింబిస్తుందని తెలిపారు. ఈ సదస్సుకు విద్యుత్‌ మంత్రిత్వ శాఖ, నూతన, పునరుత్పాదక ఇంధన మంత్రిత్వ శాఖ నుంచి పూర్తి మద్దతు ఉంటుందని చెప్పారు. జీఈఎల్‌ఎస్‌ సమావేశం ఇంధన నాయకత్వం, సహకార వేదికగా నిలుస్తుందని ఆయన ఆశాభావం వ్యక్తం చేశారు.

జీఈఎల్‌ఎస్‌ సదస్సును విజయవంతంగా నిర్వహించాలని కోరుతూ.. ఒడిశా ప్రభుత్వం, రాష్ట్ర విద్యుత్‌ శాఖ,  అన్ని భాగస్వామ్య సంస్థలకు  శుభాకాంక్షలు తెలియజేశారు. ఇలాంటి సహకార ప్రయత్నాలు దేశ  “శూన్య నికర ఉద్గారాలు-2070” లక్ష్యాలు, జాతీయంగా నిర్ణయించిన వాతావరణ చర్యల లక్ష్యాలను సాధించడంలో కీలకమని ఆయన పేర్కొన్నారు.

జీఈఎల్‌ఎస్‌ 2025

డిసెంబర్ 5 నుంచి7 వరకు ఒడిశాలోని పూరిలో ప్రపంచ ఇంధన నేతల సదస్సు 2025 జరగనుంది. ఈ సమావేశంలో కేంద్ర, రాష్ట్ర విద్యుత్‌శాఖ మంత్రులు, ప్రపంచ నేతలు, ఆవిష్కర్తలు, పరిశ్రమ దిగ్గజాలు పాల్గొననున్నారు. భవిష్యత్తు ఇంధన విధానాలను, ఆవిష్కరణలను, స్థిరమైన అభివృద్ధిని అందించే వేదికగా ఈ కార్యక్రమం ఉండనుంది.

ఈ సదస్సు రాష్ట్ర విద్యుత్‌ మంత్రుల మధ్య సహచర చర్యలను ప్రోత్సహించేలా, అంతర్జాతీయ నాయకులతో వ్యూహత్మక సంభాషణలను నిర్వహించేందుకు ఓ అవకాశంగా ఉపయోగపడనుంది. మరిన్ని వివరాల కోసం జీఈఎల్ఎస్‌ 2025 అధికారిక వెబ్‌సైట్‌ను సందర్శించండి.

https://www.gelsodisha2025.com/

 

***

(Release ID: 2190015) Visitor Counter : 14