Ka jingialang jong ki Myntri ka thain shatei lammihngi jong ka Ri halor ka Civil Aviation 2025 & ka North East Aviation Summit kaba 3, kaba la pynlong da ka Tnad Civil Aviation jong ka Sorkar India, ka la long mynta ka sngi ha Itanagar, Arunachal Pradesh. Ia kane ka jingialang la plie pyrda ha ka jingdonlang u Pema Khandu, Myntri Rangbah ka jylla Arunachal Pradesh, kum u Kongsan bad u Ram Mohan Naidu, Myntri ka Tnad Civil Aviation kum u Symbud Kongsan. U Tesam Pongte, Lamphang ka Ïing Dorbar Thaw Aiñ jong ka Jylla Arunachal Pradesh u la don lang ha kane ka jingïalang plie paidbah. U Lalduhoma, Myntri Rangbah ka Jylla Mizoram; u Tsering Thendup Bhutia, Myntri ka Tnad Civil Aviation, Sorkar Sikkim bad u Jogen Mohan, Myntri ka Tnat Hill, Development and Cooperation, Sorkar Assam ki la plie paidbah ia ka jingialang bad ki la ialam ia ki kynhun jong ka Sorkar Jylla bapher bapher na ka bynta ka jingiakren bad ka Tnad sorkar pdeng bad ka kam liengsuin. U Balo Raja, Myntri ka Tnat Civil Aviation, Arunachal Pradesh u la batai ïa ka jingsngew jong ka Jylla.

Ha ka jingplie paidbah, u Kongsan u Pema Khandu, Myntri Rangbah ka Jylla Arunachal Pradesh u la ban jur ba ka jingpynïasoh ïa ka leit ka wan ka dei ka bynta kaba kongsan tam na ka bynta ka roi ka par jong ka thain shatei lammihngi. Ha kine ki 10 snem ba la leit noh, ki jingdon jingem ba iadei bad ka kam liengsuiñ bad ka jinglong jingman jong ka jingïapyniasoh ha ka thain shatei lammihngi ka la ïohi ïa ka jingkiew ka bym pat ju jia mynno mynno ruh. Ka jingdon ïa ki kad liengsuiñ ha Arunachal Pradesh ka dei ka jingangnud kaba la slem bha jong ki paidbah kaba la urlong namar ka jingkyrshan radbah jong ka Tnad Civil Aviation hapoh ka jingïalam ba iohi jngai jong u Myntri Rangbah duh. Ka jingiaid shaphrang ka ka jingwanrah ia ki jingdon jingem ba iadei bad ki kam liengsuin bad ki skhim wanrah jingkylla kum ka UDAN ki la long ki atiar ban pynkylla ia ki jingangnud ia ka ioh ka kot ha ka imlang sahlang jong ka thain shatei lammihngi.

U Rammohan Naidu Kinjarapu, u la ban jur ïa ka jingdonkam ban pynjylliew ïa ka jingïatreilang hapdeng ka Sorkar Pdeng-Sorkar Jylla- ki Karkhana na ka bynta ka jingkiew stet jong ka kam pynher liengsuin ha ka thaiñ shatei lammihngi. U la ban jur ba ka jingkyntiew ia ka jingpyniasoh lyngba ki liengsuin ka long kaba kongsan na ka bynta ban kyntiew ka jingpoi sha ki jaka ba jngai bad jaka khappud, ban kyntiew ia ka kam jngohkai pyrthei, ban pynsuk ia ka jingkit ia ki mar bad ki kam logistic, bad ban kyntiew ka jingkiew ki karkhana bad kumjuh ruh ka jingkiew ka imlang sahlang bad ka ioh ka kot ha Arunachal Pradesh bad ka thain shatei lammihngi. Ban pynurlong ia ka lad kaba khraw jong ka ha ka kam jngohkai pyrthei, ka thain shatei lammihngi ka dei ban pynbeit ia ki jingeh ha ka jingpyniasoh jong ka ha ka rukom kaba stet. Kumjuh ruh ka donkam ban pynsted ia ki sienjam ban pyntbit na ka bynta ban pynsted ia ka jingpynmih lad ioh kam hapdeng ki samla jong ka thain. Ka jinglong jingman jong ka kam liengsuin kaba la pyniaid da ki karkhana kan lah ban pynbiang ia kine baroh ar ki jingdonkam.

U Myntri u la pynpaw ka jingsngew sarong ban pyntip ba ka jingdon jong ki kad liengsuiñ kiba treikam ha kane ka thaiñ ka la kiew na ka khyndai tylli ha u snem 2014 sha ka 16 tylli mynta. Ka jingleit jingwan lyngba ki liengsuiñ ka la kiew haduh ar shah, katba ka jingwan ki passenjar hapoh ka ri ka la kiew palat lai shah naduh u snem 2014.

Haba pynshlur ïa ki jylla ban pyndonkam ïa ka lad jong ka thaiñ ha ka kam jngohkai pyrthei, u Myntri u la ong: “Phim pat ïohi ïa ka India tad haduh ba phin da ïohi ïa ka thaiñ Shatei Lammihngi jong ka Ri. Ka jingitynnad ka mariang, ka kolshor kaba iphuh iphieng, ka jingpdiang kylluid mynsiem bad ka jinglong ba khlain jong ka jinglong nong India kaba la shem hangne ​​ki long ki bym lah ban ianujor.” U la kyntu ia ki jylla ban pynleit jingmut ha kaba kyntiew ia ki jingdon jingem ba iadei bad ka kam jngohkai pyrthei bad ki jingshakri ha ka kam pdiang sngewbha ban iarap ia ka jingpyniasoh lyngba ki liengsuin.

Haba pynpaw ia ka jingkyrshan ha ki por ban wan na ka bynta ka jingwanrah ia ki jingdon jingem, u Myntri u la iasam ba Na ka bynta ka kynhun jong ki jylla ka thain shatei lammihngi, ngi la rai ban ai saw tylli ki jingwad bniah shwa ban lah ban pyntreikam ia ka jingkyntiew ia ka kad liengsuin ba thymmai man la u snem mang tyngka, khlem da siew pisa ban ai jingmut ne kiwei kiwei ki jingsiew. Kane kan pynshlur ia ki jylla ban pynkhreh bad tei ia ki kad liengsuin kiba thymmai bad ban shim kabu pura ia ka jingkiew stet.

U la pynthikna ïa ka jingkyrshan kaba iai bteng na ka Sorkar Pdeng bad u la ban jur ba ka kam liengsuiñ kam dei shuh ka kam ia kiba don ba em—hynrei ka long ka jingplie lad kaba kongsan ïa ka Viksit Bharat @2047. Haba pynpaw ïa ka jingkylla jong ka India sha ka iew liengsuiñ kaba lai kaba heh tam hapoh ka ri, u la kdew ia ki sienjam kum ka UDAN, ka jingpynheh ïa ki kad liengsuiñ, ka jingkiew jong ki nongpynher liengsuiñ ha ka thaiñ, ka jingpynleit jingmut halor ka jingtbit ha ka kam liengsuiñ bad ki sienjam ban ai jingmyntoi pynshlur ïa ka kam MRO kum ki nongrim ba kongsan jong ka jingkiew shaphrang.

Kum shi bynta ka Jingialang halor ki lad ki lynti na ka bynta ki jylla, ki heh na ka Tnad Civil Aviation bad ka AAI ki la pyni ia ki rukom bapher bapher ban kyntiew ia ki kad liengsuin bad ki lad ki lynti kum ka HEMS bad ka jingpyntbit ia ki samla sha ki jylla. La bud sa ka jingiakren mar khmat bad ki kynhun jong ki jylla. La pynlong ruh ia ki jingiakren hapdeng ki jylla bad kito kiba iadon bynta ha kane ka kam.

Ha ka jingïakren bad ka Tnad, u Lalduhoma, Myntri Rangbah ka Mizoram, u la pynpaw ba ka jingkiew bad jingpynbha ïa ka kam liengsuiñ ha ka thaiñ Shatei Lammihngi kam dei tang ka kam ban pynbha ïa ka leit ka wan lyngba ki liengsuiñ hynrei ka dei ka sienjam kaba kongsan ban plie ïa ka lad kaba khraw ba don ha ka thaiñ. Ka jingkyntiew ia ka jingpyniasoh liengsuin kan weng ia ki jingkhanglad ha kaba iadei bad ka jaka, kan pyniasoh ia ki jaka ba jngai bad ka ri India baroh kawei, bad kan kyntiew ia ka jingpyniasoh kaba khlain bad ki iew jong ka ri bad kylleng ka pyrthei.

U la ban jur ba ki jingdon jingem kiba kham bha ba iadei bad ki liengsuiñ—kum ki kad liengsuiñ kiba thymmai, ki kad helicopter, bad ka jingpyniasoh ha ka thaiñ lyngba ki liengsuiñ kiba rit bad ki helicopter—kin ai jingmyntoi beit beit ïa ka kam jngohkai pyrthei, ka khaii pateng, ka jingïoh ïa ka koit ka khiah, bad ki jingshakri ba kyrkieh. Ka jingpynbha ia ki jingshakri ba iadei bad ki liengsuin kan pynkupbor ruh ia ki nongshong shnong ka thain da kaba plie ki lad ki lynti kiba thymmai na ka bynta ka ioh kam ioh jam, ban kyntiew ia ka jingseng kam seng jam, bad ban khring ia ki riew shimet ban bei tyngka sha kane ka thain.

U Balo Raja, Myntri ka Tnat Land Management, Civil Aviation ha ka jingkren jong u halor ka jingsngew jong ki Jylla u la ban jur ba ka jingpynkhlain ïa ka jingpyniasoh ha ki thaiñ ka long kaba kongsan ban plie lad ha kaba iadei bad ka ioh ka kot jong ka thaiñ Shatei Lammihngi jong ka Ri. U Myntri u la pynpaw ba ka jingkyntiew ia ki kam liengsuiñ ha ka thaiñ shatei lammihngi kan don ka bynta kaba wanrah jingkylla ha kaba pynbiang ïa ki jingïasoh lyngba ki liengsuiñ kiba khlaiñ hapdeng ki sor kiba jngai bad ki nongbah kan pynduna ïa ka por leit jingleit, kan kyntiew ïa ka leit ka wan, bad kan pynïasoh ïa ka thaiñ kham jan bad ka ri baroh kawei. Ka jingpynbha ia ki lad kit mar da ka liengsuin kan plie ki lad ki lynti kiba thymmai ban shalan ia ki mar rep, ki tiar shna kti, bad kiwei kiwei ki mar ba don ha ka thain, da kaba kyntiew ia ka khaii pateng ha ka thain.

U Tshering Bhutia, Myntri ka Tnat Kam jngohkai pyrthei, Civil Aviation & Industries, Sorkar Sikkim u la ban jur ïa ka jingdonkam jong ki sienjam ba la pynïaid da ki polisi ki ban wanrah ïa ka jinglong jingman kaba kham biang na ka bynta ka jingbei tyngka, ka jingsuk ban leh ia ki kam khaii pateng, bad ka jingpynïar ïa ki kam liengsuiñ ha ka thaiñ shatei lammihngi. U la kyrshan ban pyntreikam pura ia ka kad liengsuin Pakyong da kaba pynsted ia ka jingpynbeit ia ki jingeh. U la pynskhem biang ïa ka jingkular jong ka Jylla ban ïatreilang bad ka Sorkar Pdeng ban tei ïa ka jinglong jingman kaba khlaiñ ha ka kam liengsuiñ ha Sikkim.

U Jogen Mohan, Myntri ka Tnad Hill, Development and Cooperation, Sorkar Assam, u la ai khublei ïa ka sienjam jong ka Tnad ban iakren bad ki Jylla bad ban shim ïa ki kum ki nongiatreilang ban kyntiew ïa ki jingpynkylla ha ki polisi bad ki rukom pyntreikam. U la batai bniah ia ki jingangnud jong ka Jylla Assam bad ka bynta kaba kongsan kaba ka kam pynher liengsuin ka lah ban leh ban pynurlong ia ki.

Ki la don ki jingiakren markhmat da ka Tnad sorkar pdeng bad ki Jylla bad UT kiba iashim bynta ha kaba ki kynhun jong ki Jylla ki la iakren markhmat bad u Myntri Sorkar Pdeng bad ki heh jong ka Tnad ban iakren ia ki jingeh ba kyrpang ha ka jingpyniasoh, ki jingtyrwa ban tei ia ki jingdon jingem, bad ki jingdonkam jingkyrshan. Ki jingïalang ba la pynlong ha kajuh ka por ki la pynsuk ïa ki jingïakren hapdeng ki Sorkar Jylla bad ki briew kiba don ka bynta kaba heh ha kane ka kam, da kaba pynleit jingmut ha ka jingpynsuk ïa ka jingbei tyngka bad ban ithuh ïa ki jingeh ha ka jingpyntreikam.

Ha kane ka sngi la iashim bynta da ki heh ophisar na Arunachal Pradesh, Assam, Manipur, Meghalaya, Mizoram, Nagaland, Tripura bad Sikkim. Kumjuh ruh ki heh ophisar na ka Tnad sorkar pdeng kynthup, u Faiz Ahmed Kidwai, DG DGCA, bad u Vipin Kumar, Chairman, Airports Authority of India ki la wan ban ïashim bynta ha kane ka Jingialang. Palat 70 ngut ki briew kiba don bynta ha ka kam, kynthup ïa ki nongpynïaid liengsuiñ bad ki helicopter, ki OEM, ki FTO, ki MRO, ki briew ba don bynta ha ka jingkit mar, bad ki kompeni drone, ki la ïashim bynta shitrhem—kaba pynpaw ïa ka jingdonkam jong ka jingïatreilang hapdeng ka sorkar bad ki riew shimet ha kaba kyntiew ïa ka kam liengsuiñ ha ka thaiñ. Ka FICCI ka la ai ia ka lad kaba kongsan ban pynlong ia kane ka Regional Conference.

Ka jingialang ka kynthup ia ki jingbatai na ka Tnad Civil Aviation shaphang ka jingpyniaid ia ki kad liengsuin, ka UDAN, ka jingtbit ha ka kam liengsuin, bad ka Helicopter Emergency Medical Services (HEMS) kiba ai ia ki jylla ki jingshemphang ha ki bynta bad ki lynti ban pyntreikam.

Da kaba pynkhlaiñ shuh shuh ïa ki sienjam ba shakhmat jong ka Tnad, la pynleit jingmut sha ka jingïalang kaba kongsan kaban sa wan — ka Wings India 2026, kaba la pynlong lang da ka Civil Aviation, Airports Authority of India bad ka Federation of Indian Chambers of Commerce & Industry (FICCI), ka Wings India 2026 kan sdang naduh ka 28 haduh 31 tarik Kyllalyngkot, 2026. Ka jingïalang kan long kum ka rynsan ba kongsan ban pyni ïa ka jingkiew shaphrang bad ki lad ki lynti ha ka kam liengsuiñ jong ka India, kaba pynïasoh lang ïa ki kynhun ba kongsan na kylleng ka pyrthei ban kyntiew ïa ki jingïatreilang, ka jingsaindur thymmai, bad ki jingïakren halor ki polisi.

Ha ka por mynstep, shwa ka jingïalang ba kongsan ha Ïingdorbar Thaw Aiñ jong ka Jylla Arunachal Pradesh, u Myntri Sorkar Pdeng ryngkat u Myntri Rangbah ka Jylla ki la leit jngoh ïa ka Terminal Building ba thymmai jong ka kad liengsuiñ Donyl Polo namar ba ka dang sdang treikam na ka bynta ka jingleit jingwan jong ki passenjar. La tei palat ia ka 4100 sq m, ka jinglah ban kit ia ki nongleit nongwan mynta ka la kiew sha ka 1 million ngut ki nongleit nongwan ha ka shisnem bad ka jinglah ban kit ia ki nongleit nongwan ha ki por ba bunkam tam sha ka 800. U la plie paidbah ia ka UDAN Yatri cafe bad ka jaka ri khunlung. U la plie ruh ia ka dukan AVSAR (Airport as Venue for Skilled Artisans of the Region) hapoh ka terminal building. Ka liengsuiñ Indigo kaba leit sha Delhi mynta ka sngi ka la kiew na ka jaka kiew liengsuin kaba thymmai.

****

(रिलीज़ आईडी: 2189387) आगंतुक पटल : 17