Agartala, 18 Jymmang, 2025: La buh maw nongrim na ka bynta ka Integrated Aquapark hapoh ka Pradhan Mantri Matsya Sampada Yojana (PMMSY), kaba shongdor T. 42.4 klur ha Kailashahar, Tripura da u Myntri Sorkar Pdeng Rajiv Ranjan Singh ba la tip ruh kum u Lalan Singh, Tnad Fisheries, Animal Husbandry and Dairying bad Panchayati Raj ha ka jingialang kaba la pynlong ha Agartala, Tripura mynta ka sngi. Nalor kata, ha kane ka jingïalang la don ka exhibition bad ka jingplie paidbah ia ka Fish Festival kaba pyni ïa ka kolshor kaba riewspah bad ki dohkha bapher bapher jong ka jylla. Ia kane ka jingialang la plie ruh da u George Kurian, Myntri khynnah, MoFAH&D bad ka Tnad Minority Affairs ha ryngkat u Sudhangshu Das, Myntri ka Tnad ri dohkha, Sorkar jylla Tripura bad u Tinku Roy, Myntri ka Tnad kam ialehkai, Sorkar Tripura.

Ha ka jingai jingkren jong u, u Myntri Sorkar Pdeng, Rajiv Ranjan Singh u la pynshai halor ka bynta ba kongsan, kaba kane ka kam don ban kyntiew ïa ka ïoh ka kot jong ka India, da kaba ong ba ka kam ri dohkha ka la pyni ïa ka jingkiew kaba 9.08% naduh u snem 2014-15, kaba heh tam napdeng ki kam rep bad ki kam ba iadei bad kane, ha India. Da kaba ithuh ia ka lad kaba khraw kaba ka Tripura ka don ha ka kam ri dohkha, u la ban jur ia ka jingdonkam ban pyndap ia ka jingduna hapdeng ka jingdawa bad ka jingpynbiang lyngba ka jingpyndonkam ia ki kor ki bor kiba katkum ka juk mynta, ka rukom rep kaba iasohlang bad ka jingsaindur thymmai. U Rajiv Ranjan u la pynpaw ba na ki 11 tylli ki Integrated Aqua Park ha ka ri, 4 tylli ki dei kiba dang plie ha ka thain shatei lammihngi, kynthup ia kawei ha Tripura. U Myntri Sorkar Pdeng u la kyntu ia ki nongshim bynta ban trei shitom ban pynkylla ia ka Tripura sha ka “jylla kaba bun dohkha” kaba lah ban shalan ia ki dohkha shabar ri, bad ban ialeh ban kot sha ka thong ban pynmih 2 lak ton, kaba palat ia ka jingdonkam jong ka jylla kaba long 1.5 lak ton. U la ong ba shen yn sa kyntiew ruh ia ka Tripura sha ka Organic Fish Cluster kum ka Sikkim. Haba ban jur ia ka jingdonkam ban pyndep ia ka Integrated Aquapark ha ka por ba la buh, u Myntri Sorkar Pdeng u la ban jur ia ka jingdonkam ban ai jinghikai ha ki jaka ri dohkha sha ki nongri dohkha. Haba pynshlur ïa ki nongtong dohkha ban pyndonkam ïa ki skhim jong ka sorkar kum ka Fisheries and Aquaculture Infrastucture Development Fund (FIDF) bad ka PMMSY, u la pynpaw biang ïa ka jingkular jong ka sorkar pdeng ban kyrshan ïa ka jingai jinghikai bad ka jingkyntiew ïa ka sap treikam lyngba ka NFDB. U Rajiv Ranjan Singh u la kren ruh ia ki mat kum ka jingdonkam ban kyntiew ia ka jingpynmih scampi, ban kyntiew ia ka kam ri ia ki dohkha ba bun jait, kyntiew ia ki jingdon jingem, pynthikna ia ka jingsuk ban ioh ia ki iew ki hat bad kyntiew ia ka jingsaindur thymmai bad jingiaineh ha kane ka kam. Ha kane ka sngi u Myntri Sorkar Pdeng u la sam ia ki syrnot bad ki sanction order sha ki nongioh myntoi bapher bapher.

U George Kurian, Myntri Khynnah ka Tnad Fisheries, Animal Husbandry & Dairying bad ka Tnad Minority Affairs, u la ban jur ïa ka jingdonkam ban kyntiew ïa ka jingpynmih dohkha ha Tripura, da kaba ong ba jan 98% na ki nongshong shnong jong ka jylla ki bam dohkha. U la kubur ia ka bynta kaba kongsan kaba ka kam ri dohkha ka don ha ka jingpynbiang bam bad ka ioh ka kot jong ka jylla.

U Sudhangshu Das, Myntri ka Tnad Fisheries, ARDD bad SC Welfare, Sorkar Tripura, u la ban jur ïa ka jingkut jingmut jong ka jylla ban kyntiew ïa ki nongtong dohkha bad ki nongri dohkha lyngba ki jingïarap ba la thmu. U Myntri u la ïasam ruh ba hapoh ka Matsya Sahayata Yojana, ki nongtong dohkha bad ki nongri dohkha ba la ithuh ki ïoh ïa ka jingïarap pisa kaba T. 6,000 man la u snem ban kyrshan ïa ka kamai kajih jong ki. Haba pynshlur ïa ki samla ban shim ïa ka kam ri dohkha kum ka lad kamai jakpoh, u la ong ba ka Tripura ka don ïa ka lad kaba khraw kaba ym pat lah ban pyndonkam ha kane ka kam. Katba u Tinku Roy, Myntri ka Tnad Kam ialehkai, Sorkar Tripura u la pynshlur shuh shuh ia ka jingiai iatreilang bad ka sienjam jong baroh ban kyntiew ia ka kam ri dohkha bad ban kyntiew ia ka kamai kajih jong ki nongri dohkha ha Tripura.

U Dr Abhilaksh Likhi, Union Secretary, MoFAH&D, u la kren shaphang ki skhim bad ki sienjam ba kongsan jong ka Tnad, kynthup ïa ka PMMSY, FIDF, bad ka Pradhan Mantri Matsya Kisan Samridhi Sah-Yojana (PMMKSSY), ha kaba ka jingpynlut pisa lang ka long kumba T. 38,000 klur tyngka. La kdew ba ki projek kiba shongdor T. 2,114 klur la mynjur na ka bynta ka thain shatei lammihngi, kynthup T. 319 klur kyrpang ia ka Tripura. U Likhi u la kyntu ïa ki nongtong dohkha bad ki nongri dohkha ban pdiang ïa ki teknoloji ba thymmai kum ki Recirculatory Aquaculture Systems (RAS), ka Biofloc, bad ki jingpyndonkam da ki drone, katba ki dang pyndonkam pura ha ka jingwad bniah bad jingpynroi. Da kaba ban jur ia ka jingdonkam jong ka jingshngain ha ka kamai kajih, u la pynpaw ruh ia ki jingmyntoi jong ka jingai insurance na ka bynta ki nongri dohkha. Nalor kata, la buh jingmut kyrpang ia ka jingpynbun ia ki jait dohkha, khamtam eh ia ka jingpynroi ia ki jait dohkha kiba heh dor kum Pabda bad Singhi.

Ha kane ka sngi la don lang ruh u Sagar Mehra Joint Secretary, Tnad Fisheries, MoFAH&D, Dr Bijay Kumar Behera,  Chief Executive, NFDB ryngkat kiwei pat ki ophisar na ka tnad fisheries jong ka sorkar pdeng bad sorkar jylla.

Ka jinglong jingman ka kam ri dohkha mynta ha Tripura

Ka Tripura, kaba bun ka jingbam dohkha kaba palat 29 kilo na ka bynta uwei u briew ha ka shisnem, ka la kiew bha ha kine ki snem ba la dep. Hapoh ka PMMSY, ka jylla ka la ioh ia ka jingbei tyngka kaba T. 178 klur. Ha kine ki san snem ba la dep, ka Tripura ka la pyntreikam 69 tylli ki projek ba la mynjur bad ka dor kyllum lang ka long T. 258.61 klur ha kane ka kam. Tang ka Integrated Aqua Park ha Kailashahar ka jingpynlut pisa kalong T. 42.4 klur bad la khmih lynti ba kan long u budlum na ka bynta ka jingpynmih dohkha katkum ka juk mynta bad ka jingdon jingem na ka bynta ka jingpyniaid iew,  kaba ai jingmyntoi ia ki briew kiba don bynta ha kane ka kam ri dohkha. La khmih lynti ba kan pynmih ki lad ioh kam na ka bynta kumba 100 ngut ki briew bad ka jingioh kam na ka bynta palat 500 ngut ki briew ha ka jylla .

La ai khusnam ia ki nongïoh jingmyntoi ha kane ka jingialang

La sam ia ki syrnot bad ki sanction order sha ki nongioh jingmyntoi bapher bapher ha ka kam ri dohkha ha ka jingialang kaba mynta ka sngi da u Myntri Sorkar Pdeng. Ka thup jong ki nongïoh jingmyntoi ba la pynkup burom ki kynthup ïa kine, ïa ki Kisan Credit Card la ai sha u Debasish Sarkar na Mohanpur RD Block, West Tripura; u Bhajan Sarkar na Bamutia RD Block, West Tripura; ka Paramita Biswas Bhowmik na Satchand RD Block, South Tripura; u Sudharshan Chakraborty na Dukli RD Block, West Tripura; bad u Nirmal Das na Dukli RD Block, West Tripura. Nalor kata, la pynkup burom ia ki start- up ha ka kam ri dohkha kiba treikam bha kynthup ïa ka M/s Barkuchuk Fermented Fish Enterprise, Khowai, bad ka M/s Jal Raja Fish Feed Factory, Dukli Industrial Area, West Tripura na ka bynta ki jingnoh synñiang jong ki. Napdeng ki Fisheries Farmer Producer Organizations (FFPO), la ithuh ïa ka Bordosh FFPO na Rajnagar, Belonia, South Tripura, bad ka Dhalai Fish Farmer Co-operative Society Ltd., Ambassa, Dhalai Tripura na ka bynta ka jingtreikam bha jong ki ha kane ka kam.  Shuh shuh, la pynkup burom ruh ïa ki seng treilang ha ka kam ri dohkha kiba la leh bha—ka Melaghar Matshyajibi Samabay Samabay Samiti Ltd., Sepahijala Tripura, bad ka Jatiya Matshyajibi Samabay Samabay Samiti Ltd., Kusamara, Kakraban, Gomati – na ka bbynta ki sienjam ban pynkhlain ia ka kam ri dohkha ha ka jylla.  Ïa ki nongïoh jingmyntoi hapoh ka PMMSY ba kynthup ïa u Tapan Barman, Sepahijala , Tripura, u Paritosh Debbarma, Jirania RD Block West Tripura, u Biswajit Das, Jirania RD Block, West Tripura, ka Anjali Rani Das, Sepahijala, Tripura la pynkup burom da ka Finfish hatchery,  ka kali 3-shaka kaba don bad ka synduk buh thah bad ki jaka die dohkha.

****