بیماریوں سے بچاؤ کے لیے متوازن اور مقوی غذا ضروری ہے۔ مرکزی اور ریاستی حکومت کی اسکیموں سے استفادہ کر کے ہم اپنے خاندان اور معاشرے کی صحت کو یقینی بنا سکتے ہیں۔ وزیراعظم نریندر مودی کی سالگرہ کو غذائیت کے ماہ کے طور پر منانا اس بات کی عکاسی کرتا ہے کہ ملک غذائیت کے مسئلے کو کتنی سنجیدگی سے لے رہا ہے۔

ان خیالات کا اظہار بستر کے رکن پارلیمنٹ مہیش کشیپ نے کیا۔ وہ آج بستر ضلع کے توکاپال بلاک کے پوٹامارگاؤں میں “صحت مند خواتین – صحت مند خاندان” کے موضوع پر قومی غذائیت ماہ 2025 کے تحت منعقد خصوصی عوامی بیداری پروگرام سے خطاب کر رہے تھے۔

یہ پروگرام جگدلپور کے سینٹرل بیورو آف کمیونیکیشن کے علاقائی دفتر کی جانب سے منعقد کیا گیا اور اس میں دیہی باشندگان، خواتین اور عوامی نمائندگان کی بڑی تعداد نے شرکت کی۔ پروگرام کا آغاز رکن پارلیمنٹ مہیش کشیپ، چترکوٹ کے رکن اسمبلی وِنایک گوئل، ضلع پنچایت کے نائب صدر بلدیو مندواری، جنپد پنچایت کی صدر رامبتی بھنڈاری، ضلع پنچایت کی رکن پدمینی کشیپ، محکمہ خواتین و بچوں کی ترقی کی چیئرپرسن شانتی ناگ، اور دیگر معززین کی موجودگی میں ہوا۔ پروجیکٹ آفیسر جیوتی ماتھرانی، یونانی طبیب ڈاکٹر بی پرکاش مورتی، سپروائزر ممتا کرّے، گاؤں کے سرپنچ سنتوش موریا اور ڈپٹی سرپنچ بھی اسٹیج پر موجود تھے۔

چترکوٹ کے رکن اسمبلی وِنایک گوئل نے اپنے خطاب میں کہا، “صحت مند عورت ہی صحت مند خاندان کی بنیاد ہے۔ جب خواتین غذائیت کی اہمیت کو سمجھیں اور اپنا لیں، تو خاندان بھی مضبوط ہوتے ہیں اور معاشرہ بھی ترقی کرتا ہے۔”

خواتین کی فعال شرکت

خواتین کی جوش و خروش سے شمولیت کو یقینی بنانے کے لیے جگدلپور کے سینٹرل بیورو آف کمیونیکیشن نے تین زمروں میں کرسی دوڑ کا مقابلہ منعقد کیا۔ خواتین نے بھرپور جوش و خروش کے ساتھ حصہ لیا، اور فاتحین کو مہمان خصوصی، رکن پارلیمنٹ مہیش کشیپ، کی جانب سے انعامات دیے گئے۔ مہیش کشیپ نے خواتین کی حوصلہ افزائی کرتے ہوئے انہیں صاف ستھرا اور صحت مند طرز زندگی اپنانے کی ترغیب بھی دی۔

صحت سے متعلق بیداری سیشن کے دوران یونانی طبیب ڈاکٹر بی پرکاش مورتی نے متوازن غذا کی اہمیت پر روشنی ڈالی اور زور دیا کہ موسمی پھل، سبز سبزیاں، دالیں اور دودھ بیماریوں کے خلاف پہلی حفاظتی دیوار کے طور پر کام کرتے ہیں۔ پروجیکٹ آفیسر جیوتی ماتھرانی نے خواتین و بچوں کی ترقی کے محکمے کی خدمات اور سکیموں کے بارے میں تفصیلی معلومات فراہم کیں، جبکہ سپروائزر ممتا کرّے نے دیہی خواتین کو بچوں اور حاملہ خواتین کے غذائی توازن کو برقرار رکھنے کے حوالے سے مشورے دیے۔

مباحثہ اور کوئز سیشن

دیہی باشندگان کی زیادہ شمولیت کے لیے بی ایس  دھروو نے غذائیت، صحت اور سرکاری سکیموں سے متعلق سوالات پر مشتمل کوئز سیشن منعقد کیا۔ صحیح جوابات دینے والے شرکاء کو محکمہ کی جانب سے انعامات دیے گئے، جس سے آگاہی کے ساتھ ساتھ جوش و خروش بھی پیدا ہوا۔

اس موقع پر خواتین و بچوں کی ترقی کے محکمہ نے گود بھرائی ، انناپراشن (چھوٹے بچوں کی غذا کی شروعات کی تقریب) اور غذائیت کے اسٹال بھی منعقد کیے۔ دیہی خواتین بڑی تعداد میں آئیں اور غذائیت کے بارے میں اہم معلومات حاصل کیں۔ بچوں کے غذائی پروگراموں اور مواد کی نمائش بھی کی گئی، جس سے شرکاء کو عملی معلومات حاصل ہوئی۔

دیہی خواتین کی پرجوش شرکت نے اس بیداری مہم کی کامیابی کو واضح کیا۔ اس پروگرام نے اس بات پر زور دیا کہ غذائیت سے متعلق بیداری صرف ایک مہینے تک محدود نہیں بلکہ معاشرے میں صحت و غذائیت کے شعور کا ایک مسلسل سلسلہ ہے۔ پارلیمانی رکن اور دیگر نمائندگان کے پیغامات سے یہ واضح ہوا کہ غذائیت صرف فرد کی ذمہ داری نہیں بلکہ اجتماعی ذمہ داری ہے — ایک ایسی ذمہ داری جو “صحت مند خواتین، صحت مند خاندان، صحت مند معاشرہ” کے نظریہ کو حقیقت میں بدل سکتی ہے۔

۔۔۔۔۔۔۔۔۔۔

ش ح۔ع و۔ن م۔

U-883   

(रिलीज़ आईडी: 2187192) आगंतुक पटल : 19