نائب صدر جمہوریہ ہند جناب سی پی رادھا کرشنن نے آج نوا رائے پور میں منعقدہ چھتیس گڑھ رجت مہوتسو کی اختتامی تقریب میں مہمان خصوصی کے طور پر شرکت کی۔  اس تقریب میں، ریاست چھتیس گڑھ کے قیام کے 25 سال پورے ہونے پر، اس کی ترقی، نشوونما اور ثقافتی تمول کے متاثر کن سفر کا جشن منایا گیا۔

اجتماع سے خطاب کرتے ہوئے نائب صدر جمہوریہ نے اس تاریخی سلور جوبلی تقریب کے دوران، چھتیس گڑھ کے عوام کے ساتھ شامل ہونے پر بے پناہ خوشی کا اظہار کیا، جس کا افتتاح وزیر اعظم جناب نریندر مودی نے کیا تھا۔  پانچ روزہ تہوار کے دوران، لوگوں نے چھتیس گڑھ کی بھرپور ثقافت اور اس کی متاثر کن سماجی و اقتصادی تبدیلی کی جھلکیاں دیکھیں۔

نائب صدرِ جمہوریہ نے فخر کے ساتھ آنجہانی جناب اٹل بہاری واجپائی کی دور اندیش قیادت کو یاد کیا، جنہوں نے یکم نومبر 2000 کو ریاست کے قیام میں بنیادی کردار ادا کیا۔ انہوں نے بطور سابق رکنِ پارلیمنٹ (لوک سبھا) اپنے اُس ذاتی تعلق کا بھی ذکر کیا، جب انہوں نے ریاست کی تنظیم نو بل کی حمایت کی تھی۔ انہوں نے چھتیس گڑھ کے غیر معمولی پچیس سالہ سفر کو سراہا — جو بھارت کی نئی ترین ریاستوں میں سے ایک ہونے سے لے کر سماجی، معاشی، ثقافتی اور انتظامی میدانوں میں ترقی کی ایک غیر معمولی مثال بننے تک کا سفر ہے۔

جناب سی پی رادھا کرشنن نے نکسل ازم کی لعنت کو ختم کرنے میں ریاست کی کامیابی کی تعریف کی، وزیر اعظم جناب نریندر مودی اور مرکزی وزیر داخلہ جناب امت شاہ کی پرعزم قیادت کے ساتھ ساتھ ریاستی حکومت، سیکورٹی فورسز اور مقامی برادریوں کی پرعزم کوششوں کو سراہا۔  انہوں نے کہا کہ چھتیس گڑھ میں خوف اور تشدد کی جگہ ترقی اور اعتماد نے لے لی ہے۔

نائب صدر جمہوریہ نے چھتیس گڑھ کی کامیابی کی بنیاد بنانے والے لوگوں-کسانوں ، قبائلی برادریوں ، کاروباریوں ، اساتذہ اور نوجوانوں کی تعریف کی۔  انہوں نے خاص طور پر ریاست کے مثالی عوامی نظام تقسیم کی تعریف کی ، جو 72 لاکھ سے زیادہ مستفیدین کو مفت اناج فراہم کرتا ہے  اور عوامی نظام تقسیم کو مضبوط بنانے کے لیے سابق وزیر اعلی ڈاکٹر رمن سنگھ کو مبارکباد دی۔

جناب سی پی رادھا کرشنن نے ریاست کے قدرتی اور ثقافتی ورثے کے تحفظ کے لیے قبائلی برادریوں کا احترام کیا ۔  انہوں نے قبائلی برادریوں کو ان کی دانش مندی ، ثقافت اور پائیدار طرز زندگی کے لیے سراہا، جو آج کے ماحولیاتی اور سماجی تناظر میں گہری مطابقت رکھتے ہیں۔

نائب صدر جمہوریہ نے ریاست میں قابل ذکر بنیادی ڈھانچے کی ترقی پر بھی روشنی ڈالی، جس میں وسیع سڑک ، ریل ، ایکسپریس وے اور ہوائی اڈے کا رابطہ شامل ہے، جس نے دور دراز کے اضلاع کو قومی منڈیوں سے جوڑا ہے۔  انہوں نے نوا رائے پور کی ہندوستان کے پہلے گرین فیلڈ شہر کے طور پر تعریف کی، جو آئی ٹی ہب، فارما ہب ، اے آئی ڈیٹا سینٹر پارک  اور جدید صحت کی دیکھ بھال کے لیے عالمی معیار کی میڈی سٹی جیسے نئے دور کے اقدامات کے ذریعے عالمی صلاحیت کا مرکز بننے کے لیے تیار ہے۔

انہوں نے اس بات پر زور دیا کہ چھتیس گڑھ نے ابھرتی ہوئی ٹیکنالوجیز کو اپنایا ہے، جن میں سیمی کنڈکٹر مینوفیکچرنگ اور ڈیجیٹل حکمرانی میں اصلاحات شامل ہیں، جو ’’انجور وژن @2047‘‘ کے تحت اقتصادی ترقی، انسانی فروغ اور پائیدار حکمرانی کو قومی وژن ’’وِکست بھارت‘‘ کے مطابق آگے بڑھانے کے لیے تشکیل دیا گیا ہے۔

چھتیس گڑھ کی ثقافتی جوش و خروش کا جشن مناتے ہوئے ، نائب صدر نے خطے کے روایتی رقص جیسے پنتھی اور کرما ، اور اس کے بھرپور قبائلی فنون اور دستکاری کی تعریف کی۔  انہوں نے کہا کہ چھتیس گڑھ تنوع میں اتحاد کے ہندوستانی جذبے کی مثال ہے، جہاں ثقافتی تحفظ اور جدید کاری ساتھ ساتھ چلتے ہیں۔

حقیقی ترقی کے معنی پر زور دیتے ہوئے ، جناب سی پی رادھا کرشنن نے کہا کہ ’’ترقی کی پیمائش صرف جی ڈی پی سے نہیں کی جاتی ہے، بلکہ لوگوں کے چہروں پر مسکراہٹ، حکمرانی پر ان کے اعتماد اور ہر بچے کی آنکھوں میں چمکتی امید سے بھی کی جاتی ہے‘‘۔

اپنے خطاب کا اختتام کرتے ہوئے، نائب صدر جمہوریہ نے چھتیس گڑھ کے نوجوانوں پر زور دیا کہ وہ مصنوعی ذہانت، گرین ٹیکنالوجیز اور عالمی منڈیوں میں ابھرتے ہوئے مواقع سے فائدہ اٹھائیں اور ہمت، تخلیقی صلاحیتوں اور ہمدردی کے ساتھ قوم کی تعمیر میں حصہ ڈالیں۔

انہوں نے کہا کہ رجت مہوتسو کو محض ماضی کے جشن کے طور پر نہیں ، بلکہ مستقبل کے عہد کے طور پر دیکھا جانا چاہیے-ایک ترقی یافتہ چھتیس گڑھ کے ذریعے ایک ترقی یافتہ ہندوستان کی تعمیر ، جمہوریت کو مستحکم کرنے ، ثقافت کا احترام کرنے اور آنے والی نسلوں کے لیے ایک روشن کل چھوڑنے کے عہد کے طور پر۔

چھتیس گڑھ کے گورنر جناب رامن ڈیکا ؛ وزیر اعلی جناب وشنو دیو سائی ؛ چھتیس گڑھ قانون ساز اسمبلی کے اسپیکر ڈاکٹر رمن سنگھ؛ اور دیگر معززین چھتیس گڑھ رجت مہوتسو کی اختتامی تقریب میں موجود تھے۔

******

ش ح۔ ف ا۔ م ر

U-NO. 824