حکومت ہند کی کامرس اور صنعت کی وزارت کے تحت زرعی اور پروسیسڈ فوڈ پروڈکٹس ایکسپورٹ ڈیولپمنٹ اتھارٹی (اے پی ای ڈی اے) نے چھتیس گڑھ سے کوسٹا ریکا کو 12 میٹرک ٹن فورٹیفائیڈ رائس دانے (ایف آر کے) کی پہلی برآمدی کھیپ کی سہولت فراہم کی ہے۔

یہ پہل عزت مآب وزیر اعظم جناب نریندر مودی کے دور اندیشی پر مبنی پروگرام ’’کپوشن مکت بھارت‘‘ (تغذیہ کی کمی سے پاک ہندوستان) کے ساتھ مطابقت رکھتی ہے، جسے پوشن ابھیان کے تحت نافذ کیا جا رہا ہے، جس کے ذریعے فوڈ کارپوریشن آف انڈیا (ایف سی آئی) پورے ملک میں غذائیت بخش چاول تقسیم کر رہی ہے۔ فورٹیفائیڈ رائس کیرنل کی برآمد ہندوستان کے گھریلو غذائیت کے مشن کو عالمی رسائی کے ساتھ مربوط کرنے کی سمت میں ایک اہم قدم ہے۔

ریاست چھتیس گڑھ نے چاول اور غذائیت بخش چاول کی مصنوعات کی برآمد کو فروغ دینے کے لیے مسلسل کوششیں کی ہیں، جس سے ریاست کے کسانوں، مل مالکان اور برآمد کنندگان کو بین الاقوامی منڈیوں میں پہچان حاصل کرنے میں مدد ملی ہے۔ کوسٹا ریکا کو ایف آر کے کی کامیاب برآمد غذائیت سے بھرپور غذائی مصنوعات کے لیے عالمی سپلائی چین میں چھتیس گڑھ کے بڑھتے ہوئے کردار کو اجاگر کرتی ہے ۔

اس موقع پر اے پی ای ڈی اے کے چیئرمین جناب ابھیشیک دیو نے اس سنگ میل کو حاصل کرنے میں شامل برآمد کنندگان اور اسٹیک ہولڈرز کو مبارکباد دی۔ انہوں نے کہا کہ ہندوستان سے غذائیت بخش چاول کی برآمد نہ صرف ملک کے زرعی برآمدات کے پورٹ فولیو کو مضبوط کرتی ہے بلکہ سائنس پر مبنی اور عالمی سطح پر تسلیم شدہ غذائی حل کے ذریعے تغذیے کی کمی سے نمٹنے کے لیے اس کے عزم کی بھی تصدیق کرتی ہے۔ انہوں نے فورٹیفائیڈ اور ویلیو ایڈڈ فوڈ پروڈکٹس کے لیے منڈیوں کی توسیع میں برآمد کنندگان کو اے پی ای ڈی اے کی مسلسل حمایت کی یقین دہانی کرائی۔

رائس ایکسپورٹرز ایسوسی ایشن آف چھتیس گڑھ (ٹی آر ای اے-سی جی) کے صدر جناب مکیش جین نے کھیپ کو آسان بنانے میں اے پی ای ڈی اے کی طرف سے فراہم کردہ تعاون کو سراہا اور کہا کہ آنے والے دنوں میں ایف آر کے کی برآمدات کو نئے مقامات تک پہنچانے کا منصوبہ بنایا جا رہا ہے۔ انہوں نے چھتیس گڑھ سے زرعی برآمدات کو بڑھانے میں اے پی ای ڈی اے کے مسلسل تعاون کی بھی درخواست کی۔

فورٹیفائیڈ رائس کیرنل (ایف آر کے) چاول کے آٹے کو آئرن، فولک ایسڈ اور وٹمن بی 12 جیسے مائکرو نیوٹریئنٹس کے ساتھ ملا کر تیار کیا جاتا ہے۔ ان غذائی اجزاء کو باہر نکالا جاتا ہے اور چاول کے دانے سے مشابہ بنانے کے لیے شکل دی جاتی ہے، جسے پھر پہلے سے طے شدہ تناسب پر باقاعدہ چاول کے ساتھ ملایا جاتا ہے تاکہ اہم غذا کی غذائیت کی قدر کو بڑھایا جا سکے۔ ایف آر کے کی برآمد خوراک کو تغذیہ بخش بنانے میں ہندوستان کی تکنیکی صلاحیت اور عالمی غذائی تحفظ اور غذائیت میں بہتری کے لیے اس کے عزم کی نشاندہی کرتی ہے۔

چھتیس گڑھ سے فورٹیفائیڈ رائس کیرنل کی اس پہلی کھیپ کا کامیاب آغاز ہندوستان کے زرعی برآمدی شعبے کے لیے ایک اہم سنگ میل کی نمائندگی کرتا ہے۔ یہ عالمی منڈیوں میں غذائیت سے بھرپور اور اعلیٰ معیار کی غذائی مصنوعات کے قابل اعتماد سپلائر کے طور پر ہندوستان کی پوزیشن مضبوط کرنے میں اے پی ای ڈی اے، حکومت چھتیس گڑھ اور نجی شعبے کی باہمی کوششوں کی عکاسی کرتا ہے۔

*****

ش ح۔ ک ح ۔ت ع

U. No-732

(Release ID: 2186140) Visitor Counter : 15